Tomadiho Laulaudia Hahelagaia Karana Hepapahuahu Badana Ta

GABU TA Poland dekenai, tau ta ia hegaegae gabu ta dekenai ia lao gwauraia. To, ia do lao lasi neganai mai anina bada gauna ta do ia karaia. Ia be Iesu ena laulau gauna vairanai ia tui diho, harihari gauna ia henia, bona ia guriguri henia ena loaloa dekenai ia naria totona.

Maila tausen momo unai gabu amo, Bangkok, Thailand dekenai, Buddha idia tomadiho henia taudia edia aria oi itaia diba. May lalonai, hua ia kuborokuboro neganai, lagani ta ta iboudiai lalonai idia karaia ariadia amo aria ginigunana idia karaia. Unai aria idia karaia neganai, taunimanima ese idia koroa Buddha laulauna be dala dekenai idia huaia loaloa.

Reana oi diba, unai sivarai hegeregeredia, gabu momo dekenai taunimanima ese tomadiho laulau gaudia idia hahelagaia. Taunimanima bilion momo be laulau gaudia vairanai idia tomadiho. Lagani tausen momo lalodiai, taunimanima idia laloa tomadiho laulaudia be dala badana ta Dirava kahirakahira dekenai idia mai totona.

Oi laloa tomadiho lalonai laulau gaudia gaukaralaia karana be ia namo, a? Laulau gaudia hahelagadia karana be ia maoro eiava ia kerere? Dirava ena lalohadai unai kara dekenai be dahaka? Hamomokania herevana ta ese ia hahedinaraia unai bamona tomadiho karana ia abia dae, a? Reana, guna, oi ese unai bamona henanadai oi laloa momo lasi. To, bema oi laloa oi bona Dirava umui turana heheni be gau badana, namona be unai henanadai edia haere oi diba.

Momokani, taunimanima momo idia hekwarahi unai hereva dainai. Oibe, lagani tausen momo lalodiai taunimanima ese unai hereva idia hepapahuahulaia bona nega haida idia heailaia danu. Hegeregere, lagani 1513 B.C.E. ai, Heberu taudia ia hakaudia tauna Mose ese taunimanima idia karaia golo boromakauna ia hadikaia ore bona idia tomadiho henia taudia 3,000 bamona be kaia amo idia hamasedia.​—⁠Esodo, karoa 32.

To Iuda taudia mo sibodia lasi be tomadiho laulaudia gaukaralaia karana idia inai henia. Idau negai, sivarai torea taudia ese tau ta ladana Takhmūrūp ena gori herevana idia gwauraia, ia be pavapava ta Parasa dekenai, bona idia gwau lagani handred momo Mose ia do vara lasi neganai, gaukara bada herea ia karaia tomadiho laulaudia hahelagaia karana ia koua totona. China lalonai, gori sivaraina ta ia gwau, idau negai ia noho pavapavana ta ese tuari amo dirava idauidau tomadiho laulaudia ia haoredia. Unai laulau gaudia idia haoredia murinai, ia gwau raro amo idia karaia laulau gaudia idia hahelagaia be kavakava karana. Gabeai, Muhammad be do mero maragi neganai, Arab taudia ese tomadiho laulaudia gaukaralaia karana idia inai henia. Idia edia kara dainai, murina laganidia dekenai Muhammad danu be kaivakuku tomadiho henia karana ia ura henia lasi. Koran buka dekenai, Muhammad ese taunimanima ia hadibaia kaivakuku tomadiho henia karana be kara dikana bona ena gwauatao dalana be lasi, ia gwau kaivakuku tomadiho henia taudia totona do idia guriguri lasi, bona ia gwau kaivakuku idia tomadiho henia taudia adavaia be mai taravatuna.

Kerisendom lalonai danu, lagani 100 C.E. amo ia lao 400 C.E. murinai, tomadiho gunalaia taudia, hegeregere Irenaeus, Origen, Kaisarea tauna Eusebius, Epiphanius, bona Augustine, ese tomadiho laulaudia gaukaralaia karana idia inai henia. Lagani 300 C.E. bamona, Elvira, Spain dekenai, bisop edia orea taudia haida ese tomadiho laulaudia hahelagaia karana idia gwauraia dika totona, mai anina bada gwaubou herevadia idia karaia. Unai Elvira Kaunsolo hebouna dekenai idia gwauraia herevadia dainai, dubu dekenai tomadiho laulaudia gaukaralaia karana idia taravatulaia bona idia gwau bema edia dubu taudia be unai laulau gaudia idia tomadiho henia, sisiba mai davana aukana do idia henidia.

Tomadiho Laulaudia Makohia Taudia

Unai taravatu idia karaia dainai, hepapahuahua badana ta ia vara: lagani 700 C.E amo ia lao 800 C.E. murinai, tomadiho laulaudia makohia karana idia hepapahuahulaia bada. Idau negai sivaraina ia torea tauna ta ia gwau unai “hepapahuahu dikana idia karaia ena daudau be lagani 150 bamona, bona unai lagani lalodiai taunimanima ese idia davaria hisihisina be bada herea momokani,” bona unai be “East bona West edia basileia idia parara ena badina ta.”

Idia hegaegae Europe ibounai dekenai tomadiho laulaudia do idia kokidia bona do idia hadikadia ore totona. Tomadiho laulaudia hahelagaia karana haorea totona idia ese taravatu haida idia karaia. Tomadiho laulaudia hahelagaia karana be politikol hepapahuahu badana ta ai ia lao, bona pavapava, pope, jeneral bona bisop taudia be unai hepapahuahu dekenai idia vareai. Tomadiho dalanai idia tuari bamona.

Bona hereva mo sibona amo idia hepapahuahu lasi. McClintock bona Strong idia torea bukana, Cyclopedia of Biblical, Theological, and Ecclesiastical Literature lalonai, ia gwau Emperor Leo Ihatoina ese hereva ta ia halasia, unai hereva ese dubu lalonai tomadiho laulaudia gaukaralaia karana ia taravatulaia, to taunimanima “hutuma be unai taravatu dainai idia badu, hepapahuahu mai dagedage danu idia vara, bona Constantinople hanua dekenai unai dagedage karana be bada herea momokani” dina ta ta iboudiai lalonai. Gavamani ena ami taudia idia heatu henidia dainai kota ese taunimanima haida idia hamasea bona ma taunimanima momo herea idia hamasedia kava. Fada taudia idia dagedage henidia bada. Unai nega ena lagani handred momo murinai, lagani 1500 C.E. murinai, Zurich, Switzerland dekenai, taunimanima ese dubu dekenai tomadiho laulaudia gaukaralaia karana idia hepapahuahulaia. Unai dainai, taravatu idia karaia idia gwau dubu dekena amo tomadiho laulaudia iboudiai do idia kokidia. Unai gaukara idia goadalaia taudia haida be mai dagedage danu tomadiho laulaudia gaukaralaia karana idia inai henia bada.

Hari inai nega lalonai danu, dubu idauidau taudia ese tomadiho laulaudia gaukaralaia karana idia hepapahuahulaia. Sivarai gabena ese oi do ia durua bena do oi diba tomadiho laulaudia ese taunimanima idia durudia diba Dirava idia kahirakahira henia totona, eiava lasi.