Tomadiho Laulau ese Oi Dirava ai Idia Veria, A?

HARI INAI NEGAI, Aigupito, Babulono, bona Greek taudia edia tomadiho laulaudia momo herea be miusiam dekenai idia noho. Idau negai taunimanima ese idia hahelagaia tomadiho laulaudia idia atodia hedinarai taunimanima ese idia raraidia totona. Edia siahu be lasi, idia tomadiho henidia taudia edia lalohadai dekenai sibona idia be mai edia siahu. Ena be tomadiho laulaudia idia hahelagadia bona idia gwauraidia idia be mai edia siahu, to unai bamona idia karaia taudia idia mase ore neganai, unai tomadiho laulaudia edia siahu ia ore danu. Unai negai ia hedinarai goevagoeva tomadiho laulaudia be gau ta idia karaia diba lasi​—nega ibounai unai be momokani—​idia be mauri lasi au, nadi, eiava auri amo idia karaia gaudia.

Hari inai nega lalonai taunimanima ese idia hahelagaia bona idia tomadiho henia laulau gaudia be edena bamona? Unai tomadiho laulaudia edia siahu be idau negai Aigupito, Babulono, bona Greek taudia edia tomadiho laulaudia edia siahu ia hanaia, a? Idia ese taunimanima idia durudia momokani bena Dirava kahirakahira dekenai idia mai diba, a?

Taunimanima edia uru ta ta iboudiai idia vara bona idia ore negadia lalonai, toana be Dirava dekena amo idia siri momokani. Bona tanobada lalonai idia noho tomadiho laulaudia iboudiai ese dahaka idia karaia diba? Bema taunimanima ese unai tomadiho laulaudia idia naridia lasi, kahu ese do ia koudia bona gabeai idia dika idia lao. Idia be sibodia idia naria diba lasi, unai dainai taunimanima idia durudia diba lasi. To, mai anina bada gauna be inai, unai kara dekenai Bible ena hereva be dahaka?

Davana Bada, Mai Hairaina, to Anina Lasi

Hoa lasi gauna be inai, Bible ese tomadiho laulaudia ia gwauraia anina lasi gaudia bona ia gwau idia be dala lasi tomadiho taudia idia durudia Dirava kahirakahira dekenai idia mai totona. Ena be tomadiho laulaudia be davana bada gaudia bona mai edia hairai, to Bible ese edia davana korikori ia hahedinaraia: “Edia kaivakuku be siliva bona golo, tanobada taudia edia imana amo idia karaia gaudia. Mai edia uduna, to idia hereva diba lasi; mai edia matana to idia itaia diba lasi; mai edia taiana, to idia kamonai diba lasi. Mai edia udubaubau, to idia bonaia diba lasi. Mai edia imana, to gau ta idia daua toho diba lasi. Mai edia aena, to idia raka diba lasi; edia gado regena ta idia karaia diba lasi. Idia havaraia taudia be idia bamona ai do idia lao, idia dekenai idia abidadama taudia iboudiai unai.”​—Salamo 115:​4-8.

Bible ese ia hahedinaraia kaivakuku be anina lasi gaudia; unai sibona lasi to ia ese tomadiho laulaudia bona idia tomadiho henidia taudia ia gwauraidia dika danu, ia gwau: “Idia be manu hagaria gaudia kiukamba umana dekenai bamona bona idia hereva diba lasi. Haida ese idia huaia loaloa, badina idia raka diba lasi. Idia garina do umui gari lasi, badina kara dikadia idia karaia diba lasi, bona danu, kara namodia idia karaia diba lasi. Taunimanima iboudiai be kavakava bona edia aonega be lasi, bona idia koroa tomadiho laulaudia ese auri idia gaukaralaia taudia do idia hahemaraidia; badina be edia tomadiho laulaudia be koikoi gaudia, bona idia dekenai laga ia noho lasi. Idia be anina lasi, gaukara kavakavana.”​—Ieremia 10:​5, 14, 15.

Katolik Edia Hahediba

Momokani, taunimanima momo herea be tomadiho laulaudia vairanai idia tomadiho, idia dekenai idia guriguri bona kandolo idia gabudia, bona unai tomadiho laulaudia idia kisi henia taudia idia laloa lasi kaivakuku eiava tomadiho laulaudia idia tomadiho henia. Hegeregere, Katolik taudia idia gwau ena be Keriso bona Maria edia laulau idia hahelagaia, to idia diba unai laulau be dirava lasi, to unai bamona idia karaia badina unai laulau ese Iesu bona Maria idia laulaulaidia. The World Book Encyclopedia bukana, ia gwau “Roman Katolik Dubu lalonai, tomadiho laulaudia idia hahelagaia, badina unai laulau ese taunimanima idia laulaulaidia dainai.” Katolik dubu gunalaia taudia ese edia taunimanima idia hadibaia bema tomadiho laulaudia hahelagaia karana ena bada ese Dirava hahelagaia karana ena bada ia hanaia lasi, unai tomadiho laulaudia idia hahelagaia be maoro.

To momokani gauna be inai, unai tomadiho laulaudia idia tomadiho henia. Danu, New Catholic Encyclopedia bukana ia gwau, unai hahelagaia karana be “tomadiho karana ta.” To, Iesu Keriso ia gwau Dirava ita guriguri henia neganai, tomadiho laulaudia ita gaukaralaidia be maoro lasi, ia gwau: “Tamana dekenai do idia lao taudia ibounai edia dala ta be lasi, lau sibona.” (Ioane 14:6) Vadaeni, idau negai Keristen taudia be tomadiho laulaudia gaukaralaia karana idia gwauraia dika be hoa gauna ta lasi.

To, hari inai nega lalonai, Kerisendom ena dubu ese idia gaukaralaia tomadiho laulaudia edia namba ese Keristen lasi dubudia idia gaukaralaia tomadiho laulaudia edia namba ia hanaia momokani. Oibe, idau negai sivaraidia amo bona Bible ena hereva amo ia hedinarai goevagoeva tomadiho laulaudia hahelagaia karana be ia dika, to tanobada ibounai dekenai, sibodia idia gwauraia Keristen taudia be Dirava idia tahua totona idia ese tomadiho laulaudia vairanai idia tomadiho bona idia guriguri. Dahaka dainai?

Inai Tauna Ta ese Ia Koidia

Peroveta tauna Isaia ia gwau iena nega taudia be laulau idia tomadiho henia neganai, idia lalo-parara lasi unai kara be dika badina “idia matakepulu dainai idia itaia diba lasi, bona idia lalo-duhu dainai idia lalo-parara diba lasi.” (Isaia 44:18) Daika ena siahu be ia bada dainai taunimanima be unai bamona ia veridia diba? Lagani 754 C.E. ai, tomadiho laulaudia hamakohia gaukarana ia naria kaunsolo idia gwau Satana ese tomadiho laulaudia hahelagaia karana ia hamatamaia, badina ia ura taunimanima be Dirava dekena amo ia veridia oho. Edia hereva be maoro, a?

Oibe, badina unai hereva be Dirava ena lauma ese ia havaraia gauna, Bible, ena hereva hegeregerena; nega daudau herea gunanai Bible ia gwau Dirava ia inai henia tauna badana be Satana Diabolo, bona ia ese taunimanima “edia lalona ia hadiburaia” badina ia ura lasi hereva momokani ena “diari idia itaia diba.” (2 Korinto 4:4) Unai dainai, tomadiho laulaudia matauraia karana ese taunimanima be Dirava kahirakahira dekenai ia veria mai lasi, to unai be demoni edia hesiai gaukara karaia karana.​—1 Korinto 10:​19, 20.

Dirava Kahirakahira Dekenai Ita Lao Dalana

Tomadiho laulaudia ese ita idia durua lasi Dirava kahirakahira dekenai ita lao totona. Havaraia Tauna Badana, Iehova Dirava, be laulau gaudia hahelagaia karana ia ura henia lasi momokani. (Deuteronomi 7:25) Ia gwau: “Iehova be vagege bona davana henia Diravana, ia ura ia mo sibona ita tomadiho henia.” (Nahumu 1:2) Ia gwau: “Lau be Iehova. Lauegu ladana be unai; bona lauegu hairai be ta do lau henia lasi, bona lau idia hanamoa herevadia be kaivakuku gaudia do lau henidia lasi danu.” (Isaia 42:8) Unai hegeregerena, Bible ia gwau tomadiho laulaudia idia hahelagaia taudia be “Dirava ena Basileia do idia abia lasi.”​—Galatia 5:​19-21.

To, Iehova be hebogahisi bona kerere gwauatao Diravana. Bible ese kaivakuku idia rakatania bona Dirava dekenai idia giroa taudia edia sivarai ia kikilaia, ia gwau kaivakuku tomadiho henia karana idia rakatania neganai ia ese ia gwauraidia kara maoromaoro taudia. (1 Korinto 6:​9-11; 1 Tesalonika 1:9) Idia ese Iesu ena sisiba hereva idia abia dae, ia gwau: “Dirava be Lauma, bona do idia tomadiho henia taudia ese lauma bona momokani dekena amo do idia tomadiho henia.”​—Ioane 4:24.

Mai iseda ura ibounai danu Bible ita stadilaia neganai, do ita diba Dirava kahirakahira dekenai ita lao dalana be ia auka lasi. (Kara 17:​26-28) Ia be hebogahisi, lalokau, bona heabidae Tauna dainai ia dekenai ita lao diba, bona mai ena ura danu ita ia boiria iseda hetura karana ia dekenai do ita habadaia totona.​—Isaia 1:18.

Iehova ena Witness taudia ese oi idia hagoadaia iseda guba Tamana oi diba namonamo totona, unai anina be iena ladana, Iehova, do oi diba, bona iena kara bona lalohadai toana bona iena kara taunimanima dekenai do oi diba danu. Iena Hereva, Bible, dekena amo, do oi diba dahaka dainai Dirava kahirakahira dekenai oi lao totona, bona dahaka dainai tomadiho laulaudia bona piksa gaukaralaia karana be anina lasi. Oibe, “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”​—Iakobo 4:8.

[Box on page 6]

Histori Torea Taudia Idia Gwau . . .

◻ “Taunimanima idia diba, Buddha tomadihona be lagani 500 BCE murinai ia matamaia, bona ia haginia tauna ena laulau idia karaia lasi ela bona lagani 100 CE vairanai.”

“Lagani sinahu momo lalodiai, Hindu tomadiho lalonai kaivakuku eiava tomadiho laulaudia idia gaukaralaidia lasi.”

“Hindu bona Buddha tomadihodia idia matamaia neganai kaivakuku eiava tomadiho laulaudia idia gaukaralaidia lasi, to murinai sisina sisina tomadiho laulaudia idia gaukaralaidia. Keristen ena tomadiho danu be unai bamona.”​—The Encyclopedia of Religion, Mircea Eliade ese ia torea bukana.

◻ “Bible ena sivarai idauidau amo ia hedinarai goevagoeva Dirava ena tomadiho momokanina lalonai tomadiho laulaudia idia gaukaralaidia lasi. . . . Danu, TM [Taravatu Matamatana] lalonai, idau besedia edia dirava bona kaivakuku tomadiho henidia karana be mai taravatuna.”​—New Catholic Encyclopedia.

◻ “Idau negai Keristen taudia ese edia tomadiho lalonai tomadiho laulaudia idia gaukaralaia lasi.”​—Cyclopedia of Biblical, Theological, and Ecclesiastical Literature bukana, torea taudia be McClintock bona Strong.

◻ “Taravatu Matamatana lalonai, bona Keristen tomadiho ia matamaia neganai idia torea revarevadia iboudiai lalodiai, hereva ta ita davaria diba lasi ia gwau Keristen taudia ese taunimanima vairanai eiava sibodia edia ruma lalonai tomadiho laulaudia eiava piksa idia tomadiho henidia.”​—A Concise Cyclopedia of Religious Knowledge bukana, Elias Benjamin Sanford ese ia torea.

◻ “Bema haida idia gwau namona be tomadiho laulaudia be edia dubu lalonai do idia atodia, Keristen taudia ginigunadia be mai edia gari danu do idia hoa, bona do idia laloa bema unai laulau vairanai idia tomadiho eiava idia guriguri, idia diba unai be kaivakuku tomadiho henia karana.”​—History of the Christian Church bukana, John Fletcher Hurst ese ia torea.

◻ “Idau negai dubuna lalonai, taunimanima be Keriso bona helaga taudia edia piksa idia ura karaia bona idia ura hahelagadia neganai, dubu taudia ese nega ibounai unai kara idia inai henia.”​—The New Encyclopædia Britannica bukana.

◻ “Ena be idau negai Dubuna be piksa namodia idia ura henia, to idia dekenai Keriso ena laulau ta ia noho lasi.”​—Schaff-Herzog Encyclopedia of Religious Knowledge bukana.

[Picture on page 7]

Iesu be nega momo ia gwau Dirava ia ura taunimanima be “lauma bona momokani dekena amo do idia tomadiho henia”