Daika be “Hekwakwanai Negana” amo Do Ia Roho Mauri?
“Iehova ena ladana idia noinoi henia taudia ibounai be mauri do idia davaria.”—IOEL 2:32.
1. Daniel bona Malaki edia hereva hegeregerena, ia mai kahirakahira ena “hekwarahi negana” amo do idia roho mauri taudia edia kara badana be dahaka?
ISEDA nega ia laloa neganai, peroveta tauna Daniel ia toretore, ia gwau: “Hekwakwanai negana ta do ia vara; unai bamona nega be nega gunadia ta ai ia vara lasi, bese ta ia do matamaia lasi negana amo ema bona hari ela bona unai nega do ia ginidae. Bona unai negai emu bese taudia do idia roho mauri, edia ladana be buka ai idia torea taudia iboudiai.” (Daniel 12:1) Unai hereva ese ita idia hagoadaia momokani! Iehova ese ia abia dae taudia do ia laloatao, Malaki 3:16 danu ia gwau bamona: “Bena Iehova garina idia gari taudia do idia hereva heheni, bona Iehova ese ia hakala henidia bona ia kamonai henidia. Bona Iehova garina idia gari taudia bona iena ladana idia laloa taudia edia ladana ia laloatao totona buka ta idia torea.”
2. Iehova ena ladana ita laloa neganai dahaka ia vara?
2 Iehova ena ladana ita laloa neganai ia dekenai, iena Keriso dekenai, bona iena Basileia amo ia ura karaia gaudia iboudiai dekenai, diba maoromaoro ita abia. Unai dainai, iena bese taudia ese idia tomadiho henia, ia ida gwauhamata turana karana idia karaia, bona ‘mai edia kudouna ibounai ida bona mai edia lalo-parara ibounai ida bona mai edia goada ibounai ida’ idia lalokau henia. (Mareko 12:33; Apokalupo 4:11) Iehova ese dala namona ia karaia, Iesu Keriso ena boubou amo, tanobada ena manau taudia ese mauri hanaihanai do idia davaria totona. Unai dainai, idia be Iesu ena vara negana ai guba oreana ese Dirava idia hanamoa herevana idia gwauraia danu, idia gwau: “Atai momokani dekenai Dirava do ita hanamoa, bona tanobada dekenai be maino, Dirava ia moale henidia taudia ese inai maino do idia abia.”—Luka 2:14.
3. Tanobada dekenai maino do ia mai lasi neganai, Iehova ese dahaka do ia karaia guna be namo?
3 Unai maino ia kahirakahira to taunimanima momo be unai bamona idia laloa lasi. To Iehova ena hahemaoro karana tanobada dikana dekenai do ia vara guna be namo. Iena peroveta tauna Sefania ia gwau: “Iehova ena dina badana ia kahirakahira vadaeni. Ia kahirakahira, ia mai haraga herea.” Unai dina be edena bamona dinana? Peroveta herevana ma ia gwau: “Iehova ena dina regena ena mamina be idita. Unai dina ai goada herea tauna do ia tai bada. Unai dina be badu, hisihisi bona lalo-hekwarahi dinana, hadikaia bona ore dinana, dibura dinana, ori koremadia bona dibura masemase dinana, kibi regena bona tuari boiboina dinana, hanua mai edia magu bona kohoro latadia hadikaia totona. Lau ese hisihisi do lau mailaia taunimanima dekenai, bena do idia raka, matakepulu taudia bamona; badina be Iehova idia kara dika henia vadaeni.”—Sefania 1:14-17; Habakuku 2:3; 3:1-6, 16-19 itaia danu.
4. Hari inai negai daidia idia ura Dirava idia diba bona idia hesiai henia?
4 Ita moale badina hari inai nega ai taunimanima milion momo idia ura Dirava idia diba bona idia hesiai henia. Gwauhamata matamatana lalonai idia abia vareai horoa Keristen taudia be inai bamona idia perovetalaia, ia gwau: “ ‘Idia iboudiai be dohore lau idia diba, maragidia amo ela bona badadia,’ Iehova ia gwau.” (Ieremia 31:34) Idia be hari inai nega ena haroro gaukara idia gunalaia. Bona hari horoa orena taudia momo be tanobada maurina idia rakatania neganai, “mamoe idaudia haida” edia “hutuma herea” idia mai ‘Dirava dekenai dina bona hanuaboi ibounai idia hesiai henia’ iena dubu bamona oreana dekenai. (Apokalupo 7:9, 15; Ioane 10:16) Unai gaukara namo hereana oi moalelaia, a?
“Kohu Namodia” Idia Vareai Mai Dalana
5, 6. Tanobada besedia iboudiai ia do haheudeheudedia ore lasi neganai, dahaka hamauria gaukarana do ia vara?
5 Namona be Hagai 2:7 ita duahia, unuseniai Iehova be iena lauma tomadiho rumana ia perovetalaia. Ia gwau: “Bese iboudiai do lau haheudeheudedia, bena bese iboudiai edia kohu namodia do idia vareai mai; bena inai dubu be hairai amo do lau hahonua.” Bible ena peroveta herevadia idia hahedinaraia Iehova ese ‘bese ia haheudeheudedia’ neganai ia be tanobada besedia do ia hadikadia ore. (Nahumu 1:5, 6; Apokalupo 6:12-17) Unai dainai, Hagai 2:7 dekenai ia perovetalaia bamona, Iehova ena gaukara badana be tanobada besedia do ia haheudeheudedia ore—do ia hadikadia ore. To “bese iboudiai edia kohu namodia” be edena bamona? Do idia naria unai dika dokona ia havaraia heudeheude karana ia vara totona bena idia vareai mai, a? Lasi.
6 Ioel 2:32 ia gwau: “Iehova ena ladana idia noinoi henia taudia ibounai be mauri do idia davaria; badina Siona Ororona dekenai bona Ierusalem dekenai mauri idia abia taudia do idia noho, Iehova ena hereva hegeregerena, bona mauri idia abia taudia bogaragidiai do idia noho, Iehova ia boiria taudia unai.” Iehova ese ia boiridia mai, bona hisihisi badana ena heudeheude dokona ia do vara lasi neganai Iesu ena boubou dekenai idia abidadama henia dainai Iehova ena ladana dekenai idia noinoi henia. (Ioane 6:44; Kara 2:38, 39 itaia danu.) Moale gauna be inai: Hutuma bada herea taudia namodia, hari edia namba be milion hani ia hanaia, be Aramagedono ai, ‘bese ia haheudeheudedia’ negana idia naria lalonai, Iehova ena tomadiho rumana ‘lalonai idia vareai.’—Apokalupo 7:9, 10, 14.
7. Dahaka ita karaia ‘Iehova ena ladana ita noinoi henia’ totona?
7 Unai roho mauri taudia be edena dala ai Iehova ena ladana dekenai idia boiboi henia? Iakobo 4:8 be ita dekenai ia hahedinaraia, ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai. Kara dika taudia e, emui imana do umui huria. Ekalesia koikoi taudia e, laloa rua dekena amo umui emui kudouna do umui hagoevaia.” Horoa orena taudia ese dala idia gunalaia hegeregerena, idia ura Aramagedono amo do idia roho mauri hutuma bada herea taudia be kara ta idia karaia be namo. Bema oi ura do oi roho mauri, namona be Iehova ena Hereva goeva ia havaraia gauna amo oi inua bona oiemu mauri lalonai iena kara maoromaoro taravatudia oi badinaia. Namona be Iehova dekenai oiemu mauri oi gwauhamatalaia, oi daradara lasi, bona ranu bapatisona amo oi hamomokania. Abidadama amo Iehova dekenai oi noinoi henia anina be ia totona oi haroro danu. Unai dainai, Roma karoa 10, siri 9 bona 10 dekenai, Paulo ia torea, ia gwau: “Bema oiemu uduna dekenai Iesu oi gwauraia ia be Lohiabada, bona oiemu kudouna dekenai do oi abia dae Dirava ese mase dekena amo Iesu ia hatorea isi, vadaeni do oi mauri. Badina be iseda kudouna ena abidadama dekena amo Dirava vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria.” Bena, Ro 10 siri 13 dekenai, aposetolo be Ioel ena peroveta hereva amo ia hereva, ma ena hereva badana be “Iehova ena ladana idia noinoi henia taudia ibounai be mauri do idia davaria.”
‘Tahua, Tahua, Tahua’
8. (a) Peroveta tauna Sefania ena hereva hegeregerena, Iehova be roho mauri ia henia totona ia ura dahaka ita karaia? (b) Sefania 2:3 ena sisiba hereva dekenai unai hereva “reana” ena anina be dahaka ita dekenai?
8 Bible bukana Sefania, karoa 2, siri 2 bona 3 dekenai, ita duahia Iehova ia ura dahaka ita karaia be namo roho mauri ita abia totona, ia gwau: “Iehova ena badu badana be umui latanai ia do diho lasi neganai, Iehova ena badu dinana be umui dekenai ia do ginidae lasi neganai, umui tano taudia mai emui manau ida, ena taravatu umui badinaia taudia e, Iehova umui tahua. Kara maoromaoro umui tahua, lalo-manau umui tahua. Bena reana do umui hehuni diba Iehova ena badu dinana ai.” Unai hereva “reana” oi laloa. Ia gwau lasi hahemauri dalanai ita vareai neganai gabeai ita moru diba lasi. Unai dina lalonai ita hehuni diba totona namona be unai gaudia toi ita karaia noho. Namona be Iehova ita tahua, kara maoromaoro ita tahua, bona lalo-manau ita tahua.
9. Lalo-manau idia tahua taudia be edena bamona davana do idia abia?
9 Lalo-manau tahua karana ena davana be namo herea momokani! Salamo 37, siri 9 ia lao 11 dekenai ita duahia, ia gwau: “Iehova idia naria taudia be tanobada do idia abia. Bona nega sisina murinai, kara dika tauna do ia noho lasi . . . To manau taudia ese tanobada do idia abia, bona maino bada dainai do idia moale dikadika.” Bona kara maoromaoro tahua karana be edena bamona? Sa 37 Siri 29 ia gwau: “Kara maoromaoro taudia ese tanobada do idia abia, bona ia latanai do idia noho ela bona hanaihanai.” Iehova tahua karana dekenai, Sa 37 siri 39 bona 40 be ita idia hamaoroa, idia gwau: “Kara maoromaoro taudia edia mauri be Iehova ena amo; hekwarahi neganai ia be edia roho mauri gabuna. Bona Iehova ese do ia durudia bona edia heau mauri dalana ia kehoa. Ia ese kara dika taudia edia imana amo edia heau mauri dalana ia kehoa bona ia hamauridia, badina be idia ese ia idia abidadama henia.”
10. Daidia idia ura lasi momokani Iehova bona lalo-manau idia tahua?
10 Kerisendom ena dubu taudia be Iehova idia tahua lasi. Edia dubu gunalaia taudia be iena ladana namo hereana idia dadaraia, hekokoroku dainai idia hahanaidia Bible amo unai ladana idia kokia. Idia ura ladana lasi Lohiabadana ta eiava Diravana ta idia tomadiho henia bona Iehova idia tomadiho henia lasi taudia edia Toi Tamona idia matauraia bada. Ma danu, Kerisendom ese kara maoromaoro ia tahua lasi. Iena dubu taudia momo be taravatu lasi mauri daladia idia karaia eiava idia durua. Idia be lalo-manau idia tahua lasi Iesu ese ia karaia bamona, to idia be kohu momo mauri dalana heagilaia karana, hegeregere televisen dekenai idia haheitalaia bamona, idia karaia bona idia heudahanai momo. Dubu naria taudia be edia mamoe taudia edia moni amo sibodia edia kohu idia habadaia. Iakobo 5:5 ena hereva bamona, idia be ‘tanobada dekenai idia noho neganai idia ura henia karadia bona gaudia idia moalelaia mai lebulebu danu.’ Iehova ena dina ia mai kahirakahira neganai, do idia davaria Dirava ena hereva ena anina be idia dekenai do ia guguru, ia gwau: “Badu dinana ai kohu be heduru gauna lasi, to kara maoromaoro be mase amo ia hamauria gauna.”—Hereva Lada-isidia 11:4.
11. Tau dika rohorohona be daika, bona edena dala ai rara bada ia bubua?
11 Keristen taudia ginigunadia edia nega ai, aposetolo Paulo be iena revareva iharuana lalonai Tesalonika taudia dekenai ia herevalaia hegeregerena, Keristen taudia haida idia laloa Iehova ena dina be idia dekenai ia vara. To Paulo be sisiba ia henia, ia gwau, hereva momokani dadaraia karana badana do ia vara guna, bona “Tau Dika Rohorohona” do ia hedinarai guna. (2 Tesalonika 2:1-3) Lagani 1900 C.E. murinai, unai hereva momokani dadaraia karana ena bada ita itaia diba bona ita diba Dirava ena vairanai Kerisendom ena dubu naria taudia be edena bamona taravatu utua taudia. Lagani 1914 amo hari nega dokona ai, dubu naria taudia be rara bada idia bubua badina idia be ‘tano geia gaudia amo tuari kaia idia karaia.’ (Ioel 3:10) Idia be hahediba koikoi idia hadibaia noho danu, hegeregere taunimanima edia souli ia mase diba lasi, pegatori, hel lahina ena hisihisi, beibi bapatisodia karana, Toi Tamona, bona unai bamona herevadia. Iehova ese iena hahemaoro hereva do ia karaia neganai idia be edena bamona? Hereva Lada-isidia 19:5 ia gwau: “Koikoi tauna be mauri dalana do ia davaria lasi.”
12. (a) Nega kahirakahira do idia hamasea ore taunimanima edia “guba” bona “tanobada” be dahaka? (b) Dahaka do ita diba hari tanobada dikana be do ia hadikaia ore dainai?
12 Petero Iharuana 3:10 dekenai ita duahia, ia gwau: “[Iehova] ena Dina be do ia ginidae, henaoa tauna ia ginidae bamona. Unai Dina neganai guba be nega tamona do ia ore, mai regena bada danu. Gubai noho gaudia, hisiu, hua, bona dina be lahi bada herea ese idia do ia araia ore. Tanobada danu, bona ia lalonai noho gaudia ibounai, be lahi bada ese do ia araia ore.” Taunimanima ibounai latanai palai rumana bamona idia helai gavamani dikadia, bona hari inai nega ena taunimanima mirodia edia kahana iboudiai, be Dirava ena tanobada amo do idia ore. Taunimanima ibounai hamasea tuari kohudia idia karaia bona idia hoihoilaia taudia, koikoi kara amo taunimanima edia moni idia henaoa taudia, koikoi tomadiho taudia bona edia dubu gunalaia taudia, kara miro idia habadaia taudia, dagedage, bona taravatu utua karadia—idia iboudiai do idia ore. Idia be Iehova ena badu amo do idia ore. To Petero Iharuana 3 siri 11 bona 12 dekenai, Petro ese Keristen taudia ma ia sisiba henidia, ia gwau: “Vadaeni, bema inai gau ibounai unai bamona do idia ore, umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho, bona do ia ginidae haraga totona do umui gaukara goada noho.”
Mikael be Gau Ta Ia Karaia!
13, 14. Daika be Iehova ena lohia dalana ia Hamomokania Tauna badana, bona 1914 murinai edena bamona ia gaukara bada?
13 Edena dala ai Iehova ese ia havaraia “hekwarahi negana” lalonai taunimanima be roho mauri do idia davaria diba? Dirava ese ia henia Tauna, roho mauri dalana karaia totona, be Mikael, iena ladana anina be “Daika be Dirava Bamona?” Unai dainai, ia maoro ia be Iehova ena lohia dalana ia hamomokania Tauna, ia ese Iehova ia abia isi Dirava korikori tamona sibona bona gau ibounai edia Atai Momokani Lohiabadana maorona.
14 Apokalupo karoa 12, siri 7 ia lao 17, dekenai “Lohiabada ena Dina,” 1914 ena murinai idia vara gaudia ia herevalaia! (Apokalupo 1:10) Aneru badana Mikael ese guba amo gwau-edeede tauna Satana be tanobada dekenai ia negea diho. Gabeai, Apokalupo karoa 19, siri 11 ia lao 16, ese ia herevalaia bamona, ‘Abidadama’ bona ‘Momokani’ tauna ese “vain huahua moia gabunai uaina ena ranu do ia gigia murimuri dekenai. Unai moia gabuna be Siahu Ibounai Dirava ena badu, siahu dikadika.” Unai guba tuari tauna goadana ena ladana be “king ibounai edia King, bona lohia ibounai edia Lohia.” Ma hereva dokona, Apokalupo karoa 20, siri 1 bona 2 dekenai, ia be aneru badana ia herevalaia, ia be guri dobu masemase lalonai Satana ia negea bona lagani 1,000 lalonai unuseniai ia koua. Ia hedinarai momokani, unai siri iboudiai idia gwau Iehova ena atai lohia siahuna ia Hamomokania Tauna be Lohiabada Iesu Keriso, Iehova be 1914 lalonai hairai guba terona dekenai ia atoa.
15. Nega kahirakahira, edena dala badana ai Mikael be do ia “gini”?
15 Daniel 12:1 ese ia gwauraia bamona, Mikael be Iehova ena taunimanima dainai ia “gini” 1914 ai ia be King dagina ia abia negana amo. To nega kahirakahira Mikael be do ia “gini” dala idauna ta dekenai—ia be Iehova ia siaia Tauna, kara dika ibounai tanobada amo ia kokia totona, bona tanobada ibounai dekenai Dirava ena bese taudia edia Hamauria Tauna ai ia lao totona. Unai “hekwarahi negana” ena dika be Iesu ese ia gwauraia Mataio 24:21, 22 ai, ia gwau: “Unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi. Bema Dirava ese unai nega do ia hakwadogia lasi, taunimanima ta be do ia mauri diba lasi. To ia abia hidi taudia dekenai ia laloa dainai unai nega do ia hakwadogia.”
16. Hisihisi badana neganai edena taudia do idia roho mauri?
16 Ai moale bada herea badina unai negana ai taunimanima haida do idia roho mauri diba! Idia be gwau-edeede Iuda taudia bamona lasi, 70 C.E. negana ai Ierusalem dekenai idia koua, bena idia haida be Roma dekenai idia lao igui hesiai gaukara idia karaia totona. To, “nega dokona” ai do idia roho mauri taudia be Ierusalem ena hanua hagegea kara dokona negana ai idia heau siri Keristen kongregesen taudia bamona. Idia be Dirava ena bese taudia, hutuma bada herea taudia milion momo bona tanobada dekenai reana idia do noho horoa taudia. (Daniel 12:4) Hutuma bada herea be “dagedage taudia ese idia hahisia bada herea. To unai dagedage idia hanaia vadaeni, mai mauri danu.” Badina be dahaka? Badina “edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro momokani.” Idia be Iesu ena boubou rarana ena siahu idia abidadama henia bona Dirava idia hesiai henia namonamo neganai unai abidadama idia hahedinaraia. Hari danu, Iehova, ‘terona dekenai ia helai Tauna,’ be idia latanai ena kalaga ia atoa, ia naridia totona, bona Mamoe ena Natuna, Keriso Iesu, ese ia naridia bona mauri ranuna ia lohilohidae gabuna ai ia hakaudia lao.—Apokalupo 7:14, 15.
17. Hutuma bada herea idia hagoadaia dahaka idia karaia totona idia be do ia mai hekwarahi negana ai idia hehuni totona?
17 Iehova, kara maoromaoro, bona lalo-manau idia tahua neganai, namo lasi hutuma bada herea ena taunimanima milion momo edia lalokau ginigunana hereva momokani dekenai ia keru ia lao! Bema oi be mamoe bamona tauna ta, dahaka do oi karaia be namo? Kolose karoa 3, siri 5 ia lao 14 ia hereva bamona, namona be “emui mauri gunana mai ena dika dabua gunana bamona umui kokia.” Dirava ena heduru oi tahua, ‘mauri matamata, diba maoromaoro ese ia havaraia gauna,’ oi atoa. Lalo-manau dekenai, Iehova hanamoa karana bona iena ura namona ma haida dekenai hamaorolaia karana oi habadaia bona oi karaia goadagoada noho. Unai dala amo, oi be “hekwarahi negana,” “Iehova ena badu” dinana ai, reana do oi hehuni diba.
18, 19. Edena dala ai haheauka be gau badana roho mauri ita abia totona?
18 Unai dina be ia kahirakahira! Ia be ita dekenai ia mai haraga. Lagani 57 lalodiai hutuma bada herea taudia haboudia gaukarana idia karaia noho. Idia haida idia mase vadaeni bona edia toreisi lou idia naria. To Apokalupo peroveta hereva amo ita diba momokani hutuma bada herea oreana be hisihisi badana do idia hanaia bona “tanobada matamatana” ena badina ai do idia lao. (Apokalupo 21:1) Do oi noho, a? Unai bamona ia vara diba, badina Mataio 24:13 dekenai Iesu ia gwau: “Ena lalona do ia goada noho ela bona dokona, unai tauna be do ia mauri.”
19 Hari inai tanobada gunana lalonai Iehova ena taunimanima ese idia mamia hisihisidia be reana do idia bada noho. Bona hisihisi badana ena hekwarahi negana ia mai neganai, reana do oi hisihisi momo. To Iehova bona iena orea kahirakahira ai oi noho. Oi noga noho! “Iehova ia gwau, ‘Lau umui naria ela bona lau hedinarai dinana, badina lau ura bese iboudiai lau haboudia, bena basileia iboudiai lau gogoa, lauegu hahemaoro idia latanai lau bubua totona; badina lauegu badu idia latanai lau bubua; lauegu badu lahina amo tanobada ibounai do lau haorea.’ ”—Sefania 3:8.
20. “Hekwarahi negana” dina badana ia mai kahirakahira neganai, dahaka do ita karaia be namo?
20 Ita ia naria bona ita ia hagoadaia totona, ena hariharibada amo Iehova be iena taunimanima dekenai “gado goevadaena” ia henia, unai lalonai be Iehova do ia mailaia Basileiana ena sivarai badana ia noho, “Iehova ena ladana dekenai idia boiboi totona bona iena hesiai gaukara mai lalo-tamona danu idia karaia hebou totona.” (Sefania 3:9) “Hekwarahi negana” ena dina badana ia mai kahirakahira noho neganai, namona be hesiai gaukara ita karaia goadagoada, ma manau taudia ita durudia ‘Iehova ena ladana idia noinoi henia’ roho mauri idia abia totona.
Inai Oi Laloatao, A?
◻ Iehova ese dahaka do ia karaia guna bena tanobada dekenai maino do ia mailaia?
◻ Ioel ena hereva hegeregerena, dahaka ita karaia be namo ita roho mauri totona?
◻ Sefania ena hereva hegeregerena, edena dala ai lalo-manau taudia be Iehova ena badu siahuna dekenai reana idia hehuni diba?
◻ “Tau Dika Rohorohona” be daika, bona edena dala ai rara bada ia bubua?
◻ Edena dala ai roho mauri abia totona haheauka be gau badana?