Bible be Harihari Gauna Dirava Ena Lauma Helaga amo Ena Badina

BIBLE ia gwau “Dirava be lalokau” bona ia gwau ia be mai aonega bona mai ena siahu. (1 Ioane 4:8; Iobu 12:13; Isaia 40:26) Ita ia hamaoroa “iena dala iboudiai be hahemaoro maoromaoro.” (Deuteronomi 32:4) Bible ena hereva hegeregerena, Dirava be hebogahisi bona hariharibada ia hahedinaraia.​—Esodo 34:6; Roma 9:15.

Bible ia gwau Iehova Dirava dekenai unai karadia idia noho dainai, ia idia tahua taudia ia dekenai ia veridia. Unai buka ese gau iboudiai idia vara dalana, kara dika bona mase edia badina, bona Dirava ida tura henia lou dalana ia herevalaia. Ia be tanobada dekenai Paradaiso ia vara lou helaro namona ia herevalaia. To unai ibounai be anina lasi bema ita hamomokania diba lasi Bible be lauma helaga ena siahu amo Dirava ena harihari gauna.

Bible bona Saiens

Bible be nega momo ia idia samania taudia edia hereva ia hakoikoia. Hegeregere, bema lalohadai kerere ese ita ia koua lasi, ita duahia neganai ita davaria ena hereva be saiens korikorina ida ia hegeregere. Momokani, Bible be lauma dalana ai taunimanima ia hakaua totona ia torea, ia be saiens bukana totona ia torea lasi. To namona be ita ese Bible ita tahua ia be saiens ena hereva momokanidia ida ia hegeregere eiava lasi.

Tauanina Stadilaia Karana: Bogana lalonai beibi edia tauanina ia herevalaia neganai Bible be hereva momokanidia ia gwauraia, bona ia hahedinaraia “ena kahana ibounai” be ‘ena buka lalonai ia torea.’ (Salamo 139:​13-16) Ena harana, ena kudouna, ena baragi, ena matana​—ena tauanina kahana iboudiai be sinana ena bogana lalonai ia noho gatoi dekenai ‘ia torea.’ Bona nega korikori dekenai idia vara. Bona inai oi laloa! Tauanina ia vara dalana be Bible dekenai idia torea, unai be lagani 3,000 saiens taudia ese unai diba idia do abia lasi neganai.

Animal: Bible ia gwau: “Hea be . . . aniani ia gauaia loulou.” (Levitiko 11:6) François Bourlière. (The National History of Mammals, 1964, rau 41) ia gwau: “Aniani idia ania bona bogarau dekena amo tage ai ia lao bena idia ania lou be rabit bona hea edia kara. Taunimanima idia hamanadalaia rabit be edia hanuaboi tagena idia koria lasi to idia hadonoa sibona bona idia ania gauna ibounai amo kahana ta be tage amo ia mai. Dina tamona lalonai uda rabit be nega rua edia aniani be bogarau dekena amo tage ai ia lao bona idia ania lou, bona Europe ena hea be unai bamona idia karaia danu. Buka ta ladana Mammals of the World (E. P. Walker ese ia torea, 1964, volume II, rau 647 ai) ia gwau: “Reana unai be ‘aniani idia gauaia loulou’ animal haida edia kara bamona.”

Tano Lalonai Idia Davaria Idau Negai Gaudia Stadilaia Karana: Raro amo idia karaia palakapalaka gaudia, uro gaudia, toretore gaudia, bona unai bamona gaudia idia davaria dainai, Bible ese ia herevalaidia king, hanuadia, bona besedia edia sivarai ia mauri bamona. Hegeregere, Bible ese ia herevalaidia Hiti taudia be momokani guna idia noho. (Esodo 3:8) Iena buka The Bible Comes Alive lalonai, Sir Charles Marston ia gwau: “Bible dekenai taunimanima edia abidadama idia hadikaia taudia, bona ena siahu idia hamanokaia taudia be hari edia siahu idia haboioa badina Bible hamomokania gaudia idia davaria, bona unai taudia edia hereva ena siahu be ia ore. Geigei gauna be dika idia havaraia samania herevadia ia hakoikoidia bona unai amo hari ita diba, idia daradaralaia herevadia be koikoi herevadia sibona.”

Tano idia geia bona idau negai gaudia idia stadilaia karana be dala momo dekenai Bible ia hamomokania. Haheitalai be, idia davaria gaudia haida be Genese karoa 10 lalonai ia herevalaia gabudia bona ladadia idia hamomokania. Tano idia geia taudia be Kaldea hanuana Uru idia davaria, unai be Abraham ia vara hanuana, ia be bisinesi bona tomadiho karaia hanua badana. (Genese 11:​27-31) Ierusalem ena diho kahana dekenai, Gihon ena ranu ia aru lao gabuna ataiai, tano geia taudia be King David ese ia abia Iebusu hanuana idia davaria. (2 Samuel 5:​4-10) King Hesekia ese idau negai ia geia ranu heau dalana ena dokona ai Siloam Toretorena be 1880 ai idia davaria. (2 Hanua Pavapavadia 20:20) Nabonido Ena Sivarai lalonai, 539 B.C.E. neganai Kurese Badana ese Babulono ia hamorua karana, ia herevalaia; unai be 1800 C.E. bona 1899 C.E. ihuanai idia geia. Persepolis dekenai bona King Xerxes (Ahasuero) ena king ruma badana Susana, eiava, Susa dekenai, 1880 bona 1890 C.E. huanai idia davaria toretoredia amo Eseta bukana ena hereva haida idia hamomokania. Lagani 1961 ai, Caesarea dekenai, idau negai Roma gadara gabuna dekenai toretore ta idia davaria bona unai ese ia hamomokania Roma gavana, Pontio Pilato, Iesu ia dogoatao idia gwadaia totona tauna unai, be guna ia noho momokani tauna.​—Mataio 27:​11-26.

Hisiu bona Guba Gaudia Stadilaia Karana: Lagani 2,200 gunanai bamona​—taunimanima idia do diba lasi tanobada ia kuboru neganai​—peroveta tauna Isaia ia torea, ia gwau: “Tanobada kuboruna ataiai Tauna ia noho.” (Isaia 40:22) Heberu herevana chugh, iniseniai idia hahanaia “kuboru,” idia hahanaia diba “kuborukuboru” danu. (A Concordance of the Hebrew and Chaldee Scriptures, B. Davidson ese ia torea) Bona danu, tanobada ia “kuboru” be guba amo idia itaia namonamo bona idia hamomokania diba bona nega haida peleini ia roho lao atai momokani neganai unai idia itaia. Iobu 26:7 ia gwau Dirava be “tanobada ia atoa, gau ta latanai ia noho lasi.” Unai be momokani, badina hisiu bona guba gaudia idia stadilaia taudia idia diba tanobada ia abia isi gauna ta ita itaia diba lasi.

Tubutubu Gaudia Stadilaia Karana: Haida idia laloa kerere, idia gwau Bible ia hereva kerere badina Iesu Keriso ia gwau “mastadi au ena uhena” be “tanobada ena uhe idauidau edia bada . . . henunai.” (Mareko 4:​30-32) Reana, Iesu ia herevalaia gauna be mastadi tubutubu gauna koremana ena uhena (Brassica nigra eiava Sinapis nigra), ena bada be 1 ia lao 1.6 milamita sibona. Ena be maragi momokani uhedia idia noho, hegeregere orchid ena pauda bamona idia maragi uhedia, to Iesu be orchid idia hatubua taudia ia hereva henidia lasi. Unai Galilea Iuda taudia idia diba unai gabu ena biru taudia idia hadoa uhe idauidau iboudiai amo mastadi uhena be ia maragi herea. Iesu ese Basileia ia herevalaia, ia be tubutubu gaudia edia sivarai ia hadibalaia lasi.

Tano Kopina Ena Sivarai Stadilaia Karana: Bible ese gau iboudiai idia vara dalana ena sivarai ia herevalaia neganai, tano kopina ena sivarai ia stadilaia diba bada tauna, Wallace Pratt, ia gwau: “Lau be tano kopina ena sivarai stadilaia tauna dainai, bema hari inai negai iseda lalohadai tanobada bona ia dekenai mauri gaudia iboudiai idia vara dalana lau ura hadibaia sikuli bada lasi taudia dekenai, biru taudia dekenai, hegeregere Genese Bukana lalonai ia hereva henidia besedia bamona, lau be Genese ena karoa ginigunana ena hereva lau gwauraia neganai be namo herea.” Pratt ia itaia Genese lalonai idia vara gaudia edia nega ai edia nega ai sivarai torea dalana​—davara idia vara, tano ia hedinarai, bena davara ena mauri gaudia, manu, bona animal idia vara​—be tano kopina ia vara nega ena kahana ai kahana ai idia vara dalana hegeregerena ia torea.

Muramura: Iena buka The Physician Examines the Bible lalonai C. Raimer Smith ia torea, ia gwau: “Lau hoa badina Bible ena hereva be maoro muramura herevadia dekenai. . . . Hari inai negai iseda diba hegeregerena muramura henia karana, hegeregere toto, eiava bero, bona unai bamona gaudia hanamoa totona ia herevalaia neganai, ena hereva be maoro. . . . Taunimanima momo be meamea lalohadaidia idia do laloa noho, hegeregere bema poketi dekenai buckeye uhena oi atoa neganai turia gorerena do oi abia lasi; paroparo dogoatao karana ese husihusi do idia havaraia; aiona dekenai dabua kakakakana kwatua neganai gadona hisihisina do ia hanamoa; baege mai ena au todena ese gorere do ia koudia; natuna ia gorere neganai ena gorere be gaigaigaigai dainai; bona unai bamona lalohadai, to unai bamona herevadia be Bible lalonai ita davaria lasi. Unai be hoalaia gauna bona lau dekenai unai ese ia hamomokania ia be Dirava ena amo ia mai.”

Idau Negai Sivarai Ia Gwauraia Maoro

Iena buka A Lawyer Examines the Bible lalonai, loia tauna Irwin H. Linton ia gwau: “Tatau bona hahine idia lalokau heheni sivaraidia, gori sivaraidia bona sivarai koikoidia idia vara edia nega bona edia gabu korikori idia gwauraia lasi; ai loia taudia emai taravatu be ‘sivarai ena nega bona ena gabu ai gwauraia hedinarai maoro be namo,’ Bible sivaraidia ese idia vara gaudia edia nega bona gabu idia gwauraia hedinarai maoro hegeregerena.”

Unai hereva ia hamomokania totona, Linton ese Luka 3:​1, 2 ia herevalaia. Unuseniai Evanelia buka ia torea tauna be gavamani taudia 7 ia herevalaia, Iesu Keriso ese Iena hesiai gaukara hamatamaia negana ia hamomokania totona. Luka ese ia gwauraia hedinarai herevadia oi laloa, ia gwau: “Tiberio Kaisara be lagani 15 ia lohia neganai, Pontio Pilato be Iudea edia gavana, bona Heroda be Galilea dekenai ia lohia. Heroda ena tadina Filipo be Iturea bona Trakonido edia lohia, bona Lusania be Abilene ena lohia. Bona Ana bona Kaiafa be dubu biagudia badadia. Unai neganai Dirava ese Ioane Sekaria dekenai ia hereva, taunimanima idia noho lasi tanona dekenai.”

Bible be unai bamona herevadia momo amo ia honu. Ma danu, ena Evanelia bukadia idia torea neganai, Iuda, Greek, bona Roma taudia edia bese edia aonega be bada herea. Unai negadia ai loia taudia, toretore taudia, lohia taudia, bona unai bamona taudia idia noho. Vadaeni, bema Evanelia bukadia bona Bible ena kahana ma haida edia hereva be idia momokani lasi, taunimanima haida ese idia hahedinaraidia idia be koikoi herevadia. To tanobada ena sivarai idia torea tataudia idia hamomokania hereva ta be Iesu Keriso be guna ia noho momokani tauna. Haheitalai ta be, Roma sivarai torea tauna Tacitus be Iesu bona Ia murinai idia raka taudia edia sivarai ia torelaia, ia gwau: “Christus, iena ladana amo [Keristen taudia] be edia ladana idia abia, be Tiberio lohia negana ai gavamani tauna Pontio Pilato ena amo dagedage bada ia abia ela bona ia mase.” (Annals, Buka Namba 15, 44) Bible ena sivarai ia maoro dainai ia hamomokania diba ia be taunimanima dekenai Dirava ese ia henia harihari gauna.

Hamomokania Herevana Badana

Tano idia geia idau negai gaudia idia stadilaia karana, hisiu bona guba gaudia idia stadilaia karana, tanobada ena idau negai sivaraidia idia tahua, bona ma diba daladia haida ese Bible idia hamomokania, to iseda abidadama be unai hamomokania gaudia dainai sibona lasi. Idia hamomokania gaudia iboudiai amo Bible be ita dekenai Dirava ese ia henia harihari gauna ia hamomokania gauna badana be ena peroveta herevadia idia guguru.

Iehova Dirava be peroveta hereva momokanidia edia Badina. Iena peroveta tauna Isaia ena amo, ia gwau: “Gau ginigunadia​—idia mai vadaeni, to harihari gau matamatadia lau gwauraia hedinarai; idia do hedinarai lasi neganai, umui lau hamaorolaia.” (Isaia 42:9) Ma danu, Bible ia gwau ena torea taudia be Dirava ena lauma helaga eiava gaukara siahuna amo hereva idia abia. Hegeregere, Keristen aposetolo Paulo ia torea bamona, ia gwau: “Buka Helaga ena hereva ibounai be Dirava ena Lauma ese ia havaraia.” (2 Timoteo 3:16) Aposetolo Petro ia torea, ia gwau: “Tau ta ese sibona ena laloa hegeregerena peroveta hereva Buka Helaga lalonai ena anina do ia gwauraia lasi. Badina be peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.” (2 Petero 1:​20, 21) Unai dainai namona be Bible ena peroveta herevadia ita tahua.

Bible lalonai peroveta herevadia handred momo idia noho, idia ta be Asuria ena hanua badana, Nineve, “rara bubua hanua,” ia perovetalaia herevana; unai hanua be lagani 1500 bona ma haida lalodiai gunaguna Middle East kahana taudia ia hagaridia bada. (Nahumu 3:1) To, Nineve ena siahu ia bada herea negana ai, Bible ia peroveta, ia gwau: “[Dirava be] Nineve danu do ia hadikaia vaitani, gabu kaukau ai do ia halaoa, tano gagaena bamona. Bona iena bogaragina ai, mamoe seridia do idia hekure, bona uda boromadia idauidau iboudiai danu. Pelican manu bona migu be ena du latadia dekenai do idia helai. Uindo dekenai be ane ta do ia mai. Ena raka vareai dalana dekenai be dika do ia noho; badina ia be ena daiutu edia haba do ia kokia oho.” (Sefania 2:​13, 14) Hari inai nega ai, vadivadi taudia be idau negai Nineve ia gini gabuna dekenai tano idia haboua gabuna sibona idia itaia. Ma danu, peroveta herevana bamona, mamoe seridia be unuseniai idia loaloa.

Matahanai dekenai, Dirava ena peroveta tauna Daniel ia itaia gauna be doana rua mamoe maruanena ta bona ena matadia padadiai be doana badana ta nanigosi maruanena ta. Nanigosi ese mamoe maruanena ia moia mase, bona ena doana rua ia hakwaidua. Unai murinai, nanigosi ena doana badana ia kwaidu, bona ena gabu dekenai doana hani idia tubu. (Daniel 8:​1-8) Aneru Gabriel ese unai hereva ena anina ia gwauraia: “Hari mamoe maruanena oi itaia mai ena doana rua, unai ena anina be Mede bona Parasa edia pavapavadia. Bona huina bada nanigosi maruanena anina be Greece ena pavapava; bona ena matana padadiai ia noho doana badana anina be pavapava ginigunana. Bona unai doana ia kwaidu bena iena gabu dekenai doa hani idia tubu anina be iena bese ena amo basileia hani do idia gini, to iena siahu hegeregerena lasi.” (Daniel 8:​20-22) Tanobada ena idau negai sivarai ese idia hamomokania hegeregerena, doana rua mamoe maruanena​—Mede bona Parasa Basileiana​—dekenai “Greece ena pavapava” ia kwalimu. Laulau dalana dekenai unai nanigosi maruanena be mai ena “doana badana” bona ia be Alesana Badana. Ia mase murinai, iena jeneral taudia hani ese unai “doana badana” ena siahu idia abia bona idia be “basileia hani” ai idia lao.

Heberu Revarevadia (“Taravatu Gunana”) lalonai Iesu Keriso idia perovetalaia herevadia momo idia guguru vadaeni. Dirava ena lauma dainai Keristen Greek Revarevadia (“Taravatu Matamatana”) idia torea taudia idia gwau unai peroveta hereva haida edia anina be ia dekenai idia guguru. Hegeregere, Evanelia buka ta ia torea tauna Mataio ese ia hahedinaraia inai Bible peroveta hereva haida be Iesu dekenai idia guguru: ia be rami hebou kekenina amo do ia vara, Ia vairanai tau ta do ia lao guna, Ierusalem do Ia vareai neganai doniki do ia gui. (Mataio 1:​18-23; 3:​1-3; 21:​1-9 bona Isaia 7:14; 40:3; Sekaria 9:9 hahegeregeredia.) Unai peroveta herevadia idia guguru dainai, idia hamomokania Bible be momokani Dirava ena lauma helaga amo harihari gauna.

Hari inai negai Bible ena peroveta hereva idia guguru noho dainai idia hamomokania ita be “nega dokonai” ita noho. (2 Timoteo 3:​1-5) Iesu be Basileia siahuna dekenai ia “mai” ena “toana” kahana haida be tuari, aniani lasi negadia, gorere, bona guna unai bamona idia vara lasi tano mareremarere badadia. Unai toana ena kahana ta danu be tanobada ibounai dekenai Iehova ena Witness taudia 4 milion bona ma haida edia hesiai gaukarana, idia be ia gini vadaeni Basileia ena sivarai namona idia harorolaia. (Mataio 24:​3-14; Luka 21:​10, 11) Hari inai negai, Bible ena peroveta hereva haida idia guguru dainai ita diba Iesu Keriso henunai Dirava ena guba gavamani be kamonai taudia totona, moale hanaihanai tanobada matamatana kahirakahira do ia havaraia.​—2 Petero 3:13; Apokalupo 21:​1-5.

Inai sivarai ida ai torea lisi ena hereva kwarana be “Bible Ena Peroveta Hereva Idia Guguru.” Unai lisi dekenai be Bible ena peroveta hereva handred momo amo haida sibona ai torea. Idia haida idia guguru vadaeni be Bible dekenai idia torea, to anina bada peroveta herevadia be hari inai negai idia guguru noho.

Reana, tanobada dekenai idia vara gaudia dainai oi diba Bible ese ia perovetalaia herevadia idia guguru. To namona be edia anina oi tahua noho, ani? Iehova ena Witness taudia do idia moale oiemu ura hegeregerena ma hereva haida oi idia henia totona. Bona Atai Herea Tauna bona iena ura dekenai diba oi tahua noho neganai, namona be oi dekenai unai diba ese ia hamomokania Bible be momokani Dirava ena lauma helaga amo harihari gauna.

[Chart on page 7]

BIBLE ENA PEROVETA HEREVADIA IDIA GUGURU

PEROVETA HEREVANA GUGURU DALANA

[Picture on page 8]

Hari inai negai, tuari, aniani lasi, gorere, bona tano mareremarere dainai, taunimanima momo be dika idia davaria, to nega kahirakahira maino bona moale tanobada matamatana do ia vara