Aonega Dalanai Oi Raka Emu Keristen Ruhaia Mauri Namona Ai

“Umui be ura kwalimu taudia, to inai ura kwalimu do umui gaukaralaia kerere lasi. . . . Dirava ena hesiai taudia mai guia danu do umui noho.”​—1 PETERO 2:16.

1. Adam be dahaka ruhaia mauri namona ia haboioa, bona Iehova be taunimanima dekenai dahaka ruhaia mauri namona do ia henia lou?

ISEDA tama sina ginigunadia be Eden umana lalonai idia kara dika neganai, edia natudia totona ahuna namo hereana ta idia haboioa​—kara dika bona kara bodaga lasi ruhaia mauri namona unai. Unai dainai, ita ibounai be kara dika bona mase ena igui hesiai dekenai ita vara. To, ita moale badina Iehova ia ura abidadama taudia dekenai ruhaia mauri namona do ia henia lou. Hari inai negai, kudou-maoro taudia idia naria noho “Dirava ese iena natuna taudia korikori do ia hedinaraia” totona, unai ia vara neganai “Dirava ese . . . do ia ruhaidia dika ena bodaga dekena amo, vadaeni Dirava ena natuna edia hairai do idia abia, ma Dirava ese edia dala do ia kehoa, vadaeni kwalimu momokani do idia abia.”​—Roma 8:​19-21.

‘Haroro Totona Horoa Ia Abia’

2, 3. (a) “Dirava [ena] natuna taudia” be daidia? (b) Idia be edena bamona idia noho namo, to dahaka maduna idia abia?

² “Dirava [ena] natuna taudia” be daidia? Idia be lauma ena horoa idia abia Iesu ena tadikaka, ia ida guba Basileia lalonai do idia lohia taudia unai. Unai taudia ginigunadia be Keristen taudia ginigunadia edia nega lalonai idia hedinarai. Iesu ese ia hadibaia herevana idia abia dae, taunimanima ia ruhaia hereva momokanina unai, bona Pentekoste 33 C.E. negana amo, Petro ese ia herevalaia gaukara namona idia karaia. Idia dekenai ia torea, ia gwau: “Dirava ese umui ia abia hidi vadaeni, umui be iena bese, umui be King ena boubou helaga karaia taudia, bese helagana, bona Dirava ena orea korikori taudia.”​—1 Petero 2:9a; Ioane 8:32.

³ Idia be Dirava ese ia abia hidi besena​—unai be hahenamo bada hereana ta! Bona hari inai nega lalonai Dirava ia horoa natudia edia orena taudia be Dirava vairanai unai bamona idia gini namo. To unai dagi namona idia abia neganai maduna idia abia danu. Petro ese unai ia herevalaia, ia be ma ia gwau: “Dirava ese umui ia abia hidi, iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho.”

4. Edia Keristen ruhaia mauri namona dainai edena dala ai horoa Keristen taudia be edia maduna idia huaia?

⁴ Horoa Keristen taudia be unai maduna idia huaia bona Dirava ena hoa kara badadia idia gwauraia hedinarai, a? Oibe. Isaia be 1919 murinai idia noho horoa taudia ia perovetalaidia, ia gwau: “Siahu Ibounai Lohiabadana Iehova ena lauma be lau latanai ia noho, badina be Iehova ese lau ia horoa, sivarai namona manau taudia dekenai lau gwauraia totona. Lau ia siaia lalohisihisi taudia hagoadaia totona, idia guidia taudia ruhaia nege bona dibura rumadia ai idia koudia taudia edia matadia hapapadia totona; Iehova ena lalo-namo laganina bona dika davana henia dinana, iseda Dirava ena, lau harorolaia totona.” (Isaia 61:​1, 2) Unai siri ena anina badana be Iesu dekenai ia guguru, to hari inai negai, horoa orena taudia be Iesu ena kara idia tohotohoa, bona idia be ma haida dekenai ruhaia mauri namona ena sivarai namona idia harorolaia goadagoada.​—Mataio 4:​23-25; Luka 4:​14-21.

5, 6. (a) Horoa Keristen taudia idia haroro goadagoada dainai dahaka ia vara? (b) Hutuma bada herea taudia be dahaka hahenamo bona maduna idia moalelaia?

⁵ Idia haroro goadagoada dainai mamoe idaudia haida edia hutuma bada herea be inai dina dokodia ai tanobada dekenai idia hedinarai vadaeni. Idia be bese idauidau iboudiai amo idia mai bona horoa taudia ida Iehova idia hesiai henia hebou, bona hereva momokanina ese idia ia ruhadia nege danu. (Sekaria 8:23; Ioane 10:16) Abraham bamona edia abidadama dainai idia gwauraidia kara maoromaoro taudia bona Iehova Dirava ida idia turana karaia namonamo. Bona Rahaba bamona idia gwauraidia kara maoromaoro taudia dainai idia be roho mauri do idia abia diba​—Aramagedono amo do idia roho mauri unai. (Iakobo 2:​23-25; Apokalupo 16:​14, 16) To unai dagi ena hahenamo badadia idia abia dainai idia be mai edia maduna ma haida dekenai Dirava ena hairai idia harorolaia. Unai dainai Ioane ia itaia idia be taunimanima vairanai Iehova idia hanamoa, “idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ ”​—Apokalupo 7:​9, 10, 14.

⁶ Hari ia ore laganina lalonai, hutuma bada herea taudia, edia namba be milion hani bona ma haida, be horoa Keristen orena taudia orea maragina ida, kahirakahira hora bilion tamona idia gaukaralaia Iehova ena hoa kara badadia namo hereadia idia harorolaia totona. Unai be lauma dalanai idia abia ruhaia mauri namona idia gaukaralaia dalana namo hereana.

“King Do Umui Matauraia”

7, 8. Iseda Keristen ruhaia mauri namona dainai tanobada lohia taudia dekenai dahaka maduna ia noho, bona unai dekenai, dahaka lalohadai kerere ita dadaraia be namo?

⁷ Iseda Keristen ruhaia mauri namona dainai ita be maduna ma haida ita abia danu. Petro ese unai haida ia herevalaia, ia torea ia gwau: “Taunimanima ibounai do umui matauraia. Keristani taudia ibounai do umui lalokau henia. Dirava do umui gari henia. King do umui matauraia.” (1 Petero 2:17) Unai hereva “king do umui matauraia” ena anina be dahaka?

⁸ “King” ena anina be tanobada lohia taudia. Hari inai negai, tanobada dekenai siahu taudia matauraia lasi kara ia vara, bona unai kara be Keristen taudia dekenai ia hanai diba. Reana Keristen tauna ia daradara, ia laloa dahaka dainai ia ese “king” do ia matauraia, badina “Satani ese tanobada taudia ibounai ia gunalaia noho.” (1 Ioane 5:19) Unai hereva dainai, reana ia laloa bema panisi ia abia lasi, ia kerere lasi bema ia ura henia lasi taravatudia haida ia utua, bona ia laloa bema gavamani ese ia davaria lasi neganai ia be takisi do ia henia lasi. To unai be Iesu ena taravatu ia badinaia lasi, ia gwau: “Kaisara ena gau, Kaisara dekenai umui henia.” Bema unai bamona ia karaia ia be ‘iena ruhaia mauri namona ia gaukaralaia kara dika ia karaia totona.’​—Mataio 22:21; 1 Petero 2:16.

9. Dahaka badina rua dainai tanobada lohia taudia ita kamonai henidia?

⁹ Keristen taudia be siahu taudia idia matauraidia bona edia hereva idia badinadia be namo, Dirava ese ia henia edia dagi ena siahu hegeregerena. (Kara 5:29) Badina be dahaka? Petero Ginigunana 2:14 dekenai, Petro be badina toi ia gwauraia ia ese gavana taudia ia herevalaia neganai, ia gwau: “[Dirava] ese idia ia abia hidi, kara dika taudia do idia panisia, to kara namo taudia do idia hanamoa totona.” Panisi ita abia garina be badina namona ita be siahu taudia ita badinaia totona. Bema Iehova ena Witness tauna ta idia fainia eiava dibura rumana dekenai idia atoa ia be ta ia botaia dainai, ia henao dainai, eiava ma taravatu ta ia utua dainai, unai be hemarai dikadika gauna! Taunimanima haida be mai moale danu idia ura unai bamona sivarai idia halasia! To, gavamani taudia edia taravatu ita badinaia kara ia hedinarai neganai, kudou-maoro gavamani taudia ese ita idia hanamoa. Reana dala do idia kehoa sivarai namona harorolaia gaukarana ita habadaia diba totona. Ma danu, ‘kara namo dekena amo kavakava taudia edia hereva kava do ita koua.’ (1 Petero 2:15b) Unai be badina namona iharuana siahu taudia ita badinaia totona.​—Roma 13:3.

10. Dahaka badina badana dainai tanobada siahu taudia ita badinadia?

¹⁰ To badina namo hereana ma ta ia noho. Iehova ese gwaumaoro ia henia dainai siahu taudia idia noho. Petro ia hereva bamona, Iehova ese politikol taudia ia “abia hidi,” bona “Dirava ia ura” Keristen taudia ese idia badinadia. (1 Petero 2:15a) Unai hegeregerena, aposetolo Paulo ia gwau: “Gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.” Unai dainai, Bible ena diba hegeregerena iseda lalona be ita ia veria siahu taudia ita badinadia totona. Bema idia ita badinaia lasi ita be “Dirava danu [ita] kamonai henia lasi.” (Roma 13:​1, 2, 5) Ita daika ia ura Dirava ese ia gwauraia hidi dalana ia dadaraia? Unai be Keristen ruhaia mauri namona gaukaralaia kerere dalana momokani!

‘Tadikaka Lalokau Henidia’

11, 12. (a) Tadikaka dekenai iseda Keristen ruhaia mauri namona dainai dahaka maduna ia noho? (b) Daidia ita lalokau henidia bada be namo, bona badina be dahaka?

¹¹ Petro be ma ia gwau namona be Keristen tauna ese “Keristani taudia ibounai do [ia] lalokau henia.” (1 Petero 2:17) Unai be Keristen ruhaia mauri namona dainai ita abia maduna ma ta. Ita momo be kongregesen ta dekenai ita noho. Momokani, ita ibounai be orea tamona lalonai ita noho, bona tanobada hegegemadai unai Keristen taudia iboudiai be tadikaka bamona. Idia dekenai iseda lalokau ita hahedinaraia neganai be iseda ruhaia mauri namona ita gaukaralaia aonega dalana.​—Ioane 15:​12, 13.

¹² Aposetolo Paulo ese Keristen haida ia gwauraidia, ia gwau ita lalokau henidia bada be namo. Ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho nega ibounai. Gabeai idia ese Dirava ena vairanai edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia henunai do umui noho. Bema inai bamona umui karaia neganai edia gaukara mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” (Heberu 13:17) Kongregesen lalonai hakaua taudia be elda taudia. Momokani, unai taudia be idia goevadae lasi. To, Hakaua Oreana ese idia dekenai dagi idia henia. Ita idia hakaua edia kara namona amo, bona edia maduna be ita idia naria. Unai be gaukara maduna mai metau hereana! (Heberu 13:7) Ita moale, badina kahirakahira kongregesen iboudiai dekenai gaukara hebou karana idia karaia, bona elda taudia be unai kongregesen dekenai idia gaukara neganai idia moale. Taunimanima be elda taudia danu idia gaukara hebou lasi neganai elda taudia edia gaukara be ia auka. Elda tauna ese ena gaukara do ia karaia noho, to Paulo ia hereva bamona, mai “lalohisihisi” danu do ia karaia. Ita ura lasi momokani iseda kara dainai elda taudia idia lalohisihisi! Ita ura mai moale danu edia gaukara idia karaia, badina unai neganai ita idia hagoadaia diba.

13. Elda taudia danu ita gaukara hebou daladia haida be dahaka?

¹³ Elda taudia danu ita gaukara hebou daladia haida be dahaka? Dala ta be ita heduru Kingdom Hall hanamoa bona hagoevaia noho totona. Ma dala ta be gorere taudia eiava tauanina dika taudia do ita vadivadi henidia. Ma danu, namona be ita hekwarahi bada lauma dalana dekenai ita goada noho totona, unai neganai ita be haida dekenai metau do ita henidia lasi. Gaukara hebou dalana badana ta be ita heduru kongregesen taudia be tauanina ai bona lauma dalanai idia goeva totona, unai ita karaia diba iseda kara ia maoro neganai bona ta ia kara dika bada neganai elda taudia ita hamaorodia neganai.

14. Elda taudia be ta dekenai sisiba karana idia karaia neganai edena dala ai ita heduru diba?

¹⁴ Nega haida, kongregesen ia goeva noho totona, elda taudia be ia helalo-kerehai lasi kara dika tauna be kongregesen murimurinai idia atoa. (1 Korinto 5:​1-5) Unai ese kongregesen taudia ia naridia. Reana unai ese kara dika tauna ia durua danu. Nega momo, unai bamona ta be kongregesen murimurinai idia atoa dainai unai ese ia durua ia lalo-parara totona. To, bema oiemu turana eiava varavara ta be kongregesen murimurinai idia atoa be edena bamona? Reana ia be iseda tamana eiava sinana, eiava iseda natuna mero eiava kekeni. Elda taudia ese idia karaia karana ita do matauraia noho, a? Momokani, reana unai be ia auka sisina. To, kongregesen ia hadikaia diba tauna be murimurinai idia atoa neganai, bema ita be elda taudia edia hereva ita dadaraia bona unai tau be lauma dalanai ita do bamoa noho neganai, iseda ruhaia mauri namona ita gaukaralaia kerere unai! (2 Ioane 10, 11) Iehova ena taunimanima momo ita hanamoa badina unai gaudia dekenai elda taudia ida idia gaukara hebou. Unai dainai, Iehova ena orea ia goeva noho bona inai tanobada ena dika ese ia hadikaia lasi.​—Iakobo 1:27.

15. Bema ta ese kara dika badana ia karaia, dahaka ia karaia haraga be namo?

¹⁵ To edena bamona bema ita be kara dika badana ta ita karaia? King David ese Iehova ia ura henia taudia ia gwauraidia, ia gwau: “Daika ese Iehova ena ororo dekenai do ia daekau diba, bona daika be iena gabu helagana ai do ia gini diba? Imana ia goeva bona lalona ia goeva tauna, ia be kara havara ia ura lasi tauna, bona iena gwauhamata ia karaia koikoi lasi tauna ese do ia karaia diba.” (Salamo 24:​3, 4) Bema gau ta dainai iseda ‘imana bona lalona idia goeva lasi,’ namona be ita hamaoromaoroa haraga. Iseda mauri hanaihanai do ita haboioa diba.

16, 17. Badina be dahaka kara dika badadia ia karaia tauna be sibona ia hanamoa toho be namo lasi?

¹⁶ Haida be edia kara dika badadia idia hunia gwauraia, reana inai bamona idia laloa: ‘Lau be Iehova dekenai lau gwauraia hedinarai vadaeni bona lau helalo-kerehai vadaeni. Unai dainai badina be dahaka elda taudia lau hamaorodia be namo?’ Reana kara dika tauna ia hemarai eiava ia gari elda taudia be dahaka do idia karaia garina. To namona be ia laloatao, ena be Iehova sibona ese kara dika amo ita do ia hagoevaia diba, to elda taudia dekenai maduna badana ia henia idia be kongregesen ena goeva idia naria totona. (Salamo 51:2) Idia noho gorere hanamoa totona, bona “Dirava ena taudia ibounai do [idia] durua totona.” (Efeso 4:12) Lauma dalana ai ita gorere to edia heduru ita tahua lasi neganai be hegeregere ita gorere neganai doketa ena heduru ita tahua lasi.

¹⁷ Idia sibona edia hekwakwanai idia hanamoa toho taudia idia davaria hua momo eiava lagani momo murinai edia lalona ena mamina ia do dika noho. Gau dika hereana be, edia kara dika badana ginigunana idia hunia taudia be nega iharuana eiava nega ihatoina edia kara dika dekenai idia moru lou. Elda taudia ese idia davaria neganai unai be kara dika karaia loulou karana. Iakobo ena sisiba badinaia karana be namo herea! Ia torea, ia gwau: “Umui ta ia gorere, a? Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, [Iehova] ena ladanai.” (Iakobo 5:14) Bema dala ia do noho lauma gorere oi hanamoa totona namona be elda taudia dekenai oi lao. Bema ita naria nega daudau, reana kara dika dekenai ita manada bona iseda lalona ita ha-aukaia.​—Kohelete 3:3; Isaia 32:​1, 2.

Tauanina Toana bona Moale Karana

18, 19. Badina be dahaka pris tauna ta ese Iehova ena Witness taudia ia hanamoa?

¹⁸ Lagani ima gunanai, edia dubu magasin ta lalonai, Italy ena Katolik pris tauna ta ese Iehova ena Witness taudia ia hanamoa.a Ia gwau: “Lau ese Iehova ena Witness taudia lau ura henidia; do lau koikoi lasi. . . . Lau davaria taudia edia kara be namo momokani, edia gado regena be bada lasi . . . [bona] idia be lalona veria taudia. Namona be ita lalo-parara, taunimanima ese hereva momokani idia kamonai henia totona, henia dalana be gau badana, ani? Namo lasi hereva momokani idia harorolaia taudia idia hesiku bamona, namo lasi edia bonana ia dika, namo lasi edia toana ia dika, bona namo lasi edia dabua idia atoa namonamo lasi, ani?”

¹⁹ Unai hereva ese idia hahedinaraia, unai pris tauna ese Witness taudia edia toana bona hereva idia henia dalana dainai ia hoa. Ia hedinarai, ia davaria Witness taudia ese lagani momo lalodiai “hesiai tauna mai ena kamonai bona mai ena kara maoromaoro” oreana idia henia sisiba herevana idia badinaia. (Mataio 24:45) Bible ia gwau namona be hahine be “mai manau bona mai hemataurai” danu dabua do idia karaia. (1 Timoteo 2:9) Inai kara dika negana lalonai, unai sisiba be namo herea tatau dekenai danu. Dirava ena Basileia idia harorolaia taudia edia toana taunimanima vairanai ia namo be gau badana, ani?

20. Badina be dahaka Keristen tauna be sibona ena dabua hahedokilaia dalana be nega ibounai ia laloa bada be namo?

²⁰ Reana haida idia gwau hebou bona haroro gaukara dekenai edia dabua toana ia namo be gau badana, to reana idia laloa ma nega haida Bible ena hahegani idia badinaia lasi be ia hegeregere. To ita be Dirava ena Basileia harorolaia taudia be nega haida ita laloaboio be namo, a? Momokani, nega haida iseda toana ia idau gaukara ta ita karaia dainai. Bema Kingdom Hall haginia gaukara ita karaia iseda dabua be ta, to unai Kingdom Hall ena hebou dekenai ita lao neganai iseda dabua ma ia idau. Ita laga-ani neganai reana iseda dabua toana be ita laga-ani bamona. To taunimanima vairanai, namona be nega ibounai mai manau bona mai hemataurai danu dabua do ita karaia.

21, 22. Edena dala ai ita idia naria ita idia hadikaia moale karadia ita karaia garina, bona edena dala ai unai sisiba ita laloa be namo?

²¹ Moale karana dekenai sisiba momo ita abia. Taunimanima​—memero kekeni danu​—ese moale karadia idia karaia be namo. Sediual dekenai nega oi atoa ruma bese ese moale karadia haida do idia karaia totona be kara dikana lasi eiava nega haorea kava karana lasi. Iesu ese ena hahediba taudia ia hamaorodia idia “laga-ani sisina.” (Mareko 6:31) To naria namonamo, namo lasi moale karana ese iduara do ia kehoa bena lauma gaukarana do ia dika. Hari ita noho negana lalonai, moale karadia momo dekenai sihari kava, dagedage, gari dikadika, eiava lauma hereva henia karadia idia hahedinaraia bada. (2 Timoteo 3:3; Apokalupo 22:15) Hesiai tauna mai ena kamonai bona mai ena kara maoromaoro oreana ia gima noho dainai unai gaudia idia sisibalaia momo. Oi laloa unai sisiba ese oiemu ruhaia mauri namona ena moale idia koua momo, a? Eiava oi moale badina Iehova ena orea ese oi idia laloa momo dainai unai gau dikadia be hanaihanai idia sisibalaia, a?​—Salamo 19:7; 119:95.

²² Namo lasi ita laloaboio iseda ruhaia mauri namona be Iehova ena amo ia mai, bona ita be gaukaralaia dalana dekenai mai iseda maduna. Bema sisiba namona ita laloa lasi bona dala kererena ita abia hidi, ma ta ita samania diba lasi. Aposetolo Paulo ia gwau: “Ita ibounai ta ta iseda kara Dirava vairana dekenai do ita hedinaraia.”​—Roma 14:12; Heberu 4:13.

Dirava Ena Natudia Edia Ruhaia Mauri Namona Dalana Oi Tahua

23. (a) Ita be hari ruhaia mauri namona dekenai dahaka hahenamo ita moalelaia? (b) Dahaka hahenamo totona ita naria mai ura bada ida?

²³ Ita be hahenamo momo abia besena. Tomadiho koikoi bona gari kava karana amo ita ia ruhaia vadaeni. Iesu Keriso ia henia boubouna dainai, ita be kara maoromaoro taudia ia gwauraia bona mai lalona goeva amo Iehova ita tomadiho henia diba, lauma dalanai kara dika bona mase amo ita ia ruhaia vadaeni. Bona nega kahirakahira “Dirava ese iena natuna taudia korikori do ia hedinaraia” negana do ia mai. Aramagedono neganai, Iesu ena tadikakadia edia guba hairaina dekenai do idia hedinarai, idia be Iehova ena inai taudia do idia hadikadia ore. (Roma 8:19; 2 Tesalonika 1:​6-8; Apokalupo 2:​26, 27) Unai murinai, Dirava ena natudia be do idia hedinarai, idia be Dirava ena terono amo taunimanima ese hahenamo idia abia dalana. (Apokalupo 22:​1-5) Gabeai, Dirava ena natudia be unai bamona idia hedinarai neganai abidadama taudia be hahenamo do idia abia, Dirava ena natudia edia ruhaia mauri namona hairaina do idia abia. Unai nega oi naria noho mai emu ura bada, a? Namona be aonega dalanai oiemu Keristen ruhaia mauri namona oi gaukaralaia namonamo. Hari Dirava ena hesiai gaukara oi karaia, bona ela bona hanaihanai unai ruhaia mauri namona do oi moalelaia diba!

[Footnotes]

Riviu Mauana

◻ Edena dala ai horoa taudia bona mamoe idaudia be Iehova idia hanamoa?

◻ Badina be dahaka Keristen taudia be tanobada siahu taudia idia matauraia be namo?

◻ Edena daladia ai Keristen taudia ese elda taudia idia durua diba?

◻ Badina be dahaka dabua hahedokilaia karana dekenai, Iehova ena Witness taudia be tanobada taudia momo amo idia idau?

◻ Moale karadia dekenai dahaka ita dadaraia be namo?

[Picture on page 17]

Elda taudia ita lalokau henidia bada bona ita durudia be namo

[Pictures on page 18]

Namona be Keristen ena dabua toana be mai manau ida ia hahedokilaia namonamo bona iena gaukara ida ia hegeregere