Tanobada Ibounai Dekenai Taunimanima Haoda Henia
“Sivarai Namona lau harorolaia dainai lau heagi diba lasi. Badina unai bamona do lau karaia be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!”—1 KORINTO 9:16.
1, 2. (a) Daidia ese 1 Korinto 9:16 ena hereva idia badinaia, bona dahaka dainai unai bamona oi haere? (b) Iehova ena Witness taudia ese dahaka maduna idia huaia?
LAGANI 1900 ena nega amo daidia ese Paulo ena hereva atai siri dekenai idia badinaia? Tanobada ibounai dekenai “idia diba lauma gaudia idia tahua be namo” tataudia bona hahinedia idia haoda henidia taudia milion momo be daidia? (Mataio 5:3, NW) Ena be dibura rumana ai idia atodia eiava idia hamasedia diba, bona tano momo dekenai unai bamona idia karaia vadaeni, to unai gaukara Keriso ena hahegani Mataio 24:14 dekenai idia hagugurua totona, idia karaia taudia be daidia?
2 Ripoti ese haere ia henia: Unai be Iehova ena Witness taudia. Lagani gunanai, tano idauidau 211 bona gado 200 bona ma haida lalodiai, ruma ta ruma ta ai ‘sivarai namona idia harorolaia’ Witness taudia edia namba be milion hani ia hanaia. Unai be idia abia hidi misinari taudia sibodia lasi. To, Iehova ena Witness taudia iboudiai edia maduna be ruma ta ruma ta dekenai bona ma nega haida dekenai danu haroro bona hahediba gaukaradia idia karaia. Dahaka dainai idia laloa edia tomadiho be ma taunimanima haida dekenai idia hadibaia be namo? Badina idia lalo-parara taunimanima be diba idia abia neganai maduna idia abia danu.—Esekiel 33:8, 9; Roma 10:14, 15; 1 Korinto 9:16, 17.
Tanobada Ibounai Dekenai Taunimanima Haoda Henia be Gaukara Badana
3. Unai haoda gaukara ena bada be edena bamona?
3 Unai haoda gaukara badana be sinavai ta eiava gohu ta eiava davara badana dekenai sibona idia karaia lasi. To, Iesu ena hahegani hegeregerena, idia be “bese ibounai dekenai” do idia karaia. (Mareko 13:10) Ena Tamana dekenai ia do daekau lasi neganai, Iesu ese ena hahediba taudia dekenai ia gwau: “Umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.”—Mataio 28:19, 20.
4. (a) Idau negai, Iesu murinai idia raka Iuda taudia be reana dahaka hereva dainai idia hoa? (b) Iehova ena Witness taudia idia diba edia gaukara ena bada be dahaka?
4 Idau negai, Iesu murinai idia raka Iuda taudia be reana unai hereva dainai idia hoa. Ia ese iena Iuda hahediba taudia ia hamaorodia mai edia “miro” Idau Bese taudia dekenai do idia lao idia hadibadia totona. Unai hereva idia badinaia totona gau badana be edia lalohadai gunana idia haidaua. (Kara 10:9-35) Idia be dala lasi badina parabole ta amo Iesu ese idia ia hamaoroa “uma be tanobada.” Unai dainai, hari inai nega lalonai, Iehova ena Witness taudia be mai edia gwaumaoro tanobada ibounai dekenai lauma dalanai haoda gaukarana idia karaia totona. Taravatu ia noho lasi idau tano amo idia mai haoda taudia be “haida edia davara” dekenai gwarume idia tahua lasi totona, eiava kone amo “20 kilomita” murinai idia haoda diba totona, to Dirava ese ia haganidia dainai lauma dalanai haoda gaukarana dekenai unai bamona taravatu ia noho lasi. Gabu haida dekenai haroro gaukara idia koua toho neganai, mai aonega danu idia gaukara be namo. To, gwarume idia do tahua goadagoada noho. Dahaka dainai? Badina tanobada dekenai idia vara gaudia bona Bible ena peroveta hereva idia guguru karadia ese idia hahedinaraia tanobada ibounai dekenai taunimanima haoda henia gaukarana be kahirakahira do ia ore.—Mataio 13:38; Luka 21:28-33.
Tanobada Ibounai Dekenai Taunimanima Haoda Henia Gaukarana Ia Bada Ia Lao
5. Tanobada ibounai dekenai taunimanima haoda henia gaukarana amo idia abia taudia edia toana be edena bamona?
5 Lagani 1935 vairanai idia karaia haroro gaukarana dainai, horoa Basileia taudia be bese idauidau amo “idia abia,” unai dainai, guba orea taudia edia namba kahirakahira ia guguru bamona. Unai dainai, lagani 1935 dekena amo, Iehova ena Witness taudia ese “manau taudia” idia tahudia badina idia be “tanobada do idia abia.” (Salamo 37:11, 29) Unai taudia be ‘kara dika rohorohodia iboudiai dainai idia taitai bona idia ganagana.’ “Hisihisi bada herea” ese Satana ena kara dika tanobadana ia do haorea lasi bona idia tomadiho henia taudia idia do mase ore lasi bona “lahi badana” dekenai ia do negedia lasi neganai, unai taitai taudia be Dirava ena Basileia ena lohia dalana idia abia dae.—Esekiel 9:4; Mataio 13:47-50; 24:21.
6, 7. (a) Lagani 1943 ai, haroro gaukara durua totona dahaka idia karaia? (b) Unai amo dahaka ia vara?
6 Tanobada ibounai dekenai iseda haoda gaukara amo gwarume momo ita abia, a? Namona be inai sivarai oi laloa bena haere do oi diba. Lagani 1943 ai, Tanobada Ibounai Tuarina Iharuana ia vara, to Iehova ena Witness taudia edia hedikwota, Brooklyn, New York dekenai, unai abidadama horoa tadikaka idia diba tanobada ibounai dekenai taunimanima haoda henia gaukara badana do idia karaia. Vadaeni hegaegae totona dahaka idia karaia?a—Apokalupo 12:16, 17.
7 Lagani 1943 ai, Watchtower Society oreana ese misinari sikuli, ena ladana be Gilead (Heberu, “Hereva Hedinarai Nadi”; Genese 31:47, 48), idia haginia, bona hua 6 hua 6 iboudiai lalodiai misinari taudia 100 100 idia hadibaia bena idia siaidia lao lauma dalanai tanobada ibounai dekenai taunimanima idia haoda henidia totona. Unai lagani lalonai, taunimanima idia haoda henia Witness taudia be 126,329 sibona, bona tano idauidau 54 sibona dekenai idia gaukara. To, lagani 10 murinai, Witness taudia edia namba ia daekau 519,982 dekenai, bona tano idauidau 143 dekenai idia gaukara! Momokani, Gilead School dekena amo gari lasi haoda tatau bona hahine idia raka lasi, bona mai edia ura danu, idau tano dekenai idia lao taunimanima haoda henidia totona. Unai dainai, kudou-maoro taudia tausen momo ese edia hereva idia abia dae. Gunaguna, unai misinari taudia, bona unai gabu ena Witness haida danu idia gaukara hebou dainai, harihari orea ia bada ia lao noho.
8, 9. (a) Misinari gaukara namona idia karaia taudia haida be daidia? (b) Misinari idia gaukara gabudia ai gaukara ia bada ia lao ena sivarai be dahaka? (1992 Yearbook of Jehovah’s Witnesses itaia danu.)
8 Gilead School ena klas gunadia dekenai idia lao taudia momo be idia siaia tanona dekenai idia do noho, ena be edia lagani be 70 eiava 80 idia hanaia vadaeni. Idia edia haheitalai ta be lagani 82 tauna, Eric Britten, bona ena hahine, Christina, idia be lagani 1950 lalonai, Gilead ena klas namba 15 idia karaia bona idia do noho Brazil dekenai. Haroro gaukara totona Brazil dekenai idia siaia neganai, unai tano dekenai Witness taudia be 3,000 idia do abia lasi. To hari idia be 300,000 idia hanaia! Momokani, Brazil dekenai ‘maragina ta be bese badana mai goadana ta ai ia lao,’ badina taunimanima haoda henia gaukarana amo gwarume momo idia abia.—Isaia 60:22.
9 Africa dekenai misinari taudia be edena bamona? Idia momo be unai taudia edia kara idia manadalaia bona Africa taudia idia ura henidia bada. Unai taudia rua be tadikaka John Cooke bona ena varavara Eric Cooke bona edia hahine, Kathleen bona Myrtle. Idia be South Africa dekenai haroro gaukara idia karaia. Lagani 1947 ai, John bona Eric be Gilead ena klas namba 8 idia karaia. Idia ruaosi be Angola, Zimbabwe, Mozambique, bona South Africa dekenai haroro gaukara idia karaia. Africa dekenai misinari taudia haida idia gorere dainai, tuari dainai eiava dagedage dainai idia mase; vanegai, Liberia dekenai tuari ia vara neganai, Alan Battey bona Arthur Lawson idia mase. To, Africa dekenai taunimanima haoda henia gaukarana amo gwarume momo idia abia. Unai gabu badana dekenai Witness taudia edia namba be 400,000 idia hanaia.
Iboudiai be Mai Edia Gaukara
10. Dahaka dainai bona edena dala amo pioneer taudia ese gaukara namona idia karaia?
10 Namona be inai oi laloa, ena be misinari taudia edia namba be tausen haida, pablisa bona pioneer taudiab edia namba be milion haida. Tanobada ibounai dekenai unai taudia ese haroro gaukara ena kahana badana idia karaia. Lagani 1991 ai pioneer bona loaloa hesiai taudia edia averes be 550,000 ia hanaia. Unai abidadama Witness taudia momo be taunimanima haoda henia gaukarana idia goadalaia be gaukara badana ta, idia be hua ta ta iboudiai edia haroro gaukara hora ena averes be 60 ia lao 140. Idia momo be sibodia edia ura idia dadaraia bona edia moni idia negea unai gaukara idia karaia totona. Badina be dahaka? Badina idia be edia kudouna ibounai ida, edia lalona ibounai ida, edia mauri ibounai ida, bona edia goada ibounai ida Iehova idia lalokau henia, bona edia dekena taudia idia lalokau henidia sibodia idia lalokau henidia hegeregerena.—Mataio 22:37-39.
11. Dahaka ese ia hahedinaraia Iehova ena lauma helaga be iena taunimanima dekenai ia noho?
11 Ena be nega haida sibona hesiai gaukarana idia karaia diba, to Witness taudia milion toi mai kahana edia dala hegeregerena Iehova ena hesiai gaukara idia goadalaia; idia be edena bamona? Idia haida be hahine, haida be mai edia natudia maragidia, to tanobada ibounai lalonai taunimanima haoda henia gaukarana idia durua totona edia mai anina bada negadia idia henia. Momo be headava tatau eiava mai edia natudia bona moni gaukara idia karaia; to, Saturday, Sunday, bona hanuaboi dekenai idia diba lasi taudia dekenai hereva momokanina idia hadibaia totona edia nega idia henia. Bona idia headava lasi taudia bona memero kekeni momo herea ese edia haroro bona edia kara namo amo hereva momokani ena namo idia hahedinaraia. Edena tomadiho orea ma ta ena memba taudia milion hani be hua ta ta iboudiai Dirava ena Basileia lohia sivarai namona idia harorolaia davana lasi dekenai? Unai ese ia hahedinaraia Iehova ena lauma helaga ese unai gaukara taudia ia durudia!—Salamo 68:11; Kara 2:16-18; Sekaria 4:6 itaia danu.
Gaukara Ia Bada Noho Idia Durua Gaudia
12. Taunimanima ese hereva momokani idia abia dae ena badina be dahaka, bona edia bada be dahaka?
12 Lagani ta ta iboudiai haroro gaukara ia bada dainai orea ia bada ia lao. Lagani 1991 ai, ranu amo idia habapatisodia Witness matamatadia edia namba be 300,000 ia hanaia. Unai namba be hegeregere kongregesen 3,000 lalodiai Witness taudia 100 100 idia vareai bamona! Unai gaukara badana be edena bamona idia karaia diba? Namona be Iesu ena hereva ita laloatao, ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba . . . Peroveta taudia ese inai bamona idia torea, idia gwau, ‘Idia ibounai Dirava ese do ia hadibaia.’ Egu Tamana dekenai idia kamonai henia bona ena hadibaia herevadia idia abia dae taudia ibounai be lau dekenai idia mai.” Unai dainai, tanobada ibounai dekenai taunimanima haoda henia gaukara amo taunimanima ita abia be ita sibona mo eda goada amo lasi. Iehova ese unai kudou-maoro taudia edia kudouna ia diba, bona ia dekenai ia veridia.—Ioane 6:44, 45; Mataio 10:11-13; Kara 13:48.
13, 14. Witness taudia momo ese idia hahedinaraia kara namona ta be dahaka?
13 To, ia dekenai taunimanima ia veridia totona Iehova ese taunimanima haoda henia taudia ia gaukaralaidia. Unai dainai, edia teritori dekenai taunimanima idia haoda henia neganai, edia lalohadai taunimanima dekenai bona edia gaukara do idia namo be mai anina bada. Ita moale badina taunimanima momo herea ese Paulo ena hereva Galatia taudia dekenai idia badinaia, ia gwau: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.”—Galatia 6:9.
14 Lagani momo lalodiai mai edia abidadama Witness taudia momo be idia haroro, bona tanobada dekenai idia vara gaudia idia itaia noho. Idia be Nazi, Fascist, bona unai bamona gavamani ma haida edia tubu bona edia moru idia itaia vadaeni. Idia haida be lagani 1914 amo idia vara tuaridia idia itaia. Idia ese tanobada ena gavamani idia gunalaia taudia idia itaia idia ese edia abidadama be League of Nations bona gabeai United Nations oreadia dekenai idia atoa neganai. Idia itaia tano momo lalodiai gavamani ese Iehova ena gaukara idia taravatulaia bena murinai gwaumaoro idia henia edia gaukara idia karaia totona. Ena be unai kara idauidau idia vara, to Iehova ena Witness taudia be kara namo karana idia karaia noho, danu idia be taunimanima haoda henia gaukarana idia karaia noho. Nega daudau lalonai edia abidadama karana idia dogoatao!—Mataio 24:13.
15. (a) Tanobada ibounai dekenai taunimanina ita haroro henidia totona, ita idia durua gaudia be dahaka? (b) Oiemu haroro teritori dekenai unai heduru gaudia be edena bamona oi idia durua?
15 Tanobada ibounai dekenai ma gau haida ese iseda orea ia durua ia tubu bada totona. Gau ta be iseda haroro herevadia bona bukadia be nega ta ta ai ita haidaua iseda teritori dekenai idia noho taudia ita durudia totona. Idau tanodia amo idia mai taudia edia kara, edia tomadiho, bona edia gado be idauidau momo, to Iehova ena Witness taudia idia goada karaia edia lalohadai idauidau idia hadobua totona. Bona heduru bada gauna ma ta be iseda tanobada ibounai oreana ese gado 200 bona ma haida lalodiai Bible bona Bible durua bukadia idia karaia. New World Translation of the Holy Scriptures ena buka ibounai eiava kahana ta, be gado 13 dekenai idia karaia, Czech bona Slovak gado dekenai danu. Mauri Hanaihanai Tanobada Dekenai Oi Abia! buklet be gado idauidau 198 dekenai idia karaia, bona 72 milion idia printaia. Tau Hereadaena bukana be gado idauidau 69 dekenai idia hahanaia vadaeni. Mankind’s Search for God bukana be gado idauidau 29 dekenai idia halasia, unai buka ese tanobada ibounai ena tomadiho badadia edia vara dalana bona edia hahediba herevadia ia hahedinaraia, bona tanobada ibounai dekenai taunimanima haoda henia gaukarana dekenai ia be heduru bada gauna.
16. Idau tano dekenai taunimanima durudia totona haida be dahaka idia karaia?
16 Tanobada ibounai dekenai taunimanima haoda henia gaukarana ia durua gauna ma ta be dahaka? Taunimanima tausen momo idia ura ‘Makedonia ai idia lao.’ Dirava ia boiria dainai, Paulo be ia ura Asia Minor ia rakatania bona Makedonia, Europe dekenai do ia lao. Ia hegeregerena, Witness taudia momo herea idia ura idau hanua bona idau tano dekenai idia lao badina unuseniai Basileia haroro taudia be idia momo lasi, bona elda bona hesiai taudia be idia momo lasi dainai. Idia be moni gaukara idia karaia haoda taudia bamona, gwarume idia abia lasi neganai, idia lao ma gabu ta dekenai idia haoda totona, unuseniai vanagi be momo lasi bona gwarume momo idia noho.—Kara 16:9-12; Luka 5:4-10.
17. ‘Makedonia ai idia lao’ taudia edia haheitalai namona oi gwauraia.
17 Idia karaia ore vadaeni Gilead misinari sikuli kosi idia karaia taudia haida be Europe tanodia amo, idia be English gado idia dibaia bona sibodia idia henia idau tano bona idau kara idia karaia taudia dekenai idia lao, hesiai gaukara idia karaia totona. Unai hegeregerena, Hesiai Gaukara Hadibaia Sikulina dekenai, idia headava lasi tatau be hua rua dekenai idia hadibaia bena murinai idia siaidia idau tano dekenai edia kongregesen bona sekit idia hagoadadia totona. Hari, Eastern Europe dekenai bona guna idia gwauraia Soviet ripablik dekenai, taunimanima haoda henia gaukara namona be ia kehoa.—Roma 15:20, 21 itaia danu.
18. (a) Dahaka dainai pioneer taudia momo be idia haroro namonamo diba? (b) Kongregesen lalonai idia be edena bamona haida idia durudia diba?
18 Tanobada ibounai dekenai taunimanima haoda henia gaukara durua gauna ma ta be regular pioneer taudia idia lao henia Pioneer Gaukara School. Pura rua dekenai, Pioneer Gaukara School Ena Buka dekena amo idia hadibaia, unai buka idia karaia regular pioneer taudia sibodia durudia totona, edia haroro dalana idia hanamoa totona idia be inai sivarai idia kamonai: “Lalokau Ena Dala Oi Tahua,” “Iesu Tohotohoa,” bona “Emu Hadibaia Dalana Hanamoa.” Kongregesen taudia iboudiai idia moale badina unai tadikaka be ruma ta ruma ta gaukara karaia namonamo dalana idia diba bona idia ese haida do idia hadibaia diba haoda gaukara badana do idia karaia totona!—Mataio 5:14-16; Filipi 2:15; 2 Timoteo 2:1, 2.
Iseda Gaukara Ita Hanamoa Diba, A?
19. Aposetolo Paulo bamona, iseda haroro gaukara be edena bamona ita hanamoa diba?
19 Paulo bamona, ita ura ita goada karaia vaira negana ita laloa noho totona. (Filipi 3:13, 14) Ena be taunimanima be idau tanodia amo bona kara idauidau idia vara, to idia iboudiai ia hereva henidia diba. Ia ese idia laloa bada gaudia ia diba, bona edia mauri dala hegeregerena edia lalona ia veria diba ena hereva idia lalohadailaia namonamo totona. Basileia ena sivarai ita harorolaia neganai namona be ita gima noho, bema ruma tauna ese unai sivarai ia moalelaia iseda kiki herevana do ita haidaua ia laloa bada herevana ita kikilaia totona, unai dala amo Bible stadi ita hamatamaia diba. Ita dekenai Bible stadi durua bukadia be momo; namona be ruma tauna ia ura kamonai henia sivaraina ia kikilaia bukana ita henia toho ia danu ita stadi totona. Haroro herevana ita haidaua taunimanima edia kara idauidau dainai bona taunimanima idauidau edia lalona veria totona be gau badana gwarume momo ita abia totona.—Kara 17:1-4, 22-28, 34; 1 Korinto 9:19-23.
20. (a) Hari inai nega lalonai, dahaka dainai iseda taunimanima haoda henia gaukarana be mai anina bada? (b) Hari inai negai, ita ta ta ibounai eda maduna be dahaka?
20 Hari inai nega lalonai, dahaka dainai tanobada ibounai dekenai taunimanima haoda henia gaukara namona be mai anina bada? Badina Bible ena peroveta herevadia bona guna idia vara gaudia bona hari idia vara gaudia ese idia hahedinaraia Satana ena tanobada be kahirakahira do ia ore. Unai dainai, ita Iehova ena Witness taudia be dahaka ita karaia be gau badana? Inai magasin dekenai idia torea sivarai toi ese idia hahedinaraia goevagoeva namona be iseda gabu dekenai mai goada danu tanobada ibounai dekenai haoda gaukarana ita karaia. Bible ia gwau Iehova ese iseda haoda gaukara badana do ia laloaboio diba lasi. Paulo ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui ia henia, vadaeni Dirava ena taudia umui durua, bona umui durua noho danu. Ai ura bada umui ta ta ese unai bamona do umui karaia goadagoada noho ela bona emui mauri dokona. Badina be unai neganai umui naria noho davana namona do umui abia.”—Heberu 6:10-12.
[Footnotes]
a Revelation—Its Grand Climax At Hand! bukana, rau 185 bona 186 oi itaia, Watchtower Bible and Tract Society of New York, Inc. ese unai buka idia halasia.
b “Pioneer pablisa . . . Iehova ena Witness taudia edia orea lalonai ena nega ibounai hesiai gaukara ia karaia tauna.”—Webster’s Third New International Dictionary.
Inai Oi Laloatao, A?
◻ Dahaka dainai Iehova ena Witness taudia idia gwau tanobada ibounai dekenai taunimanima haoda henia gaukarana idia karaia be maoro?
◻ Gilead misinari sikuli ese edena bamona taunimanima haoda henia gaukarana ia durua?
◻ Iehova ena Witness taudia edia gaukara dekenai idia kwalimu karana ia durua gaudia haida be dahaka?
◻ Ita ta ta ibounai be iseda Keristen haroro gaukara be edena bamona ita hanamoa diba?
[Chart on page 24]
TANOBADA IBOUNAI DEKENAI HAODA GAUKARA ENA TUBU
Lagani Tano Witness Hida
1939 61 71,509
1943 54 126,329
1953 143 519,982
1973 208 1,758,429
1983 205 2,652,323
1991 211 4,278,820
[Picture on page 25]
Galilea haoda taudia dekenai haroro gaukara idia do karaia noho