Duahia Taudia Edia Henanadai

◼ Keristen ia lao labana eiava ia lao haoda be maoro, eiava?

Taunimanima edia lalohadai labana karana dekenai be idauidau bona nega momo unai kara idia laloa momo. Unai dainai, namona be Keristen taudia be Iehova Dirava ena lalohadai Bible dekenai idia diba bona idia badinaia.

Dirava be taunimanima dekenai siahu ia henia ‘uda’ ena animal bona ‘hanua’ ena animal idia biagudia totona. Gunaguna, Havaraia Tauna ese taunimanima dekenai gwaumaoro ia henia lasi aniani totona animal idia hamasea, bona reana taunimanima idia ura lasi. (Genese 1:​24, 29, 30) Abata murinai sibona, Dirava ese taunimanima dekenai gwaumaoro ia henidia animal ena vamu idia ania bema ‘ena souli​—ena rara’ idia bubua guna. (Genese 9:​3, 4) Unai vamu be uda ena animal eiava hanua ena animal.

Israel taudia ese animal idauidau idia ubua, hegeregere mamoe eiava boromakau. Idia be vamu idia ura ania neganai, idia hamasedia. (Deuteronomi 12:​20-24; 14:4-20) Unai be Dirava ena laulau hereva hegeregerena, ia gwau ia be ‘haoda taudia momo do ia siaia iena taunimanima idia abia totona bona labana taudia momo do ia siaidia idia abidia totona.’ (Ieremia 16:16) Gabeai, Iesu ese aposetolo taudia ia abia hidi neganai, idia haida be haoda taudia bona ia sibona be haoda gaukara haida dekenai ia hakaudia.​—Mataio 4:​18-22; 17:27; Luka 5:​2-6; Ioane 21:​4-7.

Tau buruka Isako be vamu aniani ia noia neganai, iena natuna Iakobo ia ura nanigosi matamatadia rua ia hamasea bona ia nadua. To, Esau ia lao labana iena tamana dekenai dia ena vamu ia henia totona. Oi laloa, ena be hanua dekenai animal ena vamu ia noho, to Isako be uda ena animal ena vamu ia ura. Oi laloa danu, natudia ruaosi be animal idia hamasea, idia sibodia idia ania lasi totona, to ma ta ese ia ania totona.​—Genese 27:​1-19.

Vamu idia ania sibona lasi to ma badina haida danu animal idia hamasea. Animal edia kopina amo dabua idia karaia. (2 Hanua Pavapavadia 1:8; Mareko 1:6; Heberu 11:37) Palai rumadia bona kohu haida idia karaia animal edia kopina amo, bona unai animal haida be taravatu Israel taudia ese idia ania totona.​—Esodo 39:​33, 34; Numera 24:7; Hahemaoro Taudia 4:19; Salamo 56:8.

Dirava ena Taravatu be idia hamasea animal edia rara idia bubua, unai dainai namona be labana taudia idia laloatao animal edia mauri be Ia ena amo idia mai, bona namona be idia hamasea kava lasi, to idia matauraidia. (Levitiko 17:13) Nimrod ese animal ia alaia kava, bona sedira ia ese iena labana ena siahu ia heagilaia, ia alaia animal ena bada eiava ia alaia animal edia namba ia heagilaia, eiava ia aladia boroma dainai ia abia diba davana ia heagilaia. Ia be “labana tauna mai goada danu Iehova vairanai.”​—Genese 10:9.

Reana Keristen tauna be ia labana eiava animal ia alaia, eiava gwarume ia veria dae dainai, moale dikadika ena mamina ia abia diba. Labana eiava haoda taudia momo be sibodia edia kudou idia tahua neganai, idia ia davaria ‘gau ta alaia ena moale’ ese ia abia. Unai bamona moale be animal edia mauri matauraia lasi karana bamona. Unai dainai, ena be haoda eiava labana be ia kerere lasi (unai animal eiava gwarume be ta ese ia ania totona eiava badina namona ta ia gaukaralaia totona neganai), ia be maoro lasi bema Keristen ta ese ia karaia Nimrod ese ia karaia hegeregerena. To labana dekenai animal lulua ena moale, eiava alaia ena moale, eiava davana abia ena moale ena dika sibona ita gwauraia lasi, to ma dika ta ia noho.

July 15, 1983 ena Watchtower ena sivarai ia hahedinaraia badina be dahaka Keristen korikoridia be ipidi, taunimanima alaia totona eiava sibona ia naria totona, idia dogoatao lasi. (Rau 23-6) Unai sisiba idia laloa namonamo dainai, Witness haida idia laloa namona be labana ena ipidi idia negea eiava taunimanima ese idia itaia diba lasi gabuna dekenai idia atoa, idia abia haraga diba lasi gabuna unai. Ma danu, labana ena ipidi be lasi neganai, eiava abia haraga diba lasi gabuna dekenai idia atoa neganai, dika momo idia koua. Unai amo, natudia be ipidi idia abia kava diba lasi bona aksiden dekenai ta idia hadikaia eiava idia alaia mase diba lasi, bona ruma tauna ta ia gari bada neganai eiava ia lalohisihisi bada neganai ipidi do idia gaukaralaia kerere diba lasi.​—Hereva Lada-isidia 22:3 danu hahegeregerea.

Keristen haida be reana vamu eiava gwarume haida edia mamina idia ura, bona idia abia dalana sibona be labana eiava haoda amo. Ma haida be uda dekenai idia labana neganai hodahoda goevana eiava eksasais idia moalelaia, eiava haoda karana amo maino mamina idia moalelaia. Bible ese unai kara ia herevalaia dika lasi, unai dainai namo lasi haida ita hahemaoro henidia bema unai gaudia idia moalelaia neganai. Bona Isako bona iena natudia edia haheitalai ese ia hahedinaraia namo lasi ita hepapahuahu daika ese labana ena vamu eiava haoda ena gwarume do ia ania.​—Mataio 7:​1-5; Roma 14:4.

Aposetolo Petro be haoda gaukara ia ura momo. Gwarume haida idia noho neganai, ia toreisi lou tauna, Iesu ese ia durua iena lalohadai gwarume eiava haoda gaukara dekenai ia tahua totona. Iesu ia nanadaia: “Simona, [Ioane] ena natuna e, lau oi lalokau henia bada eiava inai oi lalokau henia bada?”​—Ioane 21:​1-3, 9-15. November 1, 1988, The Watchtower, rau 31 itaia.

Unai hegeregerena, bema Keristen tauna be mai lalona namona ia lao labana eiava haoda, namona be ia laloa namonamo guna. Hegeregere, bema labana eiava haoda ena nega be kongregesen edia hebou ena nega, dahaka do ia karaia? Iena herevahereva ese ia hahedinaraia ia be labana eiava haoda ia karaia ena siahu ia heagilaia totona, a? Namo herea bema lo Keristen tauna, ia lao labana eiava ia lao haoda neganai ia hereva diba: “Oibe, Lohiabada, oi diba oi lau lalokau henia bada [bona inai gadara lau lalokau henia bada lasi].”​—Ioane 21:​16, NW.