Inai Heheni Karana Koua Momokani Dalana

“Inai heheni karana ia vara diba lasi bema gari be lasi. . . . Ita gari henia gauna ita inai henia bona unai dainai bema inai heheni karana ia noho, gari ia hunia noho.”​—⁠CYRIL CONNOLLY, TORETORE TAHUA TAUNA BONA EDITA.

TAUNIMANIMA edia noho hebou karana idia tahua taudia momo idia laloa inai heheni karana be taunimanima edia kara korikori ta. Politikol saiens tauna ta ia gwau, taunimanima edia kara dekenai “inai heheni karana be hanaihanai do ia hedinarai gauna.”

Taunimanima edia kara idia tahua taudia be unai bamona idia laloa be maoro. Baibel lalonai Dirava ena lauma amo ia torea hereva hegeregerena, edia kara idia tahua tatau bona hahine be “kara dika” lalonai idia vara. (Salamo 51:⁠5) Havaraia Tauna danu, lagani tausen momo gunanai goevadae lasi taudia edia kara ia laloa neganai, “taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.”​​—⁠Genese 6:⁠5.

Lalo-dika kava karana, haida dadaraia kava karana, bona idia havaraia inai heheni karana idia vara badina taunimanima idia goevadae lasi bona sibodia edia namo idia tahua dainai. (Deuteronomi 32:⁠5) Madi, taunimanima edia orea ta eiava gavamani ta, herevana ena gaukara dalana bona taravatu be edena bamona, be unai gaudia dekenai taunimanima edia kudouna idia haidaua diba lasi. Ma tano haida amo sivarai ia gwauraia hahinena Johanna McGeary ia gwau: “Tanobada ibounai ena polisi ta, herevana ena siahu ena goada be edena bamona, be inai heheni karana ia koua diba lasi, bona unai kara dainai Bosnia, Somalia, Liberia, Kashmir, bona Caucasus dekenai rara bada idia bubua.”

To koua daladia ita do tahua lasi lalonai, namona be inai heheni karadia idia vara edia badina ita lalo-pararalaia guna.

Gari ese Inai Heheni Karana Ia Habadaia

Inai heheni karadia be momo bona dala idauidau ai idia vara. Toretore tauna Andrew Sullivan ese ia gwauraia maoromaoro ia gwau: “Inai heheni kara ta be gari, bona inai heheni kara ta be ma ta ia matauraia lasi sibona; inai heheni kara ta be siahu ia hahedinaraia, bona inai heheni kara ta be siahu lasi dainai ia vara; kara ta be kara dika haloua karana, bona inai heheni kara ta be mama dainai ia vara. . . . Dagedage tauna ena inai heheni karana ia noho, bona idia hadikaia tauna ena inai heheni karana ia noho. Inai heheni karana ta be metairametaira ia siahu noho, bona inai heheni karana ta be ia ore ia lao. Inai heheni karana ta be ia pou, bona inai heheni kara ta be ia araia lasi.”

Ita daradara lasi, iseda nega lalonai inai heheni karadia idia havaraia gaudia haida be taunimanima edia noho hebou karadia bona moni gaukaralaia dalana dainai. Haida lalo-dika henia kava kara aukadia bona mai siahu ida idia hedinarai inai heheni karadia be nega momo taga taudia momo lasi gabudia ai idia vara. Danu, nega momo inai heheni karadia idia vara bema idau tano amo idia mai taudia be momo dainai hanua taudia edia noho dalana ia hadikaia diba.

Reana haida idia laloa unai idia mai matamata taudia dainai moni gaukara abia dalana be do ia auka, badina gaukara ena pei maragina do idia abia dae, eiava idia dainai kohu davana do ia hamaragia. Unai bamona idia gari be mai badina eiava lasi be ma gau ta. Moni haboioa garina bona hanua taudia edia noho namona eiava edia mauri dalana do ia dika garina be ma haida lalo-dika henia kava karana bona inai heheni karana idia havaraia ena badina badadia.

Inai heheni karana koua dalana ginigunana be dahaka? Lalohadai haidaua.

Lalohadai Idia Idau

McGeary ia gwau, “Unai taudia idia idau diba bema edia lalona ai idia ura momokani idia idau.” Taunimanima edia lalona be edena bamona idia haidaua diba? Guna idia vara gaudia ese idia hahedinaraia inai heheni karana ia koua diba gauna, mai ena siahu, bona lalona ia hamarerea diba herevana, bona do ia noho daudau diba gauna be Dirava ena Hereva, Baibel, amo ia mai. Unai be momokani badina “Dirava ena hereva be ia mauri noho, bona ia be mai ena siahu. . . . Iena matana ese kaia mai ena kahana ruaosi ena matana ia hereaia momokani. . . . Tau ena lalona momokani dekenai ia vareai . . . ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.”​​—⁠Heberu 4:⁠12.

Momokani, ma haida lalo-dika henia kava karana bona inai heheni karana haorea be ia vara kava diba lasi, bona hanuaboi tamona lalonai do ia vara lasi. To do ia vara diba. Kudouna ia hamarerea bona lalona ia haidaua tauna badana, Iesu Keriso, ese taunimanima edia lalohadai ia haidaua. Taunimanima milioni momo be Iesu Keriso ena aonega sisibana idia badinaia: “Umui dekenai idia badu henia taudia do umui lalokau henia, bona umui dekenai idia dagedage henia taudia dainai do umui guriguri.”​​—⁠Mataio 5:⁠44.

Iena hahediba hereva hegeregeredia, Iesu ese ena tura namodia ta ai ia halaoa tauna ta be Mataio, guna takisi ia gogoa tauna, Iuda bese taudia ese idia inai henia bada bona idia dadaraia tauna ta. (Mataio 9:9; 11:19) Ma danu, Iesu ese tomadiho dala goevadaena ia havaraia, bona gabeai unai dala lalonai guna idia dadaraia bona idia inai henia Idau Bese taudia tausen momo be do idia abia dae. (Galatia 3:28) Unai neganai tano idauidau amo taunimanima idia mai Iesu Keriso ena murinai idia raka totona. (Kara 10:​34, 35) Edia lalokau hereadaena dainai taunimanima momo be edia kara idia diba. (Ioane 13:35) Iesu ena hahediba tauna Stefano be idia inai henia momokani tatau ese idia hodoa mase neganai, iena hereva dokodia be inai: “Lohiabada e, inai kara dika ena davana oi henidia lasi!” Stefano ia ura ia idia inai henia taudia be namo do idia davaria.​​—⁠Kara 6:8–14; 7:​54-60.

Hari inai negai Keristani momokanidia be unai hegeregerena Iesu ena sisiba idia badinaia bona kara namo idia karaia, edia Keristani tadikakadia dekenai sibona lasi to edia inai taudia dekenai danu. (Galatia 6:10) Idia hekwarahi bada edia mauri amo inai heheni kara mai dagedage do idia kokia totona. Idia diba sibodia lalonai ia noho siahu mai goadadia ese inai heheni karana idia havaraia diba, unai dainai kara ta idia karaia unai badu ena gabunai be lalokau idia atoa. Oibe, idau negai aonega tauna ta ia gwau bamona, “Badu ese heai ia havaraia noho, to lalokau ese kerere ibounai ia koua noho.”​​—⁠Aonega Herevadia 10:⁠12.

Aposetolo Ioane ia gwau: “Iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.” (1 Ioane 3:15) Iehova ena Witnes taudia be unai idia abia dae. Unai dainai, bese, kastom, tomadiho, bona politikol karadia idauidau amo idia mai, tanobada ibounai dekenai inai heheni lasi tadikaka oreana lalonai idia haboudia tamona.​​—⁠Maua oi itadia.

Inai Heheni Karana Do Ia Doko!

Reana oi laloa, ‘Momokani unai taudia ta ta dekenai unai ia vara be namo. To, unai ese iseda tanobada amo inai heheni karana do ia kokia vaitani lasi.’ Momokani, ena be oiemu kudouna lalonai inai heheni karana be lasi, to unai kara dainai dika do oi davaria diba. Unai dainai Dirava dekenai unai tanobada ibounai ena hekwakwanai hanaia dalana do ita tahua.

Dirava ia ura tanobada amo inai heheni kara iboudiai do idia ore. Unai do ia vara guba gavamani ia lohia neganai, Iesu ese ita ia hadibaia unai gavamani totona ita guriguri: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”​​—⁠Mataio 6:​9, 10.

Unai guriguri ena haere ita abia momokani neganai, inai heheni karana idia havaraia gaudia be do idia ore vadaeni. Inai heheni karana idia habadaia noho gaudia be do idia kokia vaitani. Lalona veria herevadia, diba lasi karadia, bona haida lalo-dika henia kava karana edia gabunai lalo-parara, hereva momokani, bona kara maoromaoro do idia noho. Bena, momokani, Dirava ese ‘matana ranu ibounai be matana dekena amo ia dahua. Mase bona lalohisihisi, bona taitai, bona hisihisi be idia ore vaitani.’​​—⁠Apokalupo 21:​1-4.

Harihari sivarai namona ia noho! Ita hakoikoia diba lasi gaudia ese idia hahedinaraia ita be “nega ena dokona dekenai” ita noho. Unai dainai, ita diba momokani inai tanobada amo Dirava badinaia lasi inai heheni karadia be kahirakahira do idia ore momokani. (2 Timoteo 3:​1-5; Mataio 24:​3-14) Dirava ese ia gwauhamatalaia tanobada matamatana dekenai, tadikaka momokani oreana be do ia noho badina taunimanima be goevadae taudia ai do idia lao.​​—⁠Luka 23:43; 2 Petero 3:⁠13.

To tadikaka momokani oreana moalelaia totona do oi naria lasi ela bona unai nega. Ai torea sivarai ma haida ese idia hahedinaraia taunimanima milioni momo edia kudouna be inai heheni karana lasi to Keristani lalokau amo idia honu. Oi danu idia boiria unai lalokau tadikaka oreana lalonai oi vareai totona!

[Picture on page 7]

Dirava ena Basileia henunai inai heheni karadia iboudiai be tanobada amo do idia kokia