Tanobada Ena Lalohadai Dikadia Oi Dadaraia, Basileia Ena Gau Korikoridia Oi Tahua
“Iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.”—MATAIO 6:33.
1. Iseda laulau kudouna naria totona Bible ena Hereva lalonai dahaka sisiba ia noho, bona ita ia koia dala badana ta be dahaka?
“GAU idauidau oi naria, to oiemu kudouna oi gimaia namonamo, badina be iena amo mauri ia mai.” (Hereva Lada-isidia 4:23) Dahaka dainai aonega tauna Pavapava Solomon ese unai sisiba ia henia be namo? Badina taunimanima edia “kudouna be koikoi herea bona dika rohoroho.” (Ieremia 17:9) Iseda kudouna ese ita ia koia dalana badana ta be tanobada ena lalohadai dikadia ita abia. To tanobada ena lalohadai dikadia be dahaka? Idia be oi abia diba lasi to oi ura henia kava gaudia, lalohadai kava gaudia, anina lasi lalohadai gaudia. Bema unai lalohadai kava be oi idia doria tanobada ena lalohadai dikadia oi abia totona, oiemu nega idia halusia sibona lasi, to oi idia hadikaia diba danu. Unai dainai, ita dadaraidia momokani be gau badana. Oibe, bema Iesu bamona ita ese taravatu utua kara ita inai henia, gau badana be iseda kudouna do ita naria namonamo tanobada ena lalohadai dikadia ese ita abia garina.—Heberu 1:8, 9.
2. Tanobada ena lalohadai dikadia be dahaka, bona ita dadaraidia ena badina be dahaka?
2 To tanobada ena lalohadai dikadia be dahaka? Idia be inai tanobada ena kara, ia be Satana ena siahu dekenai ia noho dainai. Unai hereva dekenai aposetolo Ioane ia gwau: “Tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho.” (1 Ioane 2:16; 5:19) Badina be dahaka Keristen taudia be tanobada ena lalohadai dikadia idia dadaraia be gau badana? Badina tanobada ena lalohadai dikadia ese iseda lalona bona kudouna lalonai ura dikadia idia havaraia. Bema iseda lalona dekenai kara dika ta ita lalohadailaia momo unai be ita hegaegae bamona unai kara dika do ita karaia totona. Hahediba tauna Iakobo ese ita ia sisiba henia, ia gwau: “Hedibagani ena badina korikori be, tau ta sibona ena ura dainai kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.”—Iakobo 1:14, 15.
Ita Idia Sisiba Henia Haheitalai Haida
3. Ura kava gaudia lalohadailaia momo kara ese dika ia havaraia diba ena haheitalai badana ta be daika?
3 Tanobada ena lalohadai dikadia ita dadaraia ena namo ita itaia totona, namona be haida edia haheitalai ita tahua. Satana Diabolo ena sivarai ese ia hahedinaraia goevagoeva bema sibona eda ura kava gaudia ita lalohadailaia momo, dika do ia vara diba. Ia ese sibona ena kudouna lalonai ia laloa ia be tau badana bona unai ia lalohadailaia momo, bena ia ura lasi taunimanima be guba bona tanobada edia Lohia, Iehova, idia tomadiho henia, to ia ura idia be ia sibona idia tomadiho henia. (Luka 4:5-8) Unai be ia ura kava gauna ta, a? Oibe! Gabeai, Satana be lagani 1,000 lalonai do idia guia bona murinai ‘lahi gohuna’ dekenai do idia negea, bena mase iharuana do ia abia. Unai neganai do ia hedinarai goevagoeva iena lalohadai be ura kava gauna sibona.—Apokalupo 20:1-3, 10.
4. Satana ese Eva ia koia dalana be dahaka?
4 Hahine ginigunana, Eva, ena sivarai be ita ia sisiba henia. Ena ura do ia hagugurua totona, Satana ese Eva ia koia, ena lalona ia veria dainai, taravatu au huahuana ia lalohadailaia momo, ia laloa bema ia ania do ia mase lasi, to Dirava bamona do ia lao bona namo gaudia bona dika gaudia do ia diba. Unai be ia ura kava gauna bona sibona ena ura tahua karana ta, ani? Oibe, Iehova ese Eva bona ena adavana Adam ia kota henidia bona ia hahemaoro henidia neganai unai ia hedinarai goevagoeva. Edia kara dainai, idia bona edia kara dika natudia iboudiai edia mauri hanaihanai Paradaiso dekenai idia haboioa.—Genese 3:1-19; Roma 5:12.
5. Dahaka dainai Dirava ena aneru, ena natudia haida unai, idia gwau-edeede, bona idia dekenai dahaka ia vara?
5 Danu, Dirava ena aneru, ena natuna haida unai, edia sivarai be sisiba ita dekenai. (Genese 6:1-4) Guba dekenai idia be Iehova danu idia noho ena hahenamo idia laloa momo lasi, to tanobada dekenai hahine idia lalohadailaia momo, idia laloa bema idia danu idia sihari kava moale bada do idia abia. Unai kara idia lalohadailaia momo bona idia karaia dainai, hari unai gwau-edeede anerudia be lauma dalanai idia dibura, Tartarus dekenai, bona Iesu Keriso ena Lagani 1,000 Lohia Negana dokona idia naria noho, unai nega lalonai do idia mase.—2 Petero 2:4; Iuda 6; Apokalupo 20:10.
Tanobada Ena Lalohadai Dikadia Dadaraia
6, 7. Dahaka dainai tanobada ena kohu lalohadailaia momo karana ese oi ia hadikaia bona oi ia koia diba?
6 Taunimanima idia ura henia, to idia abia diba lasi gaudia lalohadailaia kava karana Satana be ia havaraia, unai gau dikana ta hari ita laloa. Niuspepa, televisen, reidio, magasin, bona buka ese iseda lalona idia veria tanobada ena lalohadai dikadia ita abia totona. Nega momo ita dekenai kohu bada ura henia karana idia havaraia. Momokani, kohu bada abia karana be ia dika lasi. Dirava idia tomadiho henia taudia Abraham, Iobu, bona Pavapava David be taga bada taudia, to idia be kohu habadaia urana idia abia lasi. Taunimanima be kohu bada ura henia karana idia lalohadailaia momo dainai idia be lagani momo lalodiai idia hekwarahi bada do idia taga totona. Unai lalohadai idia abia dainai moni gadara idauidau idia karaia, hegeregere moni idia atoa hosi do ia uini totona bona laki gadara ena tiketi idia hoia. Namo lasi taga abia karana dekenai oi lalohadai kerere. Bema ita laloa kohu ese noho namo do ia havaraia, namona be inai aonega herevana ta ita laloa, ia gwau: “Badu dinana ai kohu be heduru lasi, to kara maoromaoro be mase amo hamauria gauna.” (Hereva Lada-isidia 11:4) Oibe, kohu ese ita idia durua lasi “hisihisi bada herea” negana amo do ita roho mauri totona.—Mataio 24:21; Apokalupo 7:9, 14.
7 Tanobada ena kohu ese ita idia koia diba. Unai dainai ita idia hadibaia herevana be inai: “Taga tauna ena taga be hanua aukana bamona ia dekenai, bona iena lalohadai dekenai idia be magu badana bamona, ia idia naria totona.” (Hereva Lada-isidia 18:11) Oibe, “iena lalohadai dekenai” sibona, badina bisinesi iboudiai idia dika neganai, politik dekenai heiriheiri ia vara neganai, eiava ita ia hamasea gorerena ita abia neganai, tanobada ena kohu ese ita idia durua lasi. Iesu Keriso ese ita ia sisiba henia, ia gwau tanobada ena kohu dekenai ita abidadama be kavakava karana. (Luka 12:13-21) Danu, aposetolo Paulo ese ita ia sisiba henia herevana be inai: “Moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama kara idia rakatania vadaeni, bona mai lalohisihisi momo, edia mauri idia hadikaia ore vadaeni.”—1 Timoteo 6:10.
8. Tanobada taudia ese matabodaga karana idia lalohadailaia ena bada be edena bamona, bona unai kara ese dahaka dika ia havaraia diba?
8 Lalohadai dikadia ma haida be matabodaga karana idia lalohadailaia momo. Taunimanima be mai edia kara dika dainai, matabodaga karadia lalohadailaia momo karana be bada, unai ia hedinarai goevagoeva badina bema telefon ena namba haida oi rini henia neganai, matabodaga hereva mirodia oi kamonai henia diba, bona taunimanima momo herea ese unai kara idia moalelaia. United States lalonai, telefon amo matabodaga sivarai kamonai henia karana be moni bilion momo bisinesi badana. Bema matabodaga karadia ita lalohadailaia momo, ita be koikoi taudia badina Keristen ena kara goeva be kopina sibona dekenai ia noho, ani? Bona unai lalohadai dikadia ese ita idia veria diba sihari kava karana ita karaia totona, ani? Unai bamona ia vara vadaeni, bona idia sihari kava eiava idia heudahanai taudia be Keristen kongregesen murimurinai idia atodia. Iesu ena hereva Mataio 5:27, 28 dekenai ese ia hahedinaraia matabodaga kara idia lalohadailaia taudia iboudiai ese edia kudouna dekenai idia heudahanai vadaeni, ani?
9. Tanobada ena lalohadai dikadia ita dadaraia totona, Bible lalonai ia noho sisibana be dahaka?
9 Iseda kara dika kudouna be lalohadai dikana ia lalohadailaia garina, namona be Paulo ena sisiba ita laloatao, ia gwau: “Gau ta Dirava dekena amo ita hunia diba lasi. Ia ese ia karaia gaudia ibounai be nega ibounai ia itaia. Idia be hanaihanai iena matana vairanai idia noho. Bona Dirava ese danu iseda kara do ia kota henia.” (Heberu 4:13) Namona be nega ibounai ita ura Mose bamona ita karaia, iena ‘lalona ia goada noho, ita itaia diba lasi Diravana ese matana dekenai ia itaia bamona.’ (Heberu 11:27) Oibe, namona be hanaihanai ita sibona ita hadibaia Iehova ia ura lasi tanobada ena lalohadai dikadia ita abia, bona ita idia hadikaia diba. Namona be Dirava ena lauma huahua karadia iboudiai ita habadaia. Haheauka kara ita habadaia be gau badana, badina tauanina ena kara ita hadoa neganai, dika do ita davaria.—Galatia 5:22, 23; 6:7, 8.
Basileia Ena Gau Korikoridia
10, 11. (a) Dahaka ese ia hamomokania Gau Ibounai Havaraia Diravana ia noho? (b) Dahaka ese ia hamomokania Bible be momokani Dirava ena Hereva? (c) Dahaka ese ia hamomokania Dirava ena Basileia ena Pavapava be momokani ia noho?
10 Tanobada ena lalohadai dikadia dadaraia dala badana be Basileia ena gau korikoridia ita tahua noho. Basileia amo idia vara gau korikoridia, Dirava ese ia havaraia gaudia unai, bona tanobada ena lalohadai koikoi gaudia edia idau be bada herea. Dirava be momokani ia noho, a? Ia noho be daradaralaia lasi gauna. Ia havaraia gaudia ese ena noho idia hamomokania. (Roma 1:20) Namona be lagani 100 bona ma haida gunanai Watch Tower Society idia halasia bukana, ladana The Divine Plan of the Ages, ena hereva ita laloatao, ia gwau: “Telescope dekena amo guba ia raraia tauna, eiava sibona matana amo ia raraia tauna, ese [Dirava] ia havaraia gubana ena bada, ena toana, ena hairai, ena heiriheiri lasi, ena heau namonamo bona ena gau idauidau ia itaia neganai, bema unai gaudia ia Havaraia Diravana ese unai tau ena aonega bona ena siahu ia hanaia ia daradaralaia, bema ia laloa edia heau namonamo dalana be ia vara kava, bona Havaraia Diravana ese ia karaia lasi, ia laloa namonamo lasi, bona mai maoromaoro danu Bible ese unai bamona tauna ia gwauraia kavakava tauna (unai be laloa namonamo ia karaia lasi tauna).”—Salamo 14:1.
11 Bible Helagana dekena amo Basileia ena hereva iboudiai ita diba. Bible be momokani Dirava ena Hereva, a? Oibe, iena hereva iboudiai be heiriheiri lasi, Bible be ia maoromaoro saiens dalanai, bona ia be mai ena siahu taunimanima edia mauri ia haidaua totona bona danu ena peroveta herevadia idia guguru.a To Dirava ena Basileia ena Pavapava Iesu Keriso be edena bamona, ia be momokani ia noho, a? Dirava ena siahu amo idia torea Evanelia bukadia bona Keristen Greek Revarevadia edia hereva namodia amo idia hahedinaraia goevagoeva Iesu Keriso be tau korikorina ta. Danu, Iuda taudia edia Talmud bukana, bona Keristen ginigunadia edia nega lalonai Iuda bona Roma edia idau negai sivarai idia torea taudia ese idia hamomokania Iesu be tau korikorina ta.
12, 13. Dahaka ese ia hamomokania Dirava ena Basileia be gau korikorina ta?
12 To, Basileia be momokani ia noho, a? Kerisendom ena orea momo ese idia gwauraia momo lasi, Presbyterian orea tauna badana ena maumau herevana ese unai ia hamomokania, ia gwau: “Lagani 30 bona ma haida lalodiai haroro tauna ta lasi ese Basileia ena gau korikoridia ena kongregesen taudia dekenai ia hadibadia.” To, Basileia ese Iehova ena ladana do ia hahelagaia be Bible ena hereva badana. Dirava ese Basileia ena gwauhamata hereva ginigunana ia karaia, ia gwau: “Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:15, NW) Israel besena ese Basileia ia laulaulaia, unai be ia momokani Pavapava Solomon ena lohia negana lalonai. (Salamo 72) Ma danu, Basileia be Iesu ese ia harorolaia hereva badana. (Mataio 4:17) Iena parabole momo lalodiai Basileia ia herevalaia, Mataio karoa 13 hegeregerena. Iesu ese ita ia hadibaia ita guriguri Basileia do ia mai totona bona nega ibounai ita tahua guna totona. (Mataio 6:9, 10, 33) Oibe, Keristen Greek Revarevadia lalonai Dirava ena Basileia be nega 150 bamona idia torea.
13 Basileia be gavamani korikorina ta, mai ena siahu bona mai ena gwaumaoro ia gaukara totona, bona iseda kara maoromaoro urana ibounai do ia hagugurua. Ia be mai ena taravatu bona Bible lalonai ita davaridia diba. Basileia be gau korikoridia momo ia havaraia vadaeni. Ia be mai ena kamonai taudia—idia be Iehova ena Witness taudia 4,000,000 bona ma haida. Tano 211 dekenai idia be Dirava ena Basileia ena sivarai namona idia harorolaia noho, unai ese Mataio 24:14 ena hereva ia hagugurua. Edia 1991 hesiai laganina lalonai, hora 951,870,021 idia henia Basileia ena sivarai idia harorolaia totona. Unai gaukara ese hanaihanai do idia noho karadia haida ia havaraia; taunimanima hutuma momo be Bible ena hereva momokani ena “gado goevadaena” idia diba dainai.—Sefania 3:9.
Basileia Ena Gau Korikoridia Tahua
14. Basileia be gau korikorina ta ita abia dae noho totona, dahaka ita karaia diba?
14 Vadaeni, Basileia ena gau korikoridia be edena bamona do ita tahudia diba? Iseda helaro be abidadama goadana dekenai ita haginia be gau badana. Dirava ia gwauhamatalaia tanobada matamatana be gau korikorina ita dekenai be gau badana. (2 Petero 3:13) Bona Dirava ena gwauhamata herevana dekenai ita abidadama be gau badana, ia gwau: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” (Apokalupo 21:4) Edena bamona ita diba unai be lalohadai kava lasi gauna ta? Dirava ena ura negana lalonai do ia vara momokani, badina ia koikoi diba lasi. (Tito 1:1, 2; Heberu 6:18) Namona be unai gwauhamata herevadia ita lalohadailaidia momo. Namona be iseda lalona dekenai Dirava ena tanobada matamatana lalonai ita noho bona ena hahenamo do ita moalelaidia karana ita lalohadailaia; unai be ura kava gauna ta lasi to unai ese iseda abidadama karana ia hahedinaraia. Paulo ia gwau: “Abidadama ena anina be inai bamona: ita daradara lasi, to ita diba Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani inai gauna do ita abia.” (Heberu 11:1) Namona be Dirava ena Hereva amo, bona ita idia durua unai hereva ita badinaia totona Keristen bukadia amo, ita aniani bamona bona iseda abidadama karana ita hagoadaia. Bona kongregesen taudia danu eiava nega bona gabu idaudia dekenai iseda Basileia harorolaia gaukarana ita habadaia neganai, unai ese iseda abidadama bona iseda helaro ia hagoadaia.
15. Keristen hesiai gaukarana dekenai iseda maduna be dahaka?
15 Basileia do ia mai momokani ena hereva hegeregerena do ita karaia totona gau badana be iseda hesiai gaukara ita hanamoa. Gaukara badana ia do noho dainai, edena bamona unai ita karaia diba? (Mataio 9:37, 38) Hereva ta be ia momokani, ia gwau ena be oi buruka to hereva haida oi idia hadibaia diba. Herevana ita be lagani hida haroro gaukara ita karaia vadaeni, to iseda gaukara ita hanamoa diba. Dirava ena Hereva ita gaukaralaia dalana ita hanamoa neganai, ita ese taunimanima ma haida ita durudia namonamo diba Pavapava, Iesu Keriso, ena gadona idia kamonai henia totona. (Ioane 10:16 itaia.) Namona be ita laloaboio lasi, taunimanima ese mauri hanaihanai idia abia diba dalana ita harorolaia, unai dainai namona be iseda teritori dekenai idia noho taudia iboudiai ita hereva henidia toho, hanaihanai dala ita kehoa bona do idia hahedinaraia diba idia be edena kahana dekenai do idia noho, idia be “mamoe” eiava “nanigosi.” (Mataio 25:31-46) Momokani, unai anina be ruma dekenai taunimanima ita davaria lasi neganai, bona Basileia ena sivarai idia ura kamonai henia taudia ita davaria neganai, do ita torea iseda noutbuk dekenai.
Basileia Oi Tahua Noho
16. Basileia ena gau korikoridia idia abia dae haheitalai namona taudia be daidia, bona Basileia be edena bamona idia “dogoatao” diba?
16 Basileia ena gau korikoridia ita tahua noho totona gau badana be ita gaukara bada. Horoa Keristen orena taudia edia haheitalai namodia ese ita idia hagoadaia, ani? Idia be lagani momo lalonai Basileia ena namo gaudia idia tahua. Iesu ese unai kara ia herevalaia inai bamona: “Ioane Bapatiso ena haroro nega ia mai bona harihari Guba Basileia be taunimanima ese idia heatu henia noho, bona heatu taudia ese idia ura dogoatao momokani.” (Mataio 11:12) Ita gwau lasi unai hereva ena anina be idia heatu momokani Basileia idia dogoatao totona. To, Basileia lalonai do idia vareai taudia edia gaukara ia herevalaia. Bible ena hereva ia tahua aonega tauna ta ia gwau: “Unai hereva ese ia hahedinaraia idia be mai moale danu, idia goada karaia bona idia hekwarahi do ia mai Mesia ena basileia dekenai idia vareai totona.” Horoa taudia idia hesiku lasi, to idia goada karaia Basileia ena gaukara idia karaia totona. “Mamoe idaudia” danu idia gaukara bada be gau badana Dirava ena guba Basileia henunai tanobada dekenai idia noho totona.—Ioane 10:16.
17. Tanobada ena lalohadai dikadia idia tahua taudia dekenai dahaka do ia vara?
17 Momokani, hari ita be nega namona lalonai ita noho. Tanobada ena lalohadai dikadia idia tahua taudia be kahirakahira dika do idia davaria. Inai hereva ese do idia davaria gauna ia herevalaia, ia gwau: “Hitolo tauna bamona, ia nihi bena ena nihi dekenai ia aniani noho, to mai hitolo danu ia noga; eiava ranu mase tauna bamona, ia nihi bena ena nihi ai ranu ia inua noho, to mai ena hesiku bona mai ena ranu mase ida ia noga.” (Isaia 29:8) Momokani, tanobada ena lalohadai dikadia ese taunimanima dekenai lalo-namo bona moale do idia henia diba lasi.
18. Basileia be gau korikorina ta dainai, namona be dahaka ita karaia, bona iseda helaro be dahaka?
18 Basileia be gau korikorina ta. Ia lohia noho, to inai tanobada dikana be kahirakahira do ia ore ela bona hanaihanai. Unai dainai, Paulo ena sisiba oi kamonai henia, ia gwau: “Namo ita mahuta lasi, haida idia mahuta bamona. To namo ita noga noho, ita laloa goada noho.” (1 Tesalonika 5:6) Namona be Basileia ena gau korikoridia be iseda kudouna bona lalona dekenai ita dogoatao bena hahenamo ita moalelaia diba ela bona hanaihanai. Bona namona be unai Basileia ena Pavapava ena boiboi ita kamonai henia, ia gwau: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.”—Mataio 25:34.
[Footnotes]
a The Bible—God’s Word or Man’s? Watchtower Bible and Tract Society of New York, Inc. idia halasia bukana, oi itaia.
Edena Bamona Do Oi Haere?
◻ Tanobada ena lalohadai dikadia be dahaka, bona ita dadaraidia ena badina be dahaka?
◻ Dahaka haheitalai ese idia hahedinaraia tanobada ena lalohadai dikadia ita abia be kavakava karana?
◻ Dahaka ese idia hamomokania Gau Ibounai Havaraia Diravana, iena Hereva, Iesu Keriso, bona iena Basileia be momokani idia noho?
◻ Basileia ena gau korikoridia ita abia dae karana habadaia dalana be dahaka?
[Picture on page 15]
Nega momo, taga bada ura henia karana ese tanobada ena lalohadai dikadia ia havaraia
[Picture on page 16]
Basileia ena gau korikoridia ita abia dae dala badana ta be sivarai namona ita harorolaia
[Picture on page 17]
Dirava ena Hereva stadilaia karana amo oi ese Basileia ena gau korikoridia oi tahua, a?