Lalohisihisi Neganai Heduru Oi Davaria Diba

LALOHISIHISI mamina be edena bamona ita laloa be namo? Bema ita gwauhamata vadaeni Iehova dekenai, ita ese helaro namona ita abia bona lauma dalanai heduru momo ita abia dainai reana ita laloa lalohisihisi mamina ita abia be namo lasi, ani? Lalohisihisi mamina ita abia neganai do ita gwau ita hegeregere lasi Dirava ena hesiai gaukara ita karaia totona be maoro, a?

Hahediba tauna Iakobo ia torea ia gwau: “Elia be taunimanima sibona, ita bamona.” (Iakobo 5:17) Ena be hoa dalanai Dirava ese Elia ia gaukaralaia, to unai abidadama peroveta tauna be lalohisihisi mamina ia do abia. Nega ta Elia ia gwau: “Vadaeni, Iehova e, egu mauri oi abia oho; badina be sene taudia lau hereaia lasi.” (1 Hanua Pavapavadia 19:4) Abidadama tauna Iobu, abidadama hahine Hana, bona Iehova ena abidadama taudia ma haida ese lalohisihisi idia abia. Danu, Dirava ia abidadama henia salamo torea tauna, David, be inai bamona ia guriguri: “Egu kudouna ena hisihisi ia bada ia lao; egu hisihisi dekena amo lau oi hakaua.”​—Salamo 25:17.

Ena be Iehova ese taunimanima ia gaukaralaidia iena hesiai gaukara dekenai, to idia ese lalohisihisi idia do davaria diba. Idia be taunimanima sibona, unai dainai idia be mai edia gorere bona hemami idauidau idia abia, bona hekwakwanai negana lalonai idia be lalohisihisi idia davaria diba. (Kara 14:15) To, lalohisihisi ia vara neganai Dirava ena hesiai taudia ese idia abia heduruna be murimuri taudia idia abia heduruna ia hanaia momokani. Namona be Bible lalonai idia noho haheitalai haida ita lalodia bena ita diba dahaka ese unai taudia ia durudia lalo-metau bona lalohisihisi mamina idia koua totona.

Lalohisihisi Aposetolo Tauna ese Heduru Ia Davaria

Aposetolo tauna Paulo be lalo-metau ena mamina ia diba. Ia gwau: “Makedonia dekenai ai ginidae neganai laga-ani ai abia diba lasi. Hekwarahi ese ai ia hagegea, haida ese ai idia heatu henia gwauraia, bona gari ese ai ia abia. To Dirava, hisihisi idia abia noho taudia ia durua Diravana ese ai ia durua, badina be ai dekenai Tito ia siaia mai.” (2 Korinto 7:​5, 6) Paulo ese lalo-metau ia davaria badina nega tamona lalonai lalohisihisi gaudia haida idia vara. Kongregesen murimurinai haida ese idia “heatu henia”​—edia mauri idia boio diba unai dagedage bada karana idia davaria dainai. (2 Korinto 1:8 itaia.) Ma danu, “gari [idia] abia,” unai ena anina be kongregesen lalodiai idia vara hekwakwanai ia lalo-hekwarahilaidia, Korinto dekenai ia vara gauna bamona.

Hua haida gunanai, Paulo ese ena toretore ginigunana Korinto Keristen taudia dekenai ia torea. Unai revareva lalonai ia ese kongregesen ia sisiba henia, badina kongregesen lalonai kara dika haida idia do noho dainai, bona ia lalo-hekwarahi badina ia diba lasi Korinto taudia be unai sisiba dekenai dahaka idia laloa. To, Tito be Korinto amo ia giroa mai neganai bona ia ese Paulo ia hadibaia mai edia moale danu iena revareva idia abia dae, Paulo ena lalo-hekwarahi ia ore. Unai hegeregerena, hari inai nega lalonai reana Iehova ese iena hesiai tauna ta do ia gaukaralaia ita dekenai sivarai namona do ia mailaia totona, bona unai dala amo iseda lalo-hekwarahi do ia hamaragia.

Dirava ese Ia Henia Gaukarana Lalohadailaia Dalana

Keristen taudia haida be edia hesiai gaukara amo lalo-hekwarahi sisina idia davaria. Oibe, Iehova ena hesiai taudia haida idia laloa Dirava ese ia henidia gaukarana be auka herea dainai do idia karaia diba lasi. Hegeregere, Mose ia laloa ia hegeregere lasi Aigupito lalonai Israel bese ena gwaukau tauna ai ia lao totona. Ia gwauraia gaudia ta be iena malana be ia haraga lasi, ia gwau hereva dalana ia daradaralaia. (Esodo 3:11; 4:10) To Dirava dekenai ia abidadama neganai bona Aaron be ia totona ia hereva neganai, Mose ese ia abia gaukarana ia hamatamaia.

Gabeai Mose be sibona ia hereva, Aaron dekena amo ia hereva lasi. Unai hegeregerena, haida dekenai haroro gaukara be ia auka, to karaia dalana idia hadibaia neganai idia be aonega dalanai haroro gaukara idia karaia namonamo diba. Hegeregere, Iehova ena Witness memero bona kekeni momo be idia tubu daekau neganai nega ibounai pioneer haroro gaukara bona misinari gaukara idia karaia. Ita moale badina ita diba Iehova ese taunimanima ia durudia Keristen haroro taudia ai idia lao totona, bona idia dekenai siahu ia henia Dirava ia henia gaukarana idia hagugurua totona.​—Sekaria 4:6; 2 Korinto 2:​14-17; Filipi 4:13.

Kerere Gunadia Dainai Lalohisihisi Neganai Heduru Abia Dalana

Reana ita lalohisihisi badina guna iseda hekwarahi Dirava ena hesiai gaukara dekenai ita habadaia lasi dainai. Lagani momo lalodiai tadikaka ta be ia haroro lasi, to murinai haroro gaukara ia karaia lou. Daudau lasi murinai, gorere dikana ia abia bona ena mahuta gedana ia rakatania diba lasi. Unai tadikaka ia lalohisihisi, ia gwau: “Guna lau haroro diba, to lauegu maduna lau huaia lasi. Hari, lau ura haroro gaukara lau karaia, to gorere dainai lau be dala lasi.”

Guna ita karaia diba to ita karaia lasi gaudia lalohisihisilaia karana be namo lasi, namona be hari unai gaukara dekenai ita goada karaia, ani? Iesu ena tadina Iakobo bona Iuda be Iesu dekenai idia abidadama lasi ela bona ia mase bona ia toreisi lou murinai. Reana unai dainai idia lalohisihisi, to idia be Dirava ena hesiai taudia ai idia lao bona Bible buka haida idia torea danu.

Guriguri Kara Reaia Lasi

Lalo-metau idia davaria neganai, Dirava ena taunimanima idia guriguri goadagoada be gau badana. Oibe, Bible lalonai guriguri momo idia noho lalo-hekwarahi negana lalonai ita idia durua totona. (1 Samuel 1:​4-20; Salamo 42:8) Reana haida edia laloa be inai: ‘Lau lalo-metau bada dainai lau guriguri diba lasi.’ Namona be Iona idia laloa, ani? Gwarume bogana amo ia gwau: “Egu mauri ia boio gwauraia neganai, lau ese Iehova lau laloatao; egu guriguri ia daekau lao oiemu dubu helagana dekenai. . . . Oi dekenai boubou gauna do lau henia mai egu hahenamo hereva ida. Egu gwauhamata do lau hamomokanidia. Hahemauri be Iehova sibona dekenai.” (Iona 2:​4-9) Oibe, Iona ia guriguri, bona Dirava ese ia dekenai lalo-maino ia henia bona ia hamauria.

Ena be taihu ta Sweden dekenai be lagani momo lalodiai pioneer gaukara ia karaia bona huahua momo ia havaraia, to lalohisihisi bona hesiku mamina ia abia. Guriguri dekenai iena lalohisihisi mamina Iehova dekenai ia herevalaia. Dina haida murinai, tadikaka ta Watch Tower Society ena branch opesi amo ese ia telefon henia. Unai tadikaka ia gwau bema ia hegeregere namona be pura ta ta iboudiai dina ta ta do ia mai Betele habadaia gaukarana ia durua totona. Gabeai unai taihu ia gwau: “Betele dekenai gaukara ena mamina namona dainai, bona ruma habadaia gaukarana lau itaia neganai bona lau durua dainai, lau ia hagoadaia.”

Bema lalo-metau mamina ita abia, namona be ita laloatao guriguri be dala namona lalo-metau koua toho totona. (Kolose 4:2) Iseda guriguri haerelaia totona, reana Iehova ese dala do ia kehoa iena hesiai gaukara ma ita karaia badabada totona, eiava ia ese iseda hesiai gaukara do ia hanamoa bada. (1 Korinto 16:​8, 9) Herevana dahaka ia vara, namona be ita laloatao “Iehova ena hahenamo ese taga ia habadaia bona lalohisihisi sisina ia atoa kau lasi.” (Hereva Lada-isidia 10:22) Unai neganai lalo-maino ita abia diba.

Daradara Dainai Oi Lalohisihisi, A?

Nega haida, Iehova ena hesiai taudia ta ta be idia daradara. Bema ita dekenai unai bamona do ia vara, namo lasi kara haraga ita gwau hari Dirava ese ita ia lalo namo-henia lasi. Aposetolo tauna Toma be Biaguna ena toreisi lou idia itaia taudia edia hereva ia daradaralaia neganai, Iesu ese ia dadaraia lasi. To, mai ena lalokau danu Iesu ese Toma ia durua ena laloa daradara ia kokia totona. Bona Toma ia lalo-parara Iesu ia mauri noho neganai, ia moale dikadika!​—Ioane 20:​24-29.

Keristen ginigunadia edia nega lalonai “Dirava idia negea” taudia haida be kongregesen lalonai idia vareai, bona edia hahediba koikoi hereva, edia maumau, bona unai bamona kara ma haida dainai, haida be mai lalohisihisi ida idia laloa daradara. Unai dainai, hahediba tauna Iuda ia torea ia gwau: “Daradara taudia do umui bogahisihisi henidia. Haida lahi dekena amo do umui veria mauri.” (Iuda 3, 4, 16, 22, 23) Dirava ena hebogahisi karana abia noho totona, Iuda idia bamoa tomadiho taudia​—kongregesen ena elda taudia danu​—be daradara taudia dekenai hebogahisi karana idia hahedinaraia be gau badana. (Iakobo 2:13) Edia mauri hanaihanai idia haboioa diba, badina idia be mase hanaihanai “lahi” dekenai idia lao gwauraia. (Mataio 18:​8, 9; 25:​31-33, 41-46 itaia danu.) Bema abidadama taudia idia daradara bona mai hebogahisi ida heduru idia henia neganai lauma dalanai idia goada, unai be moale bada gauna!

Bema hekwakwanai bada idia vara reana do ita daradara, ita laloa Dirava be ita dekenai ia noho lasi, bema unai bamona ia vara, namona be unai hekwakwanai be iseda guriguri dekenai ita gwauraia hedinarai namonamo. Unai neganai, namona be Iehova ita noinoi henia ita dekenai aonega do ia henia totona. Ia henia karana be bada bona ita aonega lasi bona ita guriguri dainai ita ia gwau henia lasi. Gau badana be “noinoi neganai, namona be [ita] abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao doria mai” gabu idauidau dekenai. Unai bamona taudia be idia daradara dainai bona guriguri dekenai bona edia kara ibounai dekenai “dala tamona” idia badinaia lasi dainai, idia be gau ta Dirava dekena amo idia abia lasi. (Iakobo 1:​5-8) Unai dainai, hekwakwanai idia vara neganai, namona be ita abidadama Iehova ese ita do ia durua unai hekwakwanai ita laloa maoromaoro totona bona ita haheaukalaia totona. Ita idia bamoa abidadama taudia eiava Bible stadi lalonai tadikaka ese Bible siri haida ita idia hadibaia diba. Bema Dirava ese dala ia kehoa do ita diba dahaka do ita karaia. Danu, aneru be ita idia hakaua diba, eiava lauma helaga ese ita do ia hakaua diba. (Heberu 1:14) Gau badana be ita guriguri noho aonega ita abia totona bona iseda lalokau Diravana dekenai ita abidadama bada.​—Hereva Lada-isidia 3:​5, 6.

Laloaboio Lasi Iehova ese Heduru Ia Henia

Mai guriguri danu Paulo be ia abidadama Iehova dekenai bona ia diba ia be heduru ena Badina. Aposetolo ia torea, ia gwau: “Dirava iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana. Aiemai hisihisi ibounai lalonai ia ese ai ia durua noho. Unai dainai hisihisi idia abia noho taudia be ai durua diba. Dirava ese ai ia henia durua be ai ese ma ai henia noho idia dekenai.”​—2 Korinto 1:​3, 4.

Heduru ibounai ia henia Diravana ia diba iena hesiai taudia be idia lalohisihisi bona ia ura ia durudia. Paulo ese Korinto taudia totona ia lalohisihisi neganai, ena Keristen turana Tito ena hereva ese ia durua. Hari inai nega lalonai unai be heduru ita abia dalana ta. Ita lalohisihisi neganai, namo lasi sibona ita noho. (Hereva Lada-isidia 18:1) Dirava ese ita ia durua dalana ta be Keristen taudia ita bamodia. Reana inai bamona ita laloa: ‘Lau lalo-metau bada dainai lau goada lasi egu Keristen taudia lau bamodia totona.’ To, namona be unai bamona lalohadai ita negea, namo lasi abidadama tamona turadia edia heduru ita dadaraia.

Gaukara Rakatania Lasi!

Reana ita haida be lalo-metau bada ia havaraia diba hekwakwanai badana ita abia lasi. To gorere badana, adavana ia mase, eiava ma kara ta ese iseda lalona ia hametaua diba. Bema lalo-metau ita davaria, namo lasi ita laloa lauma dalanai ita gorere. Lalo-metau ia davaria tauna be ia do hegeregere Dirava ena hesiai gaukara ia karaia totona, lauma dalanai ia ese ma haida ia durudia diba. Paulo ese tadikaka ia haganidia ‘lalo-metau taudia idia hagoadaia totona,’ namo lasi idia laloa unai taudia idia kerere dainai lauma dalanai idia gorere. (1 Tesalonika 5:14) Momokani, nega haida taunimanima idia kara kerere bona idia hemarai dainai lalo-metau idia davaria diba, to edia kudouna goeva dekena amo Dirava ena hesiai gaukara idia karaia taudia be unai bamona lasi. Ena be mai edia hekwarahi danu reana edia tomadiho karana idia karaia, to Iehova ese edia tomadiho karana ia abia dae. Ia lalokau henidia bona idia dekenai heduru ia henia.​—Salamo 121:​1-3.

Lagani 1918 dekenai, lauma Israel ena orena taudia ese hedibagani idia abia neganai idia lalo-hekwarahi bada. (Galatia 6:16 itaia danu.) Edia haroro gaukara oreana be kahirakahira ia boio, ena be ia maoro lasi to idia haida be dibura rumana dekenai idia atoa, bona guna idia danu idia gaukara hebou taudia haida be edia abidadama idia rakatania, hereva momokani dadaraia taudia ai idia lao. Ma danu, horoa abidadama taudia idia diba lasi dahaka dainai Dirava ese unai kara ia koua lasi. Nega sisina lalonai idia be ‘mai taitai danu uhe idia hadoa,’ to haroro gaukara idia rakatania lasi. Iehova ena hesiai gaukara idia karaia noho bona sibodia edia kara idia tahua. Vadaeni, dahaka ia vara? Idia be ‘mai moale bada ida edia ruma idia lou henia edia uiti ia guidia gaudia idia laohaia neganai.’ (Salamo 126:​5, 6) Hari, horoa taudia idia diba Dirava ese unai hekwakwanai ia koua lasi, badina ia ura idia ia hagoevaia bena idia hegeregere tanobada ibounai dekenai uiti gogoa gaukarana do idia karaia totona.

Bema hekwakwanai idauidau ita davaria dainai ita lalohisihisi, namona be horoa orena taudia ese guna idia abia hekwakwanai ita laloa, unai ese ita ia durua. Namo lasi gaukara ita rakatania, bona ena be mai taitai danu ita gaukara, to namona be kara maoromaoro ita karaia noho. Nega sisina murinai, iseda hekwakwanai hanaia dalana do ia kehoa, bena ‘mai moale bada ida eda ruma do ita lou henia.’ Oibe do ita moale, unai be Dirava ena lauma helaga ena huahua ta bona hedibagani neganai bema ita haheauka unai moale do ita abia. Ita dekenai, Iehova be “durua ibounai ia henia Diravana.”