Inai Oi Laloatao, A?

Vanegai idia halasia Gima Kohorona magasin edia sivarai umui duahia neganai, umui moalelaidia, eiava? Bema umui moalelaidia, mani inai henanadai ta ta umui haerelaidia:

▫ Nethinim taudia bona Solomon ena hesiai taudia edia tubudia taudia be Babulono ena igui hesiai gaukara amo idia giroa lou neganai dagi bona gaukara namodia haida idia henidia, unai dagi bona gaukara namodia ese dahaka idia laulaulaia?

Hari inai nega lalonai, tanobada dekenai lauma Israel ena orena taudia edia namba ia maragi ia lao, mamoe idaudia edia namba ia bada ia lao. Nethinim taudia bona Solomon ena hesiai taudia edia tubudia taudia hegeregeredia, hari, mamoe bamodia taudia haida be maduna metau gaukaradia idia henia, bona idia be orena taudia edia henunai idia gaukara. (Isaia 61:5)​—4/15, rau 16-17.

▫ Peroveta tauna Sefania ia gwau: “Reana do umui hunia diba Iehova ena badu dinana ai,” unai hereva ena anina be dahaka? (Sefania 2:​2, 3)

Ita be ‘hisihisi badana’ amo ita hehuni totona, ita gwau diba lasi hahemauri dalanai ita vareai neganai gabeai ita moru diba lasi. (Mataio 24:​13, 21) Unai dina lalonai ita hehuni diba totona gau toi ita karaia noho: Namona be Iehova ita tahua, kara maoromaoro ita tahua, bona lalo-manau ita tahua.​—5/1, rau 15-16.

▫ Mikael be inai “nega dokona” lalonai edena dala ai do ia “gini”? (Daniel 12:1, 4)

Mikael be Iehova ena taunimanima dainai ia “gini” 1914 ai ia be King dagina ia abia negana amo. To nega kahirakahira Mikael be do ia “gini” dala idauna ta dekenai​—ia be Iehova Ia Siaia Tauna, kara dika ibounai tanobada amo ia kokia totona, bona tanobada ibounai dekenai Dirava ena bese taudia edia Hamauria Tauna ai ia lao totona.​—5/1, rau 17.

▫ Moale Ena Badina Korikori be Dahaka?

Moale momokanina ita abia totona iseda hebamo karana Iehova dekenai, ita ia lalo-namo henia, bona ita ia hanamoa be gau badadia. (Hereva Lada-isidia 10:22) Bema Iehova ita badinaia lasi bona mai moale danu Iehova ena ura ita karaia lasi, moale momokanina do ita davaria lasi. (Luka 11:28)​—5/15, rau 16, 19.

▫ Iesu ese hoa dalanai gorere idauidau ia hanamodia neganai, ia hanamoa tauna dekenai abidadama ia noho be namo, eiava?

Unai taudia be Iesu dekenai idia abidadama dainai Iesu dekenai idia lao do ia hanamodia totona. (Mataio 8:13) To, unai hoa karadia ia karaia neganai Iesu ia gwau lasi edia abidadama idia gwauraia hedinarai guna. Nega ta ai, Iesu ese aena dika tauna ta ia hanamoa to unai tau ia diba lasi unai be Iesu. (Ioane 5:​5-13) Petro be hahelaga tauna badana ena hesiai tauna ena taiana ia utua oho bona Iesu ese ena taiana ia hanamoa, ena be unai hanuaboi ai Iesu idia inai henia taudia ida ia mai idia dogoatao totona. (Luka 22:​50, 51) Unai hoa gaudia be Dirava ena lauma helaga siahuna amo ia karaia, ia gorere tauna ena abidadama karana amo lasi.​—6/1, rau 3.

▫ Iesu ese ia gwauraia “reke” parabolena Mataio 13:​47-50 ai, ese dahaka ia laulaulaia?

Unai parabole lalonai “reke” ese tanobada dekenai sibodia idia gwauraia Dirava ena kongregesen oreana, “gwarume” idia haboua oreana unai, ia laulaulaia. Unai orea lalonai Kerisendom bona horoa Keristen korikori taudia ena kongregesen danu idia noho, to Keristen korikori taudia ese aneru edia siahu henunai ‘gwarume namodia’ idia do gogoa noho, Mataio 13:49 ena hereva hegeregerena.​—6/15, rau 20.

▫ Israel ena hahemaoro taudia be dahaka hahegani haida idia badinaia edia gaukara idia karaia lalonai?

Taga taudia idia hahemaoro henidia ogogami taudia idia hahemaoro henidia hegeregerena, iboudiai be idia vairanai idia hegeregere, bona edia lalona ania totona moni idia abia lasi. (Levitiko 19:15; Deuteronomi 16:19)​—7/1, rau 13.

▫ Hahemaoro komiti dekenai elda taudia be dahaka idia karaia toho?

Hahemaoro komiti idia karaia ena badina ta be gau iboudiai idia tahua namonamo. To gau badana be lalokau dekenai unai idia karaia be namo. Hereva iboudiai idia diba murinai, elda taudia be gau iboudiai do idia karaia kongregesen idia naria totona, bona Iehova ena taravatu namo hereadia idia badinaia noho totona, bona iena lauma ia gaukara namonamo noho totona. To, hahemaoro komiti karaia ena badina ta be, dala ia noho neganai, kara dika tauna idia durua. (Luka 15:​8-10 itaia danu.)​—7/1, rau 18-19.

▫ Dahaka dainai matabodaga karadia ia lalohadailaia momo karana ese ita idia hadikaia diba?

Iesu ena hereva Mataio 5:​27, 28 dekenai ese ia hahedinaraia matabodaga kara idia lalohadailaia taudia iboudiai ese edia kudouna dekenai idia heudahanai vadaeni. Bona unai bamona lalohadai dikadia amo matabodaga karadia do ita karaia diba, unai dainai namona be ita naria namonamo.​—7/15, rau 15.

▫ Edena dala haida amo Iehova ese ita ia durua ita idia tohoa gaudia ita laloa namonamo bona ita haheaukalaia diba?

Iseda tadikaka ese Bible siridia amo ita idia durua diba eiava Bible stadi ita karaia neganai. Dirava ese heduru karadia haida ia karaia gaudia ese ita idia durua diba. Aneru ese ita idia hakaua diba, eiava lauma helaga ese ita ia hakaua diba. (Heberu 1:14)​—7/15, rau 21.

▫ Lagani 325 C.E. neganai Nicaea Kaunsolo ese Toi Tamona hahedibana ia haginia bona ia hamomokania, a?

Lasi. Nicaea Kaunsolo ese Natuna bona Tamana idia gwauraia “tauanina tamona” sibona. Kaunsolo taudia bona gunaguna Dubu Tamadia ese inai lalohadai idia havaraia lasi: Tamana, Natuna, bona lauma helaga ta ta iboudiai be Dirava momokanina bona noho hanaihanai dekenai, siahu dekenai, dagi dekenai, bona aonega dekenai, idia iboudiai be Dirava tamona​—toi tamona Diravana unai.​—8/1, rau 20.

▫ Iobu ia mauri noho negana lalonai, ia sibona taunimanima iboudiai amo be Iehova ia abidadama henia, a? (Iobu 1:8)

Lasi, Iobu bukana lalonai ia hahedinaraia, Dirava ese Elihu ia abia dae. Bona Iobu ena nega lalonai, Israel taudia hutuma bada be Aigupito dekenai idia noho, bona namo lasi ita laloa unai taudia iboudiai be abidadama lasi taudia bona Dirava ese ia abidia dae lasi.​—8/1, rau 31.