Keriso Ena Lou Mai Bona Iena Lohia Negana
“Inai Iesu, hari umui ia rakatania bona guba dekenai ia daekau lao be dohore ia giroa mai, hari umui itaia ia daekau hegeregerena.”—KARA 1:11.
1, 2. (a) Iesu be guba ai ia daekau neganai, aneru rua be edena bamona Iesu ena aposetolo taudia idia durudia? (b) Keriso do ia lou mai dainai dahaka henanadai idia vara?
TATAU 11 be Olive Ororona ena east kahanai idia gini bona guba dekenai idia itaia. Miniti haida gunanai Iesu Keriso ia daekau lao, ela bona ori ta ese ia hunia. Ia danu idia noho hebou neganai, unai tatau idia itaia nega momo Iesu be ia hamomokania ia be Mesia; ia mase neganai edia kudou idia lalohisihisi bada bena ia toreisi lou neganai idia moale hisidae. To hari ia lao vadaeni.
2 Aneru rua idia hedinarai haraga bona inai heduru hereva idia henia, idia gwau: “Galilea taudia e, badina dahaka umui gini bona guba dekenai umui itaia noho? Inai Iesu, hari umui ia rakatania bona guba dekenai ia daekau lao be dohore ia giroa mai, hari umui itaia ia daekau hegeregerena.” (Kara 1:11) Unai ese ia hagoadadia—Iesu be guba ai ia daekau neganai ia be tanobada bona taunimanima ia laloaboio lasi! Lasi, to Iesu do ia giroa lou. Sedira unai hereva dainai aposetolo taudia be helaro idia abia. Hari inai negai, taunimanima momo be Keriso do ia lou mai ena gwauhamata dekenai idia laloa bada. Haida ese idia gwauraia ena “Mai Negana Iharuana” eiava “Ginidae Negana.” To momo idia daradara Keriso do ia lou mai ena anina momokani be dahaka. Keriso be edena dala ai do ia giroa lou? Edena negai? Bona hari inai negai iseda mauri dekenai ena anina be dahaka?
Keriso Ia Lou Mai Dalana
3. Taunimanima momo be Keriso ena lou mai dekenai dahaka idia laloa?
3 An Evangelical Christology bukana ia hereva hegeregerena, “Keriso ia giroa lou eiava ia lou mai (parousia) neganai Dirava ena basileia do ia haginia taunimanima iboudiai vairadiai bona do ia noho ela bona hanaihanai.” Taunimanima momo idia laloa Keriso ia lou mai neganai taunimanima ibounai tanobada dekenai be matana amo do idia itaia. Unai hereva idia hamomokania totona, momo be Apokalupo 1:7 idia duahia, ia gwau: “Umui itaia, ia be ori latanai ia mai noho. Taunimanima ibounai be momokani do idia itaia. Idia gwadaia taudia ese danu do idia itaia.” To unai siri ena anina be matana korikori dekenai do idia itaia, a?
4, 5. (a) Edena dala ai ita diba Apokalupo 1:7 ena anina be matana korikori dekenai lasi? (b) Edena dala ai ita diba Iesu ena hereva ese unai lalohadai ia hamomokania?
4 Namona be oi laloatao Apokalupo bukana be ‘toa amo’ ia hahedinaraia. (Apokalupo 1:1) Unai dainai, unai siri be laulau herevana badina Iesu “idia gwadaia taudia” be edena dala ai Keriso ena lou mai do idia itaia diba? Idia be kahirakahira lagani daha rua dekenai idia mase vadaeni! Ma danu, aneru idia gwau Keriso be ia daekau lao “hegeregerena” do ia lou mai. Ia be edena dala ai ia lao? Taunimanima milion momo ese idia raraia, a? Lasi, abidadama taudia haida sibona ese idia itaia. Bona aneru ese idia hereva henidia neganai aposetolo taudia be matana korikori amo Keriso ena laolao ela bona guba dekenai idia itaia, a? Lasi, ori ta ese Iesu ia hunia. Unai nega sisina murinai, mai ena lauma tauanina danu ia be lauma taudia edia guba dekenai ia vareai bona tanobada taudia be matana amo idia itaia diba lasi. (1 Korinto 15:50) Unai dainai, aposetolo taudia ese Iesu ena laolao hamatamaia negana sibona idia itaia; ena laolao dokona, ia be iena Tamana, Iehova, vairanai, guba dekenai ia giroa lou neganai idia itaia diba lasi. Unai be abidadama ena matana amo sibona idia itaia diba.—Ioane 20:17.
5 Bible ia hadibaia Iesu ena lou mai be unai dala hegeregerena. Ia mase negana sisina vairanai, Iesu ia gwau: “Nega daudau lasi tanobada taudia ese lau do idia itaia lou lasi.” (Ioane 14:19) Danu ia gwau “Dirava ena Basileia ena mai, be ena toana do ita itaia lasi guna.” (Luka 17:20) Unai dainai, edena dala ai ‘matana ibounai be do idia itaia’? Haere ita diba totona namona be Iesu bona ia murinai idia raka taudia ese idia gaukaralaia herevana iena lou mai idia gwauraia neganai ita lalo-pararalaia namonamo guna.
6. (a) Dahaka dainai unai herevadia “ia lou mai,” “ia ginidae,” eiava “ia mai vadaeni,” be Greek herevana pa·rou·siʹa ena anina idia hahanaia maoromaoro lasi? (b) Dahaka ese idia hahedinaraia pa·rou·siʹa, eiava “lou mai” ena anina be nega kwadogina ia vara gauna sibona lasi?
6 To, Keriso be ia “giroa mai” sibona lasi. Unai hereva bona “ia lou mai,” “ia ginidae,” eiava “ia mai vadaeni,” edia anina be unai gauna ia vara nega kwadogina lalonai sibona. To Iesu bona ia murinai idia raka taudia ese idia gaukaralaia Greek herevana ena anina be ma gau haida ia gwauraia danu. Unai hereva be pa·rou·siʹa, ena anina be “ia badinai ia noho” eiava “ia noho.” Diba taudia momo idia gwau unai hereva ena anina be tau ta ia mai vadaeni, to unai sibona lasi, ena anina be ia noho danu—hegeregere lohia tauna ta be tano ta ena gavamani ia vadivadi henia neganai bamona. Unai nohona be nega kwadogina sibona lasi; ia be nega badana, idia makaia negana ta. Mataio 24:37-39 dekenai, Iesu ia gwau “Noa ena nega bamona, Taunimanima ena Natuna do ia [noho] [pa·rou·siʹa] neganai unai bamona gaudia do idia vara,” bona unai nega lalonai Abata ia vara. Abata ia do vara lasi neganai bona unai tanobada dikana ia do hadikaia ore lasi lagani momo gunanai, Noa ese lagatoi ia haginia bona kara dika taudia ia hadibaia unai dika do ia vara. Unai bamona danu, ena be ita itaia diba lasi to Keriso ia noho ena nega be lagani momo bena murinai dika badana do ia vara.
7. (a) Dahaka ese ia hamomokania ena pa·rou·siʹa eiava ena noho be taunimanima edia matana korikori amo do idia itaia lasi? (b) “Taunimanima ibounai” be Keriso ena giroa lou negana “do idia itaia” ia gwauraia siridia be edena dala ai bona edena negai do idia guguru?
7 Ita daradara lasi, ena noho eiava pa·rou·siʹa be tanobada taudia edia matana korikori amo do idia itaia lasi. Bema matana korikori amo do ita itaia, dahaka dainai Iesu ese nega bada ia henia iena murinai idia raka taudia dekenai toana ta ia henia iena noho negana idia diba totona?a To, Keriso be do ia mai Satana ena tanobada ia hadikaia ore totona, taunimanima iboudiai be iena noho mamina do idia diba momokani. Unai neganai “taunimanima ibounai be momokani do idia itaia.” Iesu ena inai taudia danu be do idia diba Keriso ena lohia negana be gau momokanina ta, bona do idia gari bada.—Mataio 24:30; 2 Tesalonika 2:8; Apokalupo 1:5, 6 itaia.
Edena Negai Ia Hamatamaia?
8. Dahaka kara ese Keriso ena noho hamatamaia negana ia makaia, bona edeseniai unai ibounai ia vara?
8 Mesia ia noho hamatamaia negana ai gau ta ia vara bona ia ese Mesia perovetalaia herevadia momo ia hagugurudia. Guba dekenai king ena korona ia abia. (2 Samuel 7:12-16; Isaia 9:6, 7; Esekiel 21:26, 27) Iesu ese ia hahedinaraia iena noho negana be iena lohia negana hegeregerena. Parabole hereva momo dekenai, sibona ia gwauraia biaguna ta bamona, iena ruma bese bona hesiai taudia ia rakatanidia, nega daudau ia lao “hanua daudau” dekenai bona unuseniai “ena basileia dekenai king dagina do ia abia.” Unai parabole bamona ta ia henia iena aposetolo taudia edia henanadai ia haerelaia totona, idia ura idia diba iena pa·rou·siʹa be edena negai do ia matamaia; parabole hereva ma ta ia henia badina “idia laloa Dirava ena Basileia be unai neganai do ia hedinarai.” (Luka 19:11, 12, 15; Mataio 24:3; 25:14, 19) Unai dainai, tanobada dekenai tau ta bamona ia noho neganai, king dagina ia abia negana be do daudau nega vairanai, unai be guba ena “hanua daudau” dekenai do ia vara. Unai be edena negai do ia vara?
9, 10. Dahaka ese ia hamomokania Keriso be guba dekenai ia lohia vadaeni, bona Iesu be edena nega ai ia lohia hamatamaia?
9 Iesu ena hahediba taudia ese idia henanadai henia neganai, idia gwau: “Do oi giroa mai [noho], bona tanobada dokona danu, ena toana be dahaka?” Iesu ia haere henidia bona unai negana ia gwauraia namonamo. (Mataio, karoa 24; Mareko, karoa 13; Luka, karoa 21; 2 Timoteo 3:1-5; Apokalupo, karoa 6 itaia danu.) Unai toana ese nega dikana ia gwauraia hedinarai namonamo. Unai nega lalonai tanobada ibounai dekenai tuari do idia vara, taravatu utua karadia idia bada idia lao, ruma bese edia mauri ia dika ia lao, daihanai goreredia, aniani lasi, bona tano mareremarere negana—unai be gabu haida dekenai sibona lasi to tanobada ibounai dekenai idia abia hekwakwanaidia. Unai gaudia oi itaia idia vara, a? Dina iboudiai idia vara gaudia ese idia hamomokania hari inai nega, lagani 1900 C.E. murinai, be Iesu ia perovetalaia negana.
10 Tanobada sivarai idia torea taudia idia gwau 1914 murinai tanobada ena sivarai ia idau, unai be lagani badana bona unai murinai hekwakwanai momo idia koua diba lasi, idia bada idia lao tanobada ibounai dekenai. Oibe, tanobada dekenai idia vara gaudia ese Bible ena peroveta hereva idia hagugurua, idia hahedinaraia 1914 ai Iesu be guba dekenai King ai ia lohia hamatamaia laganina. Ma danu, Daniel karoa 4 ena peroveta herevana ta ese ia hahedinaraia unai lagani—1914—be Iehova ese ia abia hidi King do ia lohia hamatamaia laganina.b
Dahaka Dainai Ia be Hekwakwanai Negana?
11, 12. (a) Dahaka dainai haida idia abia dae diba lasi Keriso be hari guba dekenai ia lohia? (b) Iesu be King ena korona ia abia murinai idia vara gaudia be edena bamona ita haheitalaia diba?
11 To, haida idia gwau, ‘Bema Mesia be guba dekenai ia lohia, dahaka dainai tanobada dekenai hekwakwanai momo idia vara? Iena lohia siahuna be lasi, a?’ Haheitalai ta ese ita do ia durua. Presiden dikana ta ese tano ta ia lohiaia. Unai tano ena gabu ibounai dekenai lohia dalana dikana ia haginia. To eleksen idia karaia; tau namona ta ia kwalimu. Vadaeni, dahaka do ia vara? Demokratik tanodia ai bamona, presiden matamatana be iena lohia dagina ia do abia lasi neganai, gavamani haidaua totona be hua haida ia abia. Unai tatau rua be unai negana ai edena bamona do idia karaia? Tau namona be maoromaoro gabu ibounai dekenai, lohia tauna gunana ese ia havaraia dikadia do ia kokia diba, a? Reana ia be hanua badana do ia laloa guna, ani? Ia be gavamani matamatana do ia haginia bona presiden gunana ena lohia turadia bona durua taudia do ia luludia guna, ani? Unai neganai, ia be siahu ibounai do ia abia neganai, ia be lohia goadana bona goevana gabuna amo do ia lohia diba. Bona presiden dikana ena siahu ia do boio lasi ena nega kwadogina lalonai, kara haraga koikoi amo ia abia kohudia ibounai ia gogodia, ani?
12 Unai be Keriso ena pa·rou·siʹa bamona. Apokalupo 12:7-12 ese ia hahedinaraia Keriso be guba dekenai King ai idia halaoa neganai, iena kara ginigunana be guba amo Satana bona iena demoni ia negedia oho, unai amo ia be Guba bona Tanobada Ibounai ena lohia gabuna ia hagoevaia. Unai tuari dekenai ia kwalimu lasi dainai, iena “nega be ia kwadogi” bona Keriso be iena siahu ibounai tanobada dekenai ia do hahedinaraia lasi neganai Satana be edena bamona ia karaia? Unai presiden dikana bamona, ia ura inai nega dikana amo gau momo ia abia. Moni ia ura lasi; ia ura taunimanima be ia murinai idia mai. Ia ura taunimanima momo be Iehova bona Ia ese ia abia hidi lohia King dekena amo ia veridia oho.
13. Bible siri be edena bamona idia hahedinaraia Keriso ia lohia hamatamaia neganai tanobada dekenai dika bada do ia noho?
13 Unai dainai, ita hoa lasi, Mesia ia lohia hamatamaia negana be “dika bada” negana. (Apokalupo 12:12) Unai hegeregerena, Salamo 110:1, 2, 6 ese ia hahedinaraia Mesia be ‘iena inai taudia bogaragidiai’ ena lohia negana ia hamatamaia. Gabeai ia be “tanobada besedia” do ia hadikadia ore, Satana ena tanobada dikana ena kahana ibounai danu!
Mesia ese Tanobada Ia Lohiaia Negana
14. Satana ena tanobada dikana do ia hadikaia ore murinai Mesia be dahaka do ia karaia?
14 Satana ena tanobada bona idia durudia taudia iboudiai ia hadikaia ore murinai, King Mesiana, Iesu Keriso, be iena Lagani 1,000 Lohia Negana idia perovetalaia Bible herevadia namodia do ia hagugurudia diba. Isaia 11:1-10 ese ita ia durua Mesia be edena bamona lohia tauna ita diba totona. Is 11 Siri 2 ese ita ia hamaoroa “ia latanai Iehova ena lauma do ia diho mai, aonega bona lalo-parara laumana, sisiba bona goada laumana.”
15. Mesia lohiana dekenai “goada laumana” ena anina be dahaka?
15 Namona be oi laloa Iesu ena lohia negana ai “goada laumana” be dahaka do ia havaraia? Tanobada dekenai ia noho neganai, ia be Iehova ena amo goada sisina ia abia hoa karadia ia karaia totona. Bona ena kudou amo ia hahedinaraia ia ura taunimanima ia durudia, ia gwau, “Lau ura.” (Mataio 8:3) To unai negadiai ia karaia hoa karadia be guba dekenai ia lohia neganai do ia karaia gaudia idia haheitalaia. Gabeai Iesu be tanobada ibounai dekenai hoa karadia do ia karaia! Gorere taudia, mata-kepulu taudia, taia kudima taudia, tauanina dikadia taudia, bona aena dika taudia do ia hanamodia bona do idia dika lou lasi. (Isaia 35:5, 6) Aniani do ia haria namonamo taunimanima ibounai dekenai, bona hitolo do ia vara lou lasi. (Salamo 72:16) To Dirava ese do ia lalodia tao neganai, guri gabudia ai idia noho taunimanima milion momo be edena bamona? Iesu ena “goada” anina be ia be mai ena siahu ia hatoredia isi lou totona, bona dala ia kehoa Paradaiso dekenai do idia mauri hanaihanai diba totona! (Ioane 5:28, 29) To, ena be unai goada ibounai do ia abia, King Mesiana be hanaihanai do ia manau. Ia be “Iehova gari henia do ia moalelaia.”—Isaia 11:3.
16. King Mesiana be edena bamona Hahemaoro Karaia Tauna, bona edena dala ai unai be tanobada hahemaoro karaia taudia edia kara amo ia idau?
16 Danu, unai King be Hahemaoro Karaia Tauna goevadaena. Ia be “do ia hahemaoro lasi ena matana ia itaia gaudia sibona dainai, bona lalona do ia hadaia lasi taiana idia kamonai herevana sibona dainai.” Edena tanobada hahemaoro karaia tauna ta, guna eiava hari, be unai bamona idia gwauraia diba? Hahemaoro ia karaia namonamo tauna be ia itaia bona ia kamonai gaudia amo sibona hahemaoro ia karaia diba, sibona ena aonega eiava lalo-parara ia gaukaralaia. Unai dainai, hari tanobada gunana ena hahemaoro idia karaia taudia bona idia durudia taudia be koikoi herevadia, kota kerere karaia daladia, eiava hereva idauidau dainai hahemaoro idia karaia namonamo lasi. Nega momo taga taudia bona siahu bada taudia sibona be diba momo loia taudia idia gaukaralaidia diba, hegeregere idia be hahemaoro karaia dalana maorona idia hoia. Hahemaoro Karaia Mesia Tauna be unai bamona lasi! Ia be kudou ia itaia diba. Gau ibounai ia itaia. Hahemaoro maoromaoro mai ena lalokau bona hebogahisi do ia hoihoilaia diba lasi. To nega ibounai do ia noho sibona.—Isaia 11:3-5.
Iena Lohia Ena Anina Oi Dekenai
17, 18. (a) Isaia 11:6-9 dekenai taunimanima edia gabeai negana namona be edena bamona ia herevalaia? (b) Unai peroveta hereva ena anina badana be daika dekenai, bona dahaka dainai? (b) Edena dala ai unai peroveta hereva be animal dekenai do ia guguru danu?
17 Momokani, Mesia ena lohia negana be mai anina bada ia lohiadia taudia dekenai. Taunimanima ia haidaua. Isaia 11:6-9 ese taunimanima ia haidaua daladia ia hahedinaraia. Unai peroveta hereva dekenai mai edia dagedage, ala-ala animal—bea, uda sisiadia, lepad, laion, bona gaigai—be manau animal bona taunimanima edia natudia danu maino dekenai do idia noho ia herevalaia. To hari idia dagedage gaudia be gabeai do idia dagedage lasi! Dahaka dainai? Is 11 Siri 9 ia haere, ia gwau: “Idia be lauegu ororo helagana dekenai dika do idia havaraia lasi; badina tanobada ibounai be Iehova ena diba maorona amo dohore ia honudae, davara ia honudae hegeregerena.”
18 Momokani, “Iehova ena diba” be animal ia haidaua lasi; unai dainai unai siri edia anina badana be taunimanima dekenai. Mesia ena lohia dalana be tanobada ibounai dekenai hadibaia gaukarana ia durua, taunimanima ia hadibadia Iehova bona iena kara dekenai, ia hadibadia edia dekena taudia idia lalokau henidia, idia matauraidia, bona idia lalodia namo totona. Do ia mai Paradaisona dekenai, Mesia be hoa dalana amo taunimanima do ia durudia ela bona tauanina ai bona kara dekenai idia goevadae. Taunimanima edia kara idia hadikadia dagedage bona animal bamona karadia be do idia ore. Danu, taunimanima be animal ida do idia maino heheni!—Genese 1:28 itaia danu.
19. Hari inai dina gabedia lalonai Mesia ena lohia negana be edena dala ai taunimanima edia mauri ia haidaua?
19 To, namona be oi laloa Mesia be harihari ia lohia. Hari danu, iena Basileia henunai idia noho taudia be diba idia abia maino dekenai idia noho hebou totona, dala tamona ai Isaia 11:6-9 idia hagugurua totona. Ma danu, lagani 80 bona ma haida dekenai, Iesu be Isaia 11:10 ia hagugurua, ia gwau: “Unai dina ai Iese ramuna do ia gini, taunimanima ese idia itaia pepena bamona. Bese idauidau ese do idia tahua, bona ena noho gabuna be do ia herea dae.” Tanobada besedia iboudiai dekenai taunimanima be Mesia idia tahua. Dahaka dainai? Badina ia lohia negana amo, ia be “pepe bamona” ia gini. Atai ai herevalaia vadaeni, ia ese hadibaia dalana amo tanobada ibounai dekenai ia noho negana ia hahedinaraia. Oibe, Iesu ia peroveta, ia gwau hari tanobada gunana ia do ore lasi neganai, tanobada ibounai dekenai haroro gaukarana be iena giroa lou bona ena noho toana badana ta.—Mataio 24:14.
20. Mesia ena lohia siahu henunai idia noho taudia be edena bamona idia laloa lasi be namo, bona badina be dahaka?
20 Unai dainai Keriso be mai ena King siahuna ida ia noho be ia vara momokani gauna ta, ia be tomadiho idia stadilaia taudia idia kikilaia kava herevana ta sibona lasi. Iena lohia siahuna be mai anina hari tanobada taudia dekenai bona edia mauri ia haidaua, Isaia ese guna ia perovetalaia hegeregerena. Iesu be hari tanobada dikana amo iena Basileia dekenai taunimanima milion momo ia veridia. Oi ia lohiaia, a? Namona be mai iseda ura bada bona moale danu iseda Lohia Tauna ita hesiai henia, unai bamona ita karaia be maoro! Momokani, ita hesiku haraga diba, bona namo idia itaia diba lasi tanobada taudia bamona ita hereva diba: “Iesu ia gwauhamata, do ia giroa mai, a? Edeseni ia noho?” (2 Petero 3:4) To Iesu ia hereva bamona, ia gwau: “Ena lalona do ia goada noho ela bona dokona, unai tauna be do ia mauri.”—Mataio 24:13.
21. Edena dala ai ita ibounai be Mesia helarona ita moalelaia karana ita habadaia diba?
21 Daudau lasi, Iehova be Iena Natuna do ia hamaoroa tanobada ibounai dekenai ia noho vadaeni toana momokanina do ia hahedinaraia totona. Namo lasi oiemu helaro unai dina dekenai ia manoka. Iesu ena Mesia dagina bona ia lohia vadaeni King karadia oi laloa. Danu, Iehova Dirava, Bible lalonai Mesia helarona ia torea bona ia hegaegaelaia tauna oi laloa bada. Unai oi karaia neganai, sedira aposetolo Paulo bamona do oi laloa, ia torea, ia gwau: “Dirava ena namo bona iena hariharibada be bada bona bada herea, ani?”—Roma 11:33.
[Footnotes]
a Lagani 1864 lalonai, tomadiho stadilaia tauna R. Govett be inai bamona ia gwauraia: “Lau dekenai unai hereva ia hedinarai namonamo. Ia noho toana ia henia anina be ia be hehuni gauna. Ta ia noho ita itaia neganai ia noho ena toana ia henia be anina lasi.”
b Unai hereva habadaia totona, “Let Your Kingdom Come” bukana, rau 133-9 itaia.
Edena Bamona Do Oi Haere?
◻ Keriso be edena dala ai ia giroa lou?
◻ Edena dala ai ita diba Keriso ena pa·rou·siʹa be matana korikori amo do ita itaia lasi bona nega sisina daudau negana lalonai do ia vara?
◻ Keriso ia noho negana be edena negai ia hamatamaia, bona edena bamona unai ita diba?
◻ Mesia be edena bamona guba Lohiana?
◻ Keriso ia lohia neganai edena dala ai ia lohiadia taudia edia mauri ia haidaua?
[Picture on page 15]
Iesu do ia lou mai helarona be mai anina bada iena abidadama aposetolo taudia dekenai
[Picture on page 17]
Guba amo ia lohia neganai, Iesu be tanobada ibounai dekenai hoa karadia do ia karaia
[Credit Line]
Earth: Based on NASA photo