Keriso ena Noho Negana Hadiaria Karana
“Taunimanima ena Natuna be mai ena hairai danu do ia mai,. . . bese ibounai . . . do ia hapararaia.”—MATAIO 25:31, 32.
1. Kerisendom ena haroro taudia idia gwau Mataio 24:3 ena anina be dahaka?
IESU ena mase negana be kahirakahira neganai, ena hahediba taudia 4 ese edia lalonai ibounai ida ia idia nanadaia, idia gwau: “Mani oi hamaoroa ai dekenai, oiemu hereva gauna edena negai do idia vara? Do oi giroa mai [Greek gado, pa·rou·siʹa], bona tanobada dokona danu, ena toana be dahaka?” Nega daudau lalonai Kerisendom ena haroro taudia bona torea taudia idia laloa ena anina be, Iesu ena hahediba taudia edia hereva Mataio 24:3 ai ese idia hahedinaraia, Iesu be ena tauanina ai do ia hedinarai lou mai ena hairai bada, taunimanima iboudiai vairadiai. Unai be Keriso ena mai iharuana idia gwauraia. To edia lalohadai be maoro eiava?
2, 3. (a) Studies in the Scriptures bukana ese inai hereva “mai” bona “noho” edena bamona ia haidaudia? (b) Iehova ena orea taudia edia lalodia idia parara Keriso ena pa·rou·siʹa be dahaka?
2 Lagani 1889 ai, Iehova ia horodia taudia edia lalohadai Iesu ena lou mai enai be idia hamaoromaoroa vadaeni. Buka ta ladana Studies in the Scriptures ai, Charles T. Russell, Watch Tower Bible and Tract Society ena presiden ginigunana, ia gwau: “Parousia . . . anina be noho, bona inai hereva mai be ia ida idia hahegeregerea be kerere. ‘Emphatic Diaglott’ . . . ai parousia ia torea hanai maoromaoro; mai, anina be dala ai ia mai noho, be ia torea lasi, to noho ia torea, anina be Iesu ia ginidae murinai ia noho. [Iesu] ia gwau, ‘Noa ena nega hegeregerena, Taunimanima ena Natuna ena parousia [noho] neganai unai bamona gaudia do idia vara.’ Noa ena mai bona eda Lohiabada ena mai ia hahegeregeredia lasi . . . Ia hahegeregeredia gaudia be inai: ‘Abata badana ia do ginidae lasi neganai’ Noa be taunimanima bogaragidiai ia noho negana, bona Keriso be nega iharuana ia mai negana murinai tanobada ai ia noho negana; unai be Lohiabada [Iehova] ena Dina ena hisihisi badana ia do ginidae lasi neganai.”—Mataio 24:37.
3 Anina be, unai neganai Iehova ena orea taudia be idia diba vadaeni Keriso ena pa·rou·siʹa ai ia be taunimanima vairadiai do ia hedinarai lasi. Ma idia diba Idau Besedia Edia Nega be lagani 1914 lalonai do ia ore. Lauma diarina ia bada ia lao noho, bena gabeai idia diba, unai lagani lalonai Iesu Keriso be guba ai ena terona latanai ia helai bona Basileia ena Pavapava ai ia lao.—Hereva Lada-isidia 4:18; Daniel 7:13, 14; Luka 21:24; Apokalupo 11:15.
‘Iseda Lohiabada ena Noho Negana’
4 Vadaeni, hari inai negai, Baibel ena hereva, “iseda Lohiabada ena noho negana” herevana, ena anina be dahaka? (1 Tesalonika 5:23, NW) Diba momo tauna ta ia gwau, ‘Gunaguna dagi bada tauna ta, pavapava ta, be provinsi ta dekenai ia vadivadi negana be ena pa·rou·siʹa idia gwauraia.’ Unai dainai, inai hereva ena anina be, lagani 1914 ai guba ai Lohiabada Iesu Keriso be Dirava ese terona latanai ia hahelaia negana amo Pavapava hegeregerena ia noho. Ena be taunimanima ese idia itaia diba lasi, to ia mai vadaeni, hari ia lohia noho, bona ‘do ia lao, iena inai taudia bogaragidiai do ia kwalimu’ totona. (Salamo 110:2) Lagani 79 bamona lalodiai tanobada taudia ese Keriso ena pavapava siahuna ena mamina idia abia.
5. Inai magasin ena stadi herevadia toiosi lalodiai, dahaka gau pa·rou·siʹa neganai idia vara be do ita stadilaidia?
5 Inai stadi herevadia toiosi ai, Keriso ena Basileia ese hari inai nega lalonai ia karaia karadia badadia do ai gwauraidia. Ginigunana ai, Baibel ese ia perovetalaidia gaudia do ai herevalaidia, unai gau be idia vara vadaeni eiava idia vara noho. Hereva iharuana ai, ai ese hesiai tauna mai ena kamonai bona mai ena kara maoromaoro oreana ese idia karaia noho gaukarana badana do ai herevalaia, unai orea be Iesu ese ia gaukaralaia, pavapava dagina ai ia noho negana ibounai lalonai. (Mataio 24:45-47) Hereva ihatoina ai, dokona badana do ai herevalaia, ‘hisihisi badana’ negana unai. Unai neganai Iesu do ia mai, kara dika taudia haoredia totona bona kara maoromaoro taudia hamauridia totona. (Mataio 24:21, 29-31) Paulo ese unai nega ia gwauraia, ia gwau: “Dirava ese umui bona ai, hisihisi ita abia noho taudia dekenai iena mauri namona do ia henia. Inai be do ia vara Lohiabada Iesu bona iena aneru mai siahu bada danu guba dekena amo do idia [hedinarai] neganai. Mai lahi siahu bada danu, Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”—2 Tesalonika 1:7, 8.
Toa
6 Iesu ena hahediba taudia ese idia nanadaia, Basileia ena siahu lalonai do ia noho toana be dahaka. Iena haere be Mataio karoa 24 bona 25 ai; toa ta mai ena kahana idauidau ia perovetalaia, bona hari unai toa ena anina be bese iboudiai lalodiai ia vara noho, inai hekwarahi momo bona hetoho negana lalonai. Ia gwau: “Umui naria namonamo, tau ta ese umui do ia hakaua kerere garina. Badina be taunimanima momo lauegu ladanai do idia mai, do idia gwau, ‘Lau inai Keriso,’ vadaeni taunimanima momo do idia hakaua kerere. To umui be tuari ena regena bona tuari ena sivarai do umui kamonai neganai do umui laloa daradara lasi. Inai gaudia be do idia vara guna, to dokona be do vaira neganai.”—Mataio 24:4-6.
7. Lagani 1914 amo ema, toa ena kahana dahaka dahaka be idia vara vadaeni?
7 Iesu be ma ia gwau tuari badadia do idia vara; rua idia vara vadaeni, ta be lagani 1914 amo ela bona 1918 bona ma ta be lagani 1939 amo ela bona 1945. Ma ia gwau, gabu idauidau ai hitolo bada do ia vara bona tano do ia marere, bona Keristen momokani taudia do idia dagedage henidia bada. Hanaia laganidia 80 lalodiai, Iehova ena Witness taudia, diari loalaia taudia, be Dirava ena Basileia ena sivarai namona ‘tanobada ibounai dekenai idia harorolaia’ noho lalonai, haida ese unai bamona idia kara henidia. (Mataio 24:7-14) Yearbook of Jehovah’s Witnesses danu ese idia hahedinaraia unai gau idia vara noho.
8, 9. (a) Iesu be ena pavapava dagina ai ia noho, anina be dahaka? (b) Iesu ena peroveta herevana, Keriso koikoidia herevana, ese do ia noho gabuna bona dalana edena bamona ia hahedinaraia?
8 Iesu ena pavapava dagina be mai anina tanobada hegegemadai, unai dainai tomadiho momokani be ia bada ia lao, tanobada ibounai. Iena pa·rou·siʹa neganai tanobada ibounai ia itaia namonamo. (1 Petero 2:12) Vadaeni, hanua badana ta ai ia noho bona unuseniai taunimanima ese idia itaia diba, a? Iesu ia gwau Keriso koikoi taudia do idia toreisi, ma ia gwau: “Bema umui do idia hamaoroa, do idia gwau, ‘Umui itaia, ia be tano gagaena ai,’ to do umui lao lasi. O do idia gwau, ‘Umui itaia, ia be daiutu lalonai,’ to do umui kamonai lasi. Badina be, kevaru bamona, dina daekau kahana amo ia kevarua isi ela bona dina diho kahana ai ia hedinarai, Taunimanima ena Natuna ena noho [pa·rou·siʹa] danu do ia unai bamona.”—Mataio 24:24, 26, 27, NW.
9 Iesu, “Taunimanima ena Natuna,” be ia diba goevagoeva do ia lou mai murinai ia be edeseniai do ia noho. Ia be tanobada ena gabu ta ai do ia noho lasi. “Tano gagaena ai” do ia hedinarai lasi, Mesia do idia tahua taudia be gavamani taudia ese do idia itadia diba lasi gabuna ai ia ida do idia hereva hebou lasi; iena orea taudia be unai bamona gabuna ta ai do ia tereinidia lasi, do idia tuari bena ia na tanobada ibounai lohiaia Mesiana ai do idia halaoa totona. “Daiutu” ta lalonai do ia komu lasi; ia mai ena orea taudia hereadia ida palani hehunidia do idia karaia lasi, tanobada ena gavamani do idia hamorudia bena Mesia dagina do ia abia totona. Lasi vaitani!
10. Baibel ena hereva momokani ena kevaru be tanobada ibounai edena bamona ia hedinarai?
10 Iesu ia diba, ia lou mai vadaeni bona pavapava bamona ia noho herevana do idia hunia be anina lasi. Ia peroveta hegeregerena, Baibel ena hereva momokani ena kevaru be idia kevarua isi noho, dina daekau kahana amo ela bona dina diho kahana. Momokani, diari loalaia taudia hegeregeredia, Iehova ena Witness taudia be ‘bese idauidau edia diari ai idia lao, [Iehova ena] hahemauri be tanobada ena dokona ai do ia kau totona.’—Isaia 49:6.
Aneru Edia Kara
11 Iesu do ia noho negana idia gwauraia siridia ma haida be idia gwau aneru momo ese ia do idia bamoa eiava ia ese ‘do ia siaidia.’ (Mataio 16:27; 24:31) Iesu ese uiti bona ava dikadia ia parabolelaidia neganai, ia gwau “uma be tanobada” bona “uiti utua negana be tanobada ena dokona. Utua taudia be aneru.” Uiti bamona taudia, Dirava ese ena lauma amo ia havaradia lou taudia unai, be Tanobada Ibounai Tuarina Ginigunana ai idia vara gaudia ese ia hakarohodia, bena lagani 1919 murinai Iesu ena oda hegeregerena aneru ese idia gogodia matamaia, bona idia hahegaegaedia, gaukara ma haida be Pavapava ena ladana ai do idia karaia totona. (Mataio 13:38-43) Bena lagani 10 bamona lalodiai taunimanima daha daha ese Dirava ena Basileia idia badinaia matamaia bona Dirava ese ena lauma amo ia horodia. Orena taudia ginigunadia edia orea lalonai idia vareai. Edia orea be hesiai tauna mai ena kamonai bona mai ena kara maoromaoro, ema bona hari.
12. Aneru be Iesu ida edena gabu idia hagoevaia vadaeni, bona anina be dahaka tanobada enai?
12 Lagani 1914 ai Iesu be ena terona latanai ia helai murinai aneru ese idia durua dalana ma ta be Apokalupo 12:7-9 ia gwauraia: “Mikael [Iesu Keriso] mai ena aneru danu ese huala idia tuari henia. Huala mai ena aneru danu idia tuari henia. To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho. Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.” Anina be, ena be guba idia hagoevaia vadaeni, to tanobada idia do hagoevaia lasi, Iehova ena ladana hahelagaia totona. Hari inai lagani 1993 lalonai, Dirava ena amo herevana be do mai anina: “Tanobada . . . madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”—Apokalupo 12:12.
Guba Toreisi-Louna
13 Hoa gauna ma ta, Keriso ena noho negana lalonai ia vara gauna, be guba toreisi-louna. Aposetolo Paulo ese ia hahedinaraia, horoa Keristen taudia, nega daudau edia mase guridia lalodiai idia mahuta taudia, be Keriso ese do ia hamauridia guna, bena ia ida do idia noho hebou, lauma gabuna ai. Iseda orea ese ia hahedinaraia gaudia hegeregeredia, toana be unai be lagani 1918 amo ia vara. Paulo ia gwau: ‘Keriso idia abidadama henia dainai ibounai do idia mauri. To ta ta ena nega, ena nega dekenai mauri do idia abia. Keriso ia toreisi lou guna, unai murinai, [ena pa·rou·siʹa negana lalonai], Keriso idia badinaia taudia ibounai danu do idia toreisi lou.’ (1 Korinto 15:22, 23) Tesalonika Ginigunana 4:15-17 ai Paulo ese unai ia hamomokania, ia gwau: “Lohiabada [ena pa·rou·siʹa negana lalonai] ita mauri noho taudia ese guna mase dekenai idia mahuta taudia do ita gunalaia lasi. . . . Iesu idia abidadama henia taudia, . . . mase dekenai idia mahuta vadaeni . . . be do idia toreisi lou guna. Unai neganai ita mauri noho taudia be Dirava ese idia danu ita do ia abia daekau, guba ena ori latanai, Lohiabada danu do ita hedavari.” Keriso ena horoa taudia 144,000 ese unai davana namo hereana idia abia.—Apokalupo 14:1.
13, 14. (a) Baibel ese ia hahedinaraia dahaka be lagani 1918 amo ia vara? (b) Paulo bona Ioane ese horoa taudia hari inai negai idia noho edena bamona idia herevalaidia?
14 Paulo ese ia hahedinaraia hegeregerena, horoa taudia hari inai negai idia mauri noho ese unai idaunegai aposetolo bona hahediba taudia do idia gunalaidia lasi. Aposetolo Ioane ese hari inai negai idia mase taudia inai bamona ia gwauraidia: “ ‘Harihari ia lao, Lohiabada idia abidadama henia noho neganai idia mase taudia be do idia moale.’ Ma Lauma Helaga danu ia hereva, ia gwau, ‘Oibe, idia ese edia gaukara mai hekwarahi dekena amo do idia laga-ani, . . . edia kara namodia ena sivarai be idia danu nega tamona ia lao noho,’ ” idia toreisi lou murinai. (Apokalupo 14:13) Bona Paulo ia gwau: “Ita ibounai do ita mase lasi, to Dirava ese ita ibounai do ia senisia, do ita idau. . . . Oibe, kibi do idia hiriria, vadaeni mase taudia do idia toreisi lou, bona do idia mase lou diba lasi. Bona ita ibounai Dirava ese do ia senisia, do ita idau.” (1 Korinto 15:51, 52) Hoa karana badana unai!
15, 16. (a) Dahaka parabole be Iesu ese Luka 19:11-15 ai ia henidia, bona badina be dahaka? (b) Inai peroveta herevana be edena bamona ia momokani?
15 Nega ta, Iesu ese Dirava ena Basileia na iena hahediba taudia haida ia harorolai henidia neganai, parabole ta ia henidia edia lalohadai hamaoromaoroa totona, badina be “idia laloa Dirava ena Basileia be unai neganai do ia hedinarai. Ia gwau, ‘Lohia ta hanua daudau dekenai ia lao, ena basileia dekenai king dagina do ia abia, vadaeni inai murinai do ia giroa mai. Unai dainai ena hesiai taudia 10 ia boiria guna, 20 kina ta ta idia dekenai ia henia, ia gwau, “Do umui hoihoilaia ela bona do lau giroa mai.” . . . Basileia ia abia, vadaeni ia giroa lou, moni ia henia taudia dekenai ia boiria, edia hoihoi dekenai idia davaria gaudia do ia diba gwauraia.’ ”—Luka 19:11-15.
16 Unai “lohia” be Iesu, bona unai “hanua daudau” be guba; Iesu ia lao unuseni, basileia ta abia totona. Unai Basileia ena king dagina ia abia lagani 1914 lalonai. Unai murinai ia ese sibona ena orea taudia idia gwauraia taudia edia kara ia tahua, Basileia gaukarana, ia henidia vadaeni gaukarana, ai dahaka idia karaia vadaeni. Idia momo lasi ia hanamodia, ia gwau: “Namo herea, oi be hesiai tauna namona. Gau maragina oi naria namonamo dainai, hanua 10 edia lohia tauna do oi lao.” (Luka 19:17) Keriso be hari ia noho negana lalonai, Basileia sivaraina bona Dirava ena hahemaoro herevadia kara dika taudia latadiai be idia harorolaidia goadagoada, bona inai gaukara idia itaia tao danu. Keriso ese ena “hesiai tauna” namona ia henia gaukarana be unai.
Tanobada Ibounai Idia Haroro
17 Inai pa·rou·siʹa negana lalonai, mai edia moale bada ida haroro gaukarana idia karaia, bona kamonai matamata taudia idia durudia, do idia hegaegae hisihisi badana amo do idia roho mauri totona. Inai “hutuma bada herea,” orena taudia idia durudia, be ‘ladana hanamoa revarevadia’ ai idia lao. (Apokalupo 7:9; 2 Korinto 3:1-3) Paulo ese gogodia gaukarana ena moale ia herevalaia, ia gwau: “Iseda Lohiabada Iesu [do ia noho] negana [pa·rou·siʹa] ai, iena vairana dekenai do ita gini. Unai neganai ai be dahaka kwalimu ahuna do ai abia? Ai moalelaia gauna bona ai heagilaia gauna be dahaka? Umui sibona, ani?”—1 Tesalonika 2:19.
Do Umui Goeva bona Kerere Lasi
18 Paulo ese danu Keriso be hari ia noho negana lalonai idia mauri noho taudia dainai ia guriguri, ia gwau: “Maino ena Dirava ese umui do ia hahelagaia. Emui lalona bona emui laumana bona emui tauanina be ia ese do ia naria noho. Mai kerere ta lasi danu do umui noho . . . iseda Lohiabada Iesu Keriso [ena noho negana (pa·rou·siʹa) ai].” (1 Tesalonika 5:23) Oibe, herevana ita be horoa taudia eiava ita be mamoe idaudia, lalo-tamona ai ita gaukara hebou, inai nega idau hereana lalonai do ita goeva noho bona do ita kerere lasi noho totona. Namona be do ita haheauka danu. Iakobo ia gwau: “Lauegu varavara e, do umui haheauka noho ela bona Lohiabada [ena noho negana (pa·rou·siʹa)]. . . . Bona mai abidadama ena laloa goada Lohiabada do umui naria noho, badina iena [noho negana (pa·rou·siʹa)] be kahirakahira.”—Iakobo 5:7, 8.
19. Petro ese pa·rou·siʹa edena bamona ia sisibalaia, bona dahaka do ita karaia be namo?
19 Hari inai negai ita mauri noho taudia be aposetolo Petro danu ese ita ia sisiba henia, ia gwau: “Inai hereva do umui diba guna be namo: nega dokonai, tauanina ena ura sibona idia karaia taudia be do idia hedinarai. Dirava badinaia kara do idia kirikirilaia. Vadaeni, umui dekenai do idia gwau, ‘Iesu ia gwauhamata, do ia giroa mai, a? Edeseni ia noho [pa·rou·siʹa]? . . . Iseda tubuna idia mase vadaeni, to tanobada ia karaia negana ia mai bona harihari gau ta be idau lasi.’ ” (2 Petero 3:3, 4) Ena be gonagona taudia momo be Keriso ena noho negana lalonai idia noho, to Iehova ena orea taudia ese tanobada idia hadiaria noho, taunimanima momo hamauridia totona.
Riviu Henanadaidia
◻ Iehova ena orea taudia be pa·rou·siʹa edena bamona idia hadibalaidia?
◻ Mataio 24:4-8 be edena bamona ia momokani?
◻ Aneru be King Keriso ida edena bamona idia gaukara hebou?
◻ Dahaka hoa karana be pa·rou·siʹa neganai ia vara?
◻ Dahaka moale be hari inai negai ia vara, bona daidia ese idia abia?
4. ‘Iseda Lohiabada Iesu Keriso ena noho negana’ be dahaka?
6. Dahaka toa mai ena kahana idauidau be Mataio karoa 24 bona 25 ai ia gwauraia?
11. (a) Aneru edia orea edena bamona ia gaukaralaidia, Basileia diarina halasia totona? (b) Uiti bamona taudia be edena orea ai idia gogodia? Edena negai?
17. Dahaka moale be pa·rou·siʹa ai ia vara?
18. (a) Paulo ese pa·rou·siʹa edena bamona ia gurigurilaia? (b) Ita ibounai be edena bamona do ita kara be namo, hari inai nega lalonai?