Korosi—Keristen Ena Toana ta, A?

LAGANI momo lalodiai taunimanima momo ese korosi be Keristen ena toana ta bamona idia abia dae. To unai korosi be momokani Keristen ena toana, a? Mai edia abidadama taudia momo ese korosi be Keristendom sibona ena gau lasi sivaraina idia diba neganai idia hoa. Oibe, tanobada hegegemadai Keristen lasi tomadihodia ese korosi idia gaukaralaia momo.

Hegeregere lagani 1500 ena murina negana ia matamaia neganai, Hernán Cortés bona iena “Keristen” ami taudia idia hegaegae Aztec basileiana idia tuari henia totona, edia imana dekenai saini idia dogoatao bona unai saini edia hereva ia gwau: “Mai abidadama momokani ida Helaga Korosi ena saini murinai ita raka, badina inai saini ena henunai do ita kwalimu.” Edia inai, tomadiho koikoi taudia unai be edia korosi idauna ta idia matauraia bada karana idia diba neganai reana idia hoa bada. Great Religions of the World bukana ia gwau: “Aztec taudia be taunimanima idia bouboulaidia bona Cortés bona ena murinai idia raka taudia dekenai unai kara be dika, ia be hegeregere Keristen tomadiho idia hevasehalaia Satana karadia bamona: . . . idia ese lahi bona medu diravadia be korosi toana amo idia tomadiho henidia.”

La Nación niuspepa dekenai, torea tauna José Alberto Furque ese ia hahedinaraia, lagani 1750 ia lao 1799 lalonai, “taunimanima idia stadilaia taudia bona guna idia vara karadia idia stadilaia taudia ese korosi toana bona ena vara dalana bona ena anina idia hepapahuahulaia.” Central America bona South America dekenai unai korosi toana momo idia davaria. Taunimanima haida idia ura bada idia hamomokania korosi be “Keristen” tomadiho sibona ena toana, unai dainai idia gwau Keristen taudia be America tanodia dekenai idia lao haroro guna, Columbus ia do lao lasi neganai! Taunimanima ese unai hereva koikoi idia dadaraia.

Unai lalohadai idia stadilaia taudia ese gau haida idia davaria bena unai hepapahuahu idia haorea. Furque ia gwau: “Lagani 1893 lalonai, Smithsonian Institution ese buka ta idia halasia neganai, idia hahedinaraia guna nao taudia ginigunadia be North America dekenai idia do ginidae lasi neganai . . . unai taudia be korosi idia tomadiho henia vadaeni bona unai ese ia hamomokania . . . unai hanua ibounai dekenai unai toana ia hedinarai bona edia tomadiho lalonai unai be mauri ia havaraia siahuna ena toana ta.”

Bible ese ia hahedinaraia Iesu be korosi dekenai idia hamasea lasi to ia be au maoromaoro ta dekenai, eiava stau·rosʹ. Unai Greek hereva be Mataio 27:40 ai ia hedinarai bona ena anina be au maoromaorona ta, hegeregere ruma ena du bamona. Unai dainai, korosi be Keristen momokani ena toana lasi. Iesu Keriso ese iena murinai idia raka taudia ia hereva henia neganai, ia ese Keristen momokani ena “toana” ia hahedinaraia, ia hamaorodia ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​—Ioane 13:35.