Dahaka Dainai Kaivakuku Tomadiho Henia Kara Ita Dadaraia?
“Lauegu natuna e, do umui naria namonamo, dirava koikoidia garina.”—1 IOANE 5:21.
1. Dahaka dainai Iehova tomadiho henia lalonai kaivakuku ita gaukaralaia lasi?
IEHOVA be auri, au, eiava nadi kaivakukuna ta lasi. Tanobada ena dubu lalonai ita atoa diba lasi. Ia be atai herea Laumana, taunimanima idia itaia diba lasi dainai, iena laulau ta ita karaia diba lasi. Unai dainai, Iehova ena tomadiho goevadaena lalonai kaivakuku ita gaukaralaia lasi be gau badana.—Esodo 33:20; Kara 17:24; 2 Korinto 3:17.
2. Dahaka henanadai ita laloa be namo?
2 Bema oi ese Iehova oi tomadiho henia, vadaeni, reana do oi henanadai, ‘Kaivakuku tomadiho henia karana be dahaka? Gunaguna, Iehova ena hesiai taudia be edena bamona idia dadaraia diba? Bona dahaka dainai hari ita dadaraia?’
Kaivakuku Tomadiho Henia Karana
3 Nega momo, kaivakuku tomadiho henia lalonai kara haida idia karaia. Kaivakuku tomadiho henia lalonai kaivakuku idia hahelagaia, idia lalokau henia, idia tomadiho henia, eiava idia laloa bada. Kaivakuku be dahaka? Ia be gau ta ena laulau, eiava gau ta toana idia tomadiho henia totona. Nega momo, idia laloa taunimanima edia atai ai ia mauri tauna eiava siahuna ta idia tomadiho henia. To, idia mauri lasi tanobada gaudia be kaivakuku ai idia halaoa bona idia tomadiho henia danu.
3, 4. Kaivakuku tomadiho henia kara be dahaka?
4 Baibel lalonai, kaivakuku idia gwauraia Heberu herevadia idia hahedinaraia idia be anina lasi, eiava idia gwauraidia dika. Unai hereva haida edia anina be “idia koroa eiava idia karaia kaivakuku gauna” (anina be au o nadi amo idia koroa gauna ta); “laulau, gau ta toana, eiava kaivakuku ta,” (ia veve aurina amo idia karaia gauna); “kaivakuku dikana”; “hekokoroku kaivakukuna” (anina be hekokorokulaia gauna ta); bona “kaivakuku bodagana.”
5. Dahaka dainai ita gwau diba lasi laulau iboudiai be kaivakuku gaudia?
5 Laulau haida be kaivakuku lasi. Dirava ese Israel taudia ia hamaorodia golo amo kerubi ena laulau idia karaia gwauhamata mauana totona, bona kalaga dubuna ena dabua ten edia lalona dekenai unai lauma gaudia edia laulau idia turia totona, bona Helaga Gabuna bona Helaga Herea Gabuna ia hapararaia dabuana dekenai laulau idia turia danu. (Esodo 25:1, 18; 26:1, 31-33) Hahelaga taudia sibodia ese idia karaia laulau gaudia idia itaia; unai gaudia be guba kerubi idia laulaulaidia. (Heberu 9:24, 25 itaia danu.) Ia hedinarai goevagoeva kalaga dubuna lalonai idia karaia kerubi be idia tomadiho henidia lasi, badina kara maoromaoro anerudia idia ura lasi taunimanima ese idia tomadiho henidia.—Kolose 2:18; Apokalupo 19:10; 22:8, 9.
Iehova Ena Lalohadai Kaivakuku
Tomadiho Henia Karana Dekenai
6 Iehova ena hesiai taudia ese kaivakuku tomadiho henia karana idia dadaraia badina ia ese kaivakuku karadia iboudiai ia ura henia lasi. Dirava ese Israel taudia dekenai taravatu ia henia kaivakuku do idia karaia lasi bona idia tomadiho henidia lasi totona. Unai Taravatu Ten lalonai inai hereva idia noho: “Oi ese koroa kaivakuku laulauna ta eiava guba dekenai eiava tanobada latanai eiava tano henunai ranudia lalodiai idia noho gaudia ta ena laulau oi karaia lasi. Idia vairanai oi tomadiho lasi bona oi hesiai henidia lasi, badina lau, Iehova, emu Dirava be lau mo sibona oi tomadiho henia Diravana.”—Esodo 20:4-6, NW.
7. Dahaka dainai Iehova ese kaivakuku tomadiho henia kara iboudiai ia ura henia lasi momokani?
7 Dahaka dainai Iehova ese kaivakuku kara iboudiai ia ura henia lasi momokani? Badina ia ura taunimanima be ia sibona idia tomadiho henia, unai ia hedinarai Taravatu Ten dekenai. Ma danu, iena peroveta tauna Isaia dekena amo ia gwau: “Lau be Iehova. Egu ladana unai; bona egu hairai do lau henia lasi ma tau ta dekenai, danu egu hahenamo do lau henia lasi kaivakuku laulaudia dekenai.” (Isaia 42:8) Nega ta, kaivakuku tomadiho henia kara be Israel taudia ia guidia dainai, “idia ese sibodia edia natudia maruanedia bona hahinedia lauma dikadia dekenai idia bouboulaidia.” (Salamo 106:36, 37) Kaivakuku tomadiho henia taudia be Dirava momokanina, Iehova, idia dadaraia, to unai sibona lasi, idia be Iehova ena Inai Tauna badana, Satana, bona ena demoni edia ura idia karaia.
Hetoho Lalonai Idia Abidadama Noho
8 Iehova ena ura ita badinaia noho neganai kaivakuku kara ita dadaraia diba. Daniel karoa 3 lalonai ia noho sivaraina ese unai ia hamomokania. Idia karaia golo kaivakuku badana ia hahelagaia totona Babulono ena pavapava Nebukadnesara ese ena basileia ena tau badadia ia oda henidia idia mai hebou totona. Unai oda be mai anina Sadaraka, Mesaka, bona Abedenego dekenai danu. Idia hebou taudia iboudiai ia oda henidia kibi idia hiriria neganai unai kaivakuku vairanai do idia tui diho. Unai dala amo Babulono ena dirava, Satana, ia ura doridia Babulono ena Basileia ia laulaulaia kaivakukuna idia tomadiho henia totona. Namona be oi laloa oi danu be unai nega lalonai oi noho.
9, 10. (a) Heberu memero toi be dahaka idia karaia, bona dahaka hahenamo idia davaria? (b) Heberu memero toi edia kara ese Iehova ena Witness taudia edena bamona ia hagoadaia?
9 Itaia! Heberu memero toi idia gini noho. Idia be Dirava ena taravatu idia laloatao, ia gwau kaivakuku eiava idia koroa gaudia karaia bona hesiai henia karana be dika. Nebukadnesara ia hereva henidia—ia gwau idia tomadiho henia, bema lasi do idia mase! To Iehova ena ura idia badinaia dainai, idia gwau: “Bema ia ura neganai, ai hesiai henia Diravana ese ai ia hamauria. Ia araia noho lahi gabuna amo, bona oiemu imana amo ai do ia hamauria, pavapava e. To bema ai ia hamauria lasi, mani oi laloa, pavapava e, oiemu dirava be ai hesiai henidia lasi, bona oi haginia golo laulauna do ai tomadiho henia lasi.”—Daniel 3:16-18.
10 Unai abidadama taudia be Dirava ena ura idia badinaia dainai idia hasiahua herea lahina dekenai idia negedia. Nebukadnesara ia hoa badina unai lahi lalonai taunimanima hani ia itaia, unai dainai Heberu memero toi ia boiridia lahi amo idia raka lasi totona, bona bero lasi dekenai idia raka lasi. Unai neganai pavapava ia gwau: “Sadaraka, Mesaka bona Abedenego edia Dirava lau hanamoa, badina ia ese ena aneru ia siaia [lahi lalonai ia noho tauna ihahanina] bona ena hesiai taudia ia hamauridia, Ia idia abidadama henia taudia bona pavapava ena hereva idia haidaua bona sibodia edia tauanina idia bouboulaia taudia unai, badina idia ese ma Dirava idauna ta idia hesiai henia lasi bona idia tomadiho henia lasi, to sibodia edia Dirava sibona idia tomadiho henia. Unai bamona haida ia hamauridia diravana ma ta ia noho lasi.” (Daniel 3:28, 29) Unai Heberu memero toi ese Dirava ena ura idia badinaia dainai, unai ese hari inai nega lalonai Iehova ena Witness taudia ia hagoadaia Dirava ena ura idia badinaia totona, politik lalonai idia vareai lasi, bona kaivakuku kara idia dadaraia totona.—Ioane 17:16.
Kota ai Kaivakuku Idia Lusi
11 Kaivakuku dadaraia ena badina ma ta be kaivakuku tomadiho henia be anina lasi. Ena be idia karaia kaivakuku haida edia toana be mauri taudia bamona—mai edia uduna, matana, bona taiana—to idia hereva diba lasi, gau ta idia itaia diba lasi, eiava idia kamonai diba lasi, bona idia tomadiho henia taudia ia durudia diba lasi. (Salamo 135:15-18) Unai ia hahedinaraia goevagoeva lagani 700 B.C.E. murinai, Dirava ena peroveta tauna ese Isaia 43:8-28 lalonai Iehova bona kaivakuku diravadia edia kota herevana ia torea neganai. Unai kota lalonai Dirava ena taunimanima Israel be kahana ta dekenai, bona tanobada besedia be ma kahana ta dekenai.
11, 12. (a) Isaia ese ia torea sivaraina Iehova bona kaivakuku diravadia dekenai be dahaka? (b) Iehova ese tanobada besedia edia dirava ia samanidia neganai dahaka ia vara?
12 Bona Isaia 44:1-8 lalonai Dirava ia ruhaia hesiai taudia idia gwau idia be “Iehova ena.” Ia sibona ia gwau: “Lau be ginigunana bona lau be ginigabena, bona ma Dirava ta ia noho lasi.” Kaivakuku diravadia ese unai hereva idia hakoikoia diba lasi. Iehova ese ena taunimanima dekenai ia gwau: “Umui be lauegu witness taudia,” ma ia gwau: “Lau bamona Dirava ta ia noho, a? Lasi, Nadi ta be lasi.”
13. Kaivakuku kara ese dahaka ia hahedinaraia kaivakuku idia tomadiho henia taudia dekenai?
13 Danu, kaivakuku tomadiho henia kara ita dadaraia badina unai kara be aonega lasi karana. Kaivakuku tomadiho henia tauna be ia ura henia auna ia abia bona ena kahana dekena amo kaivakuku diravana ta ia karaia ia tomadiho henia totona, bona ena kahana ta amo lahi ia karaia ena aniani ia nadua totona. (Isaia 44:9-17) Unai be kavakava karana! Kaivakuku diravadia ia karaia bona ia tomadiho henia tauna be ia hemarai danu badina unai gauna be dirava ta ia hamomokania diba lasi. To Iehova be Dirava ita hamomokanina diba, ia ese Babulono ena igui hesiai amo ena taunimanima do ia ruhadia ia perovetalaia, to unai sibona lasi, ia ese ia ruhadia. Ierusalem dekenai idia noho lou, Iuda ena siti idia haginidia lou, bona Babulono ena “ranu dobu”—Eufrate Sinavaina—ia kororo dainai Babulono taudia ia durudia diba lasi. (Isaia 44:18-27) Danu Dirava ese Parasa tauna Kurese be Babulono dekenai do ia kwalimu ia perovetalaia.—Isaia 44:28–45:6.
14. Guba ena Kota Badana lalonai, dahaka hereva do idia hamomokania vaitani?
14 Unai kota dekenai daika be dirava momokanina idia tahua neganai kaivakuku diravadia idia lusi. Bona Babulono dekenai ia vara gauna hegeregerena be hari inai negai ia laulaulaia gauna, Babulono Badana, tanobada ena tomadiho koikoi orea iboudiai dekenai do ia vara. Ia bona ena dirava iboudiai, ena tomadiho kohu iboudiai, bona idia tomadiho henia kaivakuku iboudiai do idia ore vaitani. (Apokalupo 17:12–18:8) Unai neganai guba ena Kota Badana lalonai, do idia hamomokania Iehova sibona be mauri bona momokani Diravana bona ena peroveta Hereva ibounai ia hagugurua.
Boubou Karana Demoni Dekenai
15 Iehova ena taunimanima ese kaivakuku karana idia dadaraia danu badina Dirava ena lauma helaga bona iena orea idia hakaudia dainai. Keristen ginigunadia edia negai, Iehova ena hesiai taudia edia hakaua oreana be Keristen taudia dekenai idia gwau: “Lauma Helaga bona ai be inai bamona ai laloa. Ai be maduna metau haida ma do ai atoa lasi umui dekenai. To inai taravatu mai badina gaudia, idia mo umui naria. Kaivakuku vairana dekenai idia atoa aniani umui ania lasi, rara umui ania lasi, aiona idia gigia gaudia edia hidio umui ania lasi, bona heudahanai kara umui karaia lasi.”—Kara 15:28, 29.
16. Oi sibona emu hereva amo, Paulo ena hereva kaivakuku bouboulaia karana dekenai ena anina oi gwauraia diba?
16 Kaivakuku dadaraia ena badina ma ta be ita ura lasi demoni ita tomadiho henia. Lohiabada Ena Adorahi Anianina ia herevalaia neganai, aposetolo Paulo ese Korinto Keristen taudia dekenai ia gwau: “Kaivakuku umui tomadiho henia lasi, umui rakatania. . . . Anibou Helaga ita ania neganai kapusi dekena amo Dirava ita hanamoa. Bona unai kapusi dekena amo ita inua neganai Keriso ena rarana ita inua hebou, ani? Bona paraoa ita makohia neganai Keriso ena tauanina ita ania hebou, ani? Ita be momo herea, to paraoa be tamona sibona. Unai dainai ita be tauanina tamona, badina be paraoa tamona ita ania. Israela taudia edia kara mani umui laloa. Boubou vamuna idia ania taudia be Dirava danu pata helagana ena gaukara idia karaia hebou, ani? Lauegu hereva ena anina be dahaka? Kaivakuku dekenai henia boubou gauna be mai anina, a? Kaivakuku danu be gau momokani, a? Lasi. To lauegu hereva anina be inai: Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi. Lau ura lasi lauma dikadia danu umui gaukara hebou. [Iehova] ena kapusi bona lauma dikadia edia kapusi ruaosi umui inua diba lasi.”—1 Korinto 10:14-22.
17. Keristen ginigunadia edia negai, Keristen tauna be kaivakuku ena boubou vamuna ia ania diba dalana be dahaka, bona dahaka dainai?
17 Animal ena kahana ta be kaivakuku dekenai idia bouboulaia, ena kahana ta be hahelaga taudia dekenai idia henia, bona tomadiho tauna be sisina ia abia aria ia karaia totona. To, ena vamu haida be maketi dekenai idia hoia diba. Unai dainai ena be Keristen tauna be tomadiho lalonai vamu ia ania lasi, to kaivakuku edia dubu dekenai ia lao vamu ia ania totona be namo lasi, badina unai kara ese taunimanima haida ia hahekwakwanaia diba eiava tomadiho koikoi dekenai ia veria diba. (1 Korinto 8:1-13; Apokalupo 2:12, 14, 18, 20) Kaivakuku vairanai animal idia bouboulaia karana ese ena hidio ia haidaua lasi, unai dainai Keristen tauna ese maketi dekenai unai vamu ia hoia diba. Danu ruma ta dekenai vamu abia dalana ia henanadailaia lasi. To bema ta ia gwau unai be “boubou vamuna” do ia ania lasi, tau ta ia hahekwakwanaia garina.—1 Korinto 10:25-29.[6]
18. Reana kaivakuku dekenai idia bouboulaia vamuna idia ania neganai, dahaka dainai unai ese haida ia veridia diba demoni idia tomadiho henia totona?
18 Taunimanima idia aniani hebou neganai lalo-tamona idia abia, unai hegeregerena, idia bouboulaia animal edia vamu idia ania neganai boubou patana amo idia aniani bona kaivakuku ia laulaulaia demoni diravana danu idia lalo-tamona. Unai kaivakuku karana amo, demoni ese taunimanima idia koudia Dirava momokanina tamona idia tomadiho henia garina. (Ieremia 10:1-15) Unai dainai Iehova ena taunimanima be kaivakuku dekenai idia bouboulaia gaudia idia ania lasi! Dirava ena ura ita badinaia, iena lauma helaga bona iena orea edia hakaua dalana ita abia dae, bona iseda lalona ita hadaia demoni tomadiho karana ita dadaraia totona, unai ese ita ia hagoadaia hari inai nega lalonai kaivakuku karana ita dadaraia totona.
Ita Naria Namonamo Ena Badina be Dahaka?
19 Keristen taudia idia naria namonamo kaivakuku karana idia dadaraia totona, badina unai kara toana be idauidau, bona kaivakuku tomadiho kara tamona idia karaia neganai unai ese edia abidadama ia hadikaia diba. Aposetolo Ioane ese Keristen taudia dekenai ia gwau: “Umui naria namonamo, dirava koikoidia garina.” (1 Ioane 5:21) Unai sisiba idia abia be gau badana badina kaivakuku tomadiho henia kara momo ihuanai idia noho. Ioane be Efeso amo revareva ia torea, bona unai siti lalonai meamea karadia momo idia karaia bona edia gori herevadia dirava koikoidia dekenai be momo. Tanobada ena hoa gaudia 7 amo tamona be Efeso dekenai ia noho—unai be Artemis ena dubu, unuseniai raskol taudia idia heau mauri diba bona unuseniai tomadiho kara bodaga momo idia karaia. Efeso ena aonega tauna Heracleitus, ese unai dubu ena pata dekenai ia lao henia dibura dalana be kara bodaga momokani ena dibura karana dekenai ia hahegeregerea, bona ia gwau unai dubu taudia edia kara be dika herea, animal edia kara be namo. Unai dainai, Efeso taudia idia goada karaia demoni, sihari kava, bona kaivakuku tomadiho henia karadia idia dadaraia totona.
20. Dahaka dainai kaivakuku tomadiho henia kara maragidia danu idia dadaraia be gau badana?
20 Keristen taudia edia lalona idia hadaia auka kaivakuku tomadiho henia kara iboudiai idia dadaraia totona be gau badana, badina bema nega tamona sibona Diabolo ita tomadiho henia unai ese ena hepapahuahu Dirava dekenai ia hamomokania, ia gwau taunimanima be hetoho idia davaria neganai edia abidadama karana Dirava dekenai do idia rakatania. (Iobu 1:8-12) Iesu dekenai “tanobada edia basileia ibounai mai edia hairaina danu” ia hahedinaraia neganai, Satana ia gwau: “Bema oiemu kwarana oi atoa diho, bema lau dekenai oi tomadiho, vadaeni inai ibounai be oi dekenai do lau henia.” Keriso ese ia dadaraia neganai ia hahedinaraia guba bona tanobada ena lohia maorona be Iehova bona Diabolo ena hepapahuahu herevana ia hakoikoia.—Mataio 4:8-11; Hereva Lada-isidia 27:11.
21. Roma pavapava dekenai, abidadama Keristen taudia be dahaka idia ura lasi karaia?
21 Danu, Iesu ena hahediba taudia be Satana idia tomadiho henia lasi, unai amo ena hepapahuahu herevana idia hakoikoia. Ena be “gavamani” ena hereva idia matauraia, bona ena be idia mase diba, to Roma pavapavana hanamoa totona bonana namo muramurana idia gabua lasi. (Roma 13:1-7) Unai kara dekenai Daniel P. Mannix ia gwau: “Keristen taudia momo lasi ese unai kara idia karaia, ena be do idia mase gwauraia gadara gabuna dekenai unai muramura idia atoa ura taudia ese muramura idia gabua totona, to idia kahirakahira iboudiai idia gabua lasi. Bema igui hesiai tauna be unai muramura sisina be lahi dekenai ia gabua neganai, Boubou Hamomokania Pepana idia henia bona idia ruhaia. To kahirakahira Keristen taudia iboudiai ese unai kara idia karaia lasi bona idia roho mauri lasi.” (Those About to Die bukana, rau 137) Unai bamona hetoho oi abia neganai, kaivakuku tomadiho henia kara iboudiai do oi dadaraia, a?
Kaivakuku Tomadiho Henia Kara Do Oi Dadaraia Noho, A?
22 Ia hedinarai goevagoeva, Keristen taudia be kaivakuku tomadiho henia kara iboudiai idia dadaraia be gau badana. Iehova ia ura ia mo sibona ita tomadiho henia. Mai edia abidadama Heberu memero toi be haheitalai namona, badina Babulono ena pavapava Nebukadnesara ia haginia kaivakuku badana idia tomadiho henia lasi. Peroveta tauna Isaia ese unai guba ena kota badana ena sivarai ia torea lalonai, ia hahedinaraia Iehova mo sibona be momokani bona mauri Diravana. Idau negai Keristen witness taudia be kaivakuku dekenai boubou henia karana idia dadaraia be gau badana. Mai edia abidadama taudia momo herea idia doridia diba lasi kaivakuku tomadiho henia karana ta idia karaia totona bena unai amo Iehova idia dadaraia totona.
23 Vadaeni, oi danu oi naria namonamo kaivakuku tomadiho henia kara iboudiai oi dadaraia totona, a? Dirava sibona oi tomadiho henia, a? Iehova ia lohia ena maoro bona ia be momokani bona mauri Diravana oi abia dae, a? Bema oibe, namona be emu lalona oi hadaia kaivakuku tomadiho henia karadia oi dadaraia noho totona. To kaivakuku tomadiho henia kara oi dadaraia totona Baibel ena hereva ma haida be edena bamona oi ia durua diba?
Oiemu Lalohadai be Dahaka?
◻ Kaivakuku tomadiho henia kara be dahaka?
◻ Dahaka dainai Iehova ese unai kara iboudiai ia ura henia lasi?
◻ Unai kara dekenai Heberu memero toi edia lalohadai be dahaka?
◻ Kaivakuku dekenai idia bouboulaia vamuna idia ania neganai, dahaka dainai unai ese ia veridia diba demoni idia tomadiho henia totona?
◻ Dahaka dainai kaivakuku tomadiho henia kara ita dadaraia be gau badana?
6. Iehova ena lalohadai kaivakuku tomadiho henia kara dekenai be dahaka?
8. Heberu memero toi, Sadaraka, Mesaka, bona Abedenego ese dahaka hetoho idia abia?
15. Lauma helaga bona Keristen ginigunadia edia hakaua oreana be dahaka idia gwau Iehova ena taunimanima dekenai bona kaivakuku karana dekenai?
19. Idau negai Efeso dekenai dahaka kaivakuku tomadiho henia karadia idia noho?
22, 23. Dahaka dainai kaivakuku tomadiho henia kara oi dadaraia be gau badana?
[Picture on page 23]
Ena be idia mase diba, to Heberu memero toi be kaivakuku tomadiho henia kara idia karaia lasi