Duahia Taudia Edia Henanadai

Petero Ginigunana 4:3 ia gwau Keristani taudia haida be guna ‘kaivakuku dikadia idia tomadiho henia.’a To kaivakuku iboudiai idia dika, ani? Bona Dirava ese idia ia gwauraia dika bona ia taravatua, ani?

Oibe, Dirava ena matana ai, kaivakuku iboudiai idia dika. Iena lalo-namo idia ura abia taudia ese kaivakuku do idia tomadiho henia lasi.​—⁠1 Korinto 5:11; Apokalupo 21:⁠8.

To, toana be aposetolo Petero ese dala ma ta ai kaivakuku tomadiho henia karana ia herevalaia. Hegeregere, idaunegai besedia momo huanai, kaivakuku momo idia tomadiho henia bona siahu taudia ese idia koua lasi. Anina be, gavamani ese unai bamona kaivakuku ia taravatua lasi. Kaivakuku haida be gavamani ena ura dainai idia tomadiho henia. Unai dainai, Keristani taudia ai idia do lao lasi neganai, haida be gavamani ena ‘taravatu badinaia dalana ai kaivakuku tomadiho henia karadia’ idia karaia. (New World Translation, 1950 gauna) Hegeregere, reana oi laloatao guna Babulonia ena King Nebukanesa ese golo kaivakuku ta ia haginia danu, to Iehova ena hesiai taudia Sataraka, Misaka, bona Abetenigo ese unai idia tomadiho henia lasi.​—⁠Daniela 3:​1-12.

Danu, kaivakuku tomadiho henia lalonai idia karaia karadia momo be lalona ena mamina ena taravatu eiava kara maoromaoro lalohadaina idia hadikaia karadia. (Roma 2:​14, 15) Aposetolo Paulo ese matabodaga karadia, “kara maorona idia hadikaia” bona “hemarai karadia,” ia herevalaia, bona nega momo tomadiho karadia lalonai unai karadia idia karaia. (Roma 1:​26, 27) Kaivakuku dikadia idia tomadiho henia tatau bona hahine ese taunimanima edia lalona ena mamina ena taravatu idia badinaia lasi. Keristani taudia ai idia lao taudia ese unai bamona miro karadia idia rakatania be maoro momokani.

To danu, Iuda lasi taudia edia kaivakuku tomadiho henia karadia be Iehova Dirava ese ia gwauraia dika. Unai dainai idia be taravatu utua karadia.​—⁠Kolose 3:​5-7.

[Footnote]