Namo ese Dika Do Ia Hadarerea A?

LAGANI daha rua bamona gunanai, Iesu Keriso, kerere lasi tauna, idia kota henia. Hereva momokani ia gwauraia dainai, kara dika taudia ese hamasea dalana idia tahua. Idia samania koikoi, idia gwau ia ese gavamani ia hadikaia, bona hutuma idia gwau namona be do idia alaia mase. Roma gavana, ena dagi ia laloa bada to kapenta tauna mai manauna ia laloa maragi tauna, ese Iesu ia henidia do idia alaia mase totona. Toana be dika ia kwalimu.

To, idia do alaia mase lasi hanuaboina ai, Iesu ia gwau: “Tanobada lau halusia vadaeni.” (Ioane 16:33) Ena hereva ena anina ta be, tanobada ena dika ese ena lalona ia hadikaia lasi bona ia doria diba lasi, idia kara dika henia taudia edia davana do ia henidia totona. Ena mase be kahirakahira neganai, ia idia hasatauroa taudia dainai ia guriguri, ia gwau: “Egu Tamana e, inai taudia edia dika mani oi gwauatao, badina idia diba lasi dekenai inai bamona idia karaia.”​—Luka 23:34.

Ela bona ia mase, Iesu ese ia hahedinaraia ta ese dika ia hadarerea diba. Ena hahediba taudia ia hamaorodia namona be dika do idia tuari henia. Anina be, Iesu hegeregerena, ‘ta do idia kara dika henia lasi, iena dika davana’ bona ‘edia kara namo amo dika do idia hadarerea noho.’ (Roma 12:​17, 21, NW) Unai bamona karadia be mai anina a?

Dachau ai Dika Idia Tuari Henia

Else, Germany hahinena ta, be Dachau ena dibura rumana ai idia koua. Ia ese harihari gauna namo hereana be Russia kekenina ta ia henia​—abidadama bona helaro unai.

Dachau ena dibura rumana sivaraina be bada. Unuseniai, taunimanima tausen tausen idia mase bona handred handred, hari Russia kekenina danu, be doketa taudia ese medikal karadia dikadia idia kara henidia. Dachau be dika momokani. To, unai gabu dikana ai, namo be ia vara bona ia tubu daekau.

Hari kekeni be gadi taudia ese idia doria, ena sinana idia reipia neganai do ia raraidia. Else ese ia bogaia hisi bada bona dala ia tahua, namo bona dika bona toreisi-lou helarona do ia hamaorolaia, herevana unai kara dainai do idia hamasea diba. Ia ese ia hadibaia, namona be taunimanima do ia lalokau henidia, do ia inai henidia lasi. Else ena heduru dainai kekeni be Dachau ena dika ia haheaukalaia.

Else be unai bamona ia kara, badina ia ura Keriso ena kara do ia tohotohoa. Ia be Iehova ena Witness hahinena, unai dainai ia diba namona be kara dika ena davana do ia karaia lasi, bona ena abidadama dainai haida ia durudia, unai lalohadai do idia abia dae totona. Ena be Dachau ai hisihisi bada ia ania, to ia kwalimu bona dika ia hadarerea. Ia sibona lasi, to ma haida danu ese.

Buka ta ladana A History of Christianity ai, Paul Johnson ia gwau: “[Iehova ena Witness taudia] ese Nazi oreana durua karana idia dadaraia vaitani, idia gwau ia be dika rohoroho. . . . [Witness taudia] 100 100 amo 97 97 idia dagedage henidia.” Witness taudia idia hekwarahi kava a? Buka ta ladana Values and Violence in Auschwitz ai, Anna Pawelczynska ese Witness taudia ia gwauraidia, ia gwau: “Inai dibura taudia edia orea maragina edia lalohadai be mai edia siahu bona Nazi taudia edia lalohadai idia hadarerea.”

To ita momo ita tuari henia gauna badana be ita lalonai ia noho siahuna dikana, murimuri ai ia noho gauna lasi. Unai tuari be ita lalonai ia vara.

Dika Ita Lalonai Ita Hadarerea

Paulo ese unai tuari be inai bamona ia gwauraia, ia gwau: “Kara namodia lau ura karaia neganai be lau karaia diba lasi. Bona kara dikadia lau ura lasi karaia neganai be lau karaia inai.” (Roma 7:19) Paulo ia diba, nega haida kara namo be iena kara korikorina lasi.

Eugenio,a Spain tauna ta, be lagani rua lalodiai iena ura dikadia ia tuari henidia. Ia gwau: “Lau be mero maragi neganai lebulebu lau ura henia. Lau be mero badana neganai mai egu ura ida geligeli karadia bodagadia lau karaia, bona unai lau ura henia bada.” Dahaka dainai gabeai ia ura ena kara do ia haidaua?

Eugenio ia gwau: “Lau ura Dirava do lau hamoalea, bona Baibel amo lau davaria lauegu mauri dalana be ia moalelaia lasi. Unai dainai egu lalona lau hadaia egu mauri dalana do lau haidaua, Dirava ena taravatu do lau badinadia. Dina dina iboudiai lalohadai kereredia bona mirodia be egu lalona ai idia do vara, unai dainai lau tuari henidia. Egu lalona lau hadaia auka do lau kwalimu, bona Dirava ena heduru lau noia loulou. Lagani rua murinai lau kwalimu, to egu lalona lau do biagua auka noho. Egu hekwarahi be mai anina. Hari lau ese sibogu lau matauraia, egu headava ia namo, bona gau badana be, egu hetura Dirava enai be ia namo. Lau diba bema ta ia hekwarahi bada, ena lalohadai dikadia ese anina idia do havaraia lasi neganai ia negedia diba.”

Lalohadai dikana ta ita dadaraia negadiai bona kara dika ena davana ita karaia lasi negadiai, namo ese dika ia hadarerea. Ena be unai dala ai ita kwalimu, to siboda eda manoka, Adam ena amo ita abia gauna, ita hadarerea vaitani diba lasi, bona Satana ena siahu dikana ese taunimanima ia do hakereredia noho. Vadaeni, inai dika do ia ore eiava?

Satana Do Ia Hadikaia Ore

Iesu ese Dirava ia badinaia ela bona mase, unai dainai Satana ia lusi. Ia ese Iesu ena lalo-maoromaoro ia hadikaia toho, to ia hegeregere lasi. Baibel ia gwau: “Iena mase dekena amo Iesu ese . . . Satani do ia hadikaia ore diba.” (Heberu 2:14) Ia toreisi lou murinai, Iesu ese ena hahediba taudia ia hamaorodia, ia gwau: “Siahu ibounai guba dekenai bona tanobada dekenai be lau dekenai ia henia vadaeni.” (Mataio 28:18) Unai siahu amo Satana ena gaukara ena anina do ia haorea vaitani.

Iesu ese Satana mai ena aneru dikadia ida be guba amo ia negedia diho dinana be Apokalupo bukana ese ia gwauraia, ia gwau tanobada ena kahanai ia koudia dainai dika do ia bada: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”​—Apokalupo 12:​7-9, 12.

Baibel ena peroveta herevadia ese idia hahedinaraia unai ia vara vadaeni, Tanobada Ibounai Tuarina Ginigunana negana bamona ai.b Iseda negai dika ia bada ia lao ena badina be unai. Kahirakahira Iesu ese Satana do ia koua vaitani bena taunimanima do ia hakereredia lou diba lasi.​—Apokalupo 20:​1-3 itaia.

Unai ena anina be dahaka taunimanima ediai?

Do Idia Kara Dika Lasi

Dirava ena Basileia pavapavana, Iesu, ese ‘ena siahu’ be kahirakahira do ia gaukaralaia tanobada ai, taunimanima hadibadia dalana lailaia totona. “Tanobada noholaia taudia ese kara maoromaoro do idia dibaia.” (Isaia 26:9) Unai diba do idia abia dainai, “ta do idia hahisia lasi eiava do idia hadikaia lasi, . . . badina be tanobada be Iehova dibaia karana amo do ia honu, davara ia honuhonu-dae bamona.”​—Isaia 11:9.

Hari inai negai iseda ura dikadia momo ita hadareredia diba. Vadaeni, lauma dikadia edia siahu do ia ore neganai, ‘dika do ita rakatania bona kara namo do ita karaia’ be haraga.​—1 Petero 3:11.

Namona be ita daradara lasi to ita abia dae namo ese dika do ia hadarerea, badina be Dirava be namo, bona idia ura kara namo do idia karaia taudia ese iena heduru amo dika do idia hadarerea diba, Iesu ese ia karaia hegeregerena. (Salamo 11119:68) Idia ura dika do idia tuari henia taudia edia helaro be Dirava ena Basileia, dika do ia haorea vaitani gavamanina, ese do ia lohiaia tanobadana goevana ai do idia noho. Salamo tauna ese unai nega ia gwauraia, ia gwau: “Hebogahisi bona kara momokani idia hedavari; kara maoromaoro bona maino idia kisi heheni. Kara momokani be tano amo do ia tubu, kara maoromaoro be guba amo do ia igo diho.”​—Salamo 85:​10, 11.

[Footnotes]