“Daba Namona! Dirava ena Ladana Oi Diba A?”
BRAZIL ai, lagani 12 hekapa kekenidia ruaosi Fortaleza hanuana ai ese Iehova ena Witness Taudia edia branch opesi idia tore henia, idia gwau:
“Lagani 1990 ai, grade 5 ai karaia neganai, emai sikuli ese sou ta ia karaia, saiens gaudia, laulau, bona kastom gaudia hahedinaraidia totona. Emai tisa ai hamaoroa ai ura kara idauna ta do ai karaia, haida edia kara hegeregeredia lasi. Guna ia kamonai ai ese Iehova bona Baibel ai herevalaidia, unai dainai ia gwau: ‘Emui Dirava ena sivarai umui torea.’
“Ai laloa namona be buka bona magasin, Iehova ena ladana idia gwauraia gaudia, be do ai hahedinaraidia. Baibel, ia hekeho gauna, ena laulau ai abia, bena Salamo 83:18 ena hereva be masini ta amo ai habadaia bena unai laulau ai ai hakamoa. Baibel idauidau, Iehova ena ladana be idia lalodiai ia noho gaudia, bona buka bona magasin, Baibel idia gwauraia gaudia, danu be pata ta latanai ai atodia. Pata ena duduna ai, vidio bona TV ai atodia, bena taunimanima momo idia ura henia muvini piksana ta ena laulau ta ai hahedinaraia, ia lalonai Iehova ena ladana idia herevalaia.
“Sou neganai, ta be aiemai pata dekenai ia mai neganai, ai gwau: ‘Daba namona! Dirava ena ladana oi diba a?’ Ai naria do ia haere totona, bena ai gwau: ‘Mani inai oi itaia! Baibel momo ese idia hahedinaraia iena ladana be Iehova,’ bena inai Baibel idauidau ai duanaidia: João Ferreira de Almeida ena, The Jerusalem Bible, bona New World Translation. Bena muvini piksa ena kahana ta be vidio ai ai haheitalaia, ia lalonai ta ese Dirava ena ladana Iehova ia herevalaia. Kamonai taudia be magasin o pepapepa ai henidia.
“Mero ta ese buka ta ladana Memero Kekeni edia Henanadai—Haere Maorodia ia noia. Emai tisa ese buka ta ladana Emu Ruma Bese Hamoalea Dalana ia kehoa bena ia gwau: ‘Ia! Inai be buka namona!’ Sou neganai ai ese buka 7, pepapepa 18, bona magasin 67 ai hariharilaidia. Diadi taudia idia gwau ai be namba 3 inai sou ibounai lalonai. To ai moalelaia bada gauna be, ai be mai emai dala Dirava ena ladana, Iehova, ai gwauraia hedinarai.”