Paradaiso o Momoru Gabuna—Edena Oi Ura Henia?
TAUNIMANIMA ese idia itaia neganai, idia diba ia be laolao tauna Europe amo, ia ura motumotu paradaisona ta ai do ia laga-ani bona dina ena diari do ia moalelaia. Kone kahanai miri ororodia ia rakaia hanai neganai, ia raka namonamo, badina be negenege gaudia, kavabu, tini, plastik, PK, loli kumidia pepadia, niuspepa, bona magasin be momo herea. Unai ese ia habadua, badina be gabu daudauna amo ia mai, paradaiso ia tahua, to unai ia davaria.
Nega ta unai bamona ia vara oi dekenai a? Dahaka dainai taunimanima idia ura gabu mai hairaina do idia lao laga-ani totona, to unuseniai idia noho neganai edia momoru idia negea kava bona momoru gabuna ai idia halaoa?
“Paradaiso” Lalonai Sibona Lasi
Laolao taudia momo ese idia vadivadi henidia “paradaisodia” mo sibodia lasi, to ma gabu momo danu edia hairai bona edia goeva idia naridia lasi. Hari inai negai bisinesi momo edia momoru ese tanobada ia hadikaia. Momoru mai ena poisini be aonega lasi dalanai idia negea bona oela be aksiden ai ia hebubu kava dainai, tanobada ena kahana badadia idia hadikadia, bena mauri gaudia be unuseniai idia noho diba lasi.
Tuari danu ese tanobada idia hadikaia. Lagani 1991 ai Persian Gulf ai idia tuari neganai, Iraq ena tuari taudia ese oela guridia 600 idia ha-araia. Germany ena magasin ladana Geo ia gwau unai lahi be “taunimanima ese tanobada idia hadikaia karana dika rohorohona.”
Tuari ia doko neganai maoromaoro unai gabu idia hagoevaia toho. Hua momo lalodiai idia hekwarahi bada unai lahi habododia totona. World Health oreana ia gwau unai gabu Kuwait ai do idia mase taudia edia momo be 10 pesen amo do ia daekau unai miro dainai.
Ia Hadikadia Lasi to Ia Habadudia
Unai kara badadia sibodia lasi, to kara maragidia tausen tausen ese tanobada idia hamiroa bona idia hadikaia. Momoru negea kava taudia bona magu bona haba ai idia toretore kava taudia ese tanobada ena hairai idia hadikaia.
Gabu haida ai, tereini ai, ruma edia haba ai, bona telefon gabudia ai, taunimanima ese hereva bona laulau momo hereadia idia toredia kava dainai, taunimanima ese idia manadalaidia vadaeni. Guna unai bamona hereva bona laulau be mei gabudia edia haba sibodia ai idia toredia.
Siti haida ai ruma momo idia dika momokani bona momo idia noho kava. Taunimanima momo ese edia ruma bona edia magu idia naridia namonamo lasi. Uma gabudia ai negenege gaudia idauidau ese gabu edia toana namona idia hadikaia.
Taunimanima haida, ena be edia tauanidia idia miro bona edia dabua bona edia huidia edia toana be dika, to idia laloa unai be sitailo namona. Idia laloa taunimanima idaudia, edia toana ia namo bona ia goeva taudia, be sitailo matamatana idia abia dae diba lasi.
Hekwarahi Bada Hereana!
Magasin haida edia kopidia ai gabu mai hairaidia edia laulau idia noho. Tanobada ibounai ena toana be unai laulau edia toana hegeregerena ai do ia lao totona, taunimanima do idia hekwarahi bada herea, kone, uda, ororo, bona hanua badadia bona maragidia, uma, bona taunimanima edia toadia danu haidaudia totona!
Inai hereva ena matamanai ai gwauraia tauna ia moale, badina be adorahi ai gaukara taudia ia itadia, momoru idia gogoa. To, gau maragidia—galasi, kavabu koudia gaudia, tini kehodia gaudia, bona kuku dududia—momo herea be idia rakatanidia. Unai dainai, ena be gabu idia hagoevaia toho, to unai gau maragidia momo dainai ena toana be paradaiso ena toana bamona lasi, to do momoru gabuna ena toana bamona.
Tanobada ibounai be momoru gabuna badana ai do ia lao garina bema idia hagoevaia, anina be unai gau dikadia ibouboudiai do idia kokidia. Unai do ia vara diba a? Bema oibe, edena bamona do ia vara? Daidia ese do idia karaia? Edena negai?