Tanobada Goevana Oi Moalelaia!

ITA moale diba, badina be Iehova, goeva Diravana, ese ena ura do ia hagugurua, tanobada ibounai be paradaiso ai do ia halaoa! (Isaia 11:​6-9) Ia gwau: “Lauegu uduna amo ia lasi herevana be . . . do ia giroa lou kava lasi, to lau moalelaia gauna do ia hagugurua.” Inai hereva be anina lasi herevadia lasi, badina be “Dirava ia koikoi diba lasi.”​—Isaia 55:11; Heberu 6:18.

Ita moale diba, badina be Dirava ese kara ta do ia karaia, taunimanima ese tanobada idia do hadikaia vaitani lasi neganai!​—Apokalupo 11:18.

Mai edia ura ida tanobada idia hadikaia bena idia helalo-kerehai lasi taudia be Iehova ese do ia kokidia, bona iena goeva taravatudia idia dadaraidia taudia danu. Do ia havaraia lou Paradaisona be ta ese do ia hadikaia diba lasi.​—Hereva Lada-isidia 2:​20-22.

Dirava ena Basileia be do ia lohia neganai, Keriso Iesu ena hahekau henunai tanobada hadikaia karadia oredia kokidia dalana be taunimanima do idia hadibalaidia. Unai neganai​—hari inai negai lasi​—gau badana be Dirava ena hesiai taudia iboudiai do idia gaukara hebou, tanobada hagoevaia gaukarana durua totona.​—Esekiel 39:​8-16 itaia.

Inai nega dikana ena dokona amo do idia roho mauri taudia ese tanobada hagoevaia gaukarana do idia durua mai edia ura bona mai edia goada ibounai ida, hari inai negai idia ese lauma dalanai idia miro gaudia idia hagoevadia hegeregerena.​—Salamo 110:3.

Momokani, tanobada goevana do ia vara, Dirava ena Basileia ese hagoevaia gaukarana bada hereana do ia karaia murinai. Miro bona dika, sisidia bona badadia, do idia kokidia vaitani. Haba o gabu ma ta ai toretore be lasi. Kavabu, tini, plastik, PK bona loli kumidia pepadia, niuspepa, bona magasin ese kone bona gabu mai hairaidia edia toana do idia hadikaia lasi.

Kahirakahira do ia vara tanobadana goevana oi moalelaia!

[Picture on page 7]

Gabeai tanobada hagoevaia gaukarana do oi durua a?