Basileia Haroro Ripoti

Lauma Dalanai Idia Hitolo Taudia Durudia—Sikuli Ai

IESU ia gwau: “Idia diba lauma dalanai idia dabu taudia be idia moale.” (Mataio 5:​3, NW) Sikuli memerodia bona kekenidia momo idia ura bada Dirava bona ena palani namodia do idia diba. Idia ese mauri bona Dirava ena lalo-namo abia dalana idia henanadailaia. British Virgin Islands ai, sikuli ta ai unai bamona memero kekeni idia noho. Iehova ena Witness tauna ta unuseniai be ia gwau:

◻ “Sikuli ai, tama sina bona tisa edia hebou lalonai lau helai neganai, drag, inuinu karana, memero bona kekeni idia loa hebou karana, TV raraia karana, bona memero kekeni edia maka eksam ai idia herevalaidia momo dainai, buka ta ladana Memero Kekeni edia Henanadai​—Haere Maorodia be hed-tisa lau henia. Ia itaia neganai, ia gwau ia be heduru gauna namona, bona lau ia nanadaia, buka 120 do ia abidia memero kekeni iboudiai edia be mai dalana eiava. Kongregesen ena elda taudia lau hamaorolaidia, bena idia gwau unai buka be sikuli do idia henia davana lasi. Tisa ai hamaorolaidia neganai, idia gwau ai ese unai buka be memero kekeni do ai henidia be namo. Witness taudia rua ese miniti 30 ai memero kekeni idia hereva henidia, bona unai buka ese haida ia durudia vadaeni sivaraidia be Watch Tower Society ena magasin amo idia duahidia hedinarai. Bena buka be idia ta ta idia henidia.”

Ai moale, badina be tisa idia gwau pura iboudiai unai buka amo stended foa bona stended faiv taudia do idia hadibadia. Ia ese memero kekeni edia henanadai momo, mauri bona vaira negana dekenai, be do ia haerelaidia.

Lauma Dalanai Idia Hitolo Taudia Durudia—Papua New Guinea Ai

Sekit naria tauna ta ese inai sivarai ia torea. Ia hahedinaraia Papua New Guinea ai taunimanima be lauma dalanai idia hitolo, bona iseda buka, Baibel idia gwauraia bukadia, ese edia hitolo idia haorea.

◻ Sekit naria tauna ia gwau: “Kamberatoro hanuana lau lao henia dalana be lasi dainai, lau be Vanimo kongregesen taudia ida ai gaukara hebou. Unuseniai kamonai taudia be momo. Bewani taudia haida ese buka idia abidia. Tau ta ese lau ia noia do lau lao iena hanua, ma ia gwau mahuta gabuna lau do ia henia. Taunimanima momo be eda buka bona eda magasin idia diba. Vanimo ai lao negadia iboudiai, ena be buka mauadia toi ai laohaidia, to idia hegeregere lasi. Taunimanima ese Lau Egu Bible Sivarai Buka idia laloa bada dainai idia tahua noho. Lau laohaidia bukadia be idia ore haraga. Buka ai hahedinarai henidia neganai, haida idia henanadai, idia gwau: ‘Ielo gauna ta ia noho, a?’ Tau ta ese buka sikis ia oda karaia. Iena ladana bona adres lau ia henia, bena lau ia hamaoroa, unai buka do lau abidia neganai, hadibaia herevana ta be reidio ai do lau halasia be namo, bena ena hanua amo do ia mai abidia totona.” Sekit naria tauna be ma ia gwau: “Vanimo taudia momo ese Mankind’s Search for God bona Memero Kekeni edia Henanadai​—Haere Maorodia bukadia idia abidia.”

Unai ese ia hahedinaraia lalo-maoro taudia be lauma anianina hitolona idia hitolo bada; unai aniani be Baibel bona Iehova be ena “hesiai tauna” amo ia henidia bukadia lalodiai ia noho. (Mataio 24:​45-47) Iehova ena Witness taudia ese unai bamona taudia idia durudia mai edia moale ida!

[Picture on page 19]

Haroro gaukarana Papua New Guinea ai