Basileia Haroro Ripoti
“Hoa Gaudia Idia Vara Tanona ai,” Hekwakwanai Idia Hanaia
APOSETOLO PAULO ese Korinto Keristani taudia ginigunadia ia nanadaia: “Tuari kibi bema idia hiriria namonamo lasi neganai, daika ese tuari totona do ia hegaegae? Unai bamona danu, bema umui emui hereva anina be idia hedinaraia lasi, daika ese hereva ena mamina do ia abia?”—1 Korinto 14:8, 9.
Papua New Guinea lalonai, nega haida idia gwauraia Hoa Gaudia Idia Vara Tanona ai, Iehova ena Witness taudia be Baibel ena sivarai harorolaia goevagoeva totona idia hekwarahi bada, badina koua gaudia badadia idia noho. Idia haroro henia taudia be gado idauidau 700 mai kahana idia gaukaralaia bona edia kastom be momo bona idauidau. Witness taudia idia haheaukalaia hekwakwanai ma haida be ororo badadia, dala be momo lasi, bona raskol karadia idia bada idia lao. Unai gaudia sibona lasi, to tomadiho oreadia haida, bona nega haida sikuli naria taudia danu, ese idia dagedage henidia.
To, Witness taudia be lauma dalanai idia hadibaia namonamo bona Baibel stadi durua gaudia momo edia gado badadia ai idia abia ese idia ia durua sivarai namona idia harorolaia neganai edia kibi idia hiriria namonamo bamona. Nega momo taunimanima be edia hereva idia abia dae, inai ripoti ta ese ia hahedinaraia hegeregerena:
• Sikuli ena lagani matamata ia matamaia neganai, tisa tauna ia ura ia diba dahaka dainai Iehova ena Witness taudia edia natudia be pepe idia saluti henia lasi bona bese abia isi anena idia anelaia lasi. Ia ese Maiola, ena mauri lagani be 13 stiuden ta bona ia bapatiso vadaeni Witness kekenina, dekenai unai henanadai ia henia. Maiola ese Baibel amo unai kara ena badina ia hahedinaraia goevagoeva. Unai tisa ese ena hereva ia abia dae badina ia be Baibel amo. Maiola ena hereva ia gwauraia hedinarai sikuli ena tisa taudia ibounai dekenai danu.
Gabeai, stiuden taudia idia hamaoroa sivarai ta do idia torea, bona Maiola ese ena sivarai ena sinado totona Toi Tamona ia abia hidi. Ena sivarai dekenai maka badana ta ia abia, ena kalasi taudia ibounai edia ia hanaia, bona ena tisa ia ura ia diba edeseniai amo ena hereva ia abia. Ia dekenai Mauri Hanaihanai Paradaiso Lalonai bukana, English gado gauna, ia hahedinaraia. Unai tisa tauna ese unai buka be kalasi taudia vairanai ia herevalaia, bona idia momo idia ura kopi ta idia abia. Kerukeru, Maiola ese buka 14 bona magasin 7 ia hariharilaia ena sikuli turadia dekenai, bona idia toi ida Baibel stadi ia hamatamaia. Maiola ena tahua gauna be ful-taim haroro gaukara ia karaia kekenina ai do ia lao.
• Kone hanuana ta Port Moresby kahirakahira dekenai, Iehova ena Witness taudia edia grup maragina ta be lagani 1970 amo dagedage idia haheaukalaia. To vanegai sibona, gabu idauna ta amo heduru idia abia. Dina ta United Dubu ena bisop tauna, tano ma ta dekenai edukeisini bada ia abia Papua New Guinea tauna ta, be dubu dekenai idia helai taudia ia boiria henanadai idia henia totona. Tau ta ia henanadai: “Iseda hanua lalonai dubu be rua—United Dubu bona Iehova ena Witness taudia. Witness tauna be aiemai ruma dekenai ia mai neganai, dahaka ai karaia be namo?” Bisop tauna be nega sisina daudau ia hereva lasi, bena ia haere, ia gwau: “Lau diba lasi umui dekenai dahaka do lau hamaoroa. Vanegai, Witness taudia, matamata taudia rua idia lao egu ruma dekenai. Henanadai ta idia henia lau dekenai, bona ena be iunivesiti ai edukeisini badana lau abia vadaeni, to haere lau diba lasi. To Baibel amo haere idia henia haraga. Unai dainai umui do lau hamaoroa lasi dahaka umui karaia be namo—umui ese do umui abia hidi. Bema umui ura lasi edia hereva umui kamonaia, kamonai lasi, to dagedage karana ta oi karaia lasi idia dekenai.”
Watch Tower Society ena sekit naria tauna ta be gabeai unai Witness taudia edia grup ia vadivadi henia, bona ia gwau: “Witness taudia idia haroro neganai, hanua taudia kahirakahira iboudiai ese edia sivarai idia kamonai henia. Haida be edia ruma dekenai idia boiridia danu. Hari ia be haroro gaukara paradaisona.”