Basileia Haroro Ripoti
‘Lauma Dalanai Idia Hitolo Taudia Idia Moale’
IESU ia gwau: “Idia diba lauma gaudia idia tahua be namo taudia idia moale.” (Mataio 5:3, NW) Unai bamona taudia ese mauri ia henia herevana be Dirava ena Hereva, Bible, ena amo do idia tahua, bona unai diba ese idia do ia hakaua lao mauri hanaihanai dekenai.—Mataio 4:4; Ioane 17:3.
◻ Africa tanona ta lalonai lauma dalanai ia hitolo tauna ta be hora 4 lalonai ia raka Lau Egu Bible Sivarai Buka ta do ia abia totona. Unai be keru negana, bona hanuaboi ena dibura lalonai ia raka. Hanua ta dekenai ia ginidae, unuseniai Iehova ena Witness taudia idia haroro, to ia lalohisihisi bada badina unai buka iboudiai idia henia vadaeni. Dina toi lalonai unai hanua lalonai ia noho ela bona unai buka ma haida idia abia diba, bena unai negai ia moale badina unai lauma hereva namona ia abia.
Witness taudia be hua tamona lalonai unai gabu dekenai idia noho, bona unai nega lalonai buka 55, buklet 365 bona magasin 145 idia hariharilaia, bona sabskripsen 5 idia abia danu. Unai gabu idia rakatania lalonai, taunimanima badadia bona maragidia danu idia boiboi henidia Kpelle gadona ai, idia gwau: “Iehova be umui danu ia noho!” Dala idia tahua kamonai taudia do idia lou henia totona.
Unai tano dekenai ma taunimanima ta be lauma dalanai ia hitolo. Unai hahine ese iena dubu ena moni ia naria, bona iena provinsi ena gadara karadia ia biagua danu. Witness taudia be ena ruma dekenai idia lao neganai, mai tai danu ia gwauraia hedinarai dubu ese Bible ena Keristen taravatu ia badinaia lasi. Witness taudia ese unai hahine ena Bible idia gaukaralaia bona tomadiho momokanina edena bamona ia diba dalana be ia dekenai idia hahedinaraia. Bena ia be edia hebou rua dekenai ia lao edia Kingdom Hall dekenai, bona gabeai ia gwau: “Lau itaia bona lau kamonaia gaudia dainai lau diba namonamo inai be tomadiho momokanina.” Hebou dainai bona hebou dekenai idia mai taudia edia kara dainai ia moale. Ia itaia, iena ruma dekenai idia mai Witness taudia edia hereva be gori ta lasi, to unai hereva be gau korikorina ta. Unai nega murinai, dala ia tahua iena dubu do ia rakatania totona, bona unai kara amo ia ese iena gabu ai idia noho taudia dekenai haroro namona ia henia.
◻ Melanesia tauhauna ta New Caledonia dekenai ena gaukara be tomadiho lalonai ia henanadai, dubu taudia idia haere totona. Lauma dalanai ia hitolo. Iena sinana ena ruma lalonai teibol latanai buka ta ladana Mauri Ia Lao Henia Hereva Momokanina ia davaria, bona karoa 2 bona 3 ia duahia. Unai buka lalonai Bible siridia Esodo 20:4, 5 bona Ioane 4:23, 24 ia kikilaia. Unai siri dainai iena kudouna ia marere. Unai siri edia hereva dainai iena pris ia nanadaia dahaka dainai Katolik Dubu ese kaivakuku idia gaukaralaia edia tomadiho karana lalonai. Unai pris ia ura lasi iena henanadai ia haerelaia. Unai tau be “Keristen” tomadiho ma haida dekenai ia lao, to ena henanadai idia haerelaia namonamo lasi. Bena, ia ura iena sinana danu Iehova ena Witness taudia edia hebou ta dekenai ia lao. Iena sinana ese hereva momokani ia kamonai henia vadaeni. Unai tau ia moale bada herea badina ia itaia Witness taudia idia lalokau heheni bona edia hahediba herevadia be Bible amo idia abia.
Ena be kilomita momo ia rakalaia, to wiki iboudiai hebou dekenai ia raka lao bona nega sisina murinai hereva momokani ia abia dae, bena ia bapatiso. Hari, ia be kongregesen ena hesiai tauna ta. Iena sinana bona iena taihu rua danu be Iehova ena Witness taudia ai idia lao. Unai tauhau be iena iduhu taudia dekenai ia haroro bona Bible stadi momo ia hamatamaia. Harihari, unai gabu dekenai idia haida be kongregesen ena hebou dekenai idia mai—unai ibounai ia vara badina tauhau ta ese Bible ena hereva ia gwauraia bukana ta teibol latanai ia itaia, ia stadilaia, bona iena hereva ia abia dae bona ia badinaia.
Hari inai negai, Iehova ese lauma aniani ia henia, bona unai dainai taunimanima momo ese namo idia davaria. Isaia ese unai kara ia perovetalaia maoromaoro, ia gwau: “Itaia! Lau sibona egu hesiai taudia be do idia aniani, to do umui [tomadiho koikoi taudia] hitolo.” (Isaia 65:13) Iehova ese dala ia karaia lauma dalanai idia hitolo taudia do idia boga kunu totona. Bema ita ese unai heduru ita abia dae, do ita moale.