Maumau Momo Tauna be Moale Lasi Maurina Ia Abia

PURA HAIDA lalodiai moale ia ore bona daradoko ia vara. Israel taudia be Aigupito ena igui hesiai gaukarana amo idia ruhaia neganai idia moale bada, to gabeai aniani dainai idia maumau momo. Aigupito idia rakatania ena hua rua murinai, unai maumau bese taudia idia gwau igui hesiai dekenai idia noho bema namo, tano gagaena dekenai idia hekwarahi maurina be namo lasi. Hua haida murinai, idia maumau momo dainai Iehova ena hereva idia badinaia karana idia goadalaia lasi, bona unai uru taudia ese Gwauhamata Tanona dekenai do idia vareai ia koua.​—Esodo 16:​1-3; Numera 14:​26-30.

Momokani, maumau karana be uru tamona eiava bese tamona ena kara sibona lasi. Ita ibounai be nega ta ta ai gaukara, aniani, siahu eiava keru, natudia, dekena taudia, eiava aniani davana ia bada ia lao dainai, ita maumau, ani? Ita be goevadae lasi taudia dainai ita lalodiai maumau urana ia noho.​—Roma 5:12; Iakobo 3:2.

Dahaka dainai kara haraga ita maumau? Reana ita lalohisihisi, ita moale lasi, eiava ita gorere dainai. Reana ita maumau karana be iseda lalohisihisi bada ena mamina ia hamaragia diba, eiava maumau karana amo hegeregere ita gwau: “Taunimanima ma haida lasi to lau sibona ese unai gaukara do lau karaia namo herea diba!” Taunimanima edia lalohadai bona kara idia idauidau dainai, nega haida ta ese ma ta do ia maumauraia. Bona danu, nega haida idia maumau be mai ena badina maorona.

Herevana idia maumau ena badina be dahaka, to gunaguna Israel besena ena haheitalai dikana ese ia hahedinaraia maumau noho karana ese dika do ia havaraia. Bema tau ta be maumau karana do ia manadalaia, reana ia ese Iehova ena kara do ia maumauraia diba. Dahaka dainai unai ia karaia be mai garina? Bona maumau be mai ena badina maorona neganai ta ese dahaka ia karaia unai kerere ia hamaoromaoroa totona?

Maumau be Mai Ena Badina Neganai

Bema ia vara gauna be kerere badana ta lasi, sibona dekenai do ita gwauraia henanadai ginigunana be, Lalokau dainai unai kerere do lau laloaboio diba, a? Momokani, reana tau ta, eiava Witness ta ese ita ta dekenai kerere ia havaraia dainai ita maumau be mai ena badina maorona. Reana ita dekenai ia hebogahisi lasi eiava dala maoromaoronai ita ia kara henia lasi. To, bema iena kara kerere oi dekenai be ma haida dekenai do oi maumauraia, unai kerere do ia hamaoromaoroa, a? Baibel ia gwau namona be dahaka do ita karaia? Kolose 3:13 ia gwau: “Bema tau ta ese ena bamona tauna ia maumauraia, ia kara dika henia dainai, namona be unai dika do ia gwauatao. [Iehova] ese umui emui dika ia gwauatao, vadaeni unai bamona do umui karaia danu.” Unai dainai, ena be ita maumau be mai ena badina maorona, to Baibel ia gwau namona be unai dika ita gwauatao, namo lasi ita maumauraia.​—Mataio 18:​21, 22.

To dika karana ia bada neganai bona ita gwauatao diba lasi be edena bamona? Unai dika do oi gwauraia hedinarai be maoro. Mai ena maoro danu Sodom bona Gomora hanuadia edia dika be Iehova dekenai idia ‘maumauraia’ neganai, ia ese kara ta ia karaia unai hanua taudia edia dika rohoroho karadia ia haorea totona. (Genese 18:​20, 21) Mai ena maoro danu Pentekoste 33 C.E. ai murinai ia vara gauna idia maumauraia. Idia dabu vabu taudia dekenai aniani idia hariharilaia neganai, Heberu hahinedia idia laloa momo. Vadaeni, Greek vabu taudia ese unai kara idia maumauraia. Gabeai, aposetolo taudia ese edia maumau herevana idia kamonai, bona kara haraga lo taudia idia abidia hidi unai hekwakwanai do idia hamaoromaoroa totona.​—Kara 6:​1-6.

Unai hegeregerena, namona be hari inai negai, elda dagina idia abia Keristen taudia be idia vara hekwakwanai badadia idia kamonai neganai, namona be kara haraga hamaoromaoroa dalana do idia tahua. Hereva Lada-isidia 21:13 ia gwau: “Ogogami taudia edia taitai ia hakala henia lasi tauna be sibona do ia tai bada herea, to ta do ia kamonai lasi.” Taunimanima be mai ena badina maorona dainai idia maumau neganai, namo lasi elda taudia ese edia hereva idia dadaraia, to namona be mai hebogahisina danu idia kamonai. Danu, namona be ita ibounai do ita lalo-tamona bona kerere badadia idia vara neganai elda taudia do ita hamaorodia, namo lasi idia ura kamonai taudia iboudiai dekenai ita maumauraia.

Momokani, ita ibounai ita diba vadaeni, nega haida ita maumau kava ena badina be ita be goevadae lasi taudia dainai. Tano gagaena dekenai Israel taudia edia kara ita tahua namonamo neganai, do ia hedinarai goevagoeva bema maumau sisina karana ita koua lasi, do ia bada ia lao bona ita manadalaia diba bona dika do ia havaraia.

Dirava Ena Lalohadai Maumau Taudia Dekenai

Israel taudia be aniani dainai idia maumau karana ese unai kara amo dika rua ia hahedinaraia. Gau ginigunana be, maumau karana be daihanai gorere bamona, momo dekenai be ia hanai diba. Baibel ia gwau “Israela ena hebou ibounai ese Mose bona Arona dekenai idia maumau, taunimanima idia noho lasi gabuna dekenai.” (Esodo 16:2) Reana, idia haida sibona be aniani dainai idia maumau guna, to daudau lasi murinai iboudiai idia maumau.

Gau iharuana be, maumau tauna be nega momo ia vara hekwakwanai maragina ia gwauraia bada. Hegeregere, Israel taudia idia gwau Aigupito ai bema idia noho neganai do idia namo, badina unuseniai edia ura hegeregerena paraoa, bona vamu bada idia ania diba. Idia maumau, idia gwau tano gagaena dekenai idia hakaua lao dainai hitolo amo do idia mase.​—Esodo 16:3.

Unai Israel taudia be momokani unai dika do idia davaria, a? Reana edia aniani be ia diho ia lao, to, Iehova be unai hekwakwanai ia diba, bona nega korikori dekenai ia ese mana ia henidia ia ubudia bona edia tauanina idia goada noho totona. Edia maumau herevana ese ia hahedinaraia idia be Dirava dekenai idia abidadama lasi momokani. Aigupito ai idia noho neganai mai edia badina maorona dainai idia maumau, badina edia mauri be ia auka momokani. (Esodo 2:23) To Iehova ese igui hesiai amo idia ia ruhaia neganai, idia be aniani dainai idia maumau. Unai idia karaia be maoro lasi. Mose ia sisiba henidia, ia gwau: “Umui emui maumau be ai dekenai umui maumau lasi, to Iehova dekenai.”​—Esodo 16:8.

Israel taudia be nega momo maumau karana idia hahedinaraia. Lagani tamona ia do abia lasi neganai idia ese mana anianina dainai idia maumau. (Numera 11:​4-6) Daudau lasi murinai, Israel ena spai taudia 12 amo 10 ese ripoti dikana idia gwauraia neganai, taunimanima momo herea idia maumau, idia gwau Gwauhamata Tanona lalonai do idia vareai bona unai tano do idia abia gwauraia neganai dika idauidau do idia davaria. Hegeregere idia gwau: “Aigupito ai bema ai mase be namo, eiava inai tano gagaena ai bema ai mase be namo!” (Numera 14:2) Unai be hemataurai lasi karana! Unai dainai ita hoa lasi, Iehova ese Mose dekenai ia gwau: “Inai taunimanima ese lau do idia dadaraia ela bona edena negai? Bona edena negai do idia abidadama lau dekenai?” (Numera 14:11) Unai hemataurai lasi maumau taudia ia hahemaoro henidia, ia gwau tano gagaena dekenai do idia loaloa ela bona lagani 40, ela bona unai uru taudia iboudiai idia mase ore.

Aposetolo Paulo ese unai sivarai ia gwauraia edia kara ita laloatao totona. Keristen taudia ia sisiba henidia, ia gwau namo lasi unai Israel taudia edia maumau karana idia tohotohoa, badina unai kara dainai idia be tano gagaena dekenai idia mase. (1 Korinto 10:​10, 11) Ia hedinarai goevagoeva, badina maorona lasi maumau karana bona maumau momo karana ese iseda abidadama ia hamanokaia diba, bona ita ia hakaua Iehova ese ita do ia badu henia totona.

To, Iehova ia haheauka ena hesiai taudia dekenai hagoadaia lasi karana ia vara dainai nega haida idia maumau. Pavapava Hahine dikana Iesebel ia dagedage henia dainai Elia be Horeb Ororona dekenai ia heau lao, ia laloa ena peroveta gaukarana be ia ore. Ia laloa kerere, ia laloa unai tano ibounai lalonai ia sibona be Iehova ia tomadiho henia. Elia ena abidadama hagoadaia totona, ia dekenai Dirava ese Iena siahu ia hahedinaraia. Murinai, peroveta tauna ia hamaoroa Israel tanona lalonai Iehova idia abidadama henia hesiai taudia 7,000 idia do noho, bona gaukara momo ia do noho do ia karaia totona. Unai dainai, Elia ese ena maumau ia laloaboio bona mai goada danu ia lao ia gaukara totona. (1 Hanua Pavapavadia 19:​4, 10-12, 15-18) Keristen elda taudia be lalo-parara idia gaukaralaia neganai, idia danu be hagoadaia hereva idia henia diba abidadama taudia dekenai, bona idia durudia bena idia diba Dirava ena ura do ia hagugurua totona idia be mai edia gaukara.​—1 Tesalonika 5:14.

Maumau Momo Karana Koua Dalana

Maumau momo karana koua dalana be dahaka? Haheitalai be inai, kuku ania karana ese tauanina ia hadikaia idia hamomokania neganai, unai ese taunimanima ia durua kuku ania karana idia rakatania totona. Unai hegeregerena, maumau karana ese ita ia hadikaia diba ita lalo-pararalaia neganai, unai ese ita ia durua maumau karana do ita rakatania totona.

Maumau karana idia rakatania taudia ese dahaka namo idia davaria? Maumau karana idia rakatania taudia ese idia abia namo gauna badana ta be Baibel ena hereva do idia lalo-hadailaia namonamo diba. Hekwakwanai ia vara neganai, ia maumauraia tauna be Iehova ena lalohadai unai hekwakwanai dekenai ia tahua lasi. Idia maumau Israel taudia idia laloaboio Iehova Dirava ese igui hesiai amo idia ia ruhaia bona hoa dalana amo idia totona Davara Kakakaka ena ranu ia hapararaia. Edia hagoadaia lasi lalohadaina ese edia matadia ia hakepuludia bamona, bona Dirava ena siahu idia itaia lasi bena edia moale ia boio. Unai dainai, edia abidadama Iehova dekenai ia boio.

Ma danu, hekwakwanai idia vara neganai, bema tau ta ese ena hekwakwanai ia laloa namonamo diba, do ia lalo-parara unai hekwakwanai ia vara ia sibona ena kerere dainai eiava lasi. Bena murinai unai bamona hekwakwanai do ia havaraia lou lasi. Ierusalem idia hadikaia murinai edia mauri dalana be ia auka, to Ieremia ese ena Israel tadikakadia ia sisiba henidia, ia gwau do idia maumauraia lasi. Unai hisihisi mamina idia abia be idia sibodia edia kara dika dainai, bona idia helalo-kerehai bona Iehova dekenai idia giroa henia totona, unai idia lalo-pararalaia be gau badana. (Rohe-Ahu Bukana 3:​39, 40) Unai hegeregerena, hahediba tauna Iuda ese Iehova ena hakaua herevana bona “Dirava idia negea” taudia ia sisiba henidia, badina idia ese “haida edia kara idia maumauraia noho” dainai.​—Iuda 3, 4, 16.

Gunaguna, mai ena aonega Pavapava Solomon ia gwau: “Lalo-moale be muramura namona, to lalo-metau ese turia ia hamanokadia.” (Hereva Lada-isidia 17:22) Ita maumau karana ese iseda lalona ia hadikaia bona iseda moale ia haboioa. Ia hahedinaraia ita laloa gau ibounai do idia dika, ita laloa lasi gau ibounai do idia namo. To bema “mai mataurai karadia” ita lalodia bona ita herevalaidia dalana ita diba, iseda kudouna do ia moale, bona reana unai ese edia lalona do ia hamoalea.​—Filipi 4:8.

Oibe, bema taunimanima edia kara namo ita laloa, to edia manoka gabudia ita laloa lasi, iseda mauri do ita moalelaia. Hekwakwanai idia vara neganai bema mai moale danu ita haheaukalaidia bona ita maumauraidia lasi, ita goada diba. Ena be hekwakwanai ita davaria, to bema unai hekwakwanai ese iseda abidadama bona iseda haheauka ia hagoadaia ita moale diba.​—Iakobo 1:2, 3.

Ma danu, gau badana be inai ita laloatao, bema ita maumau ita gwau lasi ita sibona mo ita hadikaia. Bema ita maumau hanaihanai, haida edia abidadama karana ita hamanokaia diba. Israel ena spai taudia 10 edia ripoti dikana dainai, bese taudia idia laloa Gwauhamata Tanona dekenai do idia vareai bona tano do idia abia be hekwarahi kava karana. (Numera 13:25–14:4) Ma nega ta ai, Mose be ia lalohisihisi badina taunimanima be hanaihanai idia maumau, unai dainai ia ese Iehova ia noia ena mauri do ia hadokoa. (Numera 11:​4, 13-15) To, bema hagoadaia herevadia ita kikilaia, reana haida edia abidadama karana bona edia moale ita habadaia diba.​—Kara 14:​21, 22.

Ena be nega haida ita danu moni gaukara idia karaia taudia, iseda turadia, iseda ruma bese taudia, eiava kongregesen elda taudia ita ura maumauraidia, to Iehova ia ura iena taunimanima ‘idia helalokau heheni.’ Unai bamona lalokau karana ese ita ia hasiahua haida edia kerere ita gwauatao totona, bona edia kerere do ita laloa bada lasi totona. (1 Petero 4:8) Ita moale, badina Iehova ia laloatao ita be kahu amo ita vara bona iseda kerere ia gwauatao. (Salamo 103:​13, 14; 130:3) Bema ita ibounai ita goada karaia iena kara ita tohotohoa totona, reana do ita maumau momo lasi.

Taunimanima be idia goevadae lou neganai, tau ta ese ena mauri dalana do ia maumauraia diba lasi. To unai nega ita naria noho lalonai, namona be iseda lalona ita biagua bona taunimanima edia kara eiava ita davaria hekwakwanai do ita maumauraia lasi. Iehova ita abidadama henia bona iseda kamonai tadikakadia ita lalokau henidia ita hahedinaraia totona, namona be “gau ibounai [ita] karaia neganai do [ita] maumau lasi o hepapahuahu lasi.” (Filipi 2:14) Unai ese Iehova do ia hamoalea bona ita dekenai hahenamo bada do ia henia. Vadaeni, ita bona ma haida ese namo do ita davaria totona, namona be ita laloaboio lasi, maumau taudia be idia moale lasi.

[Picture on page 20]

Ena be hoa dalana amo Dirava ese mana anianina ia henidia to unai danu idia maumauraia