Bapatiso Oi Abia be Maoro, A?

IDIA hanai laganidia toi lalodiai Iehova ena Witness taudia be taunimanima kahirakahira milion tamona idia bapatiso henidia. Unai be dina ta ta ai taunimanima 824 bamona idia habapatisodia, eiava miniti 7 7 lalodiai taunimanima 4 4 idia habapatisodia. Unai be lagani 1400 C.E. ia lao 1599 C.E. negana ai tomadiho goadana ena kara hegeregerena, a?

Lasi, ita gwau lasi bapatiso abia totona hari taudia idia doridia, hutuma bada be nega tamona idia bapatiso henidia dainai, eiava tomadiho tauna ta be edia lalodia ia doridia dainai. Idia bapatiso badina Iesu Keriso, Keristen taudia edia Biaguna bona Gunalaia Tauna, ese ia haganidia do idia karaia dainai. Iesu ese ia gwauraia karadia bona daladia, bona ia sibona ia abidia hidi bona ia hadibadia aposetolo taudia ese idia karaia daladia, idia badinaia.

Iesu ia toreisi lou murinai bona guba dekenai ia do daekau lasi neganai, iena murinai idia raka taudia dekenai inai bamahuta hahegani herevana ia gwauraia, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.” (Mataio 28:​19, 20) Unai negana murinai, Dirava ese unai bamona ranu bapatiso dalana sibona ia abia dae.

Unai hegeregerena, Baibel ese ita ia hadibaia, ia gwau unai negai Keriso murinai idia raka taudia be ‘Iesu ena ladana do idia gwauraia hedinarai Ierusalem dekenai, Iudea ibounai, Samaria ena kahana ibounai, do ia lao bona tanobada ena kahana ibounai.’ (Kara 1:8) Iesu ia peroveta hegeregerena, edia haroro bona hadibaia gaukarana dainai abidadama taudia be bapatiso do idia abia bona Keriso gavaia taudia ai do idia lao.

Unai ia vara negana ena sivarai be Ierusalem dekenai Pentekoste dinana 33 C.E. ai ia vara. Unai negana ai aposetolo Petro be “aposetolo taudia 11 danu idia toreisi” bona taunimanima hutuma dekenai Iesu Mesia ia herevalaia. Unai sivarai ia gwau iena hereva dainai “idia gari momo,” bona idia ura idia diba dahaka idia karaia be namo. Petro ia gwau: “Umui ibounai emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona, bona Lauma Helaga do umui abia, Dirava ena harihari gauna.” Unai dainai “ena hereva idia abia dae taudia be bapatiso idia abia, bona unai dina tamona lalonai taunimanima 3000 bamona be edia orea lalonai idia vareai.” (Kara 2:​14-41) Gabeai sivaraidia amo idia hamomokania hahediba taudia be bapatiso idia do abia lasi neganai Keristen sivaraina idia kamonai guna, unai sivarai namona idia abia dae, bona idia helalo-kerehai.​—Kara 8:​12, 13, 34-38; 10:​34-48; 16:​30-34; 18:​5, 8; 19:​1-5.

Edena Dala Ai?

To unai hahediba matamata taudia be edena dala maorona ai ranu bapatiso idia abia? Unai do idia karaia aspersion amo (ranu nevarilaia), affusion amo (kwarana dekenai bubua), eiava immersion amo (ranu henunai tauanina ibounai ia diho momokani)? Baibel sivarai be dahaka ia gwau? Iesu be ita totona ‘kara toana ia hedinaraia’ dainai, ia be edena dala ai bapatiso ia abia?​—1 Petero 2:21.

Baibel ia hahedinaraia Iesu be Ioridane dekenai bapatiso ia abia, unai be sinavai sisina badana ta. Bapatiso ia abia murinai, ia be “ranu dekena amo ia daekau.” (Mareko 1:10; Mataio 3:​13, 16) Unai dainai Iesu be Ioridane Sinavaina lalonai ia diho bapatiso abia totona. Ioane ese ia bapatiso henia; Ioane be bapatiso karaia gabuna namona ia tahua neganai Ioridane Kourana dekenai, Salim kahirakahira ai, gabu ia abia hidi “badina ranu be ia bada unuseni ai.” (Ioane 3:23) Etiopia eunuko tauna ena hereva amo ita diba Iesu idia gavaia taudia edia bapatiso karaia dalana be ranu lalonai edia tauanina idia hadihoa momokani. Ia be Filipo ena hadibaia hereva ia kamonai murinai, ia gwau: “Oi itaia, ranu be inai. Dahaka ese egu bapatiso ia koua?” Bena ita duahia “idia ruaosi ranu lalonai idia diho” bena gabeai “ranu dekenai idia daekau mai.”​—Kara 8:​36-39.

Keristen taudia be bapatiso idia karaia neganai ranu lalonai idia diho momokani be tanobada ena sivarai amo ia hedinarai, a? Oibe, ia hahedinaraia. Tano momo dekenai ita itaia ranu lalonai idia diho bapatiso karaia totona bapatiso tanka badadia momo idia noho. Ministry magasin ia gwau: “Akeoloji ena hereva momo idia hamomokania ela bona lagani 1000 C.E. eiava 1500 C.E. neganai bapatiso karaia dalana be ranu lalonai idia diho momokani.” Ma ia gwau: “Keristen gunadia edia nega ai idia haginia bona idia do noho rumadia dekenai, bona hari idia gaukaralaidia noho idau nega dubu rumadia lalodiai, Keristen bapatiso ena sivarai ita itaia diba. Tano lalonai kohua idia karaia edia mase guridia gabudia bona dubu lalodiai idia noho laulaudia ai, foloa dekediai, haba dekediai, bona guhi dekediai, koroa gaudia dekediai, bona idau negai Taravatu Matamatana toretoredia edia laulau dekedia amo unai sivarai ena hereva ita hamomokania diba . . . Unai gaudia bona inai hamomokania herevadia ita haboua diba: dubu tamadia edia toretore dekenai ia hahedinaraia dubu ia matamata negana ai nega momo bapatiso karaia dalana be ranu lalonai tauanina idia hadihoa momokani.”

New Catholic Encyclopedia bukana ia gwau: “Ia hedinarai Dubu gunana dekenai Bapatiso karaia dalana be ranu lalonai idia diho.” Unai dainai ita hoa lasi inai bamona niuspepa sivaraidia edia hereva kwaradia ita itaia: “Katolik Taudia be Ranu Lalonai Hadihoa Momokani Bapatiso Dalana Idia Karaia Lou” (The Edmonton Journal, Canada, September 24, 1983), “Iniseniai Katolik Taudia be Ranu Lalonai Diho Momokani Bapatiso Karaia Dalana Idia Abia Dae” (St. Louis Post-Dispatch, April 7, 1985), “Katolik Taudia Momo be Ranu Lalonai Diho Momokani Bapatiso Karaia Dalana Idia Abia Hidi” (The New York Times, March 25, 1989), bona “Momo be Ranu Lalonai Idia Diho Momokani Bapatiso Karaia Daladia Dekenai Idia Giroa” (The Houston Chronicle, August 24, 1991).

Dahaka Totona?

Badina be dahaka Iesu ia ura iena hahediba taudia be bapatiso idia abia? Unai be mai edia kudouna ibounai ida Dirava idia gwauhamata henia ena toana namona. Tanobada ibounai dekenai “Sivarai Namona” do idia harorolaia, bona hahediba taudia be “bese ibounai” amo do idia halaodia. (Mataio 24:14; 28:19) Iuda bese taudia be idia vara neganai ia dekenai gwauhamata lalonai idia vareai, to hari Dirava be idia sibodia lasi, to ma haida do ia lalodia. Korenelio bona iena ruma bese taudia be Idau Bese taudia, eiava Iuda lasi taudia ginigunadia, Iesu Keriso ena hereva momokani idia abia dae bona bapatiso idia abia.

Ranu lalonai idia diho momokani ese ia hahedinaraia idia bapatiso taudia be sibodia idia laloa bada mauri dalana amo idia mase vadaeni. Ranu amo idia abidia daekau karana ese ia hahedinaraia idia be hari Dirava ena ura karaia totona idia mauri bona unai idia laloa guna, Iesu ese ia karaia hegeregerena. (Mataio 16:24) “Tamana, Natuna, Lauma Helaga ena ladanai” bapatiso idia abia ese ia hahedinaraia idia be unai hereva momokani idia abia dae bona idia lalo-parara idia ta ta be dahaka. (Mataio 28:19; Kara 13:48 itaia danu.) Bapatiso be kara ginigunana Dirava bona ena ura idia badinaia totona.

Revareva Helagadia be taunimanima ese idia abia dae tomadiho lalohadaina ia hamomokania lasi, unai lalohadai be bapatiso be helaga karana ta, tomadiho karana ta bona namo ia henia​—Dirava ena heduru, helaga, eiava lauma dalanai heduruna​—unai bapatiso ia abia tauna dekenai. Anina be, Pope Eugenius Namba 4, sivarai gunana lalonai ena hereva ai torea tauna, be bapatiso inai bamona ia herevalaia, ia gwau: “Unai helaga karana dainai kara dikadia iboudiai idia gwauatao; danu, kara dika ena davana ibounai idia kokia oho. Unai dainai, bapatiso idia abia taudia be kara dika gunadia ena davana do idia abia lasi; bona bema idia kara dika lasi bona idia mase neganai, maoromaoro guba ena basileia idia abia bona Dirava idia itaia.”

Ena be Iesu be “kara dika ta ia karaia lasi”, to bapatiso ia abia. (1 Petero 2:22) Ma danu, Baibel ena hereva hegeregerena, kara dika gwauatao dalana tamona sibona be Iesu Keriso ia henia mauri davana amo. Anania ese Taso tauna Saulo ia hagoadaia, ia gwau: “Oi toreisi, bapatiso oi abia, oiemu kara dika ia huria totona, [Iesu ena] ladana dekenai oi boiboi dainai.” (Kara 22:​12-16) Oibe, hahemauri abia dalana tamona sibona be Iesu ese ia bubua rarana amo, bona abidadama dainai “iena ladana dekenai [idia] boiboi.”​—Heberu 9:22; 1 Ioane 1:7.

Unai dainai, Petro ena hereva 1 Petero 3:21 dekenai be edena bamona? Unuseniai ia gwau: “Unai ranu be bapatiso ena toana bamona, bona bapatiso ese harihari umui ia hamauria noho. Iseda tauanina ena miro be bapatiso ese ia huria lasi. Lasi, to bapatiso ena anina be, Dirava dekenai gwauhamata ita henia, mai laloa maoromaoro danu. Ia ese umui dekenai mauri ia henia, Iesu Keriso ese mase dekena amo ia toreisi lou dainai.” Petro be Abata negana ai Noa be ranu ia hanaia karana bona bapatiso ia hahegeregeredia. (1Pe 3 Siri 20) Dirava dekenai abidadama bada ia hahedinaraia dainai, Noa be iena ruma bese hamauria totona lagatoi ta ia haginia. (Heberu 11:7) Unai hegeregerena, Iehova Dirava dekenai idia abidadama dainai bona Keriso Iesu ena amo hahemauri dalana idia abia hidi dainai, taunimanima be hari tanobada dikana amo idia roho mauri diba. Namona be unai abidadama idia hamomokania danu. Bema kara dika amo idia helalo-kerehai bona edia raka dala kererena amo idia giroa, bona guriguri amo Dirava idia gwauhamata henia, Dirava idia noia edia lalona ia noho goeva totona. To Iesu ese ena mauri davana ia henia bona ia toreisi lou neganai unai boubou ena anina be guba lalonai Dirava dekenai ia henia dainai, kara dika gwauatao bona hahemauri dalana ia noho.​—1 Petero 3:22.

Dahaka Do Oi Karaia?

Nega daudau lalonai Iehova ena Witness taudia ida oi hebamo, a? Reana Baibel ena hahegani hegeregeredia oiemu mauri dalana oi haidaua, to gwauhamata bona bapatiso oi karaia lasi. Reana oi ura Dirava ena ura oi karaia to sedira oi gari bapatiso ena maduna dainai. Unai dainai, reana oi ura naria, oi ura lasi unai maduna oi huaia bona oi ura lasi emu kara do idia tahua. Lagani gunanai, taunimanima kahirakahira 11 milion mai kahana be Lohiabada ena Anibou hebouna dekenai idia lao. To, unai lagani lalonai sivarai namona idia harorolaia taudia edia namba be 4.5 milion ia abia lasi. Anina be, ena be idia be Iehova ena bapatiso Witness taudia lasi, to taunimanima 7,000,000 bamona be Dirava ena hereva momokani idia moalelaia. Momokani, idia haida be natudia bona kamonai matamata taudia haida. To idia haroro taudia haida danu be bapatiso idia do abia lasi. Unai dainai taunimanima momo be Baibel ena diba maoromaoro idia abia, to Dirava ese ia gwauraia hahemauri dalana, bapatiso unai, idia do abia lasi.

Namona be inai ita laloatao, diba ita abia vadaeni dainai Dirava ese iseda kara do ia tahua. Iakobo 4:17 ia gwau: “Bema kara namodia ia karaia diba tauna ese unai kara ia karaia lasi, unai tau be kara dika tauna.” Esekiel 33:​7-9 ese ia hahedinaraia Dirava ena taravatu bona hadibaia herevadia ia diba tauna ena maduna be unai hereva do ia badinaia. Unai dainai henanadai badana be ta ese Dirava ia lalokau henia momokani bona ia ura bada ia ia hamoalea o lasi. Unai bamona ia lalokau momokani tauna bona Iehova Dirava ida turana karana namona ia ura abia tauna be do ia naria lasi, to mai ena kudou ibounai ida ia dekenai gwauhamata do ia karaia. Bapatiso be unai gwauhamata ia karaia ena toana sibona. Ia be gau badana hahemauri abia totona. Abidadama momokani taudia be bapatiso idia abia.​—Kara 8:12.

Do ia mai nega matamatana lalonai abidadama, gwauhamata taudia dekenai Dirava ese ia gwauhamatalaia gaudia edia namo be hari tanobada dikana ese ia henia gau namodia idia hereaia. Dirava ena imana goadana ita laloa neganai, taunimanima gari henia karana ia ore. (1 Korinto 10:22; 1 Petero 5:​6, 7) Momokani, hari be nega maorona oi sibona oi nanadaia totona, Etiopia eunuko tauna be Filipo ia henanadai henia hegeregerena, ia gwau: “Dahaka ese egu bapatiso ia koua?”

[Picture on page 7]

Etiopia eunuko hegeregerena, inai henanadai, “Dahaka ese egu bapatiso ia koua?” be oi sibona dekenai oi henia, a?