Tanobada Ena Diari Gavaia
“Lauegu murina dekenai do ia raka tauna be . . . mauri ena diari do ia abia.”—IOANE 8:12.
BEMA dina dina iboudiai diari be lasi, ita be edena bamona? Umui laloa edena bamona bema lagani iboudiai dina dina iboudiai diari be lasi? Tanobada lalonai kala be lasi negana umui laloa, badina diari be lasi neganai kala be lasi danu. Bema diari be lasi, ita mauri diba lasi! Badina be dahaka? Badina be au bona ava edia rau ese diari idia gaukaralaia, iseda aniani gaudia idauidau—uhe gaudia, uma aniani, bona huahua—havaradia totona. Momokani, nega haida animal vamu ita ania. To unai animal ese reirei o ava o unai gau idia ania gaudia be idia anidia. Unai dala amo ita be diari dainai ita mauri.
2 Iseda diari be dina amo ia mai, bona dina be hisiu ta. Ena be dina ese diari bada herea ia halasia, to ia be hisiu momo edia bada hegeregerena sibona. Hisiu momo ese idia hereaia momokani. Ita be hisiu oreana ta, ladana Milky Way galaxy, lalonai ita noho, ia lalonai be hisiu handred bilion mai kahana idia noho. Ma danu, guba lalonai be hisiu oreadia bilion momo. Hisiu be momo momo herea! Idia ese diari bada herea idia halasia! Unai ibounai ia karaia bona unai diari ibounai ia havaraia Diravana, Iehova, be mai ena siahu bada. Isaia 40:26 ia gwau: “Umui gaga isi, umui itaia. Unai hisiu be daika ese ia karadia? Edia orea be ta ta amo ia halasidia, bona iboudiai edia ladadia ia hatodia Diravana ese. Ena goada hegeregerena amo, bona ena siahu be bada dainai, ta ia boio lasi.”
Diari Idauna Ta
3 Iehova ese danu diari idauna ia havaraia bona ia halasia, inai diari amo iseda lalodia ia hadiaridia bena ita be lauma dalanai ita itaia diba, lauma dalanai iseda lalodia idia diari. Dikseneri ta ia gwau “hadiaria” anina be inai: “Diba henia: hadibaia; lauma dalanai lalo-parara henia.” Ia gwau “diari abia” anina be: “lalo-duhu bona hereva koikoidia amo ruhaia.” Lauma dalanai iseda lalodia idia diari badina be Dirava ena Hereva, Buka Helaga, be ita diba goevagoeva dainai. Unai dainai ita diba Dirava be daika bona ena palani ita diba. “Guna neganai Dirava ia hereva, ia gwau, ‘Dibura dekena amo diari do ia hedinarai.’ Unai Dirava danu ese aiemai lalona dekenai iena diari ia atoa, ai do ia hadiaria totona.” (2 Korinto 4:6) Unai dainai, Dirava ena Buka Helaga ena hereva momokanidia ese lalo-duhu bona hereva koikoidia amo ita idia ruhaia. Iesu ia gwau: “Hereva momokani be do umui diba, bona hereva momokani ese umui do ia ruhaia.”—Ioane 8:32.
4 Lauma dalanai diari ena Badina, Iehova, be “aonega dekenai ia hereadae.” (Iobu 37:16) Danu, Salamo 119:105 be inai bamona Dirava ia gwauraia: “Emu hereva be egu aena ena lamepa, bona egu dala ena diari.” Unai dainai, lauma dalanai iseda mauri ena kara gabena sibona lasi, to ita vairanai dalana ia hadiaria diba danu. Unai be lasi neganai, mauri be hegeregere hanuaboi diburana ai motuka ta ita taria, dala be gageva bona motuka ena lamepa be lasi bona ma diari ta be lasi danu. Dirava ena amo lauma diarina ita abia be hegeregere motuka ena lamepa ena diari bamona. Unai diari ese dala ia hadiaria bona ita lao dalana ita itaia diba.
5 Isaia 2:2-5 ena peroveta herevana ese ia hahedinaraia iseda nega lalonai Dirava ese bese iboudiai amo taunimanima do ia gogodia, idia ura lauma diarina do idia abia, bena unai amo Dirava ese ia abia dae tomadiho momokanina do idia karaia. Siri 3 ia gwau: “Ia ese ena kara ita do ia hadibalaia, bona ita be ena dala ai do ita raka.” Siri 5 ese hereva momokani tahua taudia ia boiridia, ia gwau: “Umui mai, Iehova ena diari lalonai do ita raka.”
6 Unai dainai, diari edia toana rua be Iehova ena amo idia mai: tauanina diarina bona lauma diarina. Iseda matadia amo ita itaia diarina ese iseda tauanidia ia durudia dainai, ita mauri noho ela bona lagani 70 o 80 bamona idia ore. To lauma diarina ese ita ia hakaua lao, paradaiso tanobadana dekenai do ita mauri hanaihanai totona. Unai be Iesu ese Dirava ia guriguri henia bamona, ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.”—Ioane 17:3.
Tanobada be Lauma Dalanai Ia Dibura
7 Hari inai negai lauma diarina ita abia be mai anina bada. Mataio karoa 24 bona 2 Timoteo karoa 3 edia peroveta herevadia ese idia hahedinaraia inai tanobada ena oromana ena dokona be ia kahirakahira momokani. Unai peroveta herevadia bona ma haida danu ese iseda nega lalonai idia vara gaudia dika rohorohodia idia gwauraidia guna; ita idia hadibaia, inai tanobada be “nega dokodia” lalonai ia noho. Unai peroveta herevadia hegeregeredia, hanaia laganidia 90 bamona lalodiai hisihisi badadia momo idia vara. Taravatu utua karadia bona dagedage karadia idauidau idia bada herea dainai taunimanima idia gari. Tuari dainai taunimanima 100,000,000 bona ma haida idia mase. Dai-hanai goreredia, taunimanima idia garilaia AIDS hegeregerena, ese taunimanima milion momo idia hadikaia, United States lalonai taunimanima 160,000 bamona be AIDS amo idia mase vadaeni.
8 United Nations ena seketere badana gunana, Javier Pérez de Cuéllar ia gwau: “Hari taunimanima bilion tamona bona ma haida idia ogogami momokani” bona “unai amo dagedage kara idauidau ia havaraia.” Ia gwau inai “hisihisi metaudia be Gavamani ese idia haoredia diba lasi.” Bona siahu bada oreana ta ia gunalaia tauna ia gwau: “Tanobada besedia edia hekwakwanai badana be inai: gavamani ese idia biagudia diba lasi.” Salamo 146:3 ena hereva be momokani: “Lohia taudia umui abidadama henidia lasi, tanobada tauna ena natuna ta danu; idia dekenai be hahemauri dalana ta lasi.”
9 Hari inai negai tanobada taudia edia noho be Isaia 60:2 ese ia perovetalaia hegeregerena: “Itaia! dibura ese tanobada do ia koua, bona dibura masemase ese tanobada besedia do ia koudia.” Inai dibura dika hereana ese tanobada noholaia taudia kahirakahira iboudiai ia koudia, badina be Iehova ena amo ia mai lauma diarina idia abia dae lasi dainai. Hari lauma diburana be diari ia karaia Diravana ena inai taudia badadia, Satana bona ena lauma dikadia, ese idia havaraia. Idia be “tanobada ena dibura lohiadia.” (Efeso 6:12) Korinto Iharuana 4:4 ia hereva hegeregerena, Diabolo be “inai tanobada ena dirava,” ia ese ‘abidadama lasi taudia edia lalona ia hadiburaia. Vadaeni Keriso ena hairaina bona iena Sivarai Namona ena diari idia itaia diba lasi.’ Taunimanima edia gavamani ta ese Satana ena siahu tanobada dekenai ia haorea diba lasi. Dirava mo sibona ese.
“Diari Badana”
10 To, ena be dibura masemase ese taunimanima kahirakahira iboudiai ia koudia, to Dirava ena Hereva be Isaia 60:2, 3 dekenai ia peroveta, ia gwau: “Iehova be oi dekenai do ia diari momokani, bona iena hairai be oi latanai do ia hedinarai. Bese idauidau be emu diari dekenai do idia mai.” Unai be Isaia karoa 2 ena peroveta herevana hegeregerena, ia gwauhamata Iehova tomadiho henia karana momokanina be inai dina gabedia ai do ia haginia bona, siri 2 bona 3 edia hereva hegeregerena, “bese iboudiai ese do idia aru henia. Bona taunimanima momo do idia lao, do idia gwau: ‘Umui mai, Iehova ena ororo dekenai do ita daekau,’ ” anina be iena tomadiho momokanina dekenai do idia daekau. Unai dainai, ena be Satana ese tanobada ia biagua, to Dirava ena amo diarina be taunimanima bogaragidiai ia hedinarai, bona ia ese momo dibura amo ia ruhadia.
11 Isaia 9:2 ena peroveta hereva ia gwau Dirava ese tanobada dekenai ta do ia siaia, ena diari do ia hahedinaraia totona. Ia gwau: “Dibura ai idia raka taudia ese diari badana idia itaia vadaeni.” Hari “diari badana” be ena Gwaukau Tauna Badana, Iesu Keriso. Iesu ia gwau: “Lau be tanobada ena diarina. Lauegu murina dekenai do ia raka tauna be dibura lalonai do ia loaloa lasi, to mauri ena diari do ia abia.” (Ioane 8:12) Iesu be ia do maragi neganai haida be unai idia diba. Luka 2:25 ia gwau, tau ta ladana Simeona be “kara maoromaoro tauna bona Dirava dekenai ia gari tauna” bona “ia be Lauma Helaga ese ia hahonua.” Simeona ese mero maragina Iesu ia itaia neganai, Dirava ia guriguri henia, ia gwau: “Egu matana ese oiemu hahemauri ia itaia vadaeni. Oi ese oi karaia hegaegae vadaeni taunimanima ibounai edia vairana dekenai. Ena diarina be inai, bese idauidau dekenai diari henia totona.”—Luka 2:30-32.
12 Iesu ese taunimanima ia hadiaridia matamaia bapatiso ia abia negana sisina murinai. Mataio 4:12-16 ia gwau unai ese Isaia 9:1, 2 ia hagugurua, ia be “diari badana” ia herevalaia, lauma diburana lalonai idia raka noho taudia latadiai do ia hedinarai. Mataio 4:17 ia gwau: “Unai negana ia lao, Iesu ese ia haroro hamatamaia, ia gwau, ‘Emui lalona umui giroa, badina be Guba Basileia kahirakahira ia mai vadaeni.’ ” Iesu ese Dirava ena Basileia ena sivarai namona ia harorolaia; unai amo ia ese taunimanima edia lalodia ia hadiaridia bena Dirava ena palani idia lalo-pararalaia.—2 Timoteo 1:10.
13 Iesu ese Dirava ena amo diarina ia hahedinaraia goevagoeva mai ena kamonai ida. Ia gwau: “Lau be tanobada dekenai lau mai vadaeni, diari bamona. Unai dainai lau idia abidadama henia taudia ibounai be dibura lalonai do idia noho lasi. . . . Lau sibona egu siahu dekenai hereva lau gwauraia lasi, to lauegu Tamana, lau ia siaia Diravana, ese ia hereva lau dekenai dahaka hereva dahaka hereva do lau gwauraia, bona edena bamona do lau hereva. Lau diba danu lauegu Tamana ena hereva be mauri hanaihanai.”—Ioane 12:44-50.
“Mauri be Hereva Ena Lalona Dekenai Ia Noho”
14 Oibe, Iehova ese ena Natuna tanobada dekenai ia siaia, diari ai do ia lao bona mauri hanaihanai lao henia dalana taunimanima do ia hahedinarai henidia totona. Ioane 1:1-16 ese unai ia hahedinaraia dalana mani umui laloa. Siri 1 bona 2 idia gwau: “Matamana neganai Hereva ia noho. Hereva be Dirava danu ia noho, bona unai Hereva be Dirava hegeregerena. Hereva be matamana neganai Dirava danu ia noho.” Unai siri lalodiai Ioane ia gwau, Iesu be taunimanima ta ai ia do lao lasi neganai, iena ladana be “Hereva.” Unai ese ena dagi ia hahedinaraia, ia be Iehova Dirava ena Gwaukau Tauna. Bona Ioane ia gwau, “matamana neganai Hereva ia noho,” anina be Hereva be Iehova ese ia karadia gaudia ginigunana, ‘Dirava ese ia karadia gaudia roboana.’ (Apokalupo 3:14) Ia be Dirava ese ia havaradia gaudia iboudiai roboana dainai, iena dagi ese edia dagi ia hereadia, bona ia be ‘dirava ta,’ goada tauna. Isaia 9:6 ese ia gwauraia “Siahu Bada Diravana,” to idia gwauraia lasi Siahu Ibounai Diravana.
15 Ioane 1:3 ia gwau: “Gau ibounai be Dirava ese ia karaia inai Hereva dekena amo. Gau ta ia vara lasi idau dala ta dekena amo, lasi momokani.” Ioane 1:4 ia gwau “mauri be Hereva ena lalona dekenai ia noho bona unai mauri ese diari ia mailaia taunimanima dekenai.” Anina be Dirava ese Hereva amo mauri gaudia idaudia iboudiai ia havaradia, taunimanima danu; taunimanima be mai edia kara dika dainai idia mase, to Dirava ese ena Natuna amo dala ia kehoa mauri hanaihanai be do idia abia diba totona. Momokani, Isaia 9:2 ese ia gwauraia “diari badana” tauna be Iesu. Bona Ioane 1:5 ia gwau: “Diari be dibura lalonai ia hedinarai, bona dibura ese ia habodoa diba lasi.” Diari be hereva momokani bona kara maoromaoro edia toana; dibura be idau vaitani, ia be kerere bona kara dika edia toana. Unai dainai Ioane ia hahedinaraia diari bona dibura be idia tuari heheni to dibura ese diari do ia hadarerea lasi.
16 Ioane be siri 6 ia lao 9 dekenai ia gwau: “Tau ta ia vara, Dirava ese ia siaia, ena ladana be Ioane [Ioane Bapatiso unai]. Ia be hereva momokani do ia gwauraia, bona diari do ia hedinaraia totona ia mai, taunimanima ibounai be hereva do idia kamonai, bona do idia abidadama henia totona. Ia [Ioane] be unai diari lasi, to diari [Iesu unai] herevalaia totona ia mai. Inai be diari momokani, taunimanima ibounai hadiaria totona ia mai tanobada dekenai.” Ioane ese Mesia ena mai ia harorolaia bona ena hahediba taudia ia hahegaegaedia, Ia idia abia dae totona. Gabeai, dala do ia kehoa taunimanima idauidau iboudiai edia, diari do idia abia dae diba totona. Anina be Iesu ia mai, Iuda taudia mo sibodia hanamodia totona lasi, to bese idauidau taudia iboudiai—taga taudia bona ogogami taudia, herevana dahaka bese amo idia mai taudia ia hanamodia totona.
17 Siri 10 bona 11 idia hereva, idia gwau: “Hereva be tanobada dekenai ia noho, bona inai Hereva dekena amo Dirava ese tanobada ia karaia. To tanobada be ia diba lasi ia. Iena tano korikori dekenai ia mai, to iena bese taudia ese idia abia dae lasi ia.” Gunaguna, Iesu be taunimanima ta ai ia do lao lasi neganai, ia ena amo Dirava ese tanobada besena ia havaraia. To tanobada ai ia noho neganai, ia sibona ena bese taudia, Iuda taudia, momo herea ese idia dadaraia. Idia ura lasi edia dika bona edia koikoi karadia do ia gwauraidia hedinarai. Idia be diari idia ura lasi, to dibura idia ura.
18 Ioane be siri 12 bona 13 dekenai ia gwau: “To ia idia abia dae taudia dekenai siahu ia henia, idia be Dirava ena natudia totona. Badina be iena ladana idia abidadama henia taudia be unai. . . Dirava sibona be idia edia Tamana.” Unai siri ese idia hahedinaraia, guna Iesu ena hahediba taudia be Dirava ena natudia lasi. Keriso be tanobada dekenai ia do mai lasi neganai, taunimanima be dala lasi Dirava ena natuna ai do idia lao eiava guba dekenai do idia lao. To Keriso ena boubou karana ena hahemauri siahuna amo, bona taunimanima haida ese unai boubou karana idia abidadama henia dainai, Dirava ese iena natuna ai ia halaodia, bona dala ia kehoa iena guba Basileiana lalonai Keriso ida pavapava ai do idia lao.
19 Siri 14 ia gwau: “Inai Hereva be taunimanima ena tauanina dekenai ia halaoa, iseda huanai ia noho. Iena hairai danu ita itaia. Inai hairai be Dirava ese ia henia, badina ia be Dirava ena Natuna tamona sibona.” Tanobada dekenai, Iesu ese Dirava ena hairai ia hahedinaraia, hevarivari bamona; ia be Dirava ena vara guna Natuna dainai, ia mo sibona ese unai bamona ia hahedinaraia goevagoeva diba.
20 Unai murinai, aposetolo Ioane be siri 15 dekenai ia torea, ia gwau: “Ioane [Bapatiso] ese inai Hereva ia herevalaia, ia boiboi, ia gwau, ‘Lau herevalaia tauna be inai, lau gwau, “Lauegu murina dekenai do ia mai tauna be ia bada, to lau be maragi. Badina lau be do lau vara lasi neganai, ia be guna ia noho vadaeni.” ’ ” Ioane Bapatiso ia vara guna, hua six murinai Iesu be tanobada dekenai ia vara. To Iesu ese kara momo herea ia karadia, Ioane ia hereaia momokani; unai dainai, dala idauidau iboudiai amo Iesu ese Ioane ia gunalaia. Bona Ioane ia gwau, ia do vara lasi neganai Iesu be guna ia noho vadaeni, badina taunimanima ta ai ia do lao lasi neganai, ia be guna ia noho vadaeni dainai.
Iehova amo Harihari Gaudia
21 Ioane 1:16 ia gwau: “Iena bogahisihisi dekena amo, ia ese ita ibounai ia hanamoa vadaeni, hariharibada bona ma hariharibada ia henia vadaeni ita dekenai.” Ena be tanobada besena be kara dika ai idia vara badina unai be Adam ena amo idia abia, to Iesu ese dala ia kehoa, inai tanobada oromana dikana do ia haorea, taunimanima milion momo do idia roho mauri bena tanobada matamatana do idia noholaia, mase taudia do idia hatoredia isi lou, kara dika bona mase do ia kokidia, unai dainai taunimanima ese mauri hanaihanai do idia abia, bona tanobada be paradaiso ai do idia halaoa. Unai gau iboudiai be hariharibada gaudia, goevadae lasi taudia edia kara ena davana lasi. Idia be harihari gaudia, Iehova ese Keriso ena amo ia henidia gaudia unai.
22 Unai gau ibounai do idia vara diba totona, dahaka be harihari gauna hereadaena? “Dirava ese inai tanobada [taudia] ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Unai dainai, Dirava bona iena Natuna, ‘Mauri Biaguna,’ dekenai diba ita abia be gau badana lauma dalanai diari bona mauri hanaihanai ita abia totona. (Kara 3:15) Unai dainai Baibel ena buka ginigabena be inai boiboi ia henia hereva momokani bona mauri idia ura henia taudia ibounai dekenai, ia gwau: “ ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.”—Apokalupo 22:17.
23 Manau, mamoe bamona taudia be tanobada diarina dekenai do idia mai sibona lasi, to unai diari do idia gavaia: “Iena mamoe momokani ibounai murimuri dekenai ia hakaudia, edia vairana dekenai ia raka, vadaeni iena gadona [ena hereva momokani] idia diba dainai iena murina dekenai idia raka.” (Ioane 10:4) Momokani, idia moale ‘iena murinai do idia raka totona’ badina idia diba unai idia karaia neganai mauri hanaihanai do idia davaria.—1 Petero 2:21.
Edena Bamona Do Oi Haere?
◻ Iehova ena amo dahaka diari edia toana idaudia rua idia mai?
◻ Badina be dahaka hari inai negai lauma dalanai lalo-parara ena diari be mai anina bada?
◻ Edena dala ai Iesu be “diari badana”?
◻ Ioane karoa 1 ena hereva amo Iesu dekenai dahaka ita diba?
◻ Tanobada ena diari idia gavaia taudia dekenai dahaka harihari gaudia idia abia?
[Study Questions]
1. Diari be edena bamona gau badana?
2. Dahaka diari badadia idia noho, bona unai amo Iehova dekenai dahaka ita diba?
3. Iehova ena amo lauma dalanai ita abia diarina be edena bamona gau badana?
4, 5. Edena dala ai diba Iehova ena amo be diari ta iseda mauri lalonai?
6. Iehova ena amo diarina be edeseniai ita do ia hakaua?
7. Dahaka dainai hari inai negai lauma dalanai lalo-parara ena diari ita abia be namo?
8. Taunimanima be dahaka do idia davaria, bona badina be dahaka?
9. Daidia ese taunimanima edia dibura idia havaraia, bona daika ese ita ia durua diba unai siahu kokia totona?
10. Edena dala ai Isaia ia peroveta iseda nega lalonai diari be taunimanima dekenai do ia hedinarai?
11. Daika ese Iehova ena diari do ia hahedinaraia goevagoeva diba, hevarivari bamona, bona Simeona be edena bamona ia gwauraia hedinarai?
12. Edena negai bona edena dala ai Iesu be taunimanima ia hadiaridia matamaia?
13. Iesu be edena dala ai sibona ia gwauraia, bona dahaka dainai sibona ia gwauraia diba unai bamona?
14. Ioane 1:1, 2 ena hereva amo edena bamona Iesu ita diba?
15. Ioane 1:3-5 ena hereva amo dahaka gaudia ma haida ita diba Iesu dekenai?
16. Ioane Bapatiso be edena dala ai Iesu ena gaukara ena bada ia gwauraia?
17. Ioane 1:10, 11 ena hereva amo, Iesu ena nega lalonai Iuda taudia edia noho lauma dalana dekenai dahaka ita diba?
18. Ioane 1:12, 13 be edena dala ai ia hahedinaraia haida be Dirava ena natudia ai idia lao diba, bena ahuna idauna ta do idia abia?
19. Dahaka dainai, Ioane 1:14 ese ia hahedinaraia hegeregerena, Iesu be hegeregere momokani, hevarivari bamona, Dirava ena diari ia hahedinaraia totona?
20. Ioane 1:15 dekenai ia torea hegeregerena, Ioane Bapatiso be edena bamona Iesu ia herevalaia?
21. Dahaka dainai Ioane 1:16 ia gwau ita be “hariharibada bona ma hariharibada” ita abia?
22. (a) Dirava ena harihari gauna hereadaena dainai dahaka ia vara diba? (b) Baibel ena buka ginigabena lalonai dahaka boiboi ita dekenai idia karaia?
23. Mamoe bamona taudia be diari dekenai do idia mai neganai, dahaka idia karaia?
[Picture on page 10]
Simeona ese Iesu ia gwauraia “bese idauidau dekenai diari henia” tauna