‘Ekalesia Gunalaia Taudia Boiria’

“Umui ta ia gorere, a? Ia ese ekalesia gunalaia taudia do ia boiria be namo.”​—IAKOBO 5:14.

1, 2. (a) Hari inai nega lalonai, dahaka dika be Iehova ena hesiai taudia idia abia diba, bona sedira edia lalona ena mamina be edena bamona? (b) Dahaka henanadai edia haere ita tahua?

HARI inai nega lalonai “metau dikadia momo” idia vara. Inai “nega dokonai” taunimanima be sibodia edia ura idia tahua guna, kohu idia tahua guna, idia hekokoroku, bona nega momo heiriheiri idia havaraia. (2 Timoteo 3:​1-5) Hari inai nega dikana lalonai ita noho dainai, ita Keristen taudia be inai dika toi ita davaria: Satana Diabolo, Dirava idia laloa lasi tanobada taudia, bona kara dika dekenai ita vara dainai ita kerere momo.​—Roma 5:12; 1 Petero 5:8; 1 Ioane 5:19.

² Unai gau dikadia dainai, sedira nega haida ita laloa ita hegeregere lasi. Unai dainai, edeseniai heduru ita davaria diba abidadama dekenai ita haheauka totona? Iseda Keristen kara bona tomadiho dalana dekenai iseda lalona ita hadaia neganai edeseniai ita lao diba hakaua hereva ita abia totona?

Heduru Ia Noho

³ Ita diba Iehova be iseda goada ena Badina dainai iseda lalona ia hagoadaia. (2 Korinto 1:​3, 4; Filipi 4:13) Salamo ia torea tauna David be Dirava ena heduru ia abia, ia gwau: “Oiemu dala Iehova ena imana dekenai oi atoa, ia oi abidadama henia, bona ia ese kara ta do ia karaia.” “Emu maduna be Iehova latanai oi tahoa kau, ia ese oi do ia abia isi. Ia ese kara maoromaoro tauna do ia naria hanaihanai, do ia marere lasi totona.” (Salamo 37:5; 55:22) Unai bamona heduru dainai ita moale bada herea!

4. Petro bona Paulo be edena dala ai iseda lalona idia hagoadaia?

⁴ Iseda lalona ia goada danu badina ita diba hetoho bona dika negana lalonai ita be sibona ita noho lasi. Aposetolo Petro be Keristen tadikaka ia hagoadadia, ia gwau: “Emui abidadama dekenai do umui gini goada, vadaeni Satani do umui koua. Namo umui diba, emui ekalesia varavara tanobada kahana ibounai dekenai, be hisihisi inai bamona idia abia noho.” (1 Petero 5:9) Momokani, Keristen taudia iboudiai idia ura abidadama dekenai idia gini goada noho. Momokani, nega momo “hisihisi bona metau” ita mamia, aposetolo Paulo ese ia mamia hegeregerena. To, ia “idia hadikaia momokani lasi.” Ia bamona, sedira ita daradara, “to gaukara dekena amo [ita] doko lasi.” Ena be ita idia dagedage henia, to “Dirava ese [ita] ia rakatania lasi.” Bema ita “idia botaia,” “[ita] mase lasi.” Unai dainai, “[ita] hesiku diba lasi.” Iseda lalohadai be “matana idia itaia gaudia be [ita] laloa lasi, to matana idia itaia lasi gaudia [ita] laloa.” (2 Korinto 4:​8, 9, 16, 18) Edena dala ai unai ita karaia diba?

5. Iehova be edena daladia toi amo heduru ia henia?

⁵ Iehova, “Guriguri Ia Kamonai Henia Tauna,” be dala toi dekenai heduru ia henia. (Salamo 65:2; 1 Ioane 5:14) Gau ginigunana be, iena lauma siahuna dainai ia torea Hereva, Baibel, amo hakaua dalana ia gwauraia. (Salamo 119:105; 2 Timoteo 3:16) Gau iharuana be, iena lauma helaga dainai goada ita abia iena ura ita karaia totona. (Kara 4:​29-31 itaia danu.) Bona gau ihatoina be, Iehova ena tanobada oreana ia hegaegae ita idia durua totona. Unai heduru ita abia totona dahaka ita karaia be namo?

‘Harihari Gaudia Bamona Tataudia’

⁶ Peroveta tauna Mose ena nega lalonai ia vara sivaraina ta ese ita ia durua bena ita diba Iehova be Iena hesiai taudia dekenai lalokau bona hebogahisi amo heduru ia henia. Unai sivarai be Tabera dekenai ia vara, Tabera anina be “ia araia; ia gabua; lahi ta.” Unai be Sinai ena ranu lasi gabuna ta dekenai, bona Dirava be idia maumau Israel taudia dekenai lahi ia siaia. Bona Aigupito amo Israel taudia ida idia mai “orea idauidau taudia” be Dirava ese ia henia aniani dainai idia maumau. Dirava ena badu ia itaia neganai, bona taunimanima ia naridia bona edia ura gaudia ia henia totona ia laloa ia hegeregere lasi dainai, Mose ia boiboi, ia gwau: “Lau sibona lau hegeregere lasi inai taunimanima iboudiai lau huadia, badina be idia be metau herea. Unai dainai, bema inai bamona oi karaia lau dekenai, mani emu kara lau oi hamasea, bena egu hemarai do ia hedinarai lasi.” (Numera 11:​1-15) Iehova be dahaka ia karaia? Ia ese “Israel tau badadia 70” ia abidia hidi bona idia dekenai iena lauma siahuna ia henia Mose ida taunimanima biagudia gaukarana idia huaia totona. (Numera 11:​16, 17, 24, 25) Unai aonega tataudia be gaukara idia abia neganai, Israel taudia bona “orea idauidau taudia” dekenai heduru dalana ia kehoa.​—Esodo 12:38.

7, 8. (a) Iehova be idaunegai Israel dekenai edena dala ai “tatau [ia] abidia harihari gaudia bamona”? (b) Paulo be edena dala ai ia gwau Salamo 68:18 ena hereva ena anina be Keristen gunadia edia nega ai ia vara?

⁷ Israel taudia be lagani momo Gwauhamata Tanona idia noholaia murinai, Iehova be laulau dalana ai Siona Ororona ai ia daekau bona Ierusalem be haheitalai basileiana ena hanua badana ai ia halaoa, unai hanua ena pavapava be David. Dirava, “Siahu Ibounai Diravana,” ia hanamoa totona David be ane ia abia, ia gwau: “Oi be atai momokani oi daekau; oi be igui hesiai taudia oi hakaua lao; tatau oi abidia harihari gaudia bamona.” (Salamo 68:​14, 18) Momokani, Gwauhamata Tanona idia kwalimu henia noho lalonai, tatau idia abia mauri bona igui hesiai gaukara idia karaia, bona Levi taudia edia gaukara dekenai idia heduru.​—Esera 8:20.

⁸ Keristen gunadia edia nega lalonai, Keristen aposetolo Paulo be salamo torea tauna ena peroveta hereva ia guguru dalana ia herevalaia. Paulo ia torea, ia gwau: “Ita ta ta be Dirava ese harihari gauna idauna ta ita dekenai ia henia. Ia henia be Keriso ena hariharibada ena bada hegeregerena. Buka Helaga lalonai ia torea hegeregerena, ia gwau, ‘Atai dekenai ia daekau lao neganai, abia mauri mai guia taudia momo ia danu ia abia lao, [tatau haida be harihari gaudia bamona ia henia].’ Inai hereva ‘Ia daekau lao’ ena anina be dahaka? Ena anina be inai: Guna ia diho mai tanobada dekenai, tanobada henuna kahanai. Bona inai ia diho mai tauna be danu ia daekau lao. Guba ena atai momokani dekenai ia lao, guba bona tanobada edia gabu idauidau ibounai dekenai do ia noho totona.” (Efeso 4:​7-10) “Inai ia diho mai tauna” be daika? Unai be Iehova ena gwaukau tauna sibona, David Badana bona Mesia King, Iesu Keriso. Dirava ese ia hatoreaisi lou bona “ia abia isi, gabu bada herea momokani ia henia.”​—Filipi 2:​5-11.

9. (a) Keristen gunadia edia nega lalonai harihari gaudia bamona tataudia be daidia? (b) Hari inai nega lalonai harihari gaudia bamona tataudia be daidia?

⁹ Unai dainai, tatau haida be ‘harihari gaudia bamona’ (eiava, ‘idia be tatau haida’) be daidia? Paulo ia gwau Dirava ena Gwaukau Tauna Badana ese “haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia. Inai bamona harihari gaudia ia henia, be Dirava ena taudia ibounai do ia durua totona. Dirava ena hesiai gaukara do idia karaia namonamo, bona Keriso ena tauanina do ia gini goada totona.” (Efeso 4:​11, 12) Keriso murinai idia raka taudia be aposetolo, peroveta, haroro, mamoe naria, bona hadibaia gaukara idia karaia neganai, tiokratik hakaua dalana idia badinaia. (Luka 6:​12-16; Kara 8:12; 11:​27, 28; 15:22; 1 Petero 5:​1-3) Iseda nega lalonai, lauma dalana ai idia hegeregere elda taudia be lauma helaga ese ia hididia, bona tanobada ibounai dekenai idia be Iehova ena Witness taudia edia kongregesen 70,000 lalodiai gunalaia taudia edia gaukara idia karaia. Unai tatau be harihari gaudia bamona. (Kara 20:28) Tanobada ibounai dekenai Basileia harorolaia gaukarana be ia bada ia lao noho, bona tadikaka momo be “ekalesia ena gunalaia tauna ena dagi” bona ena maduna haida idia “tahua.” (1 Timoteo 3:1) Dagi idia abia neganai, unai tatau danu be harihari gaudia bamona.

10. Isaia be “lohia” taudia ia herevalaia neganai, edena dala ai unai be hari inai nega Keristen elda taudia edia dagi gaukarana ia herevalaia?

¹⁰ Isaia ese “lohia” taudia, Basileia henunai idia lohia taudia, edia gaukara ia perovetalaia neganai, Keristen elda taudia, eiava unai harihari gaudia bamona tataudia, be unai hereva hegeregerena idia karaia. Idia ta ta be “lai koua gabuna hegeregerena ai do idia lao, lai gubana koua gabuna; sinavai sinavai gabu kaukauna dekenai bamona, eiava nadi badana ena keruma tano gagaena dekenai bamona.” (Isaia 32:​1, 2) Unai ese ia hahedinaraia unai dagi gaukara idia abia tataudia be edena dala ai lalokau gunalaia karana dekenai heduru idia henia. Edena dala ai unai heduru namona oi abia momokani diba?

Dala Oi Tahua

¹¹ Ia maloa tauna be haraga herea ia boiboi heduru ia abia totona. Ia laloa daradara lasi. Ta ese mase ia davaria gwauraia neganai, do ia boiboi. Pavapava David be nega momo Iehova ena heduru ia noia, ani? (Salamo 3:4; 4:1; 5:​1-3; 17:​1, 6; 34:​6, 17-19; 39:12) Lauma dalana ai ita manoka neganai, sedira ita lalo-metau neganai, ita danu be Iehova dekenai ita guriguri bona ita noia iena lauma helaga amo ita ia hakaua totona. (Salamo 55:22; Filipi 4:​6, 7) Baibel ena amo lalona hagoadaia hereva ita tahua. (Roma 15:4) Ita be Watch Tower Society ena Keristen buka bona magasin ita tahua sisiba namona ita abia totona. Nega momo unai ese ita ia durua sibona eda hekwakwanai ita hanaia totona. To, bema hekwakwanai momo dainai ita laloa ita hegeregere lasi, ita be kongregesen elda taudia edia sisiba ita tahua diba. Sedira, nega haida “ekalesia gunalaia taudia do [ita] boiria” be maoro. Dahaka dainai Keristen elda taudia ita boiridia? Lauma dalana ai heduru idia ura taudia be edena dala ai idia durudia diba?

12-14. (a) Ta ia gorere neganai aonega dalana be dahaka? (b) Iakobo 5:14 ena hereva hegeregerena, “gorere” Keristen taudia be dahaka idia karaia be namo? (c) Iakobo 5:14 ese edena bamona gorere ia herevalaia, bona dahaka dainai unai bamona oi haere?

¹² Ita gorere neganai, ita laga-ani bena unai amo tauanina ia goada lou diba. To, bema iseda gorere ia lao noho, aonega dalana be doketa namona ta ita tahua. Lauma dalana ai ita manoka neganai, unai bamona ita karaia danu be namo, ani?

¹³ Hahediba tauna Iakobo ena sisiba unai kara dekenai oi laloa. Ia gwau: “Umui ta ia gorere, a? Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladanai.” (Iakobo 5:14) Unuseniai Iakobo ese edena bamona gorere ia herevalaia? Baibel herevalaia taudia haida idia laloa unai be tauanina ena gorere, idia gwau unai nega lalonai dehoro idia atoa be nega momo idia karaia muramura henia gaukarana dekenai. (Luka 10:34) Danu, idia laloa Iakobo be hoa dalana amo tauanina gorere hanamoa karana ia herevalaia. To, unai karoa ena siri ma haida ese dahaka idia hahedinaraia?

¹⁴ “Moale” ia herevalaia, bena dagedage ena “hisihisi” ia herevalaia. Unai amo ita gwau diba Iakobo ese lauma gorere ia herevalaia. (Iakobo 5:13) Idia be doketa lasi, eiava hoa dalana ai gorere idia hanamoa diba taudia lasi, to “ekalesia gunalaia taudia [elda, King James Version Baibel]” idia boiria. Bona dahaka idia karaia? Iakobo ia gwau: “Idia ese ia dainai do idia guriguri. . . . Inai guriguri mai abidadama danu ese gorere tauna do ia hanamoa.” (Iakobo 5:​14, 15; Salamo 119:​9-16 itaia danu.) Ita diba momokani Iakobo ese lauma gorere ia herevalaia badina ia gwau namona be unai tauna ese iena kara dika ia gwauraia hedinarai bena gorere do ia namo. Ia torea, ia gwau: “Unai dainai umui ta ta dekenai emui kara dikadia do umui gwauraia hedinarai, bona umui ta ta totona do umui guriguri. Vadaeni unai neganai Dirava ese emui mauri do ia hanamoa.” Bema kara dika badana ta dainai lauma gorere ia vara, unai gorere tauna ia namo ia lao dalana tamona sibona be Dirava ena Hereva ena sisiba ia badinaia, ia helalo-kerehai, bona iena kara dika ia rakatania.​—Iakobo 5:16; Kara 3:19.

15. Iakobo 5:​13, 14 dekenai dahaka kara idia karaia ia herevalaia?

¹⁵ Iakobo ese ia henia sisiba dekenai ma gau ta ita laloa. Dika ia davaria neganai, namona be Keristen tauna “ia guriguri.” Bema ia moale, “ane do ia abia be namo.” Nega ibounai kara ta ia karaia be namo​—herevana ta be dika ia davaria eiava ia moale. Dika ia davaria neganai ia guriguri, bona ia moale neganai moale herevadia ia gwauraia be namo. Unai dainai, Iakobo ia gwau neganai, “Umui ta ia gorere, a?” dahaka ia vara be namo? Ia gwau lou kara ta ia karaia be namo, oibe, dala ta ia tahua. “Ia ese ekalesia gunalaia taudia do ia boiria be namo.”​—Salamo 50:15; Efeso 5:19; Kolose 3:16.

“Ekalesia Gunalaia Taudia” ese Idia Durua Dalana

¹⁶ Iseda mauri dekenai nega haida ita daradara edena dala ai Baibel ena hahegani ita badinadia diba. Keristen elda taudia be unai dekenai heduru namona idia henia diba. Hegeregere, lauma dalana ai ia gorere tauna dainai idia guriguri diba bona ‘Iehova ena ladana dekenai dehoro idia henia diba,’ unai be Dirava ena Hereva amo aonega dalana ai durua herevadia idia henia. Elda taudia be unai dala amo ita idia durua diba lauma dalana ai ita goada lou totona. (Salamo 141:5) Nega momo, ita ura diba iseda lalohadai dalana ia maoro eiava lasi. Diba momo Keristen elda tauna ida ita herevahereva hebou neganai, unai ese ita ia hagoadaia kara maorona ita karaia totona.​—Hereva Lada-isidia 27:17.

16, 17. Ekalesia gunalaia taudia be edena dala ai ita idia durua Baibel ena hahegani ita badinaia totona?

¹⁷ Bema ta ese elda taudia ia boiria neganai, namona be Keristen elda taudia be “gari taudia [idia] hagoadaia.” Danu, idia be ‘manoka taudia idia durua, bona taunimanima ibounai dekenai do idia lalo-namo henidia.’ (1 Tesalonika 5:14) “Ekalesia gunalaia taudia” bona “manoka taudia” be unai dala ai idia diba heheni bona hebogahisi turana karana idia karaia neganai, lauma dalana ai gorere do ia namo.

Ta ta Edia Maduna bona Guriguri

¹⁸ Keristen elda taudia be Dirava ena mamoe taudia dekenai edia maduna idia huaia be namo. Idia durudia be namo. Hegeregere, Paulo ia gwau: “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina. Umui ta ta umui durua henia, emui metau do umui huaia totona. Inai dala dekenai Keriso ena taravatu do umui badinaia.” Aposetolo tauna be inai danu ia torea, ia gwau: “Ibounai ta ta sibona ena metau, ena metau do idia huaia.”​—Galatia 6:​1, 2, 5.

18, 19. Galatia 6:​2, 5 ese ia gwauraia bamona Keristen elda taudia edia gaukara be dahaka?

¹⁹ Edena dala ai ta ta edia metau ita huaia diba, to ita sibona iseda metau ita huaia diba danu? Greek gado dekenai unai hereva “metau” bona “huaia gauna” edia anina be idau dainai haere ita abia diba. Bema Keristen ta be lauma dalana ai ia manoka bona hekwakwanai ta ia davaria danu, elda taudia bona ma tadikaka haida ese do idia durua, unai amo do idia durua iena “metau” do ia huaia totona. To, unai tauna be sibona ena “huaia gauna” Dirava ena amo do ia huaia be namo.a Elda taudia be mai moale bada ida edia tadikaka edia “metau” idia huaia, unai be hagoadaia kara amo, Baibel ena sisiba amo, bona guriguri amo idia karaia. To, elda taudia be lauma dalana ai iseda maduna, ita ta ta iseda “huaia gauna,” do idia huaia hanaihanai lasi.​—Roma 15:1.

20. Dahaka dainai guriguri ita laloaboio lasi be namo?

²⁰ Guriguri be gau badana bona ita laloaboio be namo lasi. To lauma dalana ai idia gorere Keristen taudia momo be idia guriguri neganai idia hekwarahi. Elda taudia be lauma dalana ai ia gorere tauna totona abidadama guriguri idia karaia neganai, dahaka idia ura Dirava ia karaia? Iena lalo-manoka amo “[Iehova] ese iena mauri do ia hanamoa,” bona do ia hagoadaia hereva momokani bona kara maoromaoro dalana do ia tahua noho totona. Lauma dalana ai ia gorere Keristen tauna be reana lalohadai kerere ia abia to sedira kara dika badana momokanina ta ia do karaia lasi, badina Iakobo be danu ia gwau: “Iena kara dika do ia gwauatao.” Elda taudia edia Baibel sisiba bona edia guriguri goadadia be nega haida lauma dalana ai ia gorere tauna ia durua iena kara dika badadia ia gwauraia hedinarai bona helalo-kerehai ia hahedinaraia totona. Unai amo Dirava ese ia gwauatao diba.​—Iakobo 5:​15, 16.

21. (a) Dahaka dainai Keristen haida be elda taudia edia heduru idia tahua haraga lasi? (b) Sivarai gabena dekenai dahaka do ita laloa?

²¹ Taunimanima momo herea be Keristen kongregesen dekenai idia vareai dainai, edia gaukara idia laloa namonamo ekalesia gunalaia taudia edia gaukara be bada unai taudia idia naridia namonamo totona. Momokani, unai harihari gaudia bamona tataudia be Iehova ese ita ia henia gau namona hari nega dikadia lalonai ita haheauka totona. To, Keristen haida be edia heduru idia tahua haraga lasi, idia laloa unai tadikaka edia gaukara be momo eiava hekwakwanai momo idia hamaoromaorodia toho. Sivarai gabena ese ita ia durua bena ita diba unai tataudia idia moale heduru idia henia totona, badina mai edia ura namona ida Keristen kongregesen lalonai mamoe naria gaukarana idia karaia.

[Footnotes]

Edena Bamona Do Oi Haere?

◻ Heduru ita ura ita abia neganai, Iehova be dahaka heduru toi ita ia henia?

◻ Hari inai nega lalonai daidia be harihari gaudia bamona tataudia?

◻ Edena nega ai ekalesia gunalaia taudia ita boiridia be namo?

◻ Keristen elda taudia amo dahaka heduru do ita abia diba?

3. Lalona ia hagoadaia heduru hereva be daika amo ita davaria diba, bona edena bamona?

6. Iehova be Tabera dekenai dahaka heduru ia henia, bona edena dala ai?

11. Lauma dalana ai ita manoka neganai, edena dala ai heduru ita abia diba?

[Picture on page 15]

Guriguri, Baibel stadi, bona elda Keristen taudia edia heduru oi moalelaia, a?