Iehova Hesiai Henia Sibomu Emu Ura Oi Dadaraia

“Tau ta bema ia ura lauegu murina dekenai do ia raka, ia sibona ena ura do ia laloa lasi, iena satauro do ia huaia, lauegu murina dekenai do ia raka.”​—MATAIO 16:24.

1. Iesu be iena hahediba taudia be kahirakahira do ia mase sivaraina edena bamona ia hadibadia?

MAI ena sinou Heremon Ororo kahirakahira ai, Iesu Keriso ena mauri lalonai mai anina bada gauna ia vara. Lagani tamona ia do abia lasi neganai do ia mase. Unai ia diba; ena hahediba taudia idia do diba lasi. Nega ia ginidae ia hadibadia totona. Momokani, guna Iesu ese ia hadibadia do ia mase, to hari ia gwauraia hedinarai goevagoeva. (Mataio 9:15; 12:40) Mataio ena sivarai ia gwau: “Unai nega dekena amo, Iesu ese ena diba tahua taudia dekenai ia hadibaia hamatamaia, ia be Ierusalema dekenai do ia lao, vadaeni hanua tau badadia bona dubu biagudia bona taravatu hadibaia taudia ese hisihisi momo do idia henia bona do idia alaia mase. To dina toi ia abia be do ia toreisi lou.”​—Mataio 16:21; Mareko 8:​31, 32.

2. Iesu be hisihisi do Ia abia ia hadibadia neganai Petro be dahaka ia hereva, bona Iesu ena haere be dahaka?

² Iesu be kahirakahira do ia mase. To, unai hereva dainai Petro ia badu. Ia laloa Mesia do idia hamasea lasi. Unai dainai, Petro ese ena Biaguna ia sisiba henia. Mai ena ura namona ida ia gwau: “Lohiabada e, unai bamona lasi. Unai bamona do idia karaia lasi oi dekenai.” To karaharaga Iesu ese Petro ena hebogahisi kerere karana ia dadaraia, ta ese gaigai dikana ena kwarana ia moia momokani bamona. Ia gwau: “Satani e, lauegu murina kahana oi lao. Lau hamorua totona oi hereva, badina oiemu laloa be Dirava ena lasi, to taunimanima edia.”​—Mataio 16:​22, 23.

3. (a) Ena be ia diba lasi to edena dala amo Petro be Satana ena hesiai ia karaia? (b) Iesu be sibona ena ura ia dadaraia neganai, edena bamona Petro be hekwakwanai gauna ia dekenai?

³ Ena be Petro ia diba lasi, to ia be Satana ena hesiai ia karaia. Iesu ia haere auka henia, ia be tano gagaena dekenai Satana ia haere auka henia negana bamona. Unuseniai Diabolo ese ia dibagania, auka lasi maurina, bona hisihisi lasi pavapava dalana ia haheitalai henia. (Mataio 4:​1-10) Hari Petro ese ena lalona ia ania, sibona do ia kara auka henia lasi totona. Iesu ia diba unai be iena Tamana ena ura lasi. Ena mauri lalonai sibona ena ura ia dadaraia, sibona ena namo do ia tahua guna lasi be gau badana. (Mataio 20:28) Petro be hekwakwanai gauna bamona ia dekenai; ena hebogahisi kererena be idoa ia dekenai.a To, Iesu ia diba bema sibona ena ura ia dadaraia lasi maurina ia tahua, Satana ena idoa lalonai do ia moru bona Dirava ese ia do ia lalo-namo henia lasi.

4. Dahaka dainai Iesu bona iena hahediba taudia be edia mauri lalonai sibodia edia namo idia tahua guna lasi?

⁴ Unai dainai, Petro ena lalona ia hamaoromaoroa be namo. Iena hereva Iesu dekenai be taunimanima edia lalohadai, Dirava ena lasi. Iesu ia ura lasi sibona ena ura tahua karana amo mauri namona ia abia, bona hisihisi ia koua; danu ia ura lasi iena hahediba taudia be unai bamona maurina idia tahua, badina Iesu be Petro bona hahediba taudia oredia dekenai ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, iena satauro do ia huaia, lauegu murina dekenai do ia raka.”​—Mataio 16:24.

5. (a) Iseda mauri lalonai Keristen karadia ita badinaia totona dahaka be gau badana? (b) Keristen tauna do ia badinaia gau badadia toi be dahaka?

⁵ Iesu ese inai hereva badana ia gwauraia loulou: Mauri lalonai Keristen karadia idia badinaia noho. Iesu ena hahediba taudia ai idia lao totona, Keristen taudia be edia Hakaua tauna bamona, sibodia edia ura idia dadaraia karana amo Iehova idia hesiai henia be gau badana. (Mataio 10:​37-39) Keristen tauna do ia badinaia gau badadia toi ia gwauraidia: (1) sibona ena ura do ia laloa lasi, (2) ena satauro do ia huaia, bona (3) Ia murinai do ia raka noho.

“Tau Ta Bema Ia Ura Lauegu Murina Dekenai Do Ia Raka”

⁶ Sibona ena ura do ia laloa lasi ena anina be dahaka? Ena anina be tau ta ese ena ura ibounai ia dadaraia, bona haheitalai ai sibona ia hamasea bamona. Greek gado ai “sibona ena ura laloa lasi” be hegeregere oi gwau, “lasi”; ena anina be “dadaraia momokani.” Unai dainai, bema emu mauri lalonai oi ura Keristen ena kara do oi badinaia, mai emu ura danu oi tahua gaudia, emu noho namo, emu ura gaudia, bona emu moale do oi dadaraidia. Anina be emu mauri ibounai oi henia Iehova Dirava dekenai iena gaukara karaia hanaihanai totona. Ia gwau lasi sibona ena ura laloa lasi karana ena anina be nega ta ta sibona moale karana ta oi dadaraia. To, ena anina be emu tauanina oi henia Iehova do ia biagua totona. (1 Korinto 6:​19, 20) Tau ta be sibona ena ura ia laloa lasi neganai, sibona totona ia mauri lasi to ia ura Dirava ia hamoalea. (Roma 14:8; 15:3) Unai ena anina be ena mauri ibounai lalonai, ia ese sibona ena ura ia dadaraia bona Iehova ena ura ia badinaia.

7. Keristen ena satauro be dahaka, bona ia huaia dalana be dahaka?

⁷ Vadaeni, emu satauro do oi huaia, be mai anina bada gauna. Satauro huaia be maduna ta bona mase ia laulaulaia. Keristen tauna be Iesu Keriso murinai ia raka dainai, mai ena ura danu hisihisi ia ania, hemarai eiava dagedage ia abia eiava ia mase. Iesu ia gwau: “Bema tau ta ese ena satauro do ia abia isi lasi, lauegu murina dekenai do ia raka lasi, ia be lau dekenai do ia hegeregere lasi.” (Mataio 10:38) Hisihisi idia ania taudia momo be satauro idia huaia lasi. Kara dika taudia edia “hisihisi” be momo, to satauro idia huaia lasi. (Salamo 32:10) To, Keristen tauna ena mauri ibounai lalonai satauro ia huaia ena anina be boubou bamona Iehova ia hesiai henia.

8. Iesu ena mauri lalonai dahaka ia karaia ia murinai idia raka taudia idia tohotohoa totona?

⁸ Iesu ia gwauraia gauna ginigabena be ia gwau ia murinai do ita raka noho. Iesu ia ura ia hadibaia herevadia ita abidia dae bona ita abidadama henia, to unai sibona lasi, ia ura iseda mauri ibounai lalonai iena kara ita tohotohoa. Iena mauri kara badadia be dahaka? Iena hahediba taudia dekenai gaukara ginigabena ia henidia neganai, ia gwau: “Do umui lao, bese ibounai be diba tahua taudia do umui halaoa . . . , idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Iesu ia haroro bona Basileia ena sivarai namona ia hadibaia. Iena hahediba taudia bona idaunegai Keristen kongregesen taudia be unai idia karaia danu. Edia gaukara goadagoada dainai, bona idia be tanobada amo idia gini siri dainai, tanobada taudia idia badu bona idia dagedage henidia; vadaeni edia satauro idia huaia ena metau ia habadaia unai.​—Ioane 15:​19, 20; Kara 8:4.

9. Iesu be taunimanima edena bamona ia kara henidia?

⁹ Iesu ese ena mauri lalonai ia hahedinaraia gauna badana ma ta be taunimanima ia kara henidia dalana. Ia be mai ena hebogahisi bona ia be “dagedage lasi bona manau tauna.” Unai dainai, idia kamonai henia taudia idia lalo-maino, bona ia noho dainai goada idia abia. (Mataio 11:29) Ia murinai do idia raka totona ia gwau henidia lasi eiava taravatu momo ia henidia lasi; iena hahediba taudia ai do idia lao totona ia hahemaraidia lasi. Ena be sibodia edia ura idia dadaraia, to idia hahedinaraia idia moale momokani. To, tanobada taudia momo be unai bamona lasi, idia be sibodia edia ura idia tahua, bona unai be ‘nega dokona’ toana!​—2 Timoteo 3:​1-4.

Iesu Hegeregerena Sibona Eda Ura Ita Dararaia Karana Habadaia bona Badinaia

¹⁰ Iesu be sibona ena ura ia dadaraia bona unai be haheitalai namona ita tohotohoa totona. Ia ese ena satauro ia abia isi bona ia huaia noho dalana be iena Tamana ena ura ia karaia noho. Paulo be Filipi Keristen taudia ia tore henidia, ia gwau: “Keriso Iesu ena laloa bamona umui danu do umui laloa be namo. Ia be nega ibounai Dirava bamona ia noho. Oibe, Keriso be Dirava danu ia hegeregere, to ia laloa lasi unai bamona do ia noho, sibona ena gauna. Lasi, to ia ese sibona ena ura dainai iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia. Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.” (Filipi 2:​5-8) Iena ura ia laloa lasi momokani, ani? Bema oi be Keriso Iesu ena, bona oi be ia murinai oi raka tauna ta, vadaeni unai lalohadai hegeregerena oi abia be gau badana.

¹¹ Aposetolo tauna ma ta, Petro, ia gwau ita totona Iesu ese hisihisi ia ania bona ia mase, unai dainai namona be idia hegaegae namonamo tuari taudia bamona, Keristen taudia be tuari kohu do idia abia, bona Keriso ena lalohadai idia abia. Ia gwau: “Keriso ese iena tauanina dekenai hisihisi ia abia dainai, umui ese iena laloa hegeregerena do umui laloa be namo. . . . Badina be iena tauanina ia hisihisi noho tauna ese kara dika ia rakatania vadaeni. Unai dainai harihari ia lao bona emui mauri dokona inai tanobada dekenai do umui noho namonamo. Emui tauanina ena ura dikadia do umui karaia lasi, to Dirava ena ura sibona do umui badinaia.” (1 Petero 3:18; 4:​1, 2) Sibona ena ura ia dadaraia karana amo Iesu ese ia hahedinaraia ia ura Dirava ena ura ia karaia. Ena abidadama be ia bada, sibona ena ura lasi to nega ibounai ena Tamana ena ura ia karaia, ela bona mase mai hemaraina ia abia danu.​—Mataio 6:10; Luka 22:42.

12. Sibona ena ura ia dadaraia dainai Iesu ia lalohisihisi, a? Ena badina oi gwauraia hedinarai.

¹² Ena be sibona ena ura ia dadaraia dainai Iesu ena mauri be ia auka, to ia lalohisihisi lasi. Dirava ena ura ia badinaia dainai Iesu ia moale. Ia dekenai, iena Tamana ena ura ia karaia be aniani bamona. Unai amo moale ia davaria, aniani amo ia davaria moalena bamona. (Mataio 4:4; Ioane 4:34) Vadaeni, bema oi ura mauri mai moalena oi abia, dala hereadaena be Iesu ena kara oi tohotohoa bona iena laloa oi abia.

13. Lalokau be edena bamona ita ia hasiahua sibona eda ura ita dadaraia totona?

¹³ Dahaka ese oi ia hasiahua sibona emu ura oi dadaraia totona? Unai be lalokau. Iesu ia gwau: “ ‘Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.’ Inai be taravatu bada herea momokani. Ia be ginigunana. Iharuana be inai, ginigunana hegeregerena, ‘Oiemu badibadinai tauna dekenai oi lalokau henia, oi sibona oi lalokau henia bamona.’ ” (Mataio 22:​37-39) Keristen tauna be unai hereva ia badinaia diba lasi bema ia sibona ena namo ia tahua guna. Ia moale bona ia noho namo totona gau ginigunana be Iehova ia lalokau henia bona gau iharuana be ena dekena taudia ia lalokau henidia. Ena mauri lalonai Iesu be unai bamona ia karaia, bona ia ura iena hahediba taudia be unai bamona idia karaia.

14. (a) Heberu 13:​15, 16 ai, dahaka maduna ia gwauraidia? (b) Dahaka ese ita ia hagoadaia sivarai namona ita harorolaia goadagoada totona?

¹⁴ Aposetolo Paulo be lalokau taravatuna ia diba. Ia gwau: “Namona be Dirava do ita hanamoa, Iesu ena ladana dainai. Bona inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada. Kara namodia do umui laloaboio lasi, bona kohu lasi taudia danu umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.” (Heberu 13:​15, 16) Hari, Keristen taudia be Iehova dekenai animal eiava unai bamona gaudia idia bouboulaidia lasi; unai dainai, dubu ta lalonai hahelaga taudia be edia tomadiho idia gunalaia be anina lasi. Keriso Iesu dekena amo hanamoa herevadia be boubou bamona ita henia. Bona unai dala badana ta amo iena ladana ita hanamoa, bona iseda lalokau Dirava dekenai ita hahedinaraia. Lalokau ese ita ia hagoadaia bena sibona eda namo ita tahua guna lasi karana amo sivarai namona ita harorolaia goadagoada diba, bona mai iseda ura danu ita hegaegae noho iseda uduna bibinadia amo Dirava ita hanamoa totona. Unai dala amo danu ita hahedinaraia iseda dekena taudia ita lalokau henidia.

Sibona Ena Ura Dadaraia be Hahenamo Ia Havaraia

¹⁵ Namona be inai henanadai oi lalodia: Lauegu mauri lalonai sibona egu ura lau dadaraia, a? Egu mauri lalonai lau tahua gaudia ese unai ia hahedinaraia, a? Lauma dalanai lauegu haheitalai namona dainai lauegu ruma bese taudia be hahenamo idia davaria, a? (1 Timoteo 5:8 itaia danu.) Tamana bona sinana lasi natudia bona vabu taudia be edena bamona? Sibona egu ura lau dadaraia dainai namo idia davaria danu, a? (Iakobo 1:27) Boubou bamona egu haroro gaukara ena nega do lau habadaia diba, a? Lau ura pioneer, Betele, eiava misinari gaukara lau karaia, eiava lau be mai egu dala Basileia harorolaia taudia momo lasi gabuna ta dekenai lau lao durudia totona, a?

16. Aonega kara be edena bamona ita ia durua iseda mauri lalonai sibona eda ura ita dadaraia totona?

¹⁶ Sibona eda ura dadaraia karana amo iseda hesiai gaukarana Iehova dekenai ita hagugurua totona, ita aonega karaia be namo. Haheitalai be inai, Janet be regular pioneer ta Ecuador dekenai, bona dina ibounai moni gaukara ia karaia. To daudau lasi murinai ia hegeregere lasi bona ia moale lasi badina regular pioneer hora ia hagugurudia lasi dainai. Ia laloa namona be ena hekwakwanai be ena gaukara biaguna do ia hamaoroa bona do ia noia dina haida sibona moni gaukara do ia karaia. Badina biaguna ia ura lasi, murinai ia ese Maria ia hakaua lao, ia ura pioneer gaukara ia karaia dainai ia danu be dina haida sibona moni gaukara ia tahua. Idia ruaosi idia gwau dina ta ta lalodiai ta be dabai ia gaukara ta be adorahi ia gaukara, unai amo idia be dina ta ta iboudiai gaukara horadia do idia hagugurudia diba. Gaukara biaguna ia ura. Hari unai taihu ruaosi be regular pioneer taudia. Kaffa danu be unai kampani dekenai dina ibounai moni gaukara ia karaia, bona ia pioneer danu, bona ia hekwarahi bada ena pioneer hora ia hagugurudia totona, unai dainai Kaffa ese Magali ia hakaua lao gaukara biaguna dekenai bona Janet hegeregerena ia noinoi. Biaguna ia ura. Vadaeni, hari taihu hani be pioneer gaukara idia karaia noho diba, guna idia ruaosi be pioneer gaukara idia hadokoa gwauraia. To mai edia aonega danu idia karaia dainai hahenamo idia davaria.

17-21. Headava tau mai adavana edia lalohadai mauri ena badina dekenai be edena bamona idia hamaoromaoroa, bona dahaka ia vara?

¹⁷ Ma danu, idia hanaia lagani 10 lalodiai, sibona ena ura ia dadaraia hahine, Evonne, ena sivarai oi laloa. May 1991 ai, Watch Tower Society oreana dekenai inai bamona ia torea:

¹⁸ “October lagani 1982 ai, egu ruma bese bona lau be Brooklyn Betele ai vadivadi henia. Unai gabu lau itaia neganai lau ura unuseniai do lau gaukara. Aplikeisini pepana lau duahia, bona henanadai badana ta ia gwau, ‘Idia ore hua 6 lalodiai oiemu haroro hora ena averes be hida? Bema hora ena averes be ten henunai, ena badina oi gwauraia.’ Unai hora lau davaria lasi ena badina ia noho lasi, unai dainai egu lalona lau hadaia bona hua 5 lalodiai unai hora 10 lau davaria.

¹⁹ “Ena be lau pioneer lasi ena badina haida idia noho, to lagani 1983 Yearbook of Jehovah’s Witnesses bukana lau duahia neganai, lau lalo-parara do idia pioneer totona taunimanima haida be hekwakwanai badadia idia hanaia vadaeni, to lauegu hekwakwanai be bada lasi. Unai dainai, April 1, lagani 1983 ai, egu dina ibounai moni bada gaukarana lau rakatania bona heduru pioneer gaukara lau karaia, bona September 1, lagani 1983 ai, regular pioneer gaukara lau karaia.

²⁰ “Lau moale badina April 1985 ai, hesiai tauna namona lau adavaia. Lagani toi murinai, distrik hebouhebou dekenai pioneer herevana ta idia henia bona unai hereva ese egu adavana ena kudouna ia hamarerea bona lau dekenai ia hereva maragimaragi, ia gwau, ‘September 1 ai, pioneer gaukara do lau hamatamaia ia koua gauna ta oi diba, a?’ Vadaeni lagani rua lalodiai lau ia bamoa pioneer gaukara dekenai.

²¹ “Danu, egu adavana be pura rua lalodiai Brooklyn Betele ai construction gaukara ia karaia bona aplikeisini ia atoa International Program do ia karaia totona. Unai dainai, May 1989 ai, Nigeria dekenai ai lao bona hua tamona lalonai ai durudia edia branch haginia gaukarana dekenai. Kerukeru do ai lao Germany dekenai, bona visa do ai abia Poland dekenai do ai vareai totona. Ai moale dikadika Poland ena branch haginia gaukarana do ai durua dainai, bona unai nega ibounai hesiai gaukara idauna ai karaia dainai.”

22. (a) Ena be ita diba lasi, to Petro bamona, hekwakwanai be edena bamona ita havaraia diba? (b) Sibona eda ura dadaraia karana amo Iehova ita hesiai henia totona, gau badana be dahaka?

²² Bema oi be dala lasi pioneer gaukara oi karaia totona, reana nega ibounai hesiai gaukarana idia karaia taudia oi hagoadadia bona oi durudia diba idia karaia noho totona, a? Eiava oi be ruma bese taudia eiava turana haida be Petro bamona be nega ibounai hesiai gaukara ia karaia tauna dekenai oi gwau, oi laga-ani sisina, sibona oi hebogahisi henia. Ena be oi diba lasi to oi be hekwakwanai gauna ia dekenai, ani? Momokani, bema pioneer tauna be ia gorere bada eiava ena Keristen maduna ia huaia lasi, reana nega sisina lalonai nega ibounai hesiai gaukarana do ia rakatania. Sibona eda ura ita dadaraia bona Iehova ita hesiai henia gwauraia neganai ita gwau lasi pioneer, Betele, eiava unai bamona gaukara sibona amo ita karaia. To, iseda kara, iseda lalohadai, taunimanima ita kara henidia dalana, bona iseda mauri lalonai ita badinaia gaudia be gau badadia danu Dirava ita hesiai henia totona.

23. (a) Dirava ida gaukara hebou ena moale abia noho dalana be dahaka? (b) Heberu 6:​10-12 ai, dahaka hagoadaia herevana ia noho?

²³ Bema sibona eda ura ita dadaraia momokani, Dirava ida gaukara hebou moalena do ita abia. (1 Korinto 3:9) Bena ita diba Iehova ena kudouna ita hamoalea. (Hereva Lada-isidia 27:11) Bona ita diba bema ita abidadama noho Iehova dekenai ia ese ita do ia laloaboio lasi bona ita do ia rakatania lasi.​—Heberu 6:​10-12.

[Footnotes]

Oiemu Lalohadai be Dahaka?

◻ Ena be ia diba lasi to dahaka dainai Petro be hekwakwanai gauna Iesu be sibona ena ura dadaraia karana dekenai?

◻ Sibona ena ura laloa lasi ena anina be dahaka?

◻ Keristen tauna be edena bamona ena satauro ia huaia?

◻ Sibona eda ura dadaraia karana habadaia bona badinaia noho dalana be dahaka?

◻ Dahaka ese ita ia hasiahua sibona eda ura ita dadaraia totona?

6. (a) Sibona ena ura do ia laloa lasi dalana be dahaka? (b) Ita sibona lasi to daika ita hamoalea guna be namo?

10. (a) Filipi 2:​5-8 hegeregerena, Keriso be sibona ena ura ia laloa lasi dalana be dahaka? (b) Bema ita be Keriso murinai ita raka, gau badana be dahaka lalohadai ita hahedinaraia?

11. Iseda mauri lalonai sibona eda ura ita dadaraia neganai, daika ena ura ita badinaia?

15. Sibona eda ura dadaraia totona sibona dekenai dahaka henanadai badadia ita gwauraia be namo?

[Picture on page 10]

Oi ura sibona emu ura oi laloa guna lasi, oi ura emu satauro oi abia isi, bona Iesu murinai oi raka noho, a?