Dahaka Dainai Sibona Eda Ura Ita Dadaraia be Namo?
Bill be mai ena ruma bese, ena mauri lagani be 50 ia hanaia, bona ia be konstraksen gaukara ia hadibaia tauna. Lagani ta lalonai, pura momo ia gaukaralaia Iehova ena Witnes taudia edia kongregesen ia durudia edia Kingdom Hall idia palanilaia bona idia haginia totona, bona davana ta ia noia lasi. Emma ena mauri lagani be 22 bona ia be edukeisen namona bona diba bada ia abia vadaeni kekenina ta. To, sibona ena ura bona sibona hamoalea gaudia ia tahua lasi, to hua ta ta ai haroro gaukara dekenai hora 70 ia gaukaralaia, taunimanima ia durua Baibel idia lalo-pararalaia namonamo totona. Maurice bona Betty be moni gaukara amo idia ritaea vadaeni. Edia gaukara idia hamaragia matamaia lasi, to tano ma ta dekenai idia lao, taunimanima idia durua Dirava ena palani tanobada dekenai do idia diba totona.
UNAI taudia idia laloa lasi idia be taunimanima idaudia eiava edia diba be bada. Idia be taunimanima oredia hegeregerena to idia laloa kara maorona idia karaia be namo. Dahaka dainai edia nega, goada, bona kohu idia gaukaralaia ma haida durua totona? Idia ia hagoadaia gauna be Dirava bona edia dekena tauna lalokau henia bada karana. Unai lalokau ese idia dekenai sibodia edia ura dadaraia urana ia havaraia.
Sibona eda ura dadaraia laumana ita kikilaia neganai ena anina be dahaka? Sibona eda ura dadaraia ena anina lasi be moale gaudia ibounai ita dadaraia. Namo lasi iseda ura gaudia iboudiai ita dadaraia vaitani bona hanaihanai moale eiava lalona ia hegeregere mamina ita mamia diba lasi. The Shorter Oxford English Dictionary ia gwau ena anina be “ta ese sibona ena ura gaudia, moale, bona tahua gaudia ia dadaraia, maduna ta dainai eiava ma haida edia namo dainai.”
Iesu Keriso—Haheitalai Hereadaena
Dirava sibona ese ia havaraia Natuna tamona, Iesu Keriso, be sibona ena ura dadaraia karana ia haheitalaia tauna hereadaena. Taunimanima ai ia do lao lasi neganai, iena mauri dalana ia ura henia bada bona ia moalelaia bada herea. Iena Tamana bona lauma taudia ia bamoa hanaihanai diba. Danu, Dirava ena Natuna be “gaukara karaia tauna” badana bona ena diba ia gaukaralaia gaukara namodia idauidau ia karaia totona. (Aonega Herevadia 8:30, 31) Iesu ena noho dalana ese tanobada ena taga tauna hereadaena ena noho dalana ena namo ia hereaia momokani. Guba dekenai Iehova Dirava ia badinaia, bona dagi badana bona hahenamo momo ia abia.
To, Dirava ena Natuna ese “iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia.” (Filipi 2:7) Mai ena ura ida iena gau namodia ia rakatania, taunimanima ta ai ia lao, bona iena mauri ia bouboulaia, Satani ese ia havaraia dika hanamoa totona. (Genese 3:1-7; Mareko 10:45) Unai ena anina be Satani Diabolo ese ia gunalaia tanobadana dekenai kara dika taudia huanai do ia noho. (1 Ioane 5:19) Danu, ena anina be hisihisi bona hekwarahi gaudia momo do ia haheaukalaia. Herevana ena davana be dahaka, to Iesu Keriso ese ena lalona ia hadaia iena Tamana ena ura do ia karaia. (Mataio 26:39; Ioane 5:30; 6:38) Unai ese Iesu ena lalokau bona badinaia karana ia tohoa vaitani. Dahaka do ia bouboulaia mai ena ura ida? Aposetolo Paulo ia gwau: “Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.”—Filipi 2:8.
“Ena Laloa Bamona Umui Danu Do Umui Laloa”
Ita idia hagoadaia Iesu ena haheitalai ita badinaia. Paulo ia gwau: “Keriso Iesu ena laloa bamona umui danu do umui laloa be namo.” (Filipi 2:5) Edena dala ai unai ita karaia diba? Dala ta be “emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.” (Filipi 2:4) Lalokau korikorina be “sibona ena gau ia tahua lasi.”—1 Korinto 13:5.
Hebogahisi taudia be nega momo sibona edia goada idia henia ma haida hesiai henia totona. To hari inai negai, taunimanima momo be sibona idia laloa bada. Tanobada taudia be sibodia edia ura atoa guna lalohadaina idia abia. Namona be tanobada ena lauma amo ita gimaia, badina bema ia hegeregerena ita laloa matamaia, do ita laloa iseda ura gaudia sibona be mai anina bada. Bena ita karaia gaudia ibounai—iseda nega, iseda goada, bona iseda kohu gaukaralaia dalana—do ia gunalaia gauna be sibona eda ura gaudia. Unai dainai namona be unai ita tuari henia goadagoada.
Nega haida ta ese sisiba ia henia ita dekenai dainai, sibona eda ura dadaraia karana ia hamanokaia diba. Aposetolo Petero ia itaia Iesu ena ura dadaraia karana ese do ia hakaua lao ena mase dekenai dainai, ia gwau: “Lohiabada e, unai bamona lasi.” (Mataio 16:22) Iesu ese ena Tamana ena lohia siahuna ia laloa bona taunimanima hamauria totona, ia be mai ena ura ida do ia mase, to toana be Petero ia ura lasi unai ia abia dae. Unai dainai Iesu ena lalona ia ania toho, unai dala do ia badinaia lasi totona.
‘Iseda Namo Ita Laloa Lasi’
Iesu ese dahaka ia karaia? Unai sivarai ia gwau: “To Iesu ia giroa, iena diba tahua taudia ia itaia, bona ia ese Petero dekenai ia gwau henia, ia gwau, ‘Satani e, oi lao, Dirava bamona oi laloa lasi, taunimanima bamona sibona oi laloa!’ ” Bena Iesu ese hutuma ia boiria ia bona ena hahediba taudia dekenai, bona ia gwau: “Bema tau ta ia ura lauegu murinai ia raka, ia sibona kopina ena namo do ia laloa lasi, to iena satauro do ia abia isi, bona lauegu murinai do ia mai.”—Mareko 8:33, 34.
Petero ese unai sisiba ia henia Iesu dekenai bena lagani 30 murinai, ia hahedinaraia unai nega ai sibona ena ura dadaraia karana ena anina ia lalo-pararalaia. Tadikaka ia hagoadadia lasi namona be idia gaukara goadagoada lasi bona sibona idia laloa momo. To, Petero ese idia ia hamaoroa namona be idia gini hegaegae idia gaukara totona, bona guna tanobada ena tauanina gaudia idia ura to hari unai idia rakatania vaitani be namo. Herevana hahetoho idia davaria, to Dirava ena ura be gau ginigunana edia mauri lalonai be gau badana.—1 Petero 1:6, 13, 14; 4:1, 2.
Iehova dekenai iseda goada ibounai ita henia, Iesu Keriso ita badinaia mai abidadama ida bona Dirava ese iseda kara ibounai ia biagua neganai, davana namona do ita abia. Unai dekenai, Paulo ese haheitalai namona ia henia. Iena karaharaga lalohadai bona Iehova tanikiu henia karana ese ia idia hagoadaia tanobada taudia idia tahua gaudia ia dadaraia totona. Ia diba unai bamona gaudia ia karaia neganai reana Dirava ena ura karaia karana do ia rakatania. Ia gwau, “lau be mai moale danu egu kohu do lau haorea, egu tauanina danu do lau haorea” taunimanima ma haida edia namo ia tahua totona. (2 Korinto 12:15) Paulo ese ena diba ia gaukaralaia Dirava ena ura gaudia habadaia totona, sibona ena namo ia habadaia totona lasi.—Kara 20:24; Filipi 3:8.
Edena dala ai ita sibona ita tahua bema aposetolo Paulo bamona ita laloa? Reana sibona ita nanadaia: Egu nega, goada, diba, bona kohu be edena bamona lau gaukaralaia? Unai bona lau abia harihari gaudia ma haida lau gaukaralaia egu noho lau hanamoa totona, eiava lau gaukaralaia ma haida lau durua totona? Basileia ena sivarai namona harorolaia gaukara, taunimanima ia hamauria diba gaukarana, lau habadaia diba, eiava reana ful-taim lau karaia diba, a? Kingdom Hall haginia eiava hanamoa gaukarana dekenai lau henia heduru lau habadaia diba, a? Ogogami taudia durua dalana ia noho neganai, lau gaukaralaia, a? Iehova dekenai egu gau namodia lau henia, a?—Aonega Herevadia 3:9.
“Henia Kara Ena Moale be Bada”
To, sibona emu ura dadaraia karana be aonega karana momokanina, a? Oibe! Paulo ese ia davaria vadaeni gaudia amo ia diba unai bamona kara ese hahenamo bada ia mailaia. Ia dekenai moale bona ena lalona ia hegeregere hemami ia havaraia. Mileto dekenai, Efeso amo idia mai tau badadia ia hedavari henia neganai, unai ia herevalaia. Paulo ia gwau: “Inai egu kara dekena amo, umui dekenai lau hadibaia vadaeni, dala namona be, do umui gaukara goada [sibona emui ura dadaraia dalanai], manoka taudia do umui durua. Bona Lohiabada Iesu ena hereva do umui laloatao, ia gwau, ‘Henia kara ena moale be bada, abia kara ena moale be maragi.’ ” (Kara 20:35) Taunimanima milioni momo idia davaria vadaeni unai bamona kara idia hahedinaraia neganai, unai ese moale bada herea ia mailaia hari. Nega vairai moale do ia mailaia danu, badina Iehova ese iena namo bona ma haida edia namo idia tahua guna taudia dekenai davana namona do ia henia.—1 Timoteo 4:8-10.
Bill idia nanadaia dahaka dainai ia hekwarahi bada ma haida ia durua, Kingdom Hall idia haginia totona. Ia gwau: “Nega momo kongregesen maragidia be unai dala ai lau durudia ese lau ia hamoalea bada. Lau moale egu diba lau gaukaralaia ma haida edia namo habadaia totona.” Dahaka dainai Emma ia ura ena goada bona diba do ia gaukaralaia ma haida ia durua Baibel ena hereva momokani idia dibaia totona? “Gaukara ma ta lau laloa lasi. Lau do matamata bona egu goada ia do hegeregere neganai, lau ura Iehova hamoalea bona ma haida durua gaukarana lau karaia mai egu goada ibounai ida. Bema unai kara dainai kohu haida do lau abia lasi, lau dekenai unai be gau maragina sibona. Iehova ese lau totona ia karaia gaudia dainai unai lau karaia be maoro.”
Maurice bona Betty ese lagani momo lalodiai idia gaukara goadagoada edia famili ubua bona naria totona murinai, idia laga-ani momo lasi to unai idia lalohisihisilaia lasi. Moni gaukara amo idia ritaea vadaeni, to idia ura edia mauri lalonai mai anina bada gaukarana do idia karaia noho. Idia gwau: “Hari ai ura lasi ai helai bona ai laga-ani sibona. Tano idauna ai ma haida ai durua Iehova idia diba totona ese dala ia kehoa, mai anina bada gaukarana ai karaia noho diba.”
Emu lalona oi hadaia vadaeni sibona emu ura do oi dadaraia, a? Unai be auka. Hanaihanai iseda goevadae lasi tauanina ena ura bona iseda Dirava hamoalea urana idia tuari heheni. (Roma 7:21-23) To unai tuari lalonai ita kwalimu diba bema iseda mauri lalonai Iehova ena hakaua ita badinaia. (Galatia 5:16, 17) Ia ese ena hesiai gaukara lalonai sibona eda ura dadaraia karana ia laloatao bona ita do ia hanamoa bada. Momokani, Iehova Dirava ese ‘guba ena uindo do ia kehoa, bona gau namodia momo herea ita dekenai do ia bubua diho.’—Malaki 3:10; Heberu 6:10.
[Picture on page 23]
Iesu ese sibona ena ura dadaraia laumana ia hahedinaraia. Oi danu, a?
[Pictures on page 24]
Paulo ese Basileia harorolaia gaukarana dekenai ena goada ia gaukaralaia