Iesu Murinai Do Ita Raka Noho
1 Nega ta Iesu ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, to iena satauro do ia huaia, lauegu murina dekenai do ia raka.” (Mat. 16:24) Iesu ena hereva hegeregerena ita ura karaia. Namona be ena boiboi herevana ena kahana ta ta edia anina ita tahua.
2 “Sibona Ena Ura Do Ia Laloa Lasi”: Iehova dekenai iseda mauri ita gwauhamatalaia karana ena anina be sibona eda ura do ita laloa lasi. Greek gado ai “sibona ena ura laloa lasi” be hegeregere “oi gwau lasi.” Unai ena anina be mai iseda ura ida ita tahua gaudia, ita ura gaudia, iseda noho namo, bona sibona hamoalea gaudia ita dadaraidia—iseda lalona ita hadaia Iehova do ita hamoalea ela bona hanaihanai.—Roma 14:8; 15:3.
3 “Iena Satauro Do Ia Huaia”: Keristani tauna ena mauri ibounai lalonai iena satauro ia huaia ena anina be sibona ena ura ia dadaraia Iehova ia hesiai henia totona. Sibona ena ura dadaraia karana ita hahedinaraia dalana ta be haroro gaukara be mai goada ida ita karaia neganai. Inai lagani lalonai, pablisa momo be heduru painia gaukarana idia moalelaia. Sedira oi be idia ta bona oi itaia oi abia hahenamo be oiemu hekwarahi ia hanaia momokani. Heduru painia gaukara idia karaia diba lasi pablisa be dala idia karaia nega sisina bada haroro gaukara idia karaia totona. Unai karaia totona kongregesen haida ese haroro gaukara hebou ena nega idia haidaua bona idia abia haraga. Danu, haida be ‘ruma ma ta idia karaia neganai’ eiava ‘miniti ma haida’ lalonai idia gaukara neganai, anina namona idia abia.
4 Sibona eda ura dadaraia karana ita hahedinaraia dalana ma ta be ita ura hagugurua gaudia ita abia hidi. Palani idia karaia namonamo bona edia sediual idia haidaua dainai, haida be regula painia gaukarana idia karaia diba. Haida be edia noho dalana idia haidaua bena Betele eiava misinari gaukarana idia karaia. Haida be Basileia harorolaia taudia momo lasi gabudia dekenai idia lao heduru henia totona.
5 “Lauegu Murina Dekenai Do Ia Raka”: Ena be Iesu ena aposetolo taudia ese hekwakwanai momo idia davaria, to idia be Iesu ena lalo-goada bona haheauka karana hesiai gaukarana lalonai ese ia hagoadadia. (Ioa. 4:34) Ia noho dainai goada idia abia. Unai dainai ia idia badinaia taudia idia moale momokani. (Mat. 11:29) Unai hegeregerena ita ta ta ita hagoadaia heheni bena mai anina bada Basileia harorolaia bona hahediba taudia halaoa gaukarana ita karaia.
6 Namona be ita ibounai ese Iesu ena boiboi ita badinaia bona ia murinai ita raka noho totona sibona eda ura ita dadaraia. Unai bamona ita karaia neganai, ita ese moale bada hari do ita abia bona hahenamo bada do ita abia nega vaira dekenai.