Henao Taudia Lasi Tanobadana Ta
IA VARA haraga. Dabua ia atoa namonamo tauna ta be Antônio ena São Paulo, Brazil, rumana vairanai, Antônio ena kwarana dekenai ipidi ia atoa, motuka ena ki bona motuka gwaumaoro pepadia ia abidia bena motuka ia taria oho haraga.
Rio de Janeiro dekenai, iena lagani 10 natuna kekeni vairanai, mai edia ipidi momo tatau hani ese Paulo idia dogoatao. Bena, iena ruma dekenai idia taria lao murinai, henao taudia be iena ruma idia vareai bona idia ura gaudia idia henaodia, Paulo ena motuka rua be kohu amo idia hahonudia. Paulo ena adavana idia hagaria, idia gwau do idia hamasea, bena ia bona gaukara tauna ta idia dogodia tao, idia abidia lao taoni dekenai, Paulo ena jewelry sitoa dekenai, bona mai davana gaudia iboudiai idia henaodia. To, hoa gauna be inai, gabeai, henao taudia idia rini bona idia hamaorodia edeseniai motuka idia rakatanidia.
Ita hekwarahi ita abia totona monina bona kohuna idia henaodia neganai iseda lalona ia hisihisi! Ena be Antonio bona Paulo idia karaia lasi, to haida be sibodia edia ura hegeregerena henao taudia idia kara henidia. Henao tauna idia alaia eiava idia haberoa, eiava sedira idia sibodia idia mase. Hegeregere inai bamona, mero ta be Brazil hahine ta ena dina gauna ia dadihaia neganai, unai hahine ia badu bona iena puse amo ipidi ia abia bona henao tauna ia pidia mase. Dahaka ia vara? O Estado de S. Paulo niuspepa ia gwau: “Idia itaia taudia be unai hahine, ena ladana ita diba lasi, idia gwauraia namo, bona ta lasi ia ura polisi ia durua unai hahine idia davaria totona.” Ena be henao taudia lasi tanobadana ta idia ura henia momokani, to Keristen taudia be unai hahine ia karaia bamona idia karaia lasi. Dika haloua karana be Dirava dekenai sibona dainai, idia be Hereva Lada-isidia 24:19, 20 ena hereva idia badinaia, ia gwau: “Kara dika taudia dainai umui lalo-hekwarahi lasi. Kara dika taudia umui mama henidia lasi. Badina kara dika taudia edia vaira dinadia be do idia abia lasi.”
To bema henao tauna ta ese oi ia koua, dahaka oi karaia diba? Rio de Janeiro dekenai ia vara gauna ta ia hahedinaraia oi badu lasi karana be anina bada gauna. Keristen hahinena ta, Heloísa, be basi amo ia lao iena Baibel stadi ia karaia totona. Tatau rua be basi idia guia taudia edia kohu idia henaoa matamaia. Heloísa ia diho gabuna ai idia ginidae neganai, ia hamaorodia ia be Iehova ena Witness ta bona ia lao Baibel stadi ia karaia totona. Iena Baibel bona Baibel bukana ia hahedinaraia. Iena kohu idia henaoa lasi, bona henao taudia idia gwau ia diho ia namo. To, ma basi guia tauna ta ese basi ia rakatania diba lasi. Gabeai, basi taria tauna ia gwau unai bamona gauna be guna ia itaia lasi.
Mai ipidi tatau rua ese idia hamaoroa iena motuka dekenai do ia guia neganai, Regina danu ia badu lasi. Sibona ena Noga! magasin ia hahedinaraia, bona ia haroro henidia. Henao taudia idia gari dainai, ia hamaorodia motuka ena glove box idia kehoa, badina unuseniai be swit aniani haida. To Kingdom Melodies kaset idia itaia neganai, unai miusik idia kamonai henia. Idia herevahereva dalana be ia dika momokani lasi dainai, henao taudia be dala badana dekenai Regina idia rakatania, idia hagoadaia, idia hamaoroa hebogahisi taudia ese do idia durua. Miniti 10 ia raka lao murinai, ruma ta ia davaria, to ruma tauna ese iena sivarai ia abia dae lasi, ia gwau: “Oi dekena amo gau ta idia henaoa toana be lasi; oiemu toana be badu bona gari lasi.”
Ena be henao taudia ese ta amo gau ta idia henaoa neganai ena tauanina idia hadikaia lasi, to unai hagaria karana be ena lalona dekenai dika bada ia havaraia diba. O Estado de S. Paulo niuspepa ia gwau: ‘Gau ta be ia dekena amo idia henaoa neganai unai tauna be do ia gari, ena ruma bese taudia eiava idia durudia toho taudia ia badu henidia, ma haida ia tabekau henidia diba lasi, bona kara idauidau ia ura ia hamaoromaorodia hanaihanai, ia laloa taunimanima ese idia kara maoro henia diba lasi.’ To Iehova Dirava ia tabekau henia tauna amo bema gau ta idia henaoa neganai, nega momo tauanina dalana ai dika ia davaria lasi bona ia lalo-goada noho. To, bema taravatu utua karana eiava hagaria gauna ta ia vara lasi, do oi laloa unai be hahenamo ta, ani?
“Henaoa Tauna be Do Ia Henaoa Lou Lasi”
Ena be taunimanima momo be edia mata-ganigani mauri dalana idia moalelaia, to Dirava ena Hereva ese henao taudia ia durudia edia ura bona edia kara idia haidaua totona. (Efeso 4:23) Baibel amo idia davaria mauri be mai anina namona dainai, idia be inai hereva idia badinaia: “Kohu maragina mai kara maoromaorona ida be ia namo; to kohu bada hereadia kara gagevagageva dekenai be ia dika.” (Hereva Lada-isidia 16:8) Cláudio ia gwau: “Egu ruma bese taudia kahirakahira iboudiai be Witness taudia, to edia hereva Iehova bona iena ura dekenai lau kamonai henia lasi. Nega ta lau be kilomita 2,000 dekenai gabu ta amo lau giroa mai lau henaoa taraka ta lalonai, bona polisi edia check-point momo lau hanaidia. Lau heau neganai lau diba egu mauri dalana lau haidaua be namo. Guna lau karaia toho to lau karaia diba lasi. Egu Iehova ena Witness varavara taudia lau lalodia bona lau diba idia idau badina idia be mai edia moale bona mai edia maino.” Unai dainai, Cláudio be Dirava ena Hereva ia stadilaia, drag ania kava karana ia rakatania bona iena turadia gunadia ia rakatanidia, bena Keristen hesiai tauna ai ia lao.
Ma haida danu be hari inai hereva idia badinaia: “Dadidadi karana umui abidadama henia lasi, bona henao karana umui heagilaia lasi.” (Salamo 62:10) Nega ta henao karana dekenai José be ta ia alaia toho dainai dibura dekenai idia atoa, ia be drag ania kava tauna bona drag ia hoihoilaia tauna ta; gabeai iena nakimi dekenai Baibel stadi amo heduru ia abia. Drag ania kava karana ia rakatania bona hari ia be gaukara goadagoada Witness tauna.
To, mauri toana matamatana be ia vara haraga lasi, eiava hoa karana ta bamona ia vara lasi. Guna drag ania kava karana bona henao karana ia karaia momo tauna Oscar ia gwau: “Iehova lau guriguri henia goadagoada dainai nega momo egu mata-ranudia be foloa dekenai ia bubua bada.” Oibe, Dirava ena Hereva stadilaia goadagoada karana sibona lasi, to namona be kudou amo ta ia guriguri loulou. Inai guriguri dekenai aonega herevana oi laloa: “Ogogami eiava taga bada lau oi henia lasi. Lau oi henia anianina mo do lau ania. Idau lau bogakunu bona oi lau dadaraia, do lau gwau: ‘Iehova be daika?’ bona murinai do lau ogogami bona lau henaohenao bona egu Dirava ena ladana lau tuari henia.”—Hereva Lada-isidia 30:8, 9.
Sibona ena ura ia tahua guna lasi to lalokau momokanina ia hahedinaraia be namo: “Henaoa tauna be do ia henaoa lou lasi. To gaukara namona iena imana dekena amo do ia karaia, vadaeni ia ese ogogami taudia do ia durua diba.” (Efeso 4:28) Keristen ginigunadia haida be guna ‘henao taudia eiava mata-ganigani taudia,’ to Iehova be Iesu Keriso ena mauri davana dainai helalo-kerehai taudia be hebogahisi amo edia dika ia gwaudia tao. (1 Korinto 6:9-11) Herevana guna dahaka ita karaia, to iseda mauri dalana ita haidaua bona Dirava ita hamoalea diba, bona unai ese ita ia hagoadaia bada!—Ioane 3:16.
Dirava Ena Tanobada Matamatana Dekenai Noho Namo Ita Davaria Diba
Henao taudia lasi tanobadana ta oi laloa. Unuseniai oi ura taunimanima ese taravatu idia kamonai henia dainai, moni bada do oi negea lasi hahemaoro taudia, loia taudia, polisi taudia bona dibura rumadia abia totona! Unai be kohu bada tanobadana, bona taunimanima ta ta iboudiai be ma haida bona edia kohu do idia matauraidia! Unai hereva oi abia dae be auka, a? Momokani Dirava ese taunimanima edia kara do ia koua bona taravatu utua karadia do ia haoredia, a? Namona be Baibel be Dirava ena Hereva bona ena peroveta herevadia oi abia dae diba ena hamomokania herevadia oi itaia. Gabeai gaudia do idia idau ena badina namona do oi davaria. Taunimanima ta lasi ese Dirava ena gwauhamata ia koua diba, unai gwauhamata be kara maoromaoro idia ura henia taudia iboudiai be laga-ani do idia davaria, ia gwau: “Kara dika taudia dainai emu badu oi hahedinaraia lasi. Kara maoromaoro idia karaia lasi taudia edia kara oi ura henia lasi. Badina rei bamona do idia kakoro haraga, bona rei matamata bamona do idia marai.” (Salamo 37:1, 2) Idaunegai unai hereva idia torea bona nega sisina murinai do idia guguru momokani.
Dirava ena Basileia ese helaro lasi bona daradara karadia idia havaraia lalohisihisidia bona kara havara do ia haoredia. Unai neganai ta do ia dabu lasi, do ia ura lasi henao karana ia karaia. Peroveta hereva dekenai ita idia hagoadaia, ia gwau: “Aniani reidia be tano dekenai do idia vara momo; ororo edia dorina dekenai aniani momo do idia vara. Iena huahua anina be [idaunegai] Lebanon bamona, bona hanua lalodiai idia noho taudia do idia hutuma tano reirei bamona.” (Salamo 72:16) Gabeai do ia vara lou Paradaisona dekenai, gau ta lasi ese Dirava momokanina idia diba bona idia tomadiho henidia taudia edia maino do ia hadikaia diba.—Isaia 32:18.
Unai be davana namo hereana hari mata-ganigani tanobadana daladia ita dadaraia dainai! Hereva Lada-isidia 11:19 ia gwau: “Kara maoromaoro ai ia gini auka tauna be do ia mauri, to kara dika ia gavaia tauna be do ia mase.” Oibe, kara dika taudia idia utudia oho murinai, ita ta lasi be iseda mauri dainai eiava iseda kohu dainai ita gari. Salamo 37:11 be inai gwauhamata ita ia henia, ia gwau: “To manau taudia ese tanobada do idia abia, bona maino bada dainai do idia moale dikadika.”
[Box on page 5]
Henao Karana Ia Vara Dainai Ita Hegaegae
RUMA DEKENAI—Herevana ruma dekenai oi noho eiava lasi to henao taudia idia vareai diba, unai dainai iduara iboudiai oi koudia bona oi lokaia. Diba taudia idia gwau namona be sekuriti alarm eiava gadi sisia ta oi abia. Bema oi lao livi neganai, namona be oi abidadama henia diba dekena tauna oi hamaoroa guna. Oi badu lasi—henao taudia idia karaharaga, bona idia kara kava, bona idia gari neganai edia lalohadai idia haidaua haraga diba. Bema oi be Iehova ena Witness ta, namona be emu tomadiho oi gwauraia bona oi haroro henidia toho. Sedira unai amo oi do idia tura henia eiava idia hebogahisi diba. Bema oiemu tauanina idia hadikaia toho lasi, oi koudia lasi.
RUMA MURIMURINA AI—Oi gima noho ta be oiemu murina kahanai ia raka eiava lasi. Raka dalana ena bogaragina kahanai oi raka lao. Dala diburadia dekenai bona taunimanima lasi daladia ai oi raka lao lasi. Emu puse eiava davana bada gaudia oi hunidia. Oi raka haraga hegeregere oi be gabu ta ai oi lao momokani bamona. Davana bada dabuadia eiava matana ia veria ageva oi hahedokilaia lasi. Bema oi laloa henao taudia be momo bamoa ta ida oi lao sitoa dekenai. Do oi gaukaralaia monina sibona oi abia lao, poketi idauidau eiava gabu idauidau dekenai oi hunia.
MOTUKA LALONAI—Bema oiemu gabu dekenai, taunimanima be motuka lalonai idia helai neganai henao taudia ese motuka idia henaoa karana be bada, motuka atoa gabuna dekenai oiemu motuka lalonai oi helai lasi. Gaukara oi lao bona oi mai dalana oi haidaua. Ena be unai dala ai oi lao negana ia lata to henao taudia momo lasi gabuna ai oi lao. Motuka ena atoa gabuna dekenai oi do atoa lasi neganai, oi itaia namonamo guna, henao taudia idia noho eiava lasi. Namo lasi taunimanima lasi gabuna dekenai motuka ena kohu atoa gabuna oi kehoa. Motuka dekenai davana bada gaudia oi hahedinaraia lasi. Idia henao kava taudia be loka, seini, eiava henao taudia koua gauna ma ta idia itaia neganai, sedira do idia rakatania.
[Box on page 6]
“Inai tanobada dekenai kohu do umui haboua lasi, iniseniai manumanu ese dabua idia ania ore, bona raraka ese auri ia hadikaia, iniseniai danu henaoa taudia ese ruma idia makohia bona gau idia henaoa. To umui emui kohu be guba dekenai do umui haboua, unuseniai manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi.”—Mataio 6:19, 20