Tadikaka Tura Henia Kara Ita Davaria Dalana
“Dirava badinaia kara sibona lasi, to emui tadikaka [tura] henia kara danu do umui karaia.”—2 PETERO 1:5-7.
1. Iehova ena taunimanima idia hebou neganai, idia moale ena badina badana ta be dahaka?
GUNA, Iehova ena Witness lasi doketa ta, be ena natuna kekeni ena kosi haorea hebouna dekenai ia lao; ena natuna be misinari gaukara idia hadibaia totona Gilead ena Watch Tower Bible School kosi ia karaia. Ia hoa idia moale taudia momo ia itadia neganai, bona ia gwau reana unai taunimanima huanai gorere taudia be momo lasi. Unai hutuma idia moale ena badina be dahaka? Oibe, Iehova ena taunimanima be kongregesen ai, sekit hebouhebou ai, bona distrik hebouhebou ai idia moale ena badina be dahaka? Tadikaka bamona idia hetura heheni dainai, ani? Momokani, taunimanima idia gwau tomadiho orea iboudiai amo Iehova ena Witness orea taudia be edia tomadiho karana amo moale bada idia davaria, bona ena badina tamona be tadikaka bamona idia hetura heheni dainai.
2, 3. Edena Greek hereva rua ese iseda hetura heheni karana ena mamina idia hahedinaraia, bona edena bamona edia anina idia idau?
2 Aposetolo Petero ena hereva 1 Petero 1:22 dekenai dainai, tadikaka bamona idia hetura heheni karana idia hahedinaraia be namo, ia gwau: “Umui ese hereva momokani umui badinaia dainai umui ese sibona emui laumadia umui hagoevaia vadaeni, bona emui ekalesia varavara umui [tura] henidia noho. Umui ta ta do umui lalokau henia mai emui lalona ibounai.” Unai hereva ‘ekalesia varavara tura henia’ hereva be Greek gado ai ena anina ena badina ta be phi·liʹa (tura henia). Ena anina be a·gaʹpe bamona, nega momo unai hereva idia hahanaia “lalokau.” (1 Ioane 4:8) Ena be inai hereva ruaosi, tadikaka tura henia bona lalokau idia gaukaralaidia, to edia anina be idia idau sisina. Namo lasi ita laloa idia idau lasi, bona Baibel idia hahanaia taudia momo bamona idia ita gaukaralaidia kerere. Inai sivarai bona murinai sivarai dekenai, unai hereva ta ta edia anina do ai gwauraia hedinarai.
3 Unai Greek hereva ruaosi edia anina idia idau ia gwauraia neganai, aonega tauna ta ia gwau phi·liʹa ena anina be “ura henia bona tura henia bona hebogahisi henia karadia ia hahedinaraia herevana.” To, a·gaʹpe be lalohadai maoromaoro dainai ia vara lalokauna. Hahegani ita abia iseda inai taudia do ita lalokau (a·gaʹpe) henidia totona, to ita tura henidia lasi. Dahaka dainai? Badina “kara dika taudia danu umui turana karaia neganai idia ese emui kara namona do idia hadikaia.” (1 Korinto 15:33) Aposetolo Petero ena hereva ese idia hahedinaraia unai hereva rua edia anina idia idau, ia gwau: “Tadikaka [tura] henia . . . sibona lasi, to taunimanima do umui lalokau henia danu.”—2 Petero 1:5-7; Ioane 21:15-17 itaia danu.a
Tadikaka Lalokau Henia Kara Edia Sivarai
4 Dirava ena Hereva lalonai lalokau idia hahedinaraia taudia edia sivarai namona haida idia noho. Unai lalokau karana ia vara kava lasi, to ta ena kara namodia ita moalelaia dainai ita lalokau henia. Taunimanima momo idia diba sivarai namona ta be Iesu Keriso ena turana karana aposetolo Ioane dekenai. Ita diba momokani, Iesu ese ena kamonai hahediba taudia iboudiai be tadikaka bamona ia tura henidia, bona unai ia karaia be mai ena badina namona. (Luka 22:28) Ia tura henidia dalana ta be edia aedia ia huridia, unai amo lalo-manau karana ia hadibadia. (Ioane 13:3-16) To Iesu ese Ioane ia lalokau henia bada, bona Ioane ese unai ia herevalaia momo. (Ioane 13:23; 19:26; 20:2) Mai ena badina dainai Iesu ese ena hahediba taudia bona ena aposetolo taudia dekenai hetura karana ia hahedinaraia, to Ioane ese Iesu ia laloa bada dainai, reana Iesu ese ia lalokau henia bada. Ioane ia torea Evanelia bukana bona lauma siahuna amo ia torea revarevadia amo unai ia hedinarai goevagoeva. Iena revareva lalodiai nega momo ia ese lalokau ia gwauraia! Ioane karoa 1 bona karoa 13 ia lao 17 lalodiai ia torea herevadia, bona danu, Iesu be tanobada dekenai ia do diho mai lasi negana ia gwauraia momo dainai, ita diba Ioane ese Iesu ena kara lauma dalanai ia laloa bada.—Ioane 1:1-3; 3:13; 6:38, 42, 58; 17:5; 18:37.
5. Paulo bona Timoteo idia hetura heheni bada karana dekenai dahaka oi hereva diba?
5 Unai hegeregerena, namona be aposetolo Paulo bona ia bamoa Keristen tauna Timoteo be tadikaka bamona idia hetura heheni bada karana ita laloaboio lasi, unai idia karaia ena badina be edia kara dainai idia moale heheni. Paulo ena toretore lalodiai Timoteo ena kara ia gwauraia namo, hegeregere ia gwau: “Lau dekenai ta ia noho lasi Timoteo hegeregerena, iena laloa bona lauegu laloa be tamona. Bona ia ura bada umui do ia durua. . . . Timoteo ena kara namona umui diba. Mero ese ena tamana ia durua bamona, ia ese lau ia durua vadaeni, Sivarai Namona dainai ai gaukara hebou.” (Filipi 2:20-22) Ena revareva lalodiai Timoteo ia gwauraia momo, bona unai ese ia hahedinaraia Paulo be Timoteo ia ura henia bada. Hegeregere, 1 Timoteo 6:20 ena hereva oi laloa, ia gwau: “Timoteo e, Dirava ese oi dekenai ia henia dagi do oi naria namonamo.” (Bona 1 Timoteo 4:12-16; 5:23; 2 Timoteo 1:5; 3:14, 15 itaia danu.) Paulo ena revareva Timoteo dekenai bona ena revareva Tito dekenai ita hahegeregeredia neganai, ia hedinarai Paulo ese Timoteo ia tura henia bada. Ita diba reana Timoteo danu be edia hetura heheni karana ia laloa bada, badina Paulo be 2 Timoteo 1:3, 4 ai ia gwau: “Dirava lau guriguri henia noho negadia ibounai . . . oi lau laloa noho. Oiemu tai lau laloa, bona lau ura bada oi do lau itaia, do lau moale bada totona.”
6, 7. David bona Ionatan idia kara heheni karana amo edia mamina be edena bamona, bona badina be dahaka?
6 Heberu Revarevadia lalodiai idia hetura heheni taudia edia sivarai namodia idia noho danu, hegeregere David bona Ionatan. Ita duahia sivaraina ia gwau David ese Goliata ia hamasea murinai, “Ionatan bona David be lalo-tamona ai idia hetura heheni; Ionatan ese David ia lalokau henia, ia sibona ia lalokau henia hegeregerena.” (1 Samuel 18:1) David be gari lasi dekenai Dirava ena ladana ia hanamoa totona ia lao tau lata herea Goliata ia tuari henia totona, bona unai ia karaia dainai reana Ionatan ese David ia tura henia bada.
7 Ionatan ese David ia tura henia bada dainai, ia durua Pavapava Saulo ese David ia hamasea garina, bona unai ia karaia totona sibona ena mauri ia haboioa diba. Israel ena pavapava ai do ia lao totona Iehova ese David ia abia hidi neganai, Ionatan ia mama lasi. (1 Samuel 23:17) David ese Ionatan ia tura henia bada danu, unai ia hedinarai Ionatan ena mase ia taitailaia neganai, ia gwau: “Lauegu tadikaka Ionatan e, lauegu lalona ia hisihisi bada oi dainai; oi ese lau oi lalo-namo henia. Oiemu lalokau lau dekenai ese hahine edia lalokau ia hereaia.” Momokani, edia kara namo dainai idia moale heheni.—2 Samuel 1:26.
8. Edena hahine rua edia hetura heheni karana be ia goada, bona dahaka dainai?
8 Danu, Heberu Revarevadia lalodiai hahine rua edia hetura heheni goadagoada haheitalai namona idia torea, idia be Naomi bona ena ravana Ruta vabuna. Namona be Ruta ena hereva Naomi dekenai oi laloa, ia gwau: “Lau oi hagania lasi, oi gwau lasi oi do lau rakatania badina be do oi lao gabuna lau danu do lau lao, bona do oi noho gabuna danu do lau noho; oiemu bese be lauegu bese ai do ia lao, bona oiemu Dirava be lauegu Dirava ai do ia lao.” (Ruta 1:16) Vadaeni ita gwau diba, Naomi ena kara namo dainai bona Iehova ia gwauraia dainai, Ruta be mai ena ura bada danu unai bamona ia hereva diba, ani?—Luka 6:40 itaia danu.
Aposetolo Paulo be Haheitalai Namona
9 Ita itaia vadaeni, aposetolo Paulo ese Timoteo dekenai tadikaka bamona tura henia karana ia hahedinaraia. To danu, ia be haheitalai namona badina ena tadikaka iboudiai dekenai tadikaka bamona tura henia karana ia hahedinaraia. Efeso ena elda taudia dekenai ia gwau “lagani toi lalonai, dina bona hanuaboi, umui ibounai lau sisiba henia hanaihanai mai tai momo danu.” Tadikaka bamona ia ura henidia bada ena toana, a? Oibe! Bona idia be unai bamona Paulo idia laloa danu. Do idia itaia lou lasi idia kamonai neganai, “idia tai dikadika, bona Paulo idia rosia bona idia kisi henia.” (Kara 20:31, 37) Ena kara namodia idia moalelaia dainai tadikaka bamona idia tura henia, a? Oibe! Tadikaka bamona ia tura henidia karana be ena hereva 2 Korinto 6:11-13 dekenai ia hedinarai, ia gwau: “Hereva momo ai gwauraia hedinarai umui [Korinto taudia] dekenai, ai hunia lasi. Aiemai kudouna ai kehoa vadaeni, umui ai lalokau henia dainai. Aiemai lalokau umui dekenai be maragi lasi, to emui lalokau ai dekenai be ia maragi. Umui lau hereva henia, tamana ese iena natuna ia hereva henidia bamona. Lau gwau, aiemai lalokau davana ai dekenai do umui henia, emui lalokau ai dekenai mani umui habadaia!”
10. Korinto taudia be edena bamona ia idia tura henia namonamo lasi dainai, Paulo be ia davaria hekwakwanai be 2 Korinto karoa 11 dekenai ia gwauraia?
10 Ia hedinarai goevagoeva, Korinto tadikaka momo edia hetura karana aposetolo Paulo dekenai be ia bada lasi. Unai dainai, idia haida idia maumau, idia gwau: “Paulo ena revareva be mai metau bona mai siahu danu, to sibona ita dekenai ia ginidae, bona iena tauanina ita itaia neganai, ia be manoka bona iena hereva be mamina lasi.” (2 Korinto 10:10) Unai hereva dainai Paulo ese edia “aposetolo taudia namo herea” ia gwauraidia, bona murinai ia abia hetoho idauidau ia hadibadia, 2 Korinto 11:5, 22-33 dekenai ia torea hegeregerena.
11. Paulo ese Tesalonika dekenai Keristen taudia ia tura henidia hamomokania sivaraina be dahaka?
11 Paulo ena hereva 1 Tesalonika 2:8 dekenai ese ia hahedinaraia Paulo ia hesiai henia taudia be tadikaka bamona ia tura henidia, ia gwau: “Umui ai lalokau henia bada [phi-liʹa] dainai ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada.” Oibe, unai tadikaka matamatadia ia ura henidia bada dainai ia naria noho diba lasi—ia ura diba edena bamona dagedage idia haheaukalaia noho—unai dainai ia ese idia dekenai Timoteo ia siaia, bona ia giroa mai neganai ripoti namona dainai Paulo ena lalona ia hagoadaia. (1 Tesalonika 3:1, 2, 6, 7) Insight on the Scriptures bukana ia gwau: “Paulo bona ia hesiai henia taudia padanai tadikaka bamona hetura heheni namonamo karana ia noho.”
Edia Namo Moalelaia—Unai be Tadikaka Tura Henia Kehoa Dalana
12 Momokani, edia namo moalelaia karana be tadikaka tura henia kehoa dalana. Iehova dekenai idia gwauhamata bona iena hesiai gaukara idia karaia taudia iboudiai be mai edia kara namodia dainai, ita moalelaidia, ita tura henidia, bona ita ura henidia, ani? Ita iboudiai be Dirava ena Basileia bona iena kara maoromaoro ita tahua guna. Ita iboudiai be ita goada karaia ita idia hadikaia diba gaudia toi ita dadaraidia totona: Satana bona iena demoni, Satana ena siahu henunai ia noho tanobada dikana, bona ita sibona eda ura ia tahua kara dika tauanina. Namona be hanaihanai ita laloa iseda tadikaka be idia goada karaia namo idia karaia totona, ani? Tanobada dekenai idia noho taudia ta ta iboudiai idia gini gabuna be Iehova kahanai eiava Satana kahanai. Iseda tadikaka bona taihu, idia gwauhamata vadaeni taudia unai, be Iehova ena kahana dekenai idia gini, oibe, ita gini gabuna unai, bona unai dainai namona be tadikaka bamona ita hetura heheni.
13. Dahaka dainai elda taudia dekenai tura henia karana ita hahedinaraia be namo?
13 Iseda elda taudia edia kara namo dainai ita moalelaidia, a? Kongregesen ia namo totona gaukara bada idia karaia, unai dainai, namona be idia ita tura henidia bada, ani? Ita ibounai hegeregerena, idia bona edia ruma bese edia mauri durua gaudia idia henia. Danu, ita ibounai hegeregerena, idia be mai edia maduna sibodia edia stadi idia karaia totona, kongregesen heboudia lao henidia totona, bona haroro gaukara idia karaia totona. Ma danu, idia be mai edia maduna hebou ena program idia hegaegaelaia totona, pablik tok idia henia totona, bona kongregesen dekenai idia vara hekwakwanai idia hamaoromaorodia totona, nega haida unai ena anina be hora momo lalodiai hahemaoro komiti gaukara idia karaia. Momokani, namona be ‘unai idia karaia taudia ibounai do ita matauraidia.’—Filipi 2:29.
Tadikaka Bamona Hetura Heheni Kara Ita Hahedinaraia
14 Iehova hamoalea totona, Iesu Keriso bona Paulo idia karaia bamona, gau badana be iseda orea taudia dekenai tadikaka bamona hetura heheni karana ita hahedinaraia. Ita duahia: “Umui ta ta do umui lalokau henia [phi-liʹa], tadikaka edia lalokau [phi-liʹa] ta ta dekenai bamona. Umui ta ta danu do umui matauraia.” (Roma 12:10) “Emui varavara ekalesia taudia do umui lalokau henidia [phi-liʹa] totona umui dekenai leta lau torea be anina lasi. Badina be Dirava ese umui ta ta do umui lalokau henia dalana ia hadibaia vadaeni umui dekenai.” (1 Tesalonika 4:9) ‘Emui ekalesia varavara do umui lalokau henia [phi-liʹa] noho.’ (Heberu 13:1) Oibe, iseda guba Tamana ena tanobada natudia dekenai tadikaka bamona tura henia karana ita hahedinaraia neganai, ia moale bada!
15. Tadikaka bamona ita hetura heheni karana hahedinaraia dala haida be dahaka?
15 Aposetolo taudia edia nega lalonai, Keristen taudia idia hedavari heheni neganai, “ekalesia ena lalokau kisi” idia henia. (Roma 16:16; 1 Petero 5:14) Tadikaka bamona hetura heheni kara idia hahedinaraia unai! Hari inai negai, tanobada ena kahana momo dekediai, edia hetura heheni karana hahedinaraia totona idia kiri heheni bona edia imadia idia udeudea. Latin tanodia ai, hegeregere Mexico ai, idia hedavari heheni neganai idia herosi heheni, unai ese edia hetura heheni karana ia hahedinaraia. Unai bamona tanodia dekenai haroro gaukara ia tubu daekau haraga, reana unai ena badina ta be unai gabu tadikaka ese hetura heheni karana idia hahedinaraia dainai.
16. Iseda Kingdom Hall dekediai, edena dala amo tadikaka bamona hetura heheni karana ita hahedinaraia diba?
16 Kingdom Hall dekenai ita vareai neganai, ita goada karaia tadikaka tura henia karana ita hahedinaraia totona, a? Ita do ia hasiahua hagoadaia herevadia ita gwauraia totona, idia lalo-metau taudia dekenai unai bamona ita hereva be gau badana. Hahegani ita abia ‘lalo-metau taudia ita hagoadadia’ totona. (1 Tesalonika 5:14) Unai be dala namona ta tadikaka bamona hetura heheni karana ita hahedinaraia totona. Dala ma ta be pablik tok namona tadikaka ia henia neganai, hebou ena hereva ta tadikaka ia naria namonamo neganai, Haroro School dekenai ta ese hereva namo hereana ia henia neganai, bona ma nega haida danu, hanamoa hereva ita henidia.
17. Elda ta ese dahaka ia karaia dainai kongregesen taudia idia ura idia tura henia?
17 Hebou ia doko murinai, bema ia leiti momokani lasi, haida ita boiridia iseda ruma dekenai ita aniani eiava ti kavakava ita inua hebou totona be namo, ani? Iesu ena sisiba hereva Luka 14:12-14 dekenai ita badinaia be namo, ani? Guna, misinari tauna ta dekenai kongregesen gunalaia tauna ena dagi idia henia, to unai kongregesen taudia iboudiai be iena bese taudia lasi. Mamina ia abia, idia be tadikaka bamona ia idia tura henia lasi, unai dainai ia palani karaia unai kara ia haidaua totona. Dahaka ia karaia? Sunday ta ta iboudiai, ruma bese ta ta ia boiria mai idia aniani hebou totona. Lagani ta ia ore neganai, idia iboudiai be mai moale danu ia dekenai tadikaka bamona idia tura henia.
18. Gorere tadikaka bona taihu dekediai, tadikaka tura henia karana ita hahedinaraia dalana be dahaka?
18 Gorere tadikaka ta eiava taihu ta be ruma dekenai eiava hospital dekenai ia noho neganai, bema ia dekenai ita tura henia, tadikaka bamona, kara ta do ita karaia bena gorere tauna do ia diba ia ita laloa. Eiava hospital bamona rumadia dekenai idia noho taudia be edena bamona? Namona be ita vadivadi henidia, ita telefon henidia, eiava hereva namona ena kadi idia dekenai ita siaia, ani?
19, 20. Edena bamona ita hahedinaraia diba iseda tadikaka tura henia karana ita habadaia?
19 Tadikaka tura henia karana ita hahedinaraia neganai, namona be sibona dekenai ita henanadai, ‘Haida sibona be tadikaka bamona lau tura henidia, a? Edia kopina ena kala ia idau dainai, edia edukeisini dainai, bona edia kohu dainai haida lau tura henidia bona haida lau tura henidia lasi, a? Aposetolo Paulo ese Korinto Keristen taudia ia hagoadadia hegeregerena, tadikaka tura henia karana lau habadaia be namo, a?’ Bema ita dekenai tadikaka tura henia karana ia noho, unai ese ita do ia hasiahua iseda tadikaka be hagoadaia dalanai do ita lalodia totona, edia kara namodia dainai do ita moalelaidia. Danu, tadikaka tura henia karana ese ita ia durua iseda tadikaka be lauma dalanai dagi namona ia abia neganai, ia totona do ita moale, do ita maumauraia lasi.
20 Danu, ita dekenai tadikaka tura henia karana ia noho neganai, ita gima noho haroro gaukara dekenai iseda tadikaka ita durudia totona. Namona be iseda kara be iseda ane (Namba 92) ena hereva bamona, ia gwau:
“Manoka tauna oi durua,
Do ia haroro gari lasi.
Memero kekeni durudia,
Do idia goada totona.”
21. Tadikaka tura henia karana ita hahedinaraia neganai, dahaka do ita davaria?
21 Namona be inai ita laloatao, tadikaka tura henia karana ita hahedinaraia neganai, Iesu be Ororo dekenai ia haroro neganai ia gwauraia herevana be gau badana, ia gwau: “Taunimanima dekenai umui henia lao, vadaeni Dirava do ia henia umui dekenai. Taunimanima ese emui puse do idia hahonua ela bona do ia bubua danu. Oibe, umui dekenai idia haria gauna be do ia hegeregere momokani, bona ia hanaia danu. Badina be umui henia lao ena maka hegeregerena Dirava ese umui dekenai do ia henia lao.” (Luka 6:38) Tadikaka tura henia karana ia hahedinaraia neganai namo ita davaria, idia be ita bamona Iehova ena hesiai idia karaia dainai ita hanamodia. Mai edia ura danu tadikaka tura henia karana idia hahedinaraia taudia be moale momokani taudia!
[Footnotes]
a Murina sivarai ladana oi itaia: “Lalokau (Agape) be Dahaka Karana Lasi Bona Ia be Dahaka Karana.”
Edena Bamona Do Oi Haere?
◻ Edena Greek hereva ese iseda lalona ena ura idia gwauraia, bona edia anina idaudia be dahaka?
◻ Tadikaka tura henia karana kehoa dalana be dahaka?
◻ Baibel lalonai tadikaka tura henia karana idia hahedinaraia sivaraidia haida be dahaka?
◻ Iseda tadikaka bona elda taudia ita ura henidia bada ena badina be dahaka?
4. Iesu bona Ioane idia hetura heheni bada ena badina be dahaka?
9. Dahaka ese ia hahedinaraia Paulo ese tadikaka bamona taunimanima ia tura henidia namonamo?
12. Iseda tadikaka dekenai tura henia karana ita hahedinaraia ena badina haida be dahaka?
14. Edena Baibel siridia ese ita idia hagania tadikaka bamona ita hetura heheni totona?
[Picture on page 15]
Aposetolo Petero ese ena tadikaka ia hagoadadia edia abidadama karana bona edia Keristen kara ma haida dekenai tadikaka tura henia karana ma idia atoa