“Umui Ta Ta Do Umui Lalokau Henia”
“Umui ta ta do umui lalokau henia, tadikaka edia lalokau ta ta dekenai bamona.”—ROMA 12:10.
1, 2. Misinari tauna ta bona aposetolo Paulo be edia tadikaka ida edena bamona hetura karana idia moalelaia?
LAGANI 43 lalonai Don be Asia ena kahana dekenai misinari gaukara ia karaia. Ia hesiai henia taudia ia lalokau henia karana be momo idia diba. Hari ia gorere bada bona kahirakahira do ia mase lalonai, ia hadibaia taudia haida be gabu daudau amo idia mai bona ena bedi kahirakahira dekenai, Korea gado ai, idia gwau: “Kamsahamnida, kamsahamnida!”—“Tanikiu, tanikiu!” Don ena lalokau karadia ese edia kudouna ia hamarerea momokani.
2 Don ena kara bamona idia karaia taudia be momo. Aposetolo edia negai, aposetolo Paulo be ia hesiai henia taudia dekenai lalokau ia hahedinaraia. Paulo be sibona ia henia haida durua totona. Ena be ia be goada tauna, “natuna ia ubua hahine bamona,” manau bona hebogahisi ia hahedinaraia. Tesalonika kongrigeisen ia tore henidia, ia gwau: “Umui ai lalokau henia bada dainai, ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada noho.” (1 Tesalonika 2:7, 8) Gabeai, Paulo ese ena Efeso tadikaka ia hamaorodia ia do idia itaia lou lasi neganai, “idia ibounai idia tai dikadika, bona Paulo idia rosia bona idia kisi henia.” (Kara 20:25, 37) Oibe, Paulo bona ena tadikaka edia hetura karana be goada momokani, ia be tomadiho sibona dainai idia hebamo lasi. Idia ese ta ta idia lalokau henia bada.
Hebogahisi Bona Lalokau
3. Baibel lalonai hebogahisi bona lalokau be edena bamona idia gwauraia hebou?
3 Baibel lalonai hebogahisi, ma haida ura henia bona durua karadia be Keristani kara badana—lalokau—ida idia gwauraia hebou. (2 Petero 1:7; 1 Tesalonika 2:8, Buka Helağa) Mai ena kahana idauidau hairai bada daimon nadina hegeregerena, unai kara namodia ibounai idia gaukara hebou kara namodia idia havaraia totona. Unai kara ese Keristani taudia ta ta be turadia namodia ai idia halaoa sibona lasi, to edia guba Tamana idia tura henia namonamo danu. Unai dainai aposetolo Paulo ese ena tadikaka ia hagoadaia: “Umui lalokau henia momokani. . . . Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.”—Roma 12:9, 10.
4. “Hebogahisi” ena anina be dahaka?
4 Paulo ese ia gaukaralaia Greek herevana “hebogahisi” ena kahana be rua, ta ena anina be hetura karana bona ma ta anina be lalokau. Baibel ia diba bada tauna ta ia gwau, unai anina be Keristani taudia “edia tomadiho karana lalonai, idia be ruma bese ta bamona idia lalokau, hetura namonamo bona mai lalo-tamona ida idia heduru heheni.” Oiemu Keristani tadikaka bona taihu be unai bamona oi laloa, a? Hemami namona—turadia namodia—ese Keristani kongrigeisen ia hahonua be namo. (Galatia 6:10) Unai dainai, Roma 12:10 ia gwau: “Umui ta ta do umui lalokau henia, tadikaka edia lalokau ta ta dekenai bamona.” Bona Buka Helağa ia gwau: “Ta ta do umui ura henia, varavara bamona.” Oibe, Keristani taudia huanai ia noho lalokauna be taravatu ta dainai lasi. Namona be “varavara umui lalokau henidia noho. Umui ta ta do umui lalokau henia, mai emui lalona ibounai.”—1 Petero 1:22.
“Dirava ese Umui Ta Ta Do Umui Lalokau Henia Dalana Ia Hadibaia Vadaeni”
5, 6. (a) Edena dala ai Iehova ese intenesenel hebouhebou ia gaukaralaia ena taunimanima dekenai Keristani lalokau ia hadibaia totona? (b) Edena dala ai tadikaka edia hetura karana nega daudau lalonai be ia goada ia lao diba?
5 Ena be inai tanobada lalonai “taunimanima momo edia lalokau” be ia keru noho, Iehova ese iena taunimanima ia hadibaia ‘ta ta do idia lalokau henia’ totona. (Mataio 24:12; 1 Tesalonika 4:9) Iehova ena Witnes taudia edia intenesenel hebouhebou be nega namodia unai kara hahedinaraia totona. Unai hebouhebou idia karaia tanodia dekenai, Witnes taudia ese tano daudau amo idia mai tadikaka idia hedavari henidia, bona idia momo ese edia ruma dekenai idia abidia dae. Vanegai unai bamona hebouhebou ta dekenai, taunimanima be edia hemami idia hahedinaraia lasi tanodia amo tadikaka haida idia mai. Noho gabudia ia naria Keristani tauna, ia gwau: “Unai tadikaka idia ginidae dinana ai, idia gari bona hemarai bada. To dina 6 murinai, edia tano dekenai do idia lou dainai idia bamahuta neganai, idia bona edia ruma dekenai idia noho tadikaka bona taihu be ta ta idia rosia bona idia taitai. Idia be Keristani lalokauna idia moalelaia bada bona do idia laloaboio diba lasi.” Herevana, iseda tadikaka be edena tano taudia, to eda ruma dekenai ita abia dae karana dainai, idia bona ita eda kara namodia ita hahedinaraia.—Roma 12:13.
6 Unai hebouhebou edia sivarai ita moalelaia, to Keristani taudia huanai hetura namonamo karana ia vara diba, bema nega daudau lalonai idia ese Iehova idia hesiai henia hebou. Iseda tadikaka ita diba namonamo neganai, edia kara namodia hegeregere, hereva momokani idia gwauraia, koikoi karana idia dadaraia, ita idia badinaia, ma haida laloa bada karana bona durua totona sibona idia henia, edia hebogahisi bona heabidae karadia do ita ura henia. (Salamo 15:3-5; Aonega Herevadia 19:22) East Africa dekenai misinari tauna, Mark ia gwau: “Iseda tadikaka ida ita gaukara hebou karana ese ia makohi diba lasi hetura karana goadana ia havaraia.”
7. Kongrigeisen lalonai Keristani lalokau ita moalelaia totona dahaka ita karaia be namo?
7 Kongrigeisen lalonai unai bamona hetura karadia idia vara bona idia goada noho totona, namona be tadikaka bona taihu be ta ta idia diba namonamo. Keristani heboudia dekenai ita lao hanaihanai neganai, iseda tadikaka bona taihu ida iseda hetura karana ita hagoadaia. Hebou ia do matamaia lasi bona ia ore murinai, ita herevahereva hebou bona hebou lalonai ita haere neganai, ta ta ita hagoadaia bona durua ‘lalokau bona kara namodia ita karaia’ totona. (Heberu 10:24, 25) United States dekenai elda ta, ia gwau: “Lau laloatao lau be mero maragi neganai, egu ruma bese be nega ibounai Kingdom Hall ai rakatania haraga lasi, tadikaka bona taihu ida nega daudau ai kiki karana ai moalelaia bada.”
Emu Lalokau Oi “Habadaia” be Namo, A?
8. (a) Paulo ese Korinto taudia ia hamaorodia dahaka do idia “habadaia”? (b) Dahaka ita karaia diba kongrigeisen lalonai lalokau ita habadaia totona?
8 Unai bamona lalokau ita hahedinaraia totona, reana iseda lalokau ita “habadaia” be namo. Aposetolo Paulo ese Korinto kongrigeisen ia tore henidia neganai, ia gwau: “Aiemai kudouna ai kehoa vadaeni, umui ai lalokau henia dainai. Aiemai lalokau umui dekenai be ia bada, to emui lalokau ai dekenai be ia maragi.” Unai dainai Paulo ese ia sisiba henidia edia lalokau karana do idia “habadaia.” (2 Korinto 6:11-13) Oi danu emu lalokau oi “habadaia” diba, a? Oi naria lasi haida ese idia karaia totona, oi karaia guna. Paulo be Roma kongrigeisen ia torea henia bona ia hamaorodia lalokau do idia hahedinaraia, bona inai sisiba ia henia: “Umui ta ta dekenai danu do umui matauraia.” (Roma 12:10) Ma haida matauraia karana be hebou dekenai oi ese tadikaka bona taihu oi hanamoa guna. Oi boiridia danu haroro gaukara dekenai umui gaukara hebou, eiava hebou totona umui hegaegae hebou. Unai bamona kara ese lalokau do ia habadaia.
9. Haida be dahaka idia karaia edia Keristani tadikaka idia tura henidia namonamo totona? (Emui gabu ena haheitalai haida gwauraia.)
9 Kongrigeisen lalonai ruma bese haida bona tadikaka bona taihu ta ta be edia lalokau idia “habadaia” diba bema idia vadivadi heheni, aniani sisina idia ania hebou bona moale karadia ma haida idia karaia hebou. (Luka 10:42; 14:12-14) Nega ta ta ai, Hakop be grup maragidia totona piknik ia hegaegaelaia. Ia gwau: “Edia mauri lagani be idauidau taudia idia mai, tama sibona eiava sina sibona ruma bese taudia danu idia mai. Idia giroa lao ruma neganai idia karaia gaudia be mai moale ida idia laloa lou, bona ta ta idia diba namonamo.” Namo lasi ita be tomadiho sibona dainai ita hebamo, to ita be Keristani taudia dainai, ita hekwarahi tura namodia ai ita lao be namo.—3 Ioane 14.
10. Dahaka ita karaia diba bema tadikaka bona taihu edia hetura karana lalonai hekwakwanai idia vara?
10 To, nega haida ita goevadae lasi dainai, ma haida ita tura henidia bona lalokau henidia be auka. Dahaka ita karaia diba? Gau ginigunana be, iseda tadikaka ita tura henidia namonamo totona do ita guriguri. Dirava ia ura iena hesiai taudia idia hebamo namonamo, bona unai bamona guriguri do ia haerelaia. (1 Ioane 4:20, 21; 5:14, 15) Namona be iseda guriguri hegeregerena, kara danu do ita karaia. East Africa dekenai, loaloa tadikaka ta ladana, Ric, ia laloatao tadikaka ta ena kara be auka bona ia hemataurai lasi dainai, ma haida be ia danu idia turana karaia lasi. Ric ia gwau: “Ia lau dadaraia lasi, to lau ura ia lau diba namonamo. Lau davaria unai tadikaka ena tamana ena matahakani dalana be auka herea. Tadikaka be mero matamata neganai ena mauri be ia auka bona hari ia hekwarahi noho unai kara ia dadaraia totona lau lalo-pararalaia neganai, ia lau ura henia bada. Ai be turadia namodia ai ai lao.”—1 Petero 4:8.
Emu Kudouna ai Idia Noho Gaudia Hahedinaraia!
11. (a) Dahaka ita karaia be namo kongrigeisen lalonai lalokau ia tubu totona? (b) Dahaka dainai ma haida dekenai iseda hemami ita hahedinaraia lasi ese lauma dalanai dika ia havaraia diba?
11 Hari inai negai, taunimanima momo edia mauri lalonai turana namona ta idia davaria lasi. Madi! Keristani kongrigeisen lalonai unai bamona ia vara lasi be namo—bona do ia vara lasi. Tadikaka bamona lalokau korikorina be mai hemataurai eiava manau ida haida hereva henia sibona lasi; eiava mai regerege bada ida haida hanamoa karana lasi. To, Paulo ese Korinto tadikaka dekenai ia karaia bamona, namona be iseda kudouna ai idia noho gaudia ita gwauraia bona iseda tadikaka dekenai ita hahedinaraia edia namo ita laloa bada. Ena be taunimanima ibounai be idia kiri, idia moale eiava idia herevahereva momo lasi, to bema ta be ia hemarai momo bona ia herevahereva lasi, unai be namo lasi. Baibel ena sisiba be: “Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia ia ura lasi.”—Aonega Herevadia 18:1.
12. Dahaka dainai kongrigeisen lalonai tura korikoridia huanai herevahereva namonamo karana be gau badana?
12 Tura korikoridia huanai mai momokani ida herevahereva karana be gau badana. (Ioane 15:15) Ita ibounai be mai iseda tura namodia, bona idia dekenai iseda lalohadai bona hemami dobudia ita gwauraia hedinarai diba be namo. Danu, ta ta ita diba heheni namonamo neganai, ita ta ta eda ura gaudia ita hagugurua be auka lasi. Ita ta ta eda ura gaudia be unai bamona ita laloa neganai, lalokau ita habadaia. Bona Iesu ena hereva do ia momokani ita dekenai, ia gwau: “Henia kara ena moale be bada, abia kara ena moale be maragi.”—Kara 20:35; Filipi 2:1-4.
13. Dahaka ita karaia diba, unai ese do ia hamomokania iseda tadikaka ita lalokau henia momokani?
13 Iseda lalokau ese namo bada ia havaraia totona, ita gwauraia hedinarai be namo. (Aonega Herevadia 27:5) Iseda lalokau be momokani neganai, iseda vairana ese do ia hahedinaraia, bona ma haida edia kudouna do ia veria ita idia lalokau henia totona. Aonega tauna ia gwau: “Iena vairana be mai kiri tauna ese, oi ia hamoalea noho.” (Aonega Herevadia 15:30) Ma haida laloa bada karadia danu ese lalokau karana ia habadaia. Ena be ta ese lalokau momokani ia hoia diba lasi, to mai kudouna ibounai ida oi henia harihari gauna be mai anina bada. Kadi ta, revareva ta, bona nega korikori ai ita gwauraia “hereva maorona” be lalokau korikorina idia hahedinaraia karadia. (Aonega Herevadia 25:11; 27:9) Haida ita tura henidia neganai, namona be sibona eda ura dadaraia lalokauna ita hahedinaraia. Unai amo iseda hetura karana do ia goada noho. Gau badana be iseda turadia be nega dikadia idia davaria neganai, ita ura idia badinai ita noho bona ita durudia. Baibel ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.”—Aonega Herevadia 17:17.
14. Dahaka ita karaia diba bema toana be ta ia ura lasi iseda turana namona ai ia lao?
14 Momokani, kongrigeisen lalonai ibounai be iseda turadia korikoridia ai idia lao diba lasi. Vaia, haida ita tura henidia haraga diba, to haida be lasi. Unai dainai, bema toana be ta be oiemu turana namona ai ia lao haraga lasi, namo lasi oi laloa oi eiava ia dekenai gau ta ia kerere. Bona oiemu tura korikorina ai ia lao totona oi doria toho lasi. Iena ura hegeregerena ai ia oi kara namo henia neganai, dala ia noho gabeai oiemu tura korikorina ai ia lao diba.
“Lau Moale Bada Oi Dekenai”
15. Hanamoa hereva idia abia taudia bona idia abia lasi taudia edia hemami be edena bamona?
15 “Lau moale bada oi dekenai.” (Mareko 1:11) Iesu ena bapatiso dekenai guba amo unai hereva ia kamonai neganai ia moale bada. Unai hereva namona dainai, Iesu ia diba momokani iena tamana ese ia lalokau henia bada. (Ioane 5:20) Madi, taunimanima haida be idia matauraia bona lalokau henia taudia amo, unai bamona hereva idia kamonai diba lasi. Ann ia gwau: “Lau bamona, matamata taudia momo edia ruma bese taudia be edia Keristani tomadiho karana idia abia dae lasi. Ruma dekenai ai idia hereva auka henia sibona. Unai dainai ai lalohisihisi bada.” To, kongrigeisen lalonai, lauma dalanai ruma bese—tama bona sina bona tadikaka bona taihu, abidadama tamona taudia idia davaria bona edia heduru bona lalokau idia mamia.—Mareko 10:29, 30; Galatia 6:10.
16. Dahaka dainai ma haida hereva auka henia karana ese idia ia durua lasi?
16 Tano haida ai, tama sina, taunimanima badadia bona tisa taudia be edia kudouna ibounai amo matamata taudia idia hanamoa lasi. Badina idia laloa unai bamona hanamoa hereva dainai matamata taudia be hekokoroku taudia ai do idia lao. Unai bamona lalohadai be Keristani ruma bese bona kongrigeisen lalonai ia vara diba danu. Reana, taunimanima badadia ese matamata tauna ta ena tok eiava gaukara dekenai do idia gwau: “Unai be namo, to namona be oi hanamoa momokani!” Eiava dala ma ta ai, matamata tauna ta dekenai idia moale lasi toana idia hahedinaraia. Unai idia karaia neganai, momo idia laloa unai ese matamata tauna do ia doria ia gaukara goada totona. To, unai bamona kara ese do ia durudia lasi, badina matamata taudia do idia mamia gau ta idia karaia namonamo diba lasi eiava do idia hegeregere lasi.
17. Dahaka dainai dala ita tahua haida dekenai hanamoa herevadia ita gwauraia totona?
17 Namo lasi hanamoa herevana be ta dekenai ita gwauraia guna, badina ita ura ia ita sisiba henia, unai be maoro lasi. Mai momokani ida haida dekenai hanamoa hereva gwauraia karana ese ruma bese bona kongrigeisen lalonai lalokau do ia habadaia. Unai ese matamata taudia ia hagoadaia, lo tadikaka bona taihu edia heduru idia tahua totona. Namo lasi ma haida ita kara henidia dalana be iseda hanua ena kastom karadia ese ia biagua. To namona be ‘mauri matamata do ita atoa, dabua matamata ita atoa bamona. Inai mauri matamata dainai, iseda toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.’ Iehova ena kara hegeregerena haida dekenai hanamoa herevadia ita gwauraia be namo.—Efeso 4:24.
18. (a) Matamata taudia e, taunimanima badadia edia sisiba be edena bamona oi laloa be namo? (b) Dahaka dainai taunimanima badadia ese sisiba idia henia dalana idia laloa namonamo?
18 To, matamata taudia e, namo lasi oi laloa taunimanima badadia ese oi dekenai sisiba idia henia neganai, oi idia ura henia lasi. (Hadibaia Tauna 7:9) Lasi! Idia be oi idia laloa bada bona lalokau henia dainai, unai bamona idia karaia. Badina bema oi idia laloa bada lasi, emu kara hanamoa totona, oi do idia hereva henia lasi, ani? Taunimanima badadia—kongrigeisen elda taudia danu—be iseda hereva ese idia havaraia namo bona dika idia diba dainai, ta idia sisiba henia gwauraia neganai, nega ibounai nega bada lalonai idia lalohadailaia namonamo bona idia gurigurilaia guna, badina idia ura namo sibona do idia havaraia.—1 Petero 5:5.
‘Iehova be mai Ena Hebogahisi’
19. Dahaka dainai idia lalohisihisi taudia be Iehova dekenai heduru idia abia diba?
19 Haida be reana guna hekwakwanai haida idia davaria dainai, idia laloa ma haida dekenai hebogahisi karadia idia hahedinaraia neganai, lalohisihisi do idia davaria lou. Edia kudouna lalonai idia noho gaudia be ma haida dekenai idia herevalaia totona, idia boga auka bona idia abidadama goada be namo. To, namona be idia laloboio lasi Iehova “be daudau lasi ita ta ta dekenai.” Ia dekenai do ita raka kahirakahira lao totona ita ia boiria. (Kara 17:27; Iamesi 4:8) Danu, ia lalo-parara ita ura lasi ita lalohisihisi, bona ia gwauhamata ita do ia durua. Salamo torea tauna Davida ese ita ia hagoadaia, ia gwau: “Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.”—Salamo 34:18.
20, 21. (a) Edena bamona ita diba Iehova ita hetura henia namonamo diba? (b) Iehova ita tura henia namonamo totona dahaka ita karaia be namo?
20 Iehova ida ita hetura namonamo be mai anina bada gauna. To unai bamona ita karaia diba, a? Oibe. Baibel ia hahedinaraia kara maoromaoro tatau bona hahine be iseda guba Tamana idia tura henia namonamo. Edia hereva namodia be Baibel lalonai idia noho bona ita idia hagoadaia ita danu be Iehova kahirakahira dekenai ita lao diba.—Salamo 23, 34, 139; Ioane 16:27; Roma 15:4.
21 Iehova ita tura henia totona ia atoa taravatu be taunimanima ibounai ese idia badinaia diba. Davida ia henanadai: “Lohiabada e, daika be oiemu Dubu Helaga dekenai do ia noho? Edena tauna be Siona, oiemu ororo helagana dekenai, do ia tomadiho diba? Tauna be inai: Ia be nega ibounai Dirava ia kamonai henia. Ia ese kara maoromaoro sibona ia karaia, bona iena kudouna dekena amo, hereva momokani ia gwauraia noho, mai laloa maoromaoro danu.” (Salamo 15:1, 2; 25:14) Dirava ita hesiai henia ese anina namona ia havaraia, bona Ia ese ita ia hakaua bona gimaia dainai, ita diba Iehova be “bogahisihisi” Diravana.—Iamesi 5:11.
22. Iehova ia ura ena taunimanima ese edena bamona hetura karana idia moalelaia?
22 Iehova ia ura goevadae lasi taudia ia tura henidia momokani be hahenamo badana ita dekenai! Vadaeni, ita ta ta dekenai lalokau ita hahedinaraia be namo, ani? Iehova ena heduru amo, ita ta ta ese Keristani tadikaka bamona lalokau heheni karana ita habadaia bona ita moalelaia diba. Dirava ena Basileia henunai, tanobada dekenai do idia noho taudia ibounai ese unai lalokau do idia mamia ela bona hanaihanai.
Anina Oi Gwauraia Diba, A?
• Keristani kongrigeisen lalonai edena bamona hemami ia noho be namo?
• Edena dala ai ita ta ta ese kongrigeisen lalonai lalokau ita hahedinaraia diba?
• Iseda kudouna amo ita gwauraia hanamoa hereva ese edena dala ai Keristani lalokau ia habadaia diba?
• Edena dala ai Iehova ena lalokau ese ita ia durua bona naria?
[Picture on page 21]
Keristani taudia be taravatu dainai idia lalokau heheni lasi
[Pictures on page 22, 23]
Oiemu lalokau oi “habadaia” diba, a?
[Picture on page 24]
Oi ese ma haida oi hereva auka henidia eiava oi hagoadaia?