Ede Daudauna Do Oi Mauri Diba?

ITA ibounai ita diba iseda mauri lalonai hekwakwanai haida do ita davaridia. To, ita mauri dainai ita moale. Ita laloa ita be nega kwadogi mo sibona do ita mauri be hegeregere lasi; ita ura lagani momo do ita mauri noho. To, toana be mase ita reaia diba lasi. Unai be momokani a?

Mase ita koua diba a? Iseda mauri laganidia ita hadaudaudia diba a?

Lagani Hadaudaudia A?

Lagani 1990 ai niusi ripoti ta ia gwau reana dala ia noho taunimanima do idia noho daudau ela bona edia mauri laganidia be 110. Mose ena hereva Baibel lalonai be inai: “Aiemai mauri laganidia be 70, eiava goada dainai do idia 80 reana, to idia be hekwarahi bona lalohisihisi amo idia honu; idia ore haraga, bena ai roho lao.” (Salamo 90:10) To hari inai negai taunimanima ta be lagani hida do ia mauri noho diba?

Lagani 1992 ai World Health Organization ese ripoti ta idia halasia, idia gwau tanobada hegegemadai taunimanima edia mauri laganidia edia averes be 65. Idia laloa lagani 1993 ela bona 1997, lagani ta ta ai unai averes be hua 4 hua 4 amo do ia bada ia lao, badina be beibi maragidia momo edia mase do idia koua dainai. Time magasin ia gwau, United States ai bema hoa dalana amo taunimanima edia mase idia koua diba ela bona edia lagani be 50, “edia mauri laganidia edia averes be lagani 3 1/2 sibona mo amo do idia hadaudaua diba.”

Dahaka Dainai Eda Mauri be Kwadogi?

Dr. Jan Vijg, Netherlands’ Institute of Experimental Gerontology tauna ta, ia gwau gorere haida idia vara tauanina ena sel edia anina ia dika ia lao dainai, bona unai hegeregerena, taunimanima idia buruka idia lao tauanina ena jin dainai. Unai idia tahua taudia haida idia laloa, ita buruka ita lao neganai bema “jin badadia haida” idia hamatamatadia, do ita mauri daudau. Ma haida idia gwau unai sibona be hegeregere lasi.

Time magasin ia gwau saiens taudia idia gwau, ‘Toana be taunimanima ena mauri laganidia edia hetoana be ena tauanina ena sel ai ia noho.’ Haida idia gwau ita hegeregere do “ita mauri hanaihanai,” to ma idia gwau “gau ta ia kerere.” Lagani 65, 70, 80 eiava ma haida bema ita mauri, mase dainai eda lagani “idia ore haraga,” Baibel ia hereva hegeregerena.

To, Keristen aposetolo Paulo ia gwau: “Ena inaina ginigabena, mase, do ia haorea.” (1 Korinto 15:​26, NW) Mase haorea dalana be dahaka? Bona emu lalokau taudia edia mase hari inai negai be edena bamona oi haheaukalaia diba?