Tiokratik Dalana Oi Badinaia Namonamo Noho
“[Iehova] be iseda Kota Biaguna, ia sibona be iseda King. Ia ese ita do ia biagua, bona ita do ia hamauria.”—ISAIA 33:22.
1. Dahaka dainai taunimanima momo ese gavamani idia laloa momo?
TAUNIMANIMA ibounai ese gavamani idia laloa momo. Gavamani namodia ese maino bona noho namona idia havaraia. Baibel ia gwau: “Kota maoromaoro dekena amo king ta ese, iena basileia ia hagoadaia noho.” (Aonega Herevadia 29:4) To, gavamani dikadia amo kara gageva, koikoi karadia, bona hisihisi idia vara. “Kara dika tauna ia king neganai, taunimanima idia lalohisihisi momokani.” (Aonega Herevadia 29:2) Idaunegai amo ema bona hari, taunimanima be gavamani idauidau idia haginia toho, bona madi, nega momo idia “lalohisihisi momokani,” badina be edia lohia taudia ese idia hahisidia. (Hadibaia Tauna 8:9) Gavamani ta ese nega daudau herea lalonai ena taunimanima edia lalona do ia hamoalea diba, a?
2. Dahaka dainai idaunegai Israelana ena gavamani ita gwauraia “tiokratik dalana” be hegeregere?
2 Histori torea tauna Josephus ese inai hereva ia torea neganai gavamani idauna ta ia herevalaia, ia gwau: “Taunimanima haida edia politikol siahu badana be tau tamona ena imana dekenai, haida edia be orea maragina ta dekenai, ma haida edia be taunimanima hutuma dekenai. To, aiemai taravatu henia tauna [Mose] be unai politikol dalana ta ese ia veria lasi, to iena konstitusen ia hegaegaelaia dalana—bema hereva idauna amo lau gwauraia diba—be ita gwauraia diba ‘tiokratik dalana,’ lohia siahuna ibounai be Dirava ena imana dekenai ia noho unai.” (Against Apion, II, 164-5) Concise Oxford Dictionary ia gwau tiokratik dalana (theocracy) ena anina be “lohia dalana ta Dirava ena amo.” Unai hereva be Baibel lalonai ia noho lasi, to idaunegai Israela besena ena gavamani ia gwauraia namonamo. Ena be Israela taudia ese gabeai tau ta be king ai idia halaoa, to edia lohia korikorina be Iehova. Israela peroveta tauna Isaia ia gwau: “[Iehova] be iseda Kota Biaguna, ia sibona be iseda King.”—Isaia 33:22.
Tiokratik Dalana Momokanina be Dahaka?
3, 4. (a) Tiokratik dalana momokanina be dahaka? (b) Kahirakahira, taunimanima ibounai dekenai tiokratik dalana ese dahaka hahenamo idauidau do ia mailaia?
3 Josephus ese unai hereva ia gwauraia negana amo, bese momo idia gwauraia tiokratik besedia. Idia haida ese dala idaudia idia abia dae lasi, to edia kara idia badinaia auka, bona idia dagedage. Idia be tiokratik besedia momokani, a? Lasi, unai be Josephus ese ia gwauraia herevana ena anina hegeregerena lasi. Hekwakwanai ta be unai hereva “tiokratik dalana” ena anina idia habadaia. World Book Encyclopedia ia gwau unai hereva ena anina be “lohia dalana ta bona ia lalonai pris ta o pris haida ese unai bese idia lohiaia, bona ia lalonai pris oreana taudia be mai edia siahu tauanina gaudia dekenai bona tomadiho gaudia dekenai.” To, tiokratik dalana momokanina be pris taudia edia gavamani lasi. Ia be Dirava ena lohia dalana, tanobada bona guba Havaraia Tauna, Iehova Dirava, ena gavamani.
4 Kahirakahira, tanobada ibounai be tiokratik dalana henunai do ia noho, bona unai be hahenamo bada hereana! “Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:3, 4) Goevadae lasi pris oreana edia lohia dalana ese unai bamona moale do ia havaraia diba lasi. Dirava ena lohia dalana sibona ese ia havaraia diba. Unai hegeregerena, Keristani taudia momokanidia be politikol karadia amo tiokratik dalana idia haginia toho lasi. Idia be mai edia haheauka ida idia naria, Dirava ese sibona ena nega bona sibona ena dala ai tiokratik tanobadana do ia havaraia totona.—Daniela 2:44.
5. Hari inai negai, tiokratik dalana momokanina be edeseniai ia gaukara noho, bona unai dala dainai dahaka henanadai haida idia vara?
5 To, unai ita naria noho lalonai, tiokratik dalana momokanina ia gaukara noho. Edeseniai? Mai edia ura ida Dirava ena lohia dalana henunai idia vareai bona iena ura karaia totona idia gaukara hebou taudia huanai. Unai abidadama taudia be tanobada hegegemadai amo idia haboua, lauma dalana ai “bese” ta bamona ena “tano” lalonai idia noho totona. Idia be “Dirava ena Israela” taudia oredia bona edia bamodia Keristani taudia milioni 5 mai kahana ta bamona. (Isaia 66:8; Galatia 6:16) Unai taudia be Iesu Keriso henunai idia noho. Ia be “Noho Hanaihanai King,” Iehova Dirava, ese guba dekenai King ai ia halaoa tauna. (1 Timoteo 1:17; Apokalupo 11:15) Edena dala ai unai orea be tiokratik oreana? Unai orea taudia ese taunimanima edia gavamani edia siahu be edena bamona idia laloa? Bona unai orea lalonai mai edia siahu taudia ese tiokratik hakaua dalana be edena bamona idia badinaia noho?
Tiokratik Oreana
6. Tanobada ai taunimanima edia orea ta be Dirava ese edena bamona ia lohiaia diba?
6 Taunimanima edia orea ta be edena bamona guba dekenai ia noho Diravana, Iehova, ese ia lohiaia diba? (Salamo 103:19) Unai bamona ia vara diba badina unai orea taudia be Dirava ena lauma amo ia havaraia sisibana idia badinaia, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi.” (Aonega Herevadia 2:6; 3:5) Idia ura Dirava ese ia lohiadia dainai, “Keriso ena taravatu” idia badinaia bona edia mauri dinadia ta ta ibounai lalonai Baibel ena hakaua herevadia idia badinaia. (Galatia 6:2; 1 Korinto 9:21; 2 Timoteo 3:16; Mataio 5:22, 28, 39; 6:24, 33; 7:12, 21 itaia.) Unai bamona idia karaia totona, namona be idia be Baibel stiuden taudia. (Salamo 1:1-3) Idaunegai Berea taudia idia “namo” bamona, idia be taunimanima edia murinai idia raka lasi, to idia dibaia gaudia be hanaihanai Baibel lalonai idia hamomokania. (Kara 17:10, 11; Salamo 119:33-36) Salamo torea tauna bamona idia guriguri, idia gwau: “Aonega bona lalona kehoa be lau dekenai do oi hadibaia, badina be oiemu taravatu lau abidadama henia noho.”—Salamo 119:66.
7 Orea ibounai lalonai, mai edia siahu taudia o hakaua dalana idia gwauraia taudia haida idia noho be namo. Iehova ena Witness taudia danu be unai bamona, bona aposetolo Paulo ese ia gwauraia siahu gaukaralaia dalana idia badinaia. Ia gwau: “Tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” (1 Korinto 11:3) Unai hereva hegeregerena, idia hegeregere tatau sibona be kongregesen lalonai elda gaukarana idia karaia. Bona ena be Iesu—“tatau ibounai edia kwarana”—be guba dekenai ia noho, to iena horoa tadikaka “oredia,” edia helaro be ia ida guba dekenai do idia lohia taudia, be tanobada dekenai idia do noho. (Apokalupo 12:17; 20:6) Unai taudia be “hesiai tauna mai ena kamonai, bona mai ena kara maoromaoro” oreana. Keristani taudia ese unai “hesiai tauna” ena dagi idia abia dae karana amo idia hahedinaraia idia be Iesu henunai, bona unai dainai Iesu ena kwarana, Iehova, ena henunai idia noho. (Mataio 24:45-47; 25:40) Unai dala amo tiokratik dalana ia heau namonamo. “Dirava be ia ura lasi hereva kava bona heai, ia be maino Diravana.”—1 Korinto 14:33.
8. Keristani elda taudia ese tiokratik hakaua dalana be edena bamona idia badinaia?
8 Keristani elda taudia ese unai tiokratik hakaua dalana idia badinaia badina idia lalo-parara Iehova vairanai edena bamona edia siahu idia gaukaralaia be do idia gwauraia hedinarai. (Heberu 13:17) Bona dala idia abia hidi neganai, sibodia edia aonega dekenai idia tabekau lasi, to Dirava ena aonega dekenai idia tabekau. Unai amo idia be Iesu ena kara idia tohotohoa. Ia be tanobada ai ia noho aonega tauna hereadaena. (Mataio 12:42) To, Iuda taudia ia hamaoroa, ia gwau: “Natuna be sibona kara ta ia karaia diba lasi, to ia ese iena Tamana ena kara ia itaia noho, vadaeni unai kara sibona ia karaia.” (Ioane 5:19) Elda taudia edia lalohadai be King Davida ena hegeregerena. Tiokratik dalana dekenai iena siahu be bada herea. To, ia ura Iehova ena dala ia badinaia, ia sibona ena lasi. Ia guriguri, ia gwau: “Lohiabada e, oiemu kara be lau dekenai do oi hadibaia. Dala maoromaoro dekenai lau do oi hakaua.”—Salamo 27:11.
9. Tiokratik dalana henunai, helaro idaudia bona hesiai gaukara lalonai hahenamo idauidau dekenai, gwauhamata Keristani taudia be edena lalohadai maorona idia abia?
9 Haida idia henanadai bema kongregesen lalonai idia hegeregere tatau sibona ese dagi idia abia be namo eiava bema Keristani taudia haida be guba helarona idia abia bona haida be tanobada helarona idia abia be hegeregere eiava lasi. (Salamo 37:29; Filipi 3:20) To, gwauhamata Keristani taudia idia abia dae unai dala idauidau be Dirava ena Hereva dekenai idia torea. Idia be tiokratik daladia. Bema haida ese idia hepapahuahulaia, nega momo unai taudia be Baibel ena hakaua herevadia idia laloa lasi taudia. Danu, Keristani taudia idia diba Iehova ena matana ai tatau bona hahine be hegeregere bona idia be hahemauri do idia abia. (Galatia 3:28) Keristani taudia momokanidia dekenai, guba bona tanobada edia Pavapava Badana idia tomadiho henia be hahenamo hereadaena momokani, bona edena gaukara Iehova ese idia dekenai ia henia be mai edia moale ida idia abia dae. (Salamo 31:23; 84:10; 1 Korinto 12:12, 13, 18) Danu, mauri hanaihanai, guba dekenai eiava tanobada paradaisona dekenai, be helaro namo hereana momokani.
10. (a) Ionatana ese dahaka lalohadai namona ia hahedinaraia? (b) Hari inai negai Keristani taudia be edena bamona Ionatana ena lalohadai bamona idia hahedinaraia?
10 Unai hegeregerena, Iehova ena Witness taudia be King Saulo ena natuna bona Dirava gari henia tauna, Ionatana, bamona. Ionatana be king namona ai ia lao diba. To, Saulo ena abidadama lasi karana dainai, Iehova ese Davida ia abia hidi Israela ena king iharuana ai do ia lao totona. Ionatana ia lalohisihisi, a? Lasi. Ia be Davida ena turana namona ai ia lao bona Saulo ena amo ia gimaia danu. (1 Samuela 18:1; 20:1-42) Unai hegeregerena, tanobada helarona idia abia taudia be guba helarona idia abia taudia dekenai idia mama lasi. Bona Keristani taudia be kongregesen lalonai tiokratik dalana ai dagi idia abia taudia dekenai idia mama lasi. Lasi, to idia ese idia ‘lalokau henidia bona matauraidia,’ bona edia tadikaka bona taihu dainai idia karaia goadagoada gaukaradia idia laloa bada.—1 Tesalonika 5:12, 13.
Tiokratik Dalana ai Taunimanima Edia Gavamani Idia Laloa
11. Tiokratik lohia dalana henunai idia noho Keristani taudia ese taunimanima edia gavamani be edena bamona idia laloa?
11 Bema Iehova ena Witness taudia be tiokratik dalana, Dirava ena lohia dalana, henunai idia noho, edia lalohadai edia tano ena lohia taudia dekenai be edena bamona? Iesu ia gwau namona be ia murinai idia raka taudia “be tanobada ena lasi.” (Ioane 17:16) To, Keristani taudia ese edia abitorehai “Kaisara,” o gavamani, dekenai idia laloa danu. Iesu ia gwau namona be ‘Kaisara ena gau, Kaisara dekenai idia henia, to Dirava ena gau be Dirava dekenai idia henia.’ (Mataio 22:21) Baibel ia gwau taunimanima edia “gavamani edia siahu be Dirava ese ia henia.” Iehova, siahu ibounai edia Badina, ese gavamani idia noho dalana ia koua lasi, bona ia ura edia siahu henunai idia noho taudia do idia kara namo henidia. Unai bamona idia karaia neganai, idia be “Dirava ena hesiai gaukara [idia] karaia.” Keristani taudia be edia tano ena gavamani henunai idia noho “badina be [edia] lalona dekenai [idia] diba dala maorona be unai.” (Roma 13:1-7) To momokani, bema gavamani ese ia gwauraia gauna ta be Dirava ena taravatu hegeregerena lasi, Keristani taudia be “Dirava [idia] kamonai henia be namo, taunimanima [idia] kamonai henia be dika.”—Kara 5:29.
12. Gavamani ese Keristani taudia idia dagedage henia neganai daidia edia haheitalai idia tohotohoa?
12 Gavamani ese Keristani taudia idia dagedage henia neganai be edena bamona? Unai neganai idia be Keristani taudia ginigunadia idia tohotohoa, idia ese dagedage bada idia haheaukalaia. (Kara 8:1; 13:50) Idia diba unai bamona abidadama tohoa gaudia do idia vara, badina Iesu ese ia hadibadia unai gaudia do idia vara. (Mataio 5:10-12; Mareko 4:17) To, unai Keristani taudia ginigunadia be idia hahisisdia taudia idia dagedage henidia lasi; unai hisihisi dainai edia abidadama ia manoka lasi danu. To, Iesu ena haheitalai idia tohotohoa: “Idia hereva dika henia, to ia hereva dika henia lou lasi. Hisihisi ia abia neganai, ia dagedage lasi. To mai abidadama danu, sibona ena mauri be Dirava ena imana dekenai ia henia. Badina Keriso ia diba Dirava be Kota Biaguna maoromaorona.” (1 Petero 2:21-23) Oibe, Satani ena hahetoho idauidau lalonai, Keristani hakaua herevadia idia badinaia.—Roma 12:21.
13. Iehova ena Witness taudia be dahaka idia karaia, taunimanima ese idia dagedage henidia bona koikoi herevadia amo idia hadikadia neganai?
13 Hari inai negai danu be unai bamona. Lagani 1900 ema bona hari, Iehova ena Witness taudia be dagedage lohia taudia amo hisihisi bada idia davaria—Iesu ese ia gwauraia guna hegeregerena. (Mataio 24:9, 13) Tano haida dekenai taunimanima ese koikoi herevadia idia halasia badina idia ura gavamani idia doria unai Keristani taudia momokanidia idia koua totona. Ena be idia “hahemaraia,” to Witness taudia be edia kara namodia amo idia hahedinaraia idia be Dirava ena hesiai taudia. (2 Korinto 6:4, 8) Bema dala ia noho neganai, gavamani taudia bona unai tano ena kota vairanai edia maoro idia herevalaia bona idia hahedinaraia idia be kerere ta idia karaia lasi. Idia gaukaralaia diba daladia idauidau amo taunimanima vairanai sivarai namona ena maoro idia herevalaia. (Filipi 1:7) To taravatu hegeregerena idia karaia diba gaudia ibounai idia karaia murinai, gau ibounai be Iehova ena imana dekenai idia rakatania. (Salamo 5:8-12; Aonega Herevadia 20:22) Bema dala be lasi, idia be kara maoromaoro dainai hisihisi do idia ania garina idia gari lasi.—1 Petero 3:14-17; 4:12-14, 16.
Dirava Ena Hairai Atoa Guna
14, 15. (a) Tiokratik hakaua dalana idia abia isi taudia ese dahaka idia atoa guna? (b) Edena nega ai Solomona ese iena gunalaia dagina dekenai manau karana ia haheitalaia namonamo?
14 Iesu ese ena murinai idia raka taudia dekenai guriguri dalana ia hadibaia neganai, ia gwauraia gauna ginigunana be Iehova ena ladana do idia hahelagaia. (Mataio 6:9) Unai hegeregerena, tiokratik dalana idia badinaia taudia be sibona edia namo idia tahua guna lasi, to Dirava ena hairai idia atoa guna. (Salamo 29:1, 2) Baibel ia gwau aposetolo taudia edia nega lalonai, unai be Iesu murinai idia ura lasi idia raka taudia edia hekwakwanai gauna ta, badina “taunimanima edia hanamoa dekenai idia ura henia bada,” idia ura taunimanima ese idia hanamodia bada. (Ioane 12:42, 43) Momokani, ta ese sibona ena ladana badana ia laloa lasi to Iehova ia atoa guna totona lalo-manau be mai anina bada.
15 Unai kara dekenai Solomona ena lalohadai be namo herea. Ia haginia dubuna mai hairaina idia hahelagaia neganai ia gwauraia herevadia bona Nebukanesa ese ia haginia rumadia dainai ia gwauraia herevadia mani oi hahegeregerea. Nebukanesa be mai ena hekokoroku ida ia gwau: “Babulonia badana be inai, lau ese lau haginia, lauegu siahu dekenai lau haginia, bona lauegu heagi totona ia gini.” (Daniela 4:30) To Solomona be idau, ia karaia gaudia ia heagilaia lasi, ia gwau: “Dirava e, oi be momokani tanobada dekenai, taunimanima edia huana dekenai oi noho diba, a? Guba, bona guba ena ataiai momokani be hegeregere lasi oiemu noho gabuna. Unai dainai inai dubu, lau ese lau haginia gauna be maragi, edena bamona do oi noholaia diba?” (2 Sivarai 6:14, 15, 18; Salamo 127:1) Solomona be sibona ia abia isi lasi. Ia diba ia be Iehova ena gwaukau tauna ta sibona bona inai hereva ia torea: “Hekokoroku taudia ese hemarai idia davaria noho, to manau taudia ese aonega idia davaria noho.”—Aonega Herevadia 11:2.
16. Elda taudia be edena bamona idia hahedinaraia, sibona idia abia isi lasi dainai idia be hahenamo ta?
16 Keristani elda taudia danu be unai bamona Iehova idia abia isi, sibona idia abia isi lasi. Petero ena sisiba idia badinaia, ia gwau: “Bema tau ta ena diba be taunimanima durua, vadaeni inai diba, Dirava ese ia henia gauna do ia gaukaralaia mai ena goada ibounai, taunimanima durua totona. Unai dala dekenai, emui kara ibounai dainai, taunimanima ese Dirava do idia hanamoa henia, Iesu Keriso dainai.” (1 Petero 4:11) Aposetolo Paulo ese “gunalaia tauna ena dagi” ia herevalaia neganai ia gwau lasi ia be ladana bada dagina ta, to ia be “dagi [“gaukara,” NW] namona.” (1 Timoteo 3:1) Elda taudia idia abia hidi ma haida idia lohiaia totona lasi, to hesiai gaukara karaia totona. Idia be Dirava ena mamoe oreana hadibaia bona naria taudia. (Kara 20:28; Iamesi 3:1) Idia manau bona sibona edia ura idia dadaraia elda taudia be hahenamo ta kongregesen dekenai. (1 Petero 5:2, 3) Unai “kara bamona idia karaia taudia ibounai do umui matauraia,” bona Iehova umui tanikiu henia ia ese idia hegeregere elda taudia momo ia henia inai “nega ena dokona” ai tiokratik dalana idia abia isi totona.—Filipi 2:29; 2 Timoteo 3:1.
“Dirava Ena Kara Bamona Do Umui Karaia”
17. Edena dala idauidau ai tiokratik dalana henunai idia noho taudia be Dirava idia tohotohoa?
17 Aposetolo Paulo ia gwau: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.” (Efeso 5:1) Tiokratik dalana henunai idia noho taudia idia gaukara goada, goevadae lasi taudia idia karaia diba hegeregerena Dirava idia tohotohoa totona. Hegeregere, Baibel ia gwau: “[Iehova] be Nadi Badana, iena gaukara be namo momokani. Iena dala ibounai be maoro, bona iena kota be momokani. Ia be abidadama ena Dirava.” (Deuteronomi 32:3, 4) Unai dala ai Dirava idia tohotohoa totona, Keristani taudia ese abidadama, kara maoromaoro, bona hahemaoro maoromaorona idia tahua. (Mika 6:8; 1 Tesalonika 3:6; 1 Ioane 3:7) Idia ese inai tanobada taudia idia abia dae gaudia momo, hegeregere matabodaga, hegahusi, bona mataganigani, idia dadaraia. (Efeso 5:5) Iehova ena hesiai taudia ese taunimanima edia kara lasi, to Dirava ena taravatu idia badinaia dainai, iena orea be tiokratik oreana, ia goeva, bona ia namo.
18. Dirava ena kara badana be dahaka, bona Keristani taudia ese unai kara be edena bamona idia hahedinaraia?
18 Dirava ena kara hereadaena be lalokau. Aposetolo Ioane ia gwau: “Dirava be lalokau.” (1 Ioane 4:8) Tiokratik dalana ena anina be Dirava ena lohia dalana dainai, unai be lalokau amo lohia dalana ia gwauraia danu. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Unai tiokratik oreana ese inai nega dikana ena dina gabedia ai, lalokau bada herea ia hahedinaraia. Africa dekenai ala-ala karana dikana ia vara negana lalonai, Iehova ena Witness taudia ese taunimanima ibounai dekenai lalokau idia hahedinaraia, herevana idia be edena bese taudia. Guna idia gwauraia Yugoslavia tanona dekenai tuari ia vara neganai, Iehova ena Witness taudia gabu ibounai amo be idia heduru heheni, to tomadiho oreadia ma haida be bese ma ta hamasea ore karana lalonai idia vareai. Danu, Iehova ena Witness taudia ta ta ibounai idia hekwarahi Paulo ena sisiba idia badinaia totona, ia gwau: “Heai, dagedage, bona badu do umui koua. Hereva dika, laloa dika, bona samania koikoi hereva ibounai do umui hadokoa. Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.”—Efeso 4:31, 32.
19. Tiokratik dalana henunai idia noho taudia be dahaka hahenamo idauidau hari inai negai bona vaira neganai idia abia diba?
19 Tiokratik dalana idia badinaia taudia ese hahenamo bada idia moalelaia. Dirava bona edia Keristani tadikaka ida maino ai idia noho. (Heberu 12:14; Iamesi 3:17) Edia mauri be mai ena anina korikori. (Hadibaia Tauna 12:13) Lauma dalanai edia noho ia namo bona idia be mai edia helaro korikorina vaira negana totona. (Salamo 59:9) Momokani, unai taudia be tiokratik lohia dalana henunai taunimanima iboudiai do idia noho ena mamina be hari idia moalelaia sisina. Baibel ia gwau unai nega lalonai “Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.” (Isaia 11:9) Unai be nega namo hereana! Namona be hari inai negai tiokratik dalana ita badinaia karana amo ita hahedinaraia unai vaira Paradaisona dekenai do ita noho momokani.
Anina Oi Gwauraia Diba, A?
◻ Tiokratik dalana korikorina be dahaka bona hari inai negai edeseniai ita davaria diba?
◻ Taunimanima be edena dala ai tiokratik lohia dalana henunai idia noho diba?
◻ Edena dala idauidau ai tiokratik dalana henunai idia noho taudia be sibona edia hairai lasi, to Dirava ena hairai idia atoa guna?
◻ Tiokratik dalana idia badinaia taudia ese edena kara namodia haida, Dirava ena kara unai, idia hahedinaraia?
7. Tiokratik dalana henunai, orea naria dalana be edena bamona?
[Picture on page 17]
Solomona ese sibona ena hairai lasi, to Dirava ena hairai ia atoa guna