Iehova Ena Witness Taudia ese Taunimanima ta Idia Gavaia A?

IESU KERISO be haida ese idia gwauraia dika, idia gwau ia be kekero tauna, aniani dikadika tauna, Sabati taravatuna utua tauna, uitnesi koikoi tauna, Dirava hadikaia tauna, Satana ena gwaukau tauna, bona gavamani inai henia tauna.​—Mataio 9:34; 11:19; 12:24; 26:65; Ioane 8:13; 9:16; 19:12.

Iesu ia mase bona ia toreisi lou murinai, ena hahediba taudia danu be unai bamona idia gwauraidia dika. Nega ta idia haida be hanua lohiadia vairadiai idia veridia lao, idia gwau: “Inai taudia be gabu ibounai dekenai kerere idia havaraia.” (Kara 17:6) Ma nega ta aposetolo Paulo bona ena bamona Sila be kota naria taudia vairadiai idia samanidia, idia gwau Filipi hanuana idia hadikaia.​—Kara 16:20.

Gabeai haida ese Paulo idia samania, idia gwau ia be “kerere havaraia tauna. Iuda taudia tanobada kahana ibounai dekenai, edia huanai heai ia havaraia noho” bona “Dubu Helaga ia hamiroa toho.” (Kara 24:​5, 6) Iuda kwaradia taudia Roma ai edia hereva be maoro; Iesu ena orea taudia idia herevalaidia, idia gwau: “Ai diba inai orea be gabu iboudiai idia gwauraia dika.”​—Kara 28:22, NW.

Unai ese ia hahedinaraia, haida idia laloa unai tomadiho oreana matamatana, Iesu Keriso ese ia haginia oreana, edia lalohadai bona edia kara be idau vaitani dainai, taunimanima oredia, edia bese edia taravatu idia badinadia taudia, ese idia abidia dae diba lasi. Keristen taudia idia gwauraidia dika taudia edia hereva be taunimanima momo ese idia abidia dae, badina be idia be ladana bada taudia, edia hanua taudia ese idia matauraidia taudia. To, oi be reana oi diba vadaeni hegeregerena, unai samani herevadia iboudiai be koikoi! Ena be unai taudia ese idia gwauraidia, to unai ese ia hamomokanidia lasi.

Hari inai nega be edena bamona? Iehova ena Witness taudia be unai bamona idia gwauraidia dika be maoro a? Iehova ena Witness taudia ese taunimanima ta idia gavaia a, bona unai dainai edia lalohadai bona edia kara be unai bamona idia kerere a?

Idia Hedinarai Gaudia

Russia ai, gavamani tauna ta, St. Petersburg siti lalonai, ia gwau: “Guna idia hamaoromai Iehova ena Witness taudia be orea hehunina ta, dibura ai idia helai, memero kekeni idia aladia mase bona sibodia idia hamasea danu.” To, vanegai Russia taudia be edia diba Witness taudia edia kara korikori dekenai idia habadaia. Intenesenel hebouhebouna ta dainai unai gavamani tauna be Iehova ena Witness taudia ida idia gaukara hebou murinai, ia gwau: “Hari lau ese taunimanima namodia mai edia moale be lau itadia; idia ese lau diba taudia momo idia hereadia. Idia maino bona idia lalokau heheni bada.” Ma ia gwau: “Lau diba lasi dahaka dainai taunimanima ese unai bamona idia herevalaidia koikoi.”

Edia hebou lalodiai Iehova ena Witness taudia ese tomadiho karadia idia karaia hehuni lasi. Witness lasi hahinena Julia Mitchell Corbett be ena buka ladana Religion in America lalonai ia gwau: ‘Edia hebou rumadia be dubu idia gwauraidia lasi. Kingdom Hall lalodiai idia hebou negadiai, edia nega ena kahana badana be Baibel stadilaia bona herevaherevalaia karadia ai idia haorea.’ Edia hebou rumadia be saini amo idia hahedinaraidia goevagoeva. Murimuri taudia idia boiridia do idia vareai. Idia boiridia lasi taudia bema idia ginidae, idia abidia dae mai edia ura ida.

Ena buka lalonai Corbett be ma ia gwau: ‘Witness taudia edia kara dainai taunimanima idia diba idia be kara momokani bona gaukara goadagoada taudia mai edia hemataurai.’ Witness lasi taudia momo idia gwau Iehova ena Witness taudia be kavakava taudia lasi. Edia kara ese taunimanima edia taravatu namodia idia utudia lasi. The New Encyclopædia Britannica ia hereva maoro, ia gwau Witness taudia be “kara maoromaoro taravatudia idia goadalaidia.”

United States ai, TV program ta ladana 60 Minutes ai Witness taudia idia ripotilaidia kerere murinai, unai ripoti dainai televisen steisin ta ena niusi dairekta ese Witness taudia ia tore henidia. Ia gwau: “Bema taunimanima momo do idia noho, umui be emui abidadama dainai umui noho hegeregerena, inai bese do ia dika lasi, hari inai negai ia dika hegeregerena. Lau be niusi tauna ta; lau diba emui orea be lalokau bona Dirava abidadama henia bada karana latadiai umui haginia. Lau ura do umui diba Niusi taudia haida be unai bamona idia lalomui kerere lasi.”

Momo Idia Diba Tomadihona

Iehova ena Witness taudia be tomadiho oreana maragina bona idau hereana idia gwauraia be maoro, a? Tomadiho oreadia haida edia bada ese Witness taudia edia orea ena bada idia hanaia momokani. To, Iesu ena hereva mani oi laloa: “Mauri gabuna ia lao dalana ena iduara ia maragimaragi, . . . idia davaria taudia be momo lasi.”​—Mataio 7:​13, 14.

Witness taudia be orea maragina bona idau hereana lasi. April 1993 lalonai taunimanima 11 milion mai kahana be Witness taudia edia hebou lalodiai idia hebou, Keriso ena mase laloa lou totona. Unai ia hereaia gauna be inai: Edia kara maoromaoro dainai tanobada hegegemadai idia hanamodia. Momokani, bese momo ese idia na tomadiho korikori oreana ta bamona idia abidia dae badina be unai.

Vanegai orea ta ladana European Court of Human Rights ia gwau, namona be Witness taudia do idia koudia lasi, to edia lalohadai bona edia tomadiho dalana do idia badinadia, bona edia abidadama do idia herevalaia hedinarai bona haida do idia hadibalaidia be namo. Bema unai orea taudia idia diba Iehova ena Witness taudia be dala kereredia amo taunimanima be edia orea lalonai idia veridia vareai bena edia daradia idia biagudia, idia be unai bamona idia hereva diba lasi.

Tanobada hegegemadai taunimanima momo herea be Iehova ena Witness taudia idia diba momo. Umui Witness lasi taudia milion milion, hari o guna Iehova ena Witness taudia ida Baibel umui stadilaia hebou taudia e, umui ai nanadaia inai, Tiriki karadia amo emui lalona idia ania o idia doria toho a? Emui haere be “Lasi,” ani? Bema unai bamona idia karaia, idia hadikadia vadaeni taudia momo ese Iehova ena Witness taudia hanamolaidia herevadia do idia hakoikoidia vaitani.

“Taunimanima Idia Lalodia Bada”

Taunimanima idia gavadia tomadiho oreadia taudia momo ese edia varavaradia bona turadia bona taunimanima oredia iboudiai idia rakatanidia. Iehova ena Witness taudia be unai bamona a? Niusi tauna ta Czech Ripablik ai be ia gwau: “Ia hedinarai goevagoeva idia [Iehova ena Witness taudia] be kara maoromaoro idia goadalaia momokani. . . . Gavamani idia matauraidia, to idia laloa Dirava ena Basileia mo sibona ese taunimanima edia hekwakwanai iboudiai do ia haoredia. Edia tomadiho idia goadalaia kava lasi. Taunimanima idia lalodia bada.”

Bona edia varavaradia bona taunimanima ma haida idia dadaraidia lasi bona idia rakatanidia lasi, sibodia do idia noho hebou totona. Idia diba Baibel ia gwau edia maduna be edia famili do idia lalokau henidia bona do idia naridia. Idia be bese idauidau taudia bona tomadiho idauidau taudia ida idia gaukara hebou. Hisihisi badadia idia vara negadiai, dala idauidau ai idia heduru haraga.

Gau badana be inai, edukeisini gaukarana bada hereadaena idia karaia noho. Tomadiho oreadia hida be dala idia lailaia, edia orea taudia ese edia hanua taudia ta ta iboudiai do idia vadivadi henidia totona? Iehova ena Witness taudia be unai bamona idia karaia, tano 200 mai kahana ai bona gado 200 mai kahana ai! Momokani, idia ese “taunimanima idia lalodia bada.”

Baibel Idia Badinaia Momokani

Momokani, Iehova ena Witness taudia edia hahediba herevadia be dubu oreadia edia hegeregeredia lasi. Iehova ena Witness taudia idia laloa Iehova be siahu ibounai Diravana bona Iesu be ena Natuna, ruaosi be toi tamona Diravana ena kahana lasi. Edia abidadama be Dirava ena Basileia mo sibona ese hisihisi do ia haorea. Taunimanima idia hadibadia inai tanobada dikana be kahirakahira do ia ore. Tanobada paradaisona, kamonai taudia ese do idia noholaia gabuna, be idia harorolaia. Korosi idia tomadiho henia lasi. Kirisimasi idia hahelagaia lasi. Idia laloa souli idia mase diba bona hel lahina be lasi. Rara idia ania lasi bona idia abia hanai lasi. Politik bona tuari amo idia gini siri. Oi be nega ta sibomu oi henanadai a, oi gwau, Dahaka dainai Iehova ena Witness taudia edia hahediba herevadia be idau vaitani?

Massachusetts niuspepa ta, Daily Hampshire Gazette, ia gwau, Iehova ena Witness taudia ese “Baibel ena hereva idia abia dae vaitani dainai, taunimanima oredia be vaia idia karaia karadia momo be idia ese idia taravatudia . . . , idaunegai Keristen taudia idia tohotohodia toho, bona Baibel ena hereva idia badinaia toho totona.” The Encyclopedia of Religion ia gwau: “Baibel ena hereva idia gwauraidia, idia abidia dae herevadia kahirakahira iboudiai hamomokanidia totona, badina be Baibel ena hahemomokani siahuna idia abia dae vaitani.” Buka ladana Religion in America ia gwau: “Hari orea be nega ta lasi Baibel stadilaia karana ia rakatania, bona ena hahediba herevadia be Baibel ena hereva idauidau momo amo ia hamomokanidia.”

Edia Hakaua Tauna be Daika?

Baibel ena hereva be unai bamona idia badinadia namonamo dainai, Iehova ena Witness taudia ese hakaua taudia idia tomadiho henidia lasi, unai tomadiho oreadia idaudia ese idia tomadiho henidia hegeregerena. Idia laloa haroro taudia ese orea taudia oredia idia hereadia lasi. The Encyclopedia of Religion ia gwau: “Haroro taudia oreana bona dagi ladadia idaudia idia taravatudia.”

Iesu Keriso idia gavaia, badina be ia be edia Hakaua Tauna bona Keristen ekalesiana ena Kwarana dainai. Iesu ia gwau: “Taunimanima ese umui do idia gwauraia lasi ‘Hadibaia Tauna.’ Badina be umui emui Hadibaia Tauna be tamona sibona, bona umui ibounai be tadikaka. . . . Bona umui be ‘Hakaua Taudia’ do idia gwauraia lasi, badina be emui Hakaua Tauna be tamona sibona, Keriso inai.”​—Mataio 23:​8-12.

Iesu be aniani dikadika tauna lasi bona kekero tauna lasi, lasi vaitani, bona unai hegeregerena, Iehova ena Witness taudia be taunimanima ta gavaia tomadiho oreana lasi. Momokani, Iesu bona ena hahediba taudia sivaraidia koikoidia idia abidia dae taudia haida ese idia gwauraidia dika lasi. Bema oi be mai emu henanadai haida Iehova ena Witness taudia bona edia hahediba herevadia dekediai, oi dibadia namonamo be namo, ani? Edia Kingdom Hall edia iduara idia hekeho, hereva momokani tahua taudia iboudiai edia.

Baibel lalonai diba maoromaoro idia tahua namonamo; oi danu be unai edia kara amo namo do oi davaria diba bona Dirava tomadiho henia dalana maorona do oi dibaia diba. Iesu ia gwau: “Tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho.”​—Ioane 4:23.