Taunimanima Idia Gavadia Tomadiho Oreadia

FEBRUARY 28, 1993 ai, pulisi 100 mai kahana be magu ta lalonai idia heau vareai, unai magu lalonai be ruma haida, idia lalodiai be tatau bona hahine momo mai natudia ida. Pulisi ese ipidi idia tahudia bona taravatu utua tauna ta idia dogoatao gwauraia. To unai ruma idia noholaia taudia ese idia pididia, bena pulisi ese danu idia pididia.

Unai heatu lalonai taunimanima 10 idia mase bona haida idia bero. Unai murinai, dina 50 lalodiai, pulisi handred handred mai edia ipidi ese unai magu idia koua hegege. Bena dogodiatao totona idia vareai neganai taunimanima 86 idia mase, idia 17 be memero bona kekeni.

Pulisi edia inai taudia be daidia? Drug hoihoilaidia taudia a, eiava gavamani tuari henia oreana ta, a? Lasi. Edia “inai taudia” be tomadiho oreana ta taudia. Unai orea maragina taudia Texas, U.S.A. ihuana ena taora ai edia hisihisi dainai bese idauidau taudia ese idia lalodia momo. Niuspepa bona TV oreadia ese idia ripotilaia momo bona ena anina idia herevalaia, idia gwau unai bamona tomadiho oreadia ese dika bada idia havaraia diba.

Ma idia gwau, guna unai bamona oreadia hakaudia taudia haida ese edia orea taudia mase lalonai idia hakaudia vareai: 1969 ai, California ai, Manson ena orea taudia idia ala-ala; 1978 ai, Jonestown, Guyana ai tomadiho oreana ta taudia iboudiai be sibodia idia alaia mase; 1987 ai, Korea ai tomadiho oreana ta hakaua hahinena, Park Soon-ja, ena lalo-ani dainai ena orea taudia 32 be sibodia idia alaia mase. Unai taudia momo idia gwau idia be Keristen bona Baibel idia abia dae.

Baibel be Dirava ena Hereva idia gwauraia bona idia matauraia taudia momo be idia badu, unai orea ese ena hereva idia gaukaralaidia kerere dainai. Unai dainai orea momo idia haginidia, unai tomadiho oreadia edia kara do idia tahudia bona edia kara dikadia do idia hahedinaraidia totona. Edia kara idia diba momo taudia idia gwau lagani 2000 do ia ginidae neganai, reana unai ese unai bamona tomadiho oreadia do ia hamomodia. Magasin ta ia gwau, unai orea idia agenisi henidia oreadia be idia gwau unai orea tausen tausen idia noho; “idia hegaegae, emu tauanina do idia dabaia, emu darana do idia biagua, bona emu lalona do idia hakererea. . . . Haida mo be mai edia ipidi, to idia momo ese dika do idia havaraia diba.”

Hari Tomadiho Oreadia Idaudia

Nao gado ai unai bamona orea be “cult” idia gwauraidia, to tomadiho hahedibalaia taudia haida ese unai hereva idia gwauraia lasi, daradara do ia vara garina.

The World Book Encyclopedia ia gwau: “Gunaguna, tomadiho daladia idauidau iboudiai be idia gwauraidia cult.” Unai hegeregerena, tomadiho oreadia iboudiai be unai bamona idia gwauraidia be maoro. To unai buka be ma ia gwau: “Lagani 1950 murinai unai hereva ena anina idia haidaua. Hari inai negai ena anina be inai: Tomadiho oreana ta; orea taudia ese edia hakaua tauna, ia mauri noho bona hahediba herevadia matamatadia bona idaudia ia hadibalaidia tauna, be idia gavaia noho.”

Newsweek magasin ese unai ia hamomokania; ia gwau: “Unai bamona oreadia momo be maragi bona idau herea; orea taudia be lalo-siahu tauna tamona ese ia hakaudia bona edia lalodia ia hagoadadia.” Unai hegeregerena, Asiaweek magasin ia gwau: “Hari hereva [cult] ena anina be . . . tomadiho dalana matamatana ta; idia gavaia taudia be lalo-siahu tauna tamona ese ia hakaudia bona edia lalodia ia anidia, reana ia gwau ia be Dirava.”

U.S.A. ai, Maryland provinsi ena palamen ese ia halasia herevana danu ese unai bamona oreadia ia gwauraidia dika. Palamen taudia idia gwau bou, idia gwau: “Unai bamona oreadia taudia ese taunimanima ta o lalohadai ta idia badinaia dikadika, bona dala kereredia amo taunimanima edia lalodia idia anidia bona idia biagudia, edia hakaua tauna ena palani hagugurudia totona.”

Unai ese ia hahedinaraia goevagoeva unai bamona idia gwauraidia oreadia be tomadiho oreadia mai edia lalohadai idau hereadia bona mai edia kara idau hereadia. Idia momo ese edia tomadiho karadia idia karadia hehuni. Idia momo be taunimanima oredia amo idia siri bona sibodia edia hanua maragidia ai idia noho hebou. Taunimanima ta, ena dagi be ia sibona ese ia haginia tauna, be idia gavaia vaitani mai edia lalodia iboudiai ida. Unai hakaua taudia momo idia gwau Dirava ese ia abidia hidi, o idia gwau idia be dirava bamona.

Unai orea idia agenisi henidia oreadia be nega haida idia gwau Iehova ena Witness taudia edia orea danu be unai bamona. Vanegai hereva haida be niuspepa ai idia halasidia, idia gwau Iehova ena Witness taudia be unai tomadiho kerere oreadia ta. To Iehova ena Witness taudia be unai bamona idia gwauraidia be maoro a? Unai tomadiho oreadia taudia momo ese edia turadia bona edia varavaradia bona taunimanima oredia iboudiai danu idia dadaraidia bena sibodia idia noho hebou. Iehova ena Witness taudia be unai bamona idia karaia a? Idia ese koikoi daladia kereredia amo taunimanima be edia orea lalonai idia veridia vareai, a?

Unai orea hakaudia taudia ese edia orea taudia edia lalodia idia anidia mai edia aonega dikana ida. Vadaeni, gau ta ese ia hahedinaraia Iehova ena Witness taudia be unai bamona idia karaia, a? Idia tomadiho hehuni a? Taunimanima ta idia gavaia bona idia tomadiho henia, a?

[Picture Credit Line on page 3]

Jerry Hoefer/Fort Worth Star Telegram/Sipa Press