Ena Lalona Ena Ura Ia Abia

OI URA Mesia ena Basileia be tanobada ibounai do ia lohiaia be do oi itaia, a? Bema oibe, Dirava ese ia gwauhamatalaia hahenamodia, unai guba Basileiana henunai tanobada ai do idia vara gaudia, oi ura henidia bona oi gurigurilaidia. Mani oi haheauka, badina be “ia hagugurua urana be mauri auna.”​—Hereva Lada-isidia 13:12; Iakobo 5:​7, 8.

Lagani 2,000 bamona gunanai, “kara maoromaoro tauna bona Dirava dekenai ia gari tauna” ladana Simeon be Ierusalem ai ia noho. Mesia perovetalaia herevadia ia abidia dae bona “Israel dekenai Hamauria Tauna ia naria noho” mai ena haheauka ida.​—Luka 2:25.

Mesia Herevadia ese Helaro Idia Henia

Iehova ese Mesia perovetalaia herevana ginigunana ia gwauraia, do idia mase taudia mai edia kara dika be helaro namona ia henidia. Dirava ese “hahine,” iena guba oreana unai, ena garana ia perovetalaia.​—Genese 3:15.

Baibel ia gwau unai garana be Abraham ena, bona Iakobo ese ena mai ia perovetalaia. (Genese 22:​17, 18; 49:10) Salamo ese Mesia ena Basileia ena hairai idia gwauraia. (Salamo 72:​1-20) Isaia ia gwau hari Garana be haneulato rami-hebouna amo do ia vara, bona Mika ia gwau Betelehem ai do ia vara.​—Isaia 7:14; Mika 5:2.

Mesia Ia Do Mai Lasi!

Nega gunana ta mani oi laloa​—unai neganai Iesu ena vara negana be kahirakahira. Lagani 4,000 gunanai Dirava ese Mesia ia perovetalaia vadaeni. Babulono taudia ese Iehova ena dubu idia hadikaia ore vadaeni, Iuda taudia edia tano amo idia hakaudia oho vadaeni bena lagani 70 lalodiai Babulono ai idia noho, bona ma lagani 500 mai kahana ai idau bese lohiadia edia siahu henunai idia noho vadaeni. To, Mesia ia do mai lasi!

Dirava garina idia gari Iuda taudia ese Mesia ena mai idia naria mai edia ura bada ida! Iena amo idia bona bese iboudiai ese hahenamo do idia abidia.

Dirava Garina Ia Gari Tauna Ta

Iuda taudia, Dirava garina idia gari bona Mesia ena mai idia naria mai edia ura bada ida bona idia gurigurilaia taudia, ta be Simeon. Ia be tau burukana, Iehova ena hesiai tauna mai ena kamonai, Iudea ena siti badana ai ia noho.

Dirava ena lauma helaga ese Simeon ia hamaoroa vadaeni do ia mase lasi ela bona Mesia ai do ia lao Tauna do ia itaia. Dina haida idia ore, hua haida idia ore, bona hari tau burukana, Simeon, ena mauri dinadia idia ore gwauraia. Dirava ena gwauhamata ena anina do ia vara, a?

Dina ta (lagani 2 B.C.E. ai), tau ta mai ena adavana bona mai edia beibi be Betelehem amo idia mai dubu. Lauma helaga ese Simeon ia hamaoroa nega daudau ai ia naria dinana be unai. Ena goada hegeregerena ia lao haraga dubu, peroveta taudia ese idia gwauraia Tauna do ia itaia totona. Unuseniai, Iosepa, Maria, bona mero maragina ia itadia.

Mai moalena ida Simeon ese mero maragina Iesu ia abia, ia rosia! Inai be idia perovetalaia Mesiana​—Iehova ena Keriso. Ia buruka momokani dainai, Simeon ia diba Iesu ese ena gaukara tanobada ai do ia hagugurua neganai do ia itaia lasi. To, ia moale badina be Iesu ia beibi neganai ia itaia. Mesia perovetalaia herevadia edia anina idia vara matamaia. Simeon ia moale dikadika! Ena lalona be hegeregere mase ai do ia mahuta ela bona toreisi-lou negana.​—Luka 2:​25-28.

Simeon Ena Peroveta Herevadia

Simeon ese Iehova ia hanamoa, ia gwau: “Lohiabada e, oiemu hesiai tauna harihari mase dekenai mai maino danu do lau lao, oiemu gwauhamata hegeregerena. Badina be egu matana ese oiemu hahemauri ia itaia vadaeni. Oi ese oi karaia hegaegae vadaeni taunimanima ibounai edia vairana dekenai. Ena diarina be inai, bese idauidau dekenai diari henia totona. Bona ia ese hairai bada oiemu bese Israel taudia dekenai do ia henia.” Iesu ena tamana sinana, Iosepa bona Maria, ese unai hereva idia hoalaia.​—Luka 2:​29-33.

Simeon ese Iosepa bona Maria ia hanamodia, ia ura Iehova ese do ia durudia, edia maduna edia mero maragina dainai do idia huaia. Bena Maria ia hamaoroa, ia gwau: “Inai mero Iesu ese Israela taudia momo do ia hamorua, bona momo do ia hatorea isi. Ia be toa bamona do ia lao, bona taunimanima momo ese ia do idia herevalaia mai edia laloa dika danu. Unai dekena amo ia ese edia laloa hunia gaudia do ia hedinaraia. To lalohisihisi ese kaia bamona emu lalona do ia gwadaia.”​—Luka 2:​34, 35.

Simeon Ena Hereva Maria Dekenai

Maria ena mamina mani oi laloa. Simeon ena hereva ena anina be dahaka? Haida ese Keriso do idia abia dae bena do ia hatoredia isi. To, haida ese do idia dadaraia, ia dainai do idia hekwakwanai, bena do idia moru. Peroveta herevana hegeregerena, Iesu be Iuda taudia momo edia hekwakwanai nadina ai ia lao. (Isaia 8:14; 28:16) Simeon ena hereva ena anina be taunimanima idauidau ese dala idauidau ai Iesu do idia kara henia, unai amo edia lalohadai ia dekenai do idia hahedinaraia, bena Dirava ese do ia gwauraidia namo eiava dika. Idia abia dae lasi taudia dekediai ia be toa ai ia lao, do idia herevalaia mai edia lalo-dika ida. Kara dika bona kerere lalodiai idia mase taudia bema Iesu idia abidadama henia, do ia hatoredia isi, bena Dirava vairanai do idia maoromaoro. Taunimanima edia kara Mesia dekenai ese edia lalohadai do idia hahedinaraia.

Simeon ena hereva, “Lalohisihisi ese kaia bamona emu lalona do ia gwadaia,” ena anina be dahaka? Taunimanima momo ese Iesu do idia dadaraia dainai, Maria ena lalona do ia hisihisi. Bona Iesu be satauro ai ia noho ia itaia neganai, ena lalona ia hisihisi bada! Unai be kaia ese ia gwadaia bamona.

Mesia Herevadia Ia Gwauraidia

Dirava ena lauma amo Simeon ia gwau Mesia perovetalaia herevadia ese Iesu idia gwauraia. Simeon be mai mainona ida do ia mase, ‘badina be ena matana ese Dirava ena hahemauri ia itaia vadaeni. Ia ese ia karaia hegaegae vadaeni taunimanima ibounai edia vairana dekenai. Ena diarina be inai, bese idauidau dekenai diari henia totona. Bona ia ese hairai bada Iena bese Israela taudia dekenai do ia henia.’ (Luka 2:​30-32) Unai be Isaia ena peroveta herevana hegeregerena.

Isaia ia gwau: “Iehova ena hairai do ia hedinarai, bona taunimanima iboudiai ese do idia itaia hebou.” “Lau [Iehova] ese bese idauidau edia diari ai oi [Mesia] lau halaoa, egu hahemauri be tanobada dokona ai do ia lao totona.” (Isaia 40:5; 42:6; 49:6; 52:10) Keristen Greek Revarevadia bona idia vara vadaeni gaudia ese idia hamomokania, Mesia, Iesu Keriso, be bese idauidau edia diari korikorina, lauma diburana kokia bona taunimanima hamauridia Tauna.

Baibel ese Simeon ena sivarai ma haida ia gwauraia lasi. Toana be ia mase guna, gabeai Keriso ese guba maurina ena dala ia kehoa. Nega daudau lasi, Iesu ese do ia hatorea isi bena tanobada ai do ia mauri lou. Ia​—bona oi​—be moale bada do umui abia diba tanobada matamatana ai, Dirava ena Mesia ena Basileia henunai!