Ia Koikoi Diba Lasi Diravana ese Lau Ia Hagoadaia

MARY WILLIS ESE IA SIVARAILAIA

Lagani 1932 ai, Western Australia ena gunika ai, bisinesi momo idia dika, tanobada hegegemadai idia dika hegeregerena. Unai neganai egu lagani be 19 mo neganai, lau bona Ellen Davies idia siaimai, gabu bada hereana lalonai do ai haroro totona. Taoni maragina ladana Wiluna ai ai gaukara matama. Unai taoni bona aiemai siti Perth edia padadia be kilomita 950 bamona.

AI LAO henia neganai, tereini ta ai ai gui bona ena gadi tauna ida ai helai hebou. Tereini idia hastopua gabudia ta ta ai, ia hamaoromai miniti hidi do ia gini. Unai dainai ai be mai emai dala, do ai diho bona unai hanua maragidia idia noholaidia taudia do ai haroro henidia. Maini taonina Wiluna ai ai ginidae neganai, lai ese kahu ia odaia badabada noho.

To tereini hastopua gabuna bona taoni edia padadia be kilomita toi bamona. Ai ruaosi ai goada lasi, bona ai be mai emai buka mauadia metaudia toi bona mai emai sutkeisi rua. Vadaeni maua ta be au ta ai ai kwatua, bena ai ruaosi be nega tamona ai huaia. Maua ta ta ena nega ena nega ai unai bamona ai huadia lao, bena dokonai sutkeisi ruaosi ai huadia lao. Ai huadia noho lalonai, ai laga-ani loulou, badina be ai emai imadia idia hisihisi bada.

Ena be kahu be bada bona emai imadia idia hisihisi bona emai aedia edia goada ia ore, to ai moale. Ai laloa Iehova ese ai ia bamoa bona ai ia durua, unai hekwarahi ai haheaukalaia totona. Bena ai itaia emai gaukara ia hanamoa, badina be emai hekwarahi dainai Bob Horn ese Baibel ena hereva ia abia dae. Ai moale, badina be lagani haida lalodiai Betele ai ia gaukara bona lagani 50 bamona lalodiai Iehova ena hesiai ia lao henia mai ena kamonai ida, ela bona lagani 1982 lalonai ia mase.

Wiluna amo ai laolao, hanua maragidia ai ai haroro, ela bona Geraldton ai ai ginidae, bena ai giroa lou Perth. Unai taoni ruaosi edia padadia be kilomita 725. Hanuaboi haida ai be tereini naridia gabudia ai ai mahuta, bona nega ta ai be tereini ena dala badinai ai mahuta.

Pilo pusena ta ai laohaia, ia lalonai be bisikesi, ai sibomai ai gabudia gaudia. Idia be emai aniani, emai laolao ena kahana ginigunana ai. Nega haida hotele ai disi ai huridia o foloa ai hagoevadia, aiemai aniani ena davana. Ma nega haida dina ena siahu ai pi o bini ai gogodia. Baibel bukadia idia abidia dae taudia idia henimai monina amo heduru ai abia danu.

Unai dinadia ai Iehova lau abidadama henia noho bona hekwarahi momo lau haheaukalaidia, badina be guna lau maragi neganai sinagu ese dala namona ia haheitalaigu bona ia hadibalaigu dainai.

Keristen Ahuna

Egu sinana ese Dirava ia abidadama henia goada, bona ai maragi neganai ia herevalaia loulou ai dekenai. To emai taihuna be sikuli ai aksiden ta dainai ia mase neganai, unai ese ena abidadama ia tohoa. To Dirava ia lalo dika henia lasi; Baibel ia stadilaia goadagoada, unai bamona kereredia edia badina do ia dibaia totona. Unai ia dibaia, bena lagani 1920 murinai ia ese Dirava momokanina, Iehova, ia gwauhamata henia bona bapatiso ia abia.

Bena ia be ai ida ai herevahereva negadia momo ai, ia hamaoromai loulou Dirava ena gwauhamata do idia momokani. Ia hagoadamai, herevana dahaka do ia vara, do ai laloatao ‘Dirava ia koikoi diba lasi.’ (Tito 1:2) Unai dainai lau bona egu tadina bona egu taihuna rua, bona emai ruma besedia bona emai tubudia danu, be Iehova Dirava hanamoa taudia, hari inai nega lalonai. Egu tadina ena natuna rua, Alan bona Paul Mason, be distrik bona sekit gaukaradia idia karaia noho.

Lau Ura Do Lau Haroro

Lau sikuli namonamo lasi, bona lagani 1926 lalonai, egu lagani be 13 neganai, sikuli lau rakatania. To lau ura bada Baibel ena hereva be taunimanima do lau hadibalaidia. Tamagu ia laloa egu diba be hegeregere lasi, to Sinagu ia gwau: “Ena be Aramagedono tuarina herevana bona manau taudia ese tanobada do idia abia herevana mo do ia hamaorolaidia, to unai amo Dirava ena Basileia do ia harorolaia.” Unai dainai ruma ta ruma ta ai lau haroro matama, to bapatiso lau abia lasi ela bona lagani 1930. Unai murinai lau be Perth kahirakahira gabudia ai pioneer gaukarana lau karaia matama.

Lagani 1931 lalonai ai ese emai ladana matamatana Iehova Ena Witness Taudia ai gaukaralaia matama. Ena be taunimanima momo ese inai lada idia badulaia bona ia dainai idia dagedage henimai, to haroro gaukarana lau karaia noho. Lau diba momokani Dirava ena gwauhamata, goada be ena hesiai taudia do ia henidia gwauhamatana, be koikoi lasi.​—1 Petero 4:11; Filipi 4:13.

Ai Diba “Hutuma Bada Herea” be Daidia

Lagani 1935 lalonai, lau idia siaia, Australia tanobadana unukahanai do lau gaukara totona. Bena lagani momo lalodiai New South Wales ena New England distrik ai pioneer gaukarana lau karaia. Unai gabu bona Perth edia padadia be kilomita 4,000.

Guna, Memorial ai Iesu ena mase idia laloa lou negadia ai, lau ese paraoa lau ania bona uaina lau inua. Ena be unai nega lalonai idia laloa pioneer taudia be unai bamona idia karaia be maoro, to guba helarona lau abia dae vaitani lasi. Bena, lagani 1935 lalonai, ai idia hadibaia goevagoeva Keriso ese hutuma bada herea ia gogodia, edia helaro be tanobada ai do idia mauri ela bona hanaihanai. Ai momo ai moale, badina be emai lalona idia parara ai be unai hutuma bada herea taudia, bena paraoa bona uaina ai abidia lou lasi. (Ioane 10:16; Apokalupo 7:9) Iehova ena gwauhamata hegeregerena, Baibel ena hereva momokani diarina ia bada ia lao noho.​—Hereva Lada-isidia 4:18.

Haroro Daladia Matamatadia

Lagani 1937 lalonai, ai ese pikap be haroro gaukarana ai ai gaukaralaidia matama. Unai dainai emai basikele ai pata ai karadia, idia latadiai pikap metaudia mo sibodia lasi, to rekodi bona emai buka baegedia danu do ai atodia totona. Gau iboudiai be egu basikele ai lau atodia murinai, lau naria namonamo, badina be, bema ia moru, ena metau bada dainai lau abia isi lou diba lasi!

West Lau Lou Henia

Lagani 1940 murinai, Western Australia lau lou henia, taoni maragidia ai pioneer gaukarana lau karaia. Iniseniai ekspiriens namodia bona lauma hahenamodia lau abidia noho. Northam kahirakahira ai, lau ese ruma hahinena ta, Flo Timmins, lau davaria. Buka ta ladana Reconciliation ia abia dae, bena nega daudau lasi ia be Iehova Dirava ena Witness hahinena ai ia lao. Basileia gaukarana ia karaia noho ema bona hari, bona ena natuna kekenina, unai neganai ena lagani be hani mo, be gabeai ia bada neganai, special pioneer ai ia lao.

Idia vara gaudia haida lau lalodiaboio diba lasi. Nega ta, hosi ese ia veria gauna ta ai ai gui, bena nese hanai ta ai hanaia neganai, hosi ia gari dainai ia heau lalo-dika neganai, ai gari bada. Avon Sinavaina ai hanaia, bena hosi be kilomita ta mai kahana ia heau murinai, ena heau ia hadokoa.

Headava Bona Ruma Besena

Lagani 1950 ai, Arthur Willis lau adavaia, ia danu be lagani momo lalodiai pioneer gaukarana ia karaia vadaeni. West Australia ena taoni maragina Pingelly ai ai noho, emai natudia, mero ta ladana Bentley bona kekeni ta ladana Eunice, be ai havaradia. Sikuli amo idia doko gwauraia neganai, Arthur ese ena lalona ia hadaia pioneer gaukarana do ia karaia lou. Ena haheitalai namona ese emai natudia ia hagoadadia, bena idia hegeregere neganai, maoromaoro regular pioneer taudia ai idia lao.

Nega momo Arthur ese ia hakaudia lao, hanua maragidia ai do idia haroro totona. Nega haida, pura ta lalonai idia loaloa bona hanuaboi ai idia kamepa. Unai negadiai lau be ruma ai lau noho, emai bisinesi lau naria, unai dainai idia toiosi be pioneer gaukarana idia karaia diba.

Taunimanima Koremadia Bogaragidiai

Daba ta ai, idia be edia laolao ta amo idia lou mai vadaeni neganai, tau koremana ta be emai ruma ai ia ginidae. Ia henanadai, ia gwau: “Edena bamona do lau kara bena do lau lou mai diba?” Matamanai ai daradara, bena Arthur ena lalona ia parara, guna Keristen kongregesen amo idia atoa siri badina be ia inuinu kekero dainai. Unai nega murinai ena ladana be dika herea, badina be ia inuinu momo bona moni ia abia torehai loulou.

Arthur ese ia hamaoroa dahaka dahaka do ia karaia bena Iehova ena orea goevana lalonai do idia abia dae lou. Bena ia raka oho, bona ai ibounai ai diba lasi edena bamona do ia kara. Hua gabedia ai ia karaia karadia ai hoalaidia bada! Ena inuinu momo karana ia rakatania, bona taunimanima ia vadivadi henidia, guna idia edia amo ia abia torehai monina ia gwauraia, bena ia haloua! Hari inai negai ia be eda tadikaka ta abidadama ai, bona nega ta pioneer gaukarana ia karaia.

Pingelly ai be taunimanima koremadia momo, bona ai ese unai lalo-manau taudia ai durudia, Dirava ena hereva momokani do idia dibaia bona do idia abia dae totona. Unai gaukara, Australia ena taunimanima koremadia momo be hereva momokani hadibalaidia gaukarana, ese egu abidadama ia hagoadaia momokani!

Kongregesen ta be Pingelly ai ai hamatamaia, bona matamana neganai kongregesen taudia momo be taunimanima koremadia. Idia momo be duahiduahi bona toretore daladia ai hadibalaidia. Unai neganai taoni taudia momo ese idia lalo dika henidia, to Witness taudia ai idia lao taudia be gabeai idia matauraidia, edia noho goeva bona edia kara momokani dainai.

Iehova ese Ia Durugu Hanaihanai

Lagani 1986 lalonai, egu adavana lalokauna, Arthur, lagani 57 lalodiai Dirava ena hesiai ia lao henia mai ena kamonai ida tauna, be madi ia mase. Bisinesi taudia iboudiai Pingelly ai ese idia matauraia bada, bona unai distrik taudia danu ese. Unai neganai danu Iehova ese ia durugu; goada ia henigu, Arthur ena mase lau haheaukalaia totona.

Egu natuna, Bentley, be elda ta, Western Australia ena not kahana ai. Unuseniai, ia bona ena adavana, Lorna, ese edia ruma besena be hereva momokani lalonai idia naridia. Lauegu moale bada ena badina ma ta be, egu natuna hahinena, Eunice, ese pioneer gaukarana ia karaia noho ema bona hari. Ia bona ena adavana, Jeff, be pioneer taudia. Lau be idia ida ai noho, bona lau be heduru pioneer gaukarana lau karaia hanaihanai diba dainai, hahenamo lau davaridia.

Iehova ia gwauhamata mai ena lalokau ida, ia gwau ena hesiai taudia do ia hagoadadia, hisihisi idauidau do idia haheaukalaidia diba totona, bona lagani 60 mai kahana lalodiai unai gwauhamata be momokani lau dekenai. Bema Dirava ita daradaralaia lasi bona ena heduru ita laloa namonamo, eda dabu gaudia iboudiai ita ia henia. Ena imana gaukarana ena mamina lau abia lalonai, unai ese egu abidadama ia hagoadaia, bona lau itaia iena hahenamo ese iseda lalo-parara ia hereaia. (Malaki 3:10) Momokani, Dirava ia koikoi diba lasi!

[Picture on page 27]

Mary, lagani 1933 ai

[Picture on page 29]

Mary bona Arthur, idia buruka neganai