Ena be Ia Buruka to Iehova Ia Hesiai Henia Diba

BURUKA taudia momo idia laloa idia vairadiai idia noho laganidia lalodiai do idia moale lasi. Taunimanima momo ese idia diba muvini piksa gaukara hahinena ta ia gwau: “Lauegu mauri dalana lau karaia kerere, bona lau haidaua diba lasi . . . Lau sibona lau raka loaloa neganai, egu mauri dalana lau laloa, bona lau karaia dalana lau moalelaia lasi . . . Gabu iboudiai dekenai lau lao neganai lau hesiku, bona lau noho namo diba lasi.”

Lagani 2,000 bona ma haida gunanai ia noho hahine burukana ta be unai hekwakwanai ia davaria lasi. Ia be lagani 84 vabu ta, to ia gaukara diba, ia moale, bona ena Dirava ese ia lalo-namo henia bada. Iena ladana be Ana, bona ia moale be mai ena badina namona. Unai be dahaka?

“Dubu Helaga Ia Rakatania Lasi”

Evanelia buka ta ia torea tauna Luka be Ana ena sivarai ia gwauraia. Ia gwau: “Peroveta hahinena ta danu ia noho, ena ladana be Ana, Fanuela ena natuna, Asere ena iduhu hahinena.” Ia be peroveta hahinena dainai, Dirava ena lauma helaga, eiava iena gaukara siahuna, be dala idauna dekenai ia gaukaralaia diba. Bona ita laloa bada negana ta Ana be mai ena dala namona ia peroveta totona.

Luka be ma ia gwau: “Ia be hahine buruka, ia headava, lagani 7 ena adavana danu idia noho nega tamona. Bona unai murinai ia be lagani 84 vabu ia noho.” (Luka 2:​36, 37) Sedira, Ana be do hahine matamata neganai vabu ai ia lao. Herevana edia lagani be dahaka to edia lalokau adavana ia mase neganai Keristen hahine idia lalohisihisi bada herea. To, iseda nega ai Dirava idia badinaia hahine momo hegeregeredia, unai lalo-metau gauna ese Ana ia koua lasi Dirava ia hesiai henia totona.

Luka ia gwau Ana be Ierusalem lalonai “Dubu Helaga ia rakatania lasi.” (Luka 2:37) Ia diba momokani Dirava ena ruma dekenai hesiai gaukara ia karaia neganai hahenamo bada ia davaria diba. Ena kara ese idia hahedinaraia, Israel ena salamo torea pavapavana David bamona, ia be Iehova dekenai gau tamona sibona ia noia. Unai be dahaka? David ena ane lalonai ia gwau: “Gau tamona mo Iehova dekenai lau noia, unai mo do lau tahua; Iehova ena ruma ai do lau noho, egu mauri dinadia iboudiai; Iehova ena hairai do lau itaia, bona mai egu hemataurai ida iena dubu do lau raraia.” (Salamo 27:4) Unai dala dekenai danu, Ana be hari inai nega ena Keristen hahinedia bamona, Iehova ena tomadiho gabuna dekenai idia lao hanaihanai karana idia moalelaia.

Ana be dina bona hanuaboi lalonai Iehova ena hesiai helagana ia karaia. Unai ia karaia neganai “ia guriguri noho, aniani ania lasi ena taravatu ia badinaia noho,” bona unai ese ia hahedinaraia ia taitai bona ia karaia mai ena kudouna ibounai ida. (Luka 2:37) Lagani edia siahu handred momo lalodiai Iuda taudia be Idau Bese Taudia edia siahu henunai idia noho, bona dubu lalonai bona hahelaga taudia danu be tomadiho karana idia karaia kerere, reana unai dainai Ana be Iehova Dirava dekenai ia guriguri bona ia aniani lasi. To ia moale be mai ena badina danu, badina lagani 2 B.C.E. dinana ta ai gau idauna ta ia vara.

Ia Diba Lasi Do Ia Vara Hahenamo Ta

Unai anina bada dinana ai, ia be beibi neganai, Iesu ena sinana, Maria, bona iena heubu tamana, Iosepa, be Ierusalem ena dubu dekenai Iesu idia mailaia. Buruka tauna Simeona ese unai beibi ia itaia bona unai negana ai peroveta hereva ia gwauraia. (Luka 2:​25-35) Vaia ena kara bamona Ana be dubu dekenai. Luka ia gwau: “Unai nega korikori dekenai ia danu ia ginidae.” (Luka 2:38) Ana ia moale bada herea badina iena buruka matadia ese gabeai Mesia ai do ia lao tauna ia itaia!

Dina 40 gunanai, Betelehem kahirakahira idia noho mamoe naria taudia idia hoa Dirava ena aneru be inai bamona ia hereva neganai: “Hereva namona lau mailaia vadaeni, taunimanima ibounai idia moale totona. Badina be hari inai dina, [David] ena hanua dekenai, umui emui Hamauria Tauna ia vara vadaeni, Keriso Lohiabada unai.” Guba anerudia momo be Iehova idia hanamoa bona idia gwau: “Atai momokani dekenai Dirava do ita hanamoa, bona tanobada dekenai be maino, Dirava ia moale henidia taudia ese inai maino do idia abia.” (Luka 2:​8-14) Unai hegeregerena, Ana be gabeai Mesia ai do ia lao Tauna dainai ia haroro!

Beibi Iesu ia itaia neganai, Ana be “Dirava dekenai ia hanamoa, bona Ierusalema hamauria totona idia naria noho taudia dekenai inai mero ena sivarai be ia ese ia hamaoroa.” (Luka 2:38) Buruka tauna Simeona hegeregerena, Ana danu be hahenamo ia abia badina beibi Iesu be dubu dekenai ia itaia; ia be idia gwauhamatalaia Hahemauri Tauna ia ura bada, ia totona ia guriguri noho, bona ia naria noho. Iesu be unai Tauna ia diba be sivarai namona dainai, ma haida hamaorodia totona idia koua diba lasi.

Ena be Ana ia laloa sedira Iesu ia bada neganai ia do mauri noho lasi, dahaka ia karaia? Mai moale danu ma haida ia haroro henidia, dahaka hahemauri do idia abia unai Mesia tauna ia mai neganai ia harorolaia.

Ana Ena Haheitalai Namona

Tanobada dekenai tomadiho taudia hida be lagani 84 idia abia neganai unai bamona do idia haroro, eiava hanuaboi bona dina ai tomadiho idia karaia? Reana unai lagani idia do abia lasi neganai, gaukara rakatania monina do idia noia. Ana bona Simeona be idau. Iehova ena buruka hesiai taudia iboudiai dekenai idia be haheitalai namodia. Momokani, Iehova ena tomadiho rumana idia ura henia bada bona mai edia kudou ibounai ida Iehova idia hanamoa.

Ana be Dirava badinaia vabu hahinena dainai ena haheitalai be namo. Luka be unai manau buruka hahinena ia gwauraia dalana be 1 Timoteo 5:​3-16 ia gwauraia vabu namona ena kara ia gwauraia dalana hegeregerena. Unuseniai aposetolo Paulo ia gwau unai bamona vabu “ia guriguri henia noho, bona Dirava ena durua ia noia noho dina bona hanuaboi ibounai,” ia be “tau tamona ia adavaia,” bona “kara namodia ibounai ia goadalaia.” Ana be unai bamona hahine.

Hari inai negai, tanobada hegegemadai Iehova ena Witness taudia edia kongregesen tausen momo lalodiai, ita davaria abidadama buruka vabu hahinedia be hanuaboi bona dina ai Dirava idia hesiai henia mai edia helaga danu. Ita moale bada badina hari inai negai “Ana bamona” hahinedia be ita bogaragidiai idia noho!

Idia buruka neganai danu, tatau bona hahine be Dirava dekenai idia gwauhamata henia bona ranu bapatiso amo unai idia hahedinaraia diba. Ita gwau lasi buruka taudia be Iehova idia hesiai henia diba lasi, eiava iena Mesia Basileiana idia harorolaia diba lasi. Unai Basileia be guba dekenai hari ia lohia bona nega sisina murinai kamonai taudia dekenai hahenamo momo do ia mailaia diba. Dirava dekenai hesiai gaukara helagana idia karaia buruka taudia idia hamomokania Iehova be idia ia hanamoa, lagani handred momo gunanai Ana ese hahenamo bada ia abia hegeregerena. Ena be ia buruka, to Iehova ia hesiai henia bona iena ladana helagana ia hanamoa​—bona hari idia noho buruka taudia danu be unai idia karaia diba.