Basileia Haroro Ripoti

Latvia Taudia ese Sivarai Namona Idia Kamonai

BAIBEL ese ia hahedinaraia goevagoeva Dirava ena ura be “taunimanima ibounai ese mauri do idia davaria, bona hereva momokani do idia diba.” (1 Timoteo 2:⁠4) Lagani momo lalonai, idia be dala lasi sivarai namona idia kamonai taudia, be hari sivarai namona idia kamonai noho! Latvia dekenai, tanobada ena kahana ma haida dekenai hegeregerena, mauri lagani bona noho daladia idauidau taudia ibounai be sivarai namona idia kamonai noho, henunai idia noho ekspiriens ese idia hahedinaraia bamona.

• Latvia ena ist kahana dekenai ia noho taoni ta ladana Rēzekne dekenai, sinana ta bona ena natuna kekeni be gabu ta ena dala totona hahine ta idia nanadaia. Idia dekenai dala ia hahedinaraia murinai, unai hahine, ia be Iehova ena Witnes hahinena ta, ese idia ia boiria Witnes taudia edia hebou dekenai idia lao totona.

Unai sinana bona ena natuna kekeni be tomadiho idia laloa bada dainai, edia lalona idia hadaia hebou dekenai do idia lao. Dala dekenai idia gwauhamata bema unuseniai gau kererena ta idia itaia, unai gabu do idia rakatania haraga. To, hebou idia ura henia bada dainai, unai gabu rakatania lalohadaina idia abia lasi. Baibel stadi idia abia dae, bona hanaihanai hebou dekenai idia lao. Hua toi sibona murinai, edia ura haroro gaukara karaia totona idia hahedinaraia bona edia bapatiso negana idia naria.

• Latvia ena west kahana dekenai ia noho siti ta dekenai, Witnes ta ese mauri lagani 85 hahine burukana ta ladana Anna ia hedavari henia, ena ura bada ia hahedinaraia bona Baibel stadi ia abia dae. Ena natuna kekeni bona ruma bese taudia ma haida ese ia idia koua auka. To, unai kara eiava ia buruka bona ia gorere momo ese Anna ia koua lasi to ena Baibel stadi ia karaia noho.

Dina ta Anna ese ena natuna kekeni ia hamaoroa bapatiso do ia abia. Anna ena natuna kekeni ia gwau: “Bema bapatiso oi abia, buruka taudia naria rumana dekenai oi do lau siaia.” To, unai hagaria herevana ese Anna ia koua lasi. Ena tauanina ia goada lasi dainai, ena ruma dekenai bapatiso ia abia.

Unai kara dainai Anna ena natuna kekeni be edena bamona ia kara? Ena lalohadai ia haidaua, bona bapatiso murinai ena sinana totona aniani namona ia hegaegaelaia. Bena ena sinana ia nanadaia, “Hari oi bapatiso vadaeni dainai, emu mamina be edena bamona?” Anna ena haere be dahaka? “Beibi matamatana bamona!”

• December 1998 lalonai, Witnes taudia rua ese guna idia gwauraia Soviet Union ena ritaea ami opesa ta idia hedavari henia. Havaraia Tauna ta ia noho be ia abia dae dainai, Baibel stadi ia abia dae bona gabeai ena hahine danu be stadi lalonai ia vareai. Lauma dalanai idia tubu haraga bona daudau lasi murinai bapatiso lasi pablisa ai idia lao. Gabeai, siahu negana lalonai, guna opesa tauna ese bapatiso ia abia. Unai tau mai ena adavana ese lauma gaudia idia ura bada dainai kongregesen taudia ibounai idia hagoadaia. Ma danu, edia noho gabuna dekenai ia noho rumana ta be Kingdom Hall namona ta ai idia halaoa neganai, unai gaukara idia durua.