Dahaka Dainai Tomadiho Oi Laloa be Namo?

TANO idauidau iboudiai lalodiai, taunimanima ese tomadiho idia laloa. To momo idia gwau tomadiho idia laloa lasi. Guna danu unai bamona idia laloa a?

Taunimanima edia kara korikori be tauanina gaudia sibodia idia moalelaidia lasi. Lauma gaudia danu idia abidia be namo. Bema dina dina iboudiai tauanina durua gaudia idia abidia bona nega ta ta idia laga-ani, idia be gau ta ai idia do dabu, unai dainai edia lalodia idia moale momokani lasi. Boroma be idau, taunimanima hegeregeredia lasi. Taunimanima idia ura inai do idia diba, ‘Mauri ena anina be dahaka?’ ‘Inai mauri kwadogina sibona mai ena namo bona mai ena dika ita abia, a?’ Nega ta oi be unai bamona oi henanadai a?

To, taunimanima milion momo hari inai negai be idia tubu daekau negana lalonai, edia tamadia sinadia, o edia tisa, o edia bamodia, o gavamani ese tomadiho do idia laloa bada karana idia koua.

Skalabrino, tauhau ta Albania amo, ia gwau Komiunis lohia siahuna henunai taunimanima idia hadibadia Dirava be lasi. Inai danu, bema tomadiho idia herevalaia, reana dibura rumana ai do idia koudia. To lagani 1991 ai, Switzerland ai ia noho neganai, dala ia hekeho Baibel do ia stadilaia. Ia abia dae. Dahaka dainai?

Albania ai ia noho neganai, ia kamonai buka ta ladana Baibel ia noho, to ena sivarai ia diba lasi. Matamana ai reana Baibel ena anina do ia lalo-pararalaia urana ese ia doria lasi do ia stadilaia totona. Stadi gwauraia tauna ese ia hamaoroa, Dirava ena ura taunimanima bona tanobada totona do ia stadilaia, bena ia laloa inai dala amo gado matamatana, ia noho tanona taudia edia, be do ia manadalaia. To karaharaga ia davaria, ia dibaia herevadia ese ena lalona ena ura, lauma gaudia ura henidia urana, idia hagugurua. Ia ese Dirava ena gwauhamata, tanobada matamatana gwauhamatana, ia moalelaia; unuseniai maino do ia vara badabada, taunimanima do idia mauri hanaihanai, bona mauri durua gaudia iboudiai do idia abidia badabada. Ia bona ena famili be unai tanobada matamatana ai do idia mauri diba herevana be ia dibaia neganai, ena kamonai ia bada ia lao. Inai sivarai namona ia hunia diba lasi; ena famili Albania ai be ia rini henidia bona ia hamaorolaidia.

Aleksei, Russia ai ia noho tauna ta, be Baibel diba maoro karana ese ta ena mauri ia haidaua diba dalana be ia hoalaia. Hekwakwanai dainai ena lalona ia metau herea bona mauri ena anina ia davaria diba lasi, unai dainai ena lalona ia hadaia sibona do ia hamasea. To ena turana ta Finland ai ia vadivadi henia guna. Tereini ai ia heau henia neganai, ena hekwakwanai be gui taudia haida ia hamaorolaidia. Idia ta be Iehova ena Witness hahinena, ia ese ia hagoadaia Baibel do ia tahua, badina be ena hekwakwanai kokidia dalana ia hahedinaraia. Ena hereva ia abia dae momokani lasi. Russia ia lou henia negana lalonai, Witness hahinena ma ta ese ia hereva henia, ia hamaoroa, guna ia danu be mai ena hekwakwanai unai bamodia, to Baibel ena heduru dainai ia hanaidia. Ia danu ese ia hagoadaia Baibel do ia tahua. Aleksei be ena ruma ai ia ginidae neganai, telefon ia tai. Ena bamona ma ta, Witness taudia ida Baibel ia stadilaia bona ia moale bada hahinena, ese ia rini henia unai. Aleksei ena lalona ia parara matama Baibel ese ia durua diba, to ia diba bema heduru ia abia lasi do ia lalo-pararalaia diba lasi. Ia gwau ena lalona be hegeregere pura iboudiai ena ruma ai Iehova ena Witness tauna ta ida Baibel do idia stadilaia, bona edia hebou ia lao henidia matama danu. Nega daudau lasi ia diba dahaka dainai Baibel ena hereva idia badinaia taudia be idia moale bada, herevana taunimanima iboudiai ese idia davaridia hekwakwanaidia be idia danu ese idia davaridia.

Iesu Keriso be taunimanima edia lalodia ia diba momo; ia gwau: “Aniani sibona dekena amo taunimanima do idia mauri lasi.” (Mataio 4:4) Ma ia gwau: “Idia diba lauma dalanai idia dabu taudia be idia moale.” (Mataio 5:3, NW) Idia moale, badina be idia diba lauma dalanai idia dabu, dala maorona ai unai idia hamaoromaoroa toho, bona Dirava ena hahenamo idia abia. To, bema tomadiho oreana ta ai ita vareai o ita lao guriguri, unai sibona ese iseda dabu lauma dalanai be do ia haorea lasi. Tomadiho karadia idaudia, dubu lalodiai idia karaia loulou karadia, ese eda lalona idia hamoalea reana, to mauri ena hekwakwanai idia kokidia a? Ena be tomadiho oreana ta ese taravatu maorodia idia abidia dae, to bema mauri ena anina idia gwauraia goevagoeva diba lasi, emu dabu lauma dalanai be do idia haorea a? Gau badana be inai: Unai bamona tomadihona bema oi badinaia, oi do ia durua Dirava ena turana namona ai do oi lao totona, eiava? Bema lasi, emu lalona do ia hegeregere momokani lasi.

Unai hegeregerena, taunimanima momo be gau ta idia tahua noho to idia do davaria lasi.

[Picture on page 3]

Bema tomadiho oreana ta ai do oi vareai, unai ese emu dabu lauma dalanai be do ia haorea momokani a?

[Picture on page 4]

Momo idia davaria Baibel idia lalo-pararalaia neganai, edia mauri be mai anina matamatana