Tomadiho ese Ita Ia Durua Diba, A?

DAHAKA do ita ania? Dahaka do ita inua? Dahaka dabua do ita atoa? Mauri durua gaudia abia be auka neganai, unai henanadai be mai anina bada. To Iesu Keriso ia gwau: “Mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai.” (Mataio 6:25) Reana oi laloa unai be hereva idauna ta, a? Badina bema ta be aniani, dabua, bona noho gabuna lasi, gau badana be ta ese ia durua; tomadiho oreadia ese hereva namona sibona ia dekenai idia gwauraia be hegeregere lasi.

Iesu be mai ena hebogahisi, bona taunimanima idia dabulaia gaudia be ia diba. To, dika havaraia gauna ta ia diba danu. Ia diba, bema tauanina gaudia ita laloa momo, reana Dirava do ita laloa bada lasi. Unai dainai, mai anina bada gaudia ita lalodia guna be namo.

Bema Iesu ena sisiba ita badinaia, lalohadai maorona do ita abia; ia gwau: “[Dirava ena] Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.” (Mataio 6:33) Bema unai sisiba ita badinaia, tomadiho​—Bible ena hereva dekenai ia gini tomadihona unai​—ese ita ia durua diba!

Iesu ia gwau lasi taunimanima ta be iena hahediba tauna ta ai ia lao bona ena hahediba herevadia ia abidia dae neganai, ena hekwakwanai iboudiai do idia ore; danu, ia gwau lasi ena hahediba taudia do idia naria ela bona Dirava ese hoa dalana amo do ia durudia. Bema ta be Keristen tauna ai ia lao neganai ena hekwarahi iboudiai be nega tamona idia ore, reana taunimanima iboudiai be Keristen taudia ai do idia lao! Iesu ena hereva ena anina be, iena Tamana, Iehova Dirava, ese iseda dabu gaudia iboudiai be ita do ia henia. Unai dainai Iesu be ma ia gwau: “Tamana guba dekenai ia noho be ia diba, umui ura gaudia ibounai be unai.”​—Mataio 6:32.

Iehova ese lauma gaudia mai anina bada ita ia henia danu. Buka Helaga ena hereva amo, ita ia durua iseda mauri ia heau namonamo totona. (Isaia 48:17) Dirava ese ena tomadiho taudia edia orea ia haginia vadaeni, nega korikori ai ita idia durua. (Kara 4:34) Danu, ena lauma helaga o ena siahu amo ia ese ena hesiai taudia ia durudia. (Luka 11:13; Galatia 5:​22-25) Ma danu, Dirava ese dala ia karaia, tanobada dekenai Paradaiso do ia havaraia lou totona.​—Luka 23:43; Apokalupo 21:​1-4.

Mauri Durua Gaudia Abia Dalana

Bible ena taravatu haida mani oi laloa, taunimanima idia durudia edia dabu gaudia abia totona. Aposetolo Paulo ia gwau:

“Tauanina bona lauma [lalohadai] hamiroa karadia ibounai do ita hadokoa bona iseda mauri ita hagoevaia be namo.” (2 Korinto 7:1)

Hekwakwanai momo mani oi laloa, bema kuku bona drag bona tauanina hadikaia gaudia ita dadaraidia neganai, unai hekwakwanai do ita davaria lasi. Bema iseda moni, nega, bona lalona ita gaukaralaia lasi buka dikadia duahidia totona bona moale karadia dikadia karaia totona, unai be namo, badina unai bamona kara ese iseda lalona idia hadikaia diba!

Danu, Buka Helaga ia gwau:

“Uaina idia inua momo taudia ida do umui inuinu hebou lasi, bona idia aniani momo taudia ida do umui aniani hebou lasi; badina be kekero tauna bona aniani bada tauna be do idia ogogami; bona mahuta momo tauna ese dabua dikadia do ia karaia.” (Hereva Lada-isidia 23:​20, 21)

Inuinu kekero bona aniani momo karadia ese ogogami bona dabu do ia havaraia. Hari inai negai taunimanima momo​—tomadiho idia laloa bada taudia danu​—be idia ogogami badina kekero muramura idia inua momo, eiava tauanina hadikaia karadia idia karaia dainai. Bema unai bamona kara ita dadaraia Bible ena taravatu ita badinaia totona, unai ese ita do ia durua bada, aniani, dabua, bona noho gabuna ita davaria totona.

Bible ena hereva ma ta ese Keristen taudia ia durudia idia dabulaia gaudia abia totona. Aposetolo Paulo ia gwau:

“Aiemai lalona be maoromaoro Dirava ena vairanai. Ai ura be nega ibounai kara maoromaoro do ai karaia.” (Heberu 13:18)

Keristen taudia momo edia kara iboudiai be maoromaoro dainai, unai ese ia durudia sibodia bona edia ruma bese taudia idia ubudia namonamo totona. Edia kara maoromaoro dainai, taunimanima ese idia lalo-namo henidia bona idia ura idia dekenai bisinesi do idia karaia. Reana kara maoromaoro tauna ese kohu momo do ia abia lasi, to ena mauri durua gaudia do ia davaria, bona taunimanima vairanai do ia hemarai lasi.

Unai bamona sisiba herevana ma ta be inai:

“Henaoa tauna be do ia henaoa lou lasi. To gaukara namona iena imana dekena amo do ia karaia.” (Efeso 4:28)

Taunimanima momo ese inai taravatu idia badinaia noho dainai idia kara maoromaoro, bona unai dainai moni gaukara idia davaria diba bena idia dogoatao diba. Vadaeni, idia bona edia ruma bese taudia idia naridia namonamo diba unai. Tanobada taudia ese koikoi karadia momo idia karaia, to Keristen taudia be unai bamona lasi, idia be kara maoromaoro taudia, bona edia kara ese anina namona ia havaraia.

Haheitalai ta be inai: Japan lalonai, Iehova ena Witness tauna ta ia ura ena moni gaukara horadia do ia hamaragidia, lauma gaudia be hora momo lalodiai do ia tahua totona. Ena biaguna ia noia neganai, ena gaukara amo ia hadokoa. Gaukara biaguna ena sinana ia kamonai neganai, ia nanadaia, ia gwau: “Gaukara ia karaia namonamo tauna oi hadokoa, a?” Vadaeni, unai Witness tauna ese ma dika ta ia davaria; ena doruna ia hadikaia gaukara idauna ia karaia neganai. To nega daudau lasi murinai, ena gaukara biaguna gunana ia davaria, unai tau ia lalohisihisi badina ena gaukara tauna ta ese golo, platinum, bona rini momo ena kampani amo ia henaodia. Maoromaoro Witness tauna ia noia gaukara dekenai do ia giroa mai, bona ia gwau ena ura horadia a do ia gaukara diba. Unai tau ia ura kara maoromaoro tauna ta do ia abia.

Aposetolo Paulo ia gwau, namona be Keristen tauna ese “gaukara namona” do ia karaia, ia sibona durua totona sibona lasi, to “ogogami taudia” durudia totona danu. (Efeso 4:28) Taunimanima idia dabu negadiai, Keristen korikori taudia ese mai edia ura danu idia durudia. Ruma bese ta Fiji dekenai ese unai bamona heduru idia abia. Keristen hebouhebouna ta dekenai idia lao neganai, lai gubadia dikadia ese edia ruma idia hadikaia. Idia giroa mai neganai, idia itaia gau iboudiai be idia dika. To, edia tomadiho oreana taudia ese sibodia edia kohu idia durulaidia mai edia ura ida. Mahuta gabuna ta idia henidia, bona idia durudia edia ruma idia haginia lou totona. Tama ia gwau, “Keristen taudia ese oiemu namo idia tahua - unai oi diba neganai oiemu lalona ia goada.”

Iesu Keriso ese dabu taudia ia hebogahisi henidia bada. Nega momo, dala idauidau amo ia durudia. To, Iesu ia diba inai tanobada dikana ia do noho lalonai, ogogami bona hekwakwanai momo do idia noho danu. (Ioane 12:8) Unai dainai, ena be tauanina dalanai taunimanima ia durudia momo, to ena gaukara badana be lauma dalanai ia durudia.

Iesu ese taunimanima hutuma ia ubudia bona idia boga kunu neganai, ia murinai idia lao Kaperanaum dekenai. Bena ia hamaorodia, ia gwau: “Lau umui tahua noho, toa umui itaia totona lasi, to aniani gaudia umui ania, vadaeni umui boga kunu dainai. Umui gaukara lasi aniani ia ore gauna abia totona, to do ia noho ia lao bona mauri hanaihanai ena aniani abia totona do umui gaukara. Unai be Taunimanima ena Natuna ese do ia henia umui dekenai.” (Ioane 6:​26, 27) Anina be dahaka?

Iesu ia diba, taunimanima haida ese ia bona ena hahediba taudia do idia bamodia ena badina tamona be tauanina durua gaudia do idia abia totona. To ia diba unai be heduru hanaihanaina lasi. Unai dainai ia gwau: “Idia diba lauma gaudia idia tahua be namo taudia idia moale, badina Guba Basileia be idia edia. Kara maoromaoro idia ura dikadika idia karaia taudia be idia namo, badina be Dirava ese boga kunu do ia henidia.”​—Mataio 5:​3, NW, 6.

Taunimanima be aniani korikori sibona hitolona idia hitolo lasi, to lauma dalanai hereva momokani hitolona idia hitolo danu. Lauma aniani ita bogakunulaia neganai, moale korikori ia havaraia. Kerisendom lalonai taunimanima momo ese kohu idia ura henia bada bona Asia ena tomadiho daladia dainai taunimanima be lauma diburana lalonai idia noho. To, tomadiho momokanina​—Iesu Keriso ena tomadiho unai​—ese taunimanima ia durudia vadaeni lauma aniani idia abia totona. Bema oi ura, oi danu ese inai heduru do oi abia diba.

Haheitalai ta be inai: Mauritius dekenai Witness ta ese dala dekenai magasin ia hariharilaidia neganai, tauhau ta ese Gima Kohorona bona Noga! magasin ia ena amo ia abia. Wiki gabenai ia giroa mai ma magasin haida ia abidia totona. Bena Witness tauna dekenai ia gwau, magasin ia do abia lasi neganai, ena moni be hegeregere lasi dainai sibona ia alaia mase gwauraia, to magasin dainai ia lalo-parara taunimanima durudia Diravana ia noho. Unai tauhau ena lauma aniani hitolona ia ore matamaia unai.

Nega do ia ginidae iseda dabu gaudia iboudiai do ita abidia, a? Oibe, Bible ena gwauhamata unai. Momokani, taunimanima ese gwauhamata namodia momo kamonaidia idia hesikulaia vadaeni, badina be unai gwauhamata momo idia momokani lasi. To Bible ena gwauhamata herevadia ita abia dae vaitani diba. Iehova, Bible havaraia Diravana, ese ena gwauhamata iboudiai ia hamomokania. Iosua ese unai ia gwauraia, Israel taudia ia hereva henidia neganai; ia gwau: “Umui diba momokani mai emui kudouna ibounai danu bona mai emui mauri ibounai danu Iehova emui Dirava ese umui dekenai ia gwauraia hereva namodia iboudiai amo ta ia reaia lasi. Iboudiai idia guguru. Hereva ta ia reaia lasi.”​—Iosua 23:14.

Dirava ena gwauhamata be inai tanobada ibounai do ia hagoevaia, bona unai gwauhamata do ia hamomokania neganai iseda hekwakwanai iboudiai do idia ore momokani. (Apokalupo 11:18) Iena Basileia ese tanobada Paradaisona do ia havaraia lou neganai, iseda dabu gaudia iboudiai do ita abidia, bona Dirava ena palani taunimanima totona do ia guguru vaitani. (Mataio 6:​9, 10) Unai neganai, idia dabu taudia edia ‘taitai bona hisihisi’ regedia be lasi. Iboudiai do idia gaukara namonamo bona Dirava ena taravatu do idia badinaia dainai, mai moale danu do idia noho namonamo.​—Isaia 65:​17-25.

Ai kikilaia vadaeni Katolik sisita ladana Maria, ese unai ia hamomokania. Ia lalo-parara lagani momo lalodiai lauma diburana lalonai ia noho, dina vairai do idia vara gaudia ia garilaia, bona mauri ena anina korikori ia diba lasi. To, Bible ena hereva momokani ia dibalaia neganai, ia gwau, “Dibura amo lau raka lasi bona diari ia bada ia lao gabunai lau raka vareai.” (Salamo 43:3; Hereva Lada-isidia 4:18) Hereva momokani ese ia durua tauanina gaudia ia abia totona sibona lasi, to lauma aniani bona inuinu gaudia ia abidia totona danu. Oibe, tomadiho​—tomadiho momokanina unai​—ese ita ia durua diba.

[Picture on page 7]

Tomadiho momokanina ese iseda ura gaudia iboudiai ita do ia henia