Tomadiho Maorona Idia Tahua

IDIA maragi negana amo taunimanima haida ese edia henanadai mauri dekenai edia haere maorodia idia tahudia. Idia memero kekeni neganai, reana idia lao guriguri. To idia momo idia davaria idia abia haeredia bona tomadiho karadia ese idia durudia lasi, mauri ena hekwakwanai do idia haheaukalaidia totona.

Reana idia gwau idia be do edia tamadia sinadia edia tomadiho oreana taudia, to nega ta ta sibona idia lao guriguri. Anglikan bisop ta ia gwau edia abidadama be maragi. Edia tomadiho idia laloa lasi. Ma haida be tomadiho oreadia taudia edia koikoi dainai idia badu bona tomadiho idia dadaraia vaitani. To edia henanadai mauri dekenai be idia do noho.

Haida Idia Daradara Bada Ena Badina

Taunimanima momo idia diba tomadiho oreadia momo ese ruma lasi taudia idia durudia bona aniani be idia dabu taudia idia henidia. To kahirakahira dina iboudiai niusi ripoti ai idia kamonai Keristen lasi taudia sibodia lasi to sibodia idia gwauraia Keristen taudia danu be idia dagedage heheni bona idia ala-ala heheni. Bema idia gwau unai dagedage karadia idia karaia taudia be tomadiho maorona badinaia taudia lasi, unai do ita hoalaia lasi, ani?

Idia maragi negana amo tomadiho idia badinaia taudia be guna idia laloa tama sina lasi natudia naridia oreadia, tomadiho oreadia edia, be gau namona. To vanegai laganidia ai idia hoa maragi lasi, badina be gabu momo ai fada taudia idia samanidia, idia naridia memerodia idia kara bodaga henidia dainai. Matamanai taunimanima idia laloa fada taudia haida sibodia idia kara kerere. To hari idia haida idia laloa reana edia tomadiho oreana be mai ena kerere.

Taunimanima haida, Eugenia bamona, be guna edia tomadiho idia goadalaia. Argentina ai ia kekeni neganai, ia lao loulou Itatí Ena Haneulato Rami-Hebouna tomadiho henia totona. Lagani 14 lalodiai ia be dubu ena sisita ta. Unai dagi ia rakatania murinai, tomadiho bona politikol oreana ta lalonai ia vareai, unai orea taudia edia ura be taunimanima edia noho hebou daladia bona edia bisinesi daladia be gavamani hamorudia karadia amo do idia haidaudia. Ia itadia gaudia bona ia dekenai idia vara gaudia dainai ena abidadama Dirava dekenai be ia boio. Do ia abia dae diba tomadihona be ia tahua momokani lasi. Ia tahudia gaudia be ogogami taudia durudia dalana bona turana ta, do ia abidadama henia diba tauna.

Haida ese tomadiho oreadia ai idia vara gaudia idia itadia bena idia lalodiai idia vareai lasi. Ia gwau Dirava be lasi tauna ta ia gwau: “Keristen lasi oreadia edia tomadiho bona Keristen oreadia edia tomadiho edia idau badana ta be lau itaia diba lasi.” (Sputnik, 1991) Fada taudia haida ia gwauraidia, edia dabua be lata bona mai edia golo; mase mauana ta be Moscow ena dala ai idia huaia, ia lalonai be “Otodoks Keristen helaga tauna” ta, gunaguna ia mase tauna, ena tauanina. Miusium amo idia abia lao, dubu ai idia atoa. Unai ia itaia neganai, ia ese helaga taudia bona mase tauanidia idaunegai Aigupitona ai be ia lalodia. Ma ia laloa, unai tatau Moscow ai ese “Keristen Toi Tamona Diravana” herevana idia abia dae bona unai Aigupito taudia danu ese dirava toi idia tomadiho henidia​—Osiris, Isis, bona Horus unai.

Hari tau ia gwau Keristen tomadihona ena lalohadai lalokau dekenai​—“Dirava be lalokau,” bona “emu dekena tauna oi lalokau henia”​—be idaunegai Aigupitona ena tomadiho ai ia davaria lasi. To ia gwau: ‘Tadikaka ura henidia karana be sibodia idia gwauraidia Keristen besedia ai ia kwalimu lasi.’ Unai murinai ia ese tomadiho oreadia be gavamani karadia ai idia vareai dainai idia havaradia huahuadia dikadia be ia gwauraidia. Ia itadia gaudia dainai, ia laloa Kerisendom ena tomadiho oreadia ese ia tahua gauna idia henia diba lasi.

Ma haida ese haere maorodia idia davaridia vadaeni, to Kerisendom ena tomadiho oreadia lalodiai lasi.

Mase Taudia Herevadia Momokanidia Ia Diba

Magdalena, ena lagani be 37, be Bulgaria ai ia noho. Ena ravana be lagani 1991 ai ia mase murinai, ena lalona ia metau herea. Sibona ena lalona ai ia gwau loulou, ‘Mase taudia idia lao edeseni? Egu ravana be edeseni?’ Ia lao dubu, bona ena ruma ai kaivakuku ta vairanai ia guriguri, to haere ta ia davaria lasi.

Bena dina ta ena dekena tauna ta ese ia boiria, badina be Iehova ena Witness taudia ida ia stadi tauhauna ta ese ia vadivadi henia noho dainai. Dirava ena Basileia bona Ena palani, tanobada be paradaiso ai do ia halaoa bona unuseniai taunimanima do idia mauri hanaihanai mai moale ida palanina, ia herevalaia neganai, Magdalena ia hakala. Tauhau ese buka ta ladana Mauri Hanaihanai Paradaiso Lalonai ia abia, ia lalonai Baibel sirina ta, Kohelete 9:​5, ia hahedinarai henia; unai siri ia gwau: “Mase taudia be gau ta idia diba lasi.” Unai hanuaboi ai Magdalena ese hereva ma haida ia duahidia, bena ia diba mase taudia idia lao lasi guba eiava hel; gau ta idia diba lasi, idia mahuta mase bamona. Bena Iehova ena Witness taudia edia hebou ta ia lao mai ena moale ida. Hebou murinai ia gwau ena lalona be hegeregere pura iboudiai Baibel stadi do ia abia. Hebou ai Iehova idia guriguri henia dalana ia itaia, bena ia danu ese Iehova ia guriguri henia, ia noia do ia durua, ena kara kererena ta, ia manadalaia vadaeni karana, do ia hadokoa totona. Ena guriguri hegeregerena ia durua neganai, ia diba tomadiho maorona ia davaria vadaeni.

Idia Davaria Mauri be mai Anina

André be Katolik tomadihona ai ia tubu daekau Belgium ai, bona ia be fada tauna ta ena heduru tauna. To unai nega lalonai ia itadia gaudia haida ese ena hemataurai ena tomadiho oreana dekenai idia hadikaia. Unai dainai guriguri ia rakatania.

Lagani 15 lalodiai soka ia gadaralaia, ena moni gaukarana bamona. Nega ta ena tim be Italy ai idia gadara neganai, idia boiridia pope dekenai do idia lao. Idia lao, to lauma dalanai ia hagoadadia lasi, bona André ese pope ena taga ia badulaia. Unai tomadiho oreana ia daradaralaia bada. Inai danu, ia moale lasi badina be ena headava rua idia doko. Tanobada ai idia vara gaudia danu ese ena lalona idia hahisia. Lagani 1989 ai, inai hereva ia torea: ‘Tanobada ai idia vara karadia kavakavadia edia anina be dahaka?’ Haere be ena tomadiho oreana amo ia abia lasi.

Lagani 1990 ai, soka hahedibalaia gaukarana be Iceland ai ia karaia neganai, Iehova ena Witness misinari hahinena ta ladana Iiris ese ia hedavari henia. André ese buka ta iena amo ia abia bona ia noia do ia lou mai. Iiris mai ena adavana Kjell ida ese idia lou henia neganai, idia davaria ia bona ena adavana Ásta idia ura bada Baibel ena hereva do idia lalo-pararalaia. Ruaosi ese edia lalodia idia hadaidia, André ena laga-ani horadia toi do idia gaukaralaia Baibel do idia stadilaia totona. Ia gwau: “Egu mamina be Baibel stadilaia karana ese lau ia hagoadaia bada, laga-ani ese lau ia hagoadaia sisina.” Metairametaira Baibel ese edia henanadai ia haerelaidia, bona edia abidadama Iehova dekenai bona ena Basileia dekenai be ia bada ia lao. Baibel ena gwauhamata, tanobada matamatana mai mainona, ia lalonai hari idia “vara karadia kavakavadia” do idia vara lasi gwauhamatana, be idia abia dae momokani. Hari, André bona Ásta ese idia abia dae herevadia be ma haida dekediai idia herevalaidia.

Magdalena, André, bona Ásta idia laloa tomadiho maorona idia davaria vadaeni. Eugenia danu, tanobada ena hekwakwanai be politik amo ia kokidia toho murinai, ia laloa Iehova ena Witness taudia bogaragidiai tomadiho maorona ia davaria. To dahaka ese ia hamomokania tomadiho ta ia maoro? Mani hereva gabedia oi duahia.

[Picture on page 7]

Iehova ena Witness taudia ida Baibel stadilaia loulou karana ese taunimanima milion ima mai kahana ia durudia noho haere maorodia do idia davaridia totona