Basileia Haroro Ripoti
Dirava ese Taunimanima Edia Toana Ia Laloa Lasi
GUNAGUNA, aposetolo Petero ese tuari biaguna Korenelio ia haroro henia, ia gwau: “Hari lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.” (Kara 10:34, 35) Korenelio ese Dirava garina ia gari bona kara maoromaoro ia ura henia. Petero ena hereva ia abia dae bona Keristen tauna ai ia lao.
Hari inai negai danu Dirava ese taunimanima edia toana ia laloa lasi. Germany amo ia mai ripotina ta ese unai ia hamomokania; ia gwau:
‘Emai kongregesen ena teritori ai be Russia ena ami taudia edia bariki badana ta. Lagani 1989 ai, Berlin Wall ia moru murinai, elda taudia ese ai idia nanadaia, Russian gado ai diba eiava. Ai haida be ai diba dainai, unai bariki lalonai ai haroro, bona unai gaukara ai moalelaia bada. Sivarai namodia be momo, ta be inai.
‘Lau ese bapatiso lasi pablisa tauna ta lau bamoa neganai, ami biaguna ta ai hereva henia. Emai hereva ia kamonai, bena ai ia noia tuari taudia do ai hereva henidia. Ia gwau idia danu be Dirava bona Baibel edia sivarai do idia kamonai be namo. Unai dainai, ai ese do ai lou henidia negana ai gwauraia.
‘Russian gado ia diba momo taihuna ta ai noia ai do ia bamoa, gado hahanaia totona. Bariki ena hebou rumana ai buka bona magasin be pata ta latanai ai atodia, bena tuari taudia 68 ida ai herevahereva bona edia henanadai ai haerelaidia. Unai murinai buka 35 bona magasin 100 bamona idia abidia. Hebou rumana ai rakatania lalonai, haida ai itadia, buka idia herevalaidia hebou.
‘Ai hamaorodia July 4, 1992 ai do ai lou henidia. Ai ginidae neganai, ikoukou gimaia tauna ese ai ia hamaoroa tuari taudia ese ai idia naria noho. Ami opesa ta ese hebou rumana lalonai ai ia hakaua vareai. Unuseniai ai davaria buka be laiberi totona guna ia abidia hahinena ese emai vadivadi herevana be notisi amo ia hadibadia vadaeni. Tadikaka toi ese iseda gaukara tanobada hegegemadai be idia herevalaia, bona Baibel ena hereva ita abia dae diba ena badina danu. Unai murinai hebou taudia edia henanadai be Baibel amo ai haerelaidia. Edia henanadai ta be, Iehova ena Witness taudia ese tuari gaukarana be edena bamona idia laloa, bona idia haida be tuari taudia eiava lasi? Lau ia bamoa lou tauna, bapatiso ia abia lasi pablisana, ese ena gaukara gunana, lagani 25 lalodiai East Germany ena ami ai ia karaia gaukarana, ia herevalaia. Dirava bona Baibel ia dibadia dalana ia hamaorolaidia, ma ia gwau ia ura Iehova ena Witness tauna ai do ia lao. Tuari taudia ese idia kamonai herevadia idia moalelaidia. Ai laohaidia bukadia iboudiai be miniti 7 ai idia abidia ore, bona momo idia ura Baibel do idia abidia. Sitoa ta amo Baibel 7 Russian gado ai be ai abidia; idia moalelaidia bada. Lauma dalanai idia hitolo taudia be Baibel ena hereva amo ai ubudia karana be ai moalelaia bada, bona emai ura be unai hereva do idia badinaia.’
Momokani, Dirava ese taunimanima edia toana ia laloa lasi. Ena Hereva amo ia ese lalo-namo taudia idauidau be gabu iboudiai ia boiridia, ia bona ena Natuna, Iesu Keriso, do idia dibadia. Idia momo be unai bamona idia karaia.—Ioane 17:3.