“Dirava Ena Ruma” Ita Raraia Mai Lalo-Moale Ida

“GAU tamona mo Iehova dekenai lau noia, unai mo do lau tahua; Iehova ena ruma ai do lau noho, egu mauri dinadia iboudiai; Iehova ena hairai do lau itaia, bona mai egu hemataurai ida iena dubu do lau raraia.”​—Salamo 27:4.

Pavapava David ese Iehova ena dubu ia raraia mai lalo-moale ida, bona ia moalelaia. Hari inai negai, tomadiho momokani rumadia dekenai unai bamona oi laloa, a? Iseda nega lalonai, Watch Tower Society edia brens opesi dekenai Betele rumadia 95 bona ma haida be Iehova tomadiho henia karadia dainai idia haginidia rumadia.

Helga be lagani 1948 ai, Germany ena Betele rumana dekenai gaukara ia hamatamaia, bona ia gwau: “Lagani momo lalodiai Betele ena hesiai gaukara lau karaia bona unai lau laloa neganai, egu moale be bada bona Betele ena namo lau moalelaia karana be lagani ta ta iboudiai ia bada noho.” Helga be tanobada hegegemadai idia moale Betele gaukara taudia 13,828 ida, lagani 1993 hesiai laganina lalonai ‘Iehova ena hairai idia itaia.’ Unai hereva Betele ena anina be dahaka? Herevana ta be Betele lalonai eiava ma gabu ta ai Dirava ia hesiai henia, to Iehova ena Witness ta ta iboudiai be edena bamona unai dala idia raraia diba mai lalo-moale ida?

Unai Ladana Dainai Namona be Idia Gaukara Goadagoada

“Betele” be ladana maorona, badina Heberu gadona ai unai hereva Behth-ʼElʹ ena anina be “Dirava ena Ruma.” (Genese 28:19) Oibe, Betele be idia haheaua namonamo rumana ta, eiava ‘aonega ai idia haginia rumana,’ bona unai ruma lalonai Dirava bona iena ura be gau badana. (Hereva Lada-isidia 24:3) Herta be unai ruma ena namo ia laloa bada dainai, ia gwau: “Inai be ruma bese ta lalonai ai noho bamona. Dina ta ta iboudiai aiemai gaukara dalana idia haheaua namonamo.” Ia bona Helga be Betele tamona lalonai idia gaukara hebou lagani 45 lalodiai. Unai Betele taudia edia bese badana lalonai, ta ta iboudiai be mai ena gaukara bona mai ena noho gabu, unai amo ia moale bona ia noho namo diba. Betele ladana ena anina hegeregerena, dipatmen ta ta iboudiai lalodiai, gaukara daladia idia biagua namonamo bona idia heau namonamo. Unai ese maino ia habadaia, bona unai amo sivarai namona harorolaia gaukarana ia durua diba, bona kongregesen iboudiai be mai edia badina “Dirava ena Ruma” idia matauraia bada totona.​—1 Korinto 14:​33, 40.

Dahaka dainai unai bamona rumadia idia haginia be namo? Haheitalai ta be, inai magasin be Betele ta ena printa gabuna dekenai idia karaia. Iesu be guna ia peroveta, ia gwau Basileia sivaraina do idia harorolaia bona lauma aniani do idia hariharilaia, unai dainai orea be Betele gaukara idia haginia be namo​—mai edia ura bada ida Betele taudia idia gaukara bona Iehova idia tomadiho henia taudia iboudiai ese Betele idia laloa bada.​—Mataio 24:​14, 45.

Oi ura diba, inai gabu ai dina ta ta iboudiai ai karaia gaukarana be dahaka, a? Helga bona Herta idia noho gabuna ai, mahuta rumadia iboudiai lalodiai ane bamona regena ta be 6:30 a.m. ai ia boiboi; to unai gaukara taudia iboudiai 800 amo, momo be daba momokani ai idia toreisi idia hegaegae totona. Monday ia lao Saturday, 7.00 a.m. ai, Betele taudia be aniani gabudia ai idia hebou dina ena siri, eiava daba guriguri, idia karaia totona. Unai murinai, edia tauanina ia hagoadaia aniani idia ania. Gaukara dina ta ta ai idia hamatamaia 8.00 a.m. dekenai, bona gaukara horadia iboudiai be 8, to dina tubua aniani totona idia laga-ani sisina. (Nega momo Betele taudia be Saturday ena dina kahana tamona idia gaukara.) Herevana nadunadu gabuna ai, printa gabuna ai, dabua huria gabuna ai, opesi gabuna ai, faktori ai, buka kumia gabuna ai, eiava dipatmen ma ta dekenai, gaukara be bada herea.

Hanuaboi ai bona Saturday bona Sunday ai, Betele taudia be kahirakahira idia noho kongregesen ida idia hebou bona idia lao haroro. Betele tadikaka momo be elda taudia eiava hesiai taudia unai kongregesen lalodiai. Unai gabu Witness taudia idia moale bada Betele taudia ida idia haroro hebou dainai, badina idia bona Betele taudia be orea tamona lalonai idia gaukara hebou, idia hemataurai heheni bona idia lalo-tamona. (Kolose 2:19) Betele taudia ta ta iboudiai idia diba edia gaukara “Dirava ena Ruma” lalonai be gau badana, bona unai gaukara idia karaia guna be namo. To, haroro gaukara ura henia bada karana, kongregesen lalonai gaukara goadagoada karana, bona gau iboudiai lalohadailaia namonamo karana ese lauma dalana ai Betele gaukara tauna ia hagoadaia, iena moale ia habadaia, bona ena Betele gaukara do ia karaia namonamo. Unai kara be mai anina bada unai “ruma” dekenai idia gaukara neganai, badina unai ruma ena ladana idia gwauraia neganai, Dirava badinaia mai lalona ibounai ida karana idia laloa danu!

Betele Hesiai Gaukara Dekenai Kwalimu Dalana

Dahaka ese Iehova ena Witness taudia momo herea ia durudia edia Betele hesiai gaukara dekenai idia kwalimu totona? France Betele taudia haida be lagani momo lalodiai Betele dekenai idia gaukara, bona edia hereva be inai bamona: “Iehova lalokau henia karana. Herevana edeseniai ita ia siaia to ita haheauka; ita manau, ita kamonai, bona Society amo ita ia henia hakaua herevadia ita badinaia.” (Denise) “Lau itaia Roma 12:10 dekenai Paulo ese ia gwauraia hahegani ita matauraia be mai anina bada: ‘Umui ta ta danu do umui matauraia.’ Unai siri ese ia hahedinaraia, ma haida ita doridia iseda lalohadai idia abia dae totona be gau badana lasi, to namona be ma haida edia lalohadai ita laloa. Anina be, iseda ladana habadaia karana ita tahua lasi.” (Jean-Jacques) Barbara ia gwau: ‘Bema tanobada taudia bamona ita laloa, reana Betele hesiai gaukara ita matauraia karana ia manoka diba, badina do ita laloaboio Iehova ese iena orea ia hakaua. Bema ma haida edia kerere dainai ita hekwakwanai, reana unai hemataurai karana do ita haboioa.’

Betele dekenai, taunimanima iboudiai idia goevadae lasi, unai dainai edia hebamo karana idia laloa namonamo. Lagani bada lasi taudia eiava Betele dekenai idia vareai matamata taudia be edia lagani hegeregere taudia sibodia lasi, to lagani bada taudia haida danu idia bamodia be namo. Idia maumau taudia eiava hagoadaia lasi hereva idia gwauraia taudia be Betele dekenai eiava kongregesen lalonai ita do idia hagoadaia lasi hebamo taudia. To Iakobo 3:17 ese ia gwauraia “Dirava dekena amo aonega” ita tohotohoa ese hahenamo ia havaraia. Unai “kara ginigunana be ia goevagoeva. Ma iena kara haida be inai: mai ena maino, laloa manada bona gado namo. Ia be mai ena [hebogahisi], bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi, bona ia be [Keristen] koikoi lasi.” Unai bamona karadia, bona boga-auka bona hebogahisi, be “Dirava ena Ruma” lalonai oi itaia momo, bona unai dainai unuseniai oi noho negana ai do oi moale bona oi ia hamarerea oi gaukara totona. Nega momo, Witness lasi vadivadi taudia danu be Betele gaukara taudia edia kara namo, hetura namo karana, bona edia moale toana idia gwauraia namo.

Anny be lagani 70 bona ma haida ia abia vadaeni, bona lagani 1956 negana amo Germany ena Betele dekenai ia gaukara; hanaihanai ia hegaegae hesiai gaukara ia karaia totona ena dala ia gwauraia: “Lauma dalanai lau goada noho totona, lau hekwarahi bada Society ese idia halasia matamaia buka bona magasin iboudiai lau duahia haraga totona, hanaihanai lau lao hebou, bona hanaihanai lau lao haroro. Danu, egu tauanina lau hagoadaia noho totona daba iboudiai eksasais lau karaia, lift dekenai lau vareai momo lasi, bona dala idia noho neganai, hanaihanai lau raka, haroro gaukara dekenai danu.”

Betele gaukara idia manadalaia taudia momo be Anny bamona do idia hereva. Edia diba idia habadaia noho, edia gaukara idia hadokoa lasi. Edia tauanina ia goada noho totona, anina be idia mahuta namonamo, eksasais sisina idia karaia, bona aniani bona inua karana idia biagua. Idia dekenai gau badana be guriguri bona sibodia edia Baibel stadi karana idia laloaboio lasi.

Betele Hesiai Gaukara Helagana Matauraia Bada Karana

Nega momo Betele taudia dekenai inai henanadai idia henia: “Edeseniai oi gaukara?” Gaukara gabudia be idauidau, to namona be iboudiai ese unai gaukara iboudiai idia matauraia bada. Badina be dahaka? Ena badina be herevana ta ese lauma aniani karaia totona printa masini ia haheaua, eiava dabua ia huria, eiava Betele taudia totona ia nadunadu eiava gabu ia hagoevaia, eiava opesi lalonai ia gaukara, to unai gaukara iboudiai be hesiai gaukara helagana. Atai dekenai ai gwauraia vadaeni hegeregerena, Keristen taudia be ta ta edia toana lasi, to maka tamona dekena amo idia kara henidia. Namona be oi laloatao, dubu lalonai hahelaga taudia bona Levi taudia ese idia karaia gaukara iboudiai be Iehova dekenai hesiai henia gaukara helagana, dubu ena badinai idia noho gabudia bona ena aniani gabudia danu. Unai gaukara haida be boubou totona animal idia aladia bona idia hegaegaelaidia, oela amo lamepa idia hahonudia lou, bona hagoevaia gaukara, bona gima taudia edia gaukara. Unai hegeregerena, Betele gaukara iboudiai be “Lohiabada ena gaukara” bona lalo-moale ia havaraia bona ia be anina bada gaukarana, unai dainai ia be hahenamo hereana ta.​—1 Korinto 15:58.

Namona be ita laloa sisina, kara ta ese “Dirava ena Ruma” ita raraia mai lalo-moale ida karana ia hadikaia diba. Betele lalonai bona murimuri ai idia noho Keristen taudia idia gima noho, idia lalo-dika bona idia mama garina, unai ese “turia ia hamanokaia.” (Hereva Lada-isidia 14:30) Betele taudia edia hesiai gaukara dagina dainai ta ia mama be mai anina lasi. Ma danu, Betele taudia bogaragidiai mama ia noho be namo lasi, unai be tauanina ena kara ta. Mai manau danu oi naria​—bema ta ia laloa tadikaka ese idia laloaboio to ma haida ese gaukara mai ena hahenamo bada idia abia, unai be sisiba namona ia dekenai. Danu, Betele dekenai haida be moni bada bona haida be moni sisina. Bema ta ese “tau ta ena kara danu ia hahegeregerea” neganai sibona ena noho dalana do ia badulaia diba! “Aniani bona dabua” dekenai idia hegeregere dainai, unai be momo ia durudia lagani momo lalodiai “Dirava ena Ruma” lalonai mai edia abidadama ida idia gaukara noho totona.​—Galatia 5:​20, 26; 6:4; 1 Timoteo 6:8.

Betele dekenai moni davana idia abia lasi to idia gaukara dainai, Iehova ena Witness taudia bona ma milion momo be hahenamo bada idia davaria​—unai gaukara idia karaia neganai sibodia idia laloa lasi, to idia karaia badina Dirava bona edia dekena taudia idia lalokau henidia dainai. Watch Tower Society ena Betele rumadia bona printa rumadia be volantia kontribusen monina amo idia naridia, tiokratik rumadia ma haida hegeregeredia. (2 Korinto 9:7) Pavapava David bona Israel ena lohia bona biagua taudia hegeregeredia, “Dirava ena Ruma” ita moalelaia bona ena namo ita laloa bada diba dalana be Society ita durua bona moni ita henia neganai. (1 Sisiga 29:​3-7) Namona be ita itaia, edena dala ai Betele dekenai “Iehova ena moale ita itaia” diba.

“Dirava ena Ruma” Lalonai Ita Abia Hahenamodia

Hebouhebou ta ai oi lao bona Iehova idia tomadiho henia moale taudia bogaragidiai oi noho neganai, moale momokani mamina oi abia, a? Inai oi laloa, dina ta ta iboudiai Betele gaukara tauna ena moale ahuna be tadikaka bogaragidiai Iehova ia hesiai henia diba! (Salamo 26:12) Lauma dalana ai oi tubu noho dala namona be unai! Tadikaka ta ia gwau, Betele dekenai lagani tamona lalonai ia diba gaudia ese ia durua namo herea iena kara bona lalohadai ia hamaoromaoroa totona, to lagani toi ma gabu ta dekenai be unai bamona ia durua lasi. Badina be dahaka? Badina ma gabu ta dekenai lo Keristen taudia momo idia noho lasi edia abidadama ia itaia bona ia tohotohoa totona.​—Hereva Lada-isidia 13:20.

Ta be Betele dekenai ia gaukara neganai, sisiba henia dalana idia manadalaia taudia bogaragidiai ia noho. Ma danu, dabai idia guriguri neganai, Betele taudia edia Gima Kohorona Stadi neganai, bona Monday hanuaboi ai hereva haida idia kamonai neganai, tadikaka ese haere idia hegaegaelaia namonamo dainai, ia kamonai henia diba. Idia vareai matamata taudia be Bethel Entrants’ School dekenai diba idia abia, bona hua 12 ginigunadia lalodiai edia gaukara ta be Baibel ibounai idia duahia ore.

Ma tano haida amo idia vadivadi taudia edia ripoti bona ekspiriens danu ese idia ia hagoadadia. Ma danu, Hakaua Oreana taudia haida eiava idia siaidia taudia be brens opesi dekenai idia vadivadi. Helga ia gwau, ‘Ena be edia gaukara be bada herea, to nega ibounai tadikaka be mai edia nega turana bamona idia hereva totona, eiava moale toana idia hahedinaraia totona.’ Unai bamona manau, abidadama taudia edia kara oi itaia neganai, oi ia hagoadaia!

Betele dekenai idia gaukara taudia be Dirava ena orea ia heau dalana bona iena lauma helaga ese ura taudia ia hasiahudia idia gaukara totona dalana idia itaia namonamo diba. France dekenai, lagani 1949 negana amo Betele dekenai ia hesiai tadikaka ta ia gwau: “Betele dekenai, emu mamina be gaukara badana idia karaia gabuna ai oi noho.” Ma ia gwau: “Lau diba momokani, Betele gaukara dekenai Iehova lau hesiai henia diba ful-taim hesiai gaukarana dekenai, bona mai egu nega bona goada ibounai ida lau karaia, bona tadikaka momo lau durudia diba.” Unai be iseda mauri ena anina badana, ani? Dirava ena ura ita karaia. Betele dekenai ta ese ‘dina ibounai lalonai Dirava ia hesiai henia’ diba. Unai be hahenamo badana!​—Salamo 44:8.

Ita davaria vadaeni bamona, Betele ruma dekenai ia gaukara tauna be Iehova ena namo ia itaia diba bona hahenamo idauidau ia davaria diba. (Heberu 6:10) “Dirava ena Ruma” dekenai oi hesiai henia be oi dekenai gaukara namona ta, a? Iehova ena Witness taudia bogaragidiai idia noho lagani 19 taudia, bema ta be lauma dalana ai bona tauanina dalana ai ia goada neganai, bona Timoteo bamona, ‘varavara ibounai idia gwau ia be tau namona’ neganai, ia be Betele aplikesen ia torea diba. (Kara 16:2) Momo be Betele hesiai gaukara be edia mauri ibounai lalonai idia karaia, atai taudia bamona. Idia dekenai salamo ia torea tauna ta ena guriguri idia davaria vadaeni​—ia gwau ‘ela bona hanaihanai Iehova ena ruma dekenai ia ura noho.’

Iehova ena Witness taudia be edia Betele tadikaka bona taihu idia matauraidia bada, badina unai taudia be sibodia edia ura idia rakatania, bona mai edia ura bada bona moale ida edia gaukara idia karaia. Herevana Betele dekenai eiava ma gabu ta ai Iehova ita hesiai henia, ita ibounai be Pavapava David bamona ita laloa diba​—“Dirava ena Ruma” ita raraia mai lalo-moale ida, eiava ita moalelaia diba.

[Picture on page 31]

Inai Keristen taudia idia moale bada, lagani momo lalodiai, Betele, Germany dekenai, hesiai gaukara helagana idia karaia dainai