Oi Vadivadi Henia!

DAHAKA oi vadivadi henia be namo? Iehova ena Witnes taudia edia brens opesi ladana, Betele, oi vadivadi henia be namo. Tano idauidau ai, Betele rumadia be 118. Nega momo vadivadi taudia be unuseniai idia itaia gaudia dainai idia moale.

Stadi merona ta be Mexico ena brens opesi ai Iehova ena Witnes taudia edia gaukara goadagoada karana ia moalelaia dainai ia henanadai: “Dahaka do lau karaia diba iniseniai lau noho totona?” Tadikaka ese ia idia hamaoroa: “Oi bapatiso guna be namo. Unai murinai, painia gaukara oi karaia, anina be hanaihanai Basileia ena sivarai namona oi harorolaia.” Unai mero be unai tadikaka ena hereva hegeregerena ia karaia, bona lagani rua murinai ia idia boiria Mexico ena Betele ai ia gaukara totona​—⁠unuseniai lagani 20 ia gaukara vadaeni.

Betele Ena Anina

Heberu gado herevana “Betele” ena anina be “Dirava Ena Ruma.” (Gen. 28:19) Unuseniai Baibel bona Baibel idia herevalaia bukadia idia printaia bona idia siaia sibona lasi, to tanobada hegegemadai Iehova ena Witnes taudia edia kongrigeisen 100,000 mai kahana idia durua. Betele taudia 20,000 bamona be mai edia ura ida Iehova bona edia tadikaka taihu idia hesiai henia. Unai tatau bona hahine edia noho daladia bona kastom be idauidau. Bona lagani momo idia gaukara taudia be matamata taudia ida idia gaukara hebou. Adorahi bona wikeni ai Betele taudia be Iehova ena Witnes taudia edia hebou ai tadikaka taihu idia bamoa bona haroro gaukara idia karaia. Danu, nega haida Baibel stadi, moale karadia bona edia ura gaudia idia karaia.

Hua ta ta ai, Betele taudia be moni sisina idia abia. Idia ese aniani namona idia ania bona daiutu namodia ai idia noho. Betele rumadia be davana bada hotel rumadia bamona lasi. Vadivadi taudia be Betele rumana, gabu ena toana bona orea ena heau namonamo dalana idia moalelaia sibona lasi, to tadikaka taihu edia kara namodia bona gaukara hebou karadia idia moalelaia danu. Ena be Betele taudia idia bisi bada, to danu vadivadi taudia idia laloa bada. Betele dekenai ta ena gaukara ese ma ta ena gaukara ia hanaia lasi. Gaukara ibounai hegeregere, gabu hagoevaia gaukara, flaoa naria bona hadoa gaukara, nadunadu gaukara, printa gaukara bona opesi gaukara be mai anina bada. Betele taudia be tim ta bamona, bona edia gaukara idauidau amo Iehova ena Witnes taudia edia haroro gaukara idia durua.​​—⁠Kol. 3:​23.

Ekspiriens Haida

Betele taudia haida edia ekspiriens mani ita itaia. Dahaka dainai idia ura Betele dekenai idia gaukara? Mario ena sivarai mani oi laloa. Ia be Iehova ena Witnes tauna ta. Matamanai, ia be German ena ladana bada motuka kampani dekenai ia gaukara, ena pei be bada bona dagi ma haida ia abia diba. Ia bapatiso murinai, Betele dekenai wiki tamona ia gaukara. Unuseniai ia be printa gaukara ia karaia. Ia itaia Betele gaukara ena namo ese ena moni gaukara ena namo ia hanaia. Unai dainai, Betele ena aplikeisen ta ia atoa, unuseniai ia gaukara hanaihanai totona. Varavara bona turadia be Mario ena abia hidi dekenai idia laloparara lasi. Hari, Mario be mai moale ida German ena Betele dekenai ia gaukara.

Betele taudia momo be sikuli bada lasi taudia. Abel be unai bamona, bona ia be Mexico ena Betele dekenai lagani 15 ia gaukara. Ia gwau, “Betele ai tadikaka momo ese lau idia hadibaia. Unuseniai printa masini badadia gaukaralaia dalana lau dibaia. Lau diba bema unai aonega be Betele murimurinai o kampani ta ai lau gaukaralaia, moni momo lau abia diba, to reana moale momokani do lau davaria lasi bona do lau wari momo. To lau diba Betele ai aonega namona lau abia bona lau ia durua Dirava lau hesiai henia totona. Unai bamona hahenamo be iunivesiti hereadaena ta ese ia henia diba lasi.”

Goada Ita Davaria Diba

Betele vadivadi henia karana ese ta ia durua diba Dirava tura henia karana ia habadaia totona. Mexico merona, Omar, be unai heduru ia abia. Ena sinana ese hereva momokani be ia dekenai ia hadibaia. To, ena mauri lagani be 17 neganai, kongrigeisen heboudia lao henia karana bona haroro gaukarana ia hadokoa. Ia ese kohu bona moni bada ia tahua matamaia. Nega ta, Omar be kampani ta dekenai ia gaukara neganai, ia bona ena turana haida be Mexico ena Betele dekenai idia lao, gaukara haida idia karaia totona. Omar ia gwau, “Emai gaukara ia ore murinai, ta ese Betele dekenai ai ia abia loaloa. Unuseniai tadikaka edia kara namodia lau itaia neganai, lau laloparara lauegu kara be namo lasi badina lau be Iehova amo lau daudau. Unai murinai, kongrigeisen heboudia lau lao matamaia bona Baibel stadi lau abia. Unai vadivadi negana ela bona hua siks murinai, bapatiso lau abia. Iehova lau tanikiu henia badina unai vadivadi karana amo lau ia durua egu mauri lau haidaua totona.”

Japan dekenai, Masahiko ena ruma bese be Witnes taudia. To, ia laloa Iehova ena Witnes oreana dekenai taravatu be momo. Bena hebou lao henia karana bona haroro gaukara ia hadokoa, to sikuli gaudia dekenai ena nega bona goada ia henia. Masahiko ia gwau, “Dina ta egu ruma bese taudia bona turadia haida idia ura Betele idia vadivadi henia. Lau be egu ruma bese edia noinoi dainai lau lao. Betele ai vadivadi henia neganai, Keristani taudia edia hebamo karana amo moale korikori lau mamia. Witnes lasi taudia lau bamoa negana, unai bamona moale lau abia lasi. Lau ura unai Witnes taudia edia mauri dalana lau badinaia, unai dainai ta lau noia lau ia stadi henia totona.” Hari, Masahiko be ena kongrigeisen dekenai ful-taim hesiai gaukarana ia karaia.

France taihu ta be Moscow dekenai ia lao moni gaukara ia karaia totona. Unuseniai Iehova ena Witnes taudia ia bamoa lasi dainai ia manoka. Kara dikadia ia karaia bona Witnes lasi tauna ta ia adavaia. Nega ta France taihu ta ese ia ia vadivadi henia, bona idia ruaosi be St. Petersburg dekenai Russia Betele idia vadivadi henia. Ia gwau, “Betele taudia ese ai idia welkam henia, bona unai ese egu lalona ia hagoadaia. Unuseniai maino ia noho. Lau mamia unuseniai Iehova ena lauma helaga ia noho. Iehova ena orea lau rakatania be abia hidi kererena. Betele lau vadivadi henia murinai, Iehova lau guriguri henia lau ia durua, lau goada lou bona Baibel amo egu natuna ruaosi lau hadibaia matamaia.” Unai manoka taihuna be ma haida edia heduru sibona ia abia lasi, to Betele vadivadi henia karana ese ia hagoadaia dainai orea lalonai ia goada lou.

To, Iehova ena Witnes edia gaukara idia diba lasi taudia be Betele idia vadivadi henia neganai, dahaka idia dibaia? Lagani 1988 ai, politik tauna ta, Alberto, be Brazil Betele ia vadivadi henia. Ia moalelaia gauna be, Betele ia goeva, kohu ibounai idia atoa namonamo, bona edia gaukara momo be ai itaia diba. Guna, Alberto be pris taudia edia noho gabuna dekenai ena nakimi ia vadivadi henia, ia be pris tauna ta. Alberto ese unai gabu bona Betele ena idau be inai bamona ia herevalaia: “Pris taudia edia gaukara momo ai itaia be taravatu.” Alberto be Betele ia vadivadi henia murinai, Baibel stadi ia abia dae, politik ia rakatania bona hari ia be kongrigeisen ena elda gaukara ia karaia.

Oi Mai!

Momo be gau haida idia karaia brens opesi idia vadivadi henia totona. Hegeregere, Brazil ai, Paulo bona Eugenia be lagani foa lalonai moni idia haboua, unai amo PMV ena davana idia karaia, dina rua lalonai kilomita 3,000 idia heau edia Betele idia vadivadi henia totona. Idia gwau, “Ena be moni ai negea bona gabu be daudau, to moale ai davaria. Hari, Iehova ena orea ena heau dalana ai lalopararalaia namonamo. Emai stadi taudia dekenai Betele ai herevalaia neganai, nega haida idia henanadai, Unuseniai oi lao vadaeni, a? Vadaeni ai haere diba, ‘Oibe.’ ”

Emu gabu dekenai brens opesi bona Betele rumana ta ia noho, a? Vadaeni, unai gabu oi vadivadi henia. Unuseniai oi do idia welkam henia bona namo do oi davaria.

[Picture on page 18]

Mario

[Picture on page 18]

Abel

[Picture on page 18]

Germany

[Picture on page 18]

Japan

[Picture on page 18]

Brazil