Dahaka Ia Vara Siahu Lohia Taudia Dekenai?

IDIA laloa namonamo taudia idia diba siahu lohia taudia idia noho be anina bada gauna. Bema siahu taudia edia lohia dalana be lasi, haraga herea taunimanima edia noho dalana be do ia kerere. Unai dainai, gavamani ena taravatu ia herevalaia France bukana hereana ta ia gwau: “Taunimanima edia orea iboudiai dekenai, kahana rua idia noho: hahegani idia henia taudia bona hahegani idia badinadia taudia, oda idia henia taudia bona oda idia hagugurua taudia, gunalaia taudia bona orea ena memba taudia, lohia taudia bona idia lohiadia taudia. . . . Taunimanima edia orea iboudiai dekenai ita itaia siahu lohia taudia idia noho.”a

To, Tanobada Ibounai Tuarina Iharuana negana amo taunimanima edia lalohadai siahu lohia taudia dekenai ia idau, bona lagani 1960 ia lao 1969 negana amo unai be momokani. France ena Encyclopædia Universalis bukana ese unai nega ia herevalaia, ia gwau unai be “dagi taudia bona siahu lohia taudia dadaraidia negana dikana.” Baibel idia stadilaia taudia idia hoa lasi unai kara ia vara neganai. Aposetolo Paulo ia peroveta, ia gwau: “Namona be oi diba, nega dokonai metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, . . . haida edia ladana do idia hadikaia kava, . . . do idia lebulebu, do idia dagedage, . . . Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi.”​—2 Timoteo 3:​1-4.

Siahu Lohia Taudia Idia Hekwarahi

Unai peroveta herevana ese iseda nega toana ia herevalaia maoro. Dala iboudiai dekenai taunimanima ese siahu lohia taudia idia gwau-edeede henidia toho​—ruma bese lalonai, sikuli ai, iunivesiti ai, bisinesi ai, hanua gavamani ai bona nesenel gavamani ai. Siahu lohia taudia matauraidia karana ia boio toana be inai daladia amo ia hedinarai: taunimanima edia lalohadai tatau bona hahine idia kara heheni dalana ai ia idau, rap miusik aukana, stiuden taudia idia gwau-edeede, union ese ia hamaorodia lasi to gaukara taudia idia straik, taunimanima ese gavamani idia gwau-edeede henia, bona taunimanima alaia mase dagedage karadia.

Paris dekenai, French Institute of Political Science bona Paris ena Le Monde niuspepa idia printaia taudia be hebou ta idia karaia, bona unuseniai Profesa Yves Mény ia gwau: “Edia siahu ena badina ia maoro neganai sibona, siahu lohia taudia idia noho diba.” Hari inai negai, siahu lohia taudia idia hekwarahi, badina taunimanima momo idia laloa unai siahu taudia idia lohia be maoro lasi. Anina be, idia laloa unai taudia edia gwaumaoro be lasi idia lohia totona. Unai kara idia tahua herevana ta amo ia hedinarai lagani 1980 ia lao 1985 neganai, United States taudia iboudiai amo 9 pesen, Australia taudia iboudiai amo 10 pesen, Britain taudia iboudiai amo 24 pesen, France taudia boudiai amo 26 pesen, bona India taudia iboudiai amo 41 pesen idia laloa edia gavamani ia lohia be maoro lasi.

Taunimanima ese mai Edia Gwaumaoro Siahu Lohia Taudia Idia Tahudia

Baibel ia gwau, matamana negana ai taunimanima be Dirava ena lohia siahu henunai idia noho. (Genese 1:​27, 28; 2:​16, 17) To, idau nega amo, mauri ena kara goeva dekenai taunimanima idia ura lasi Havaraia Tauna ena taravatu idia badinaia, to sibodia edia taravatu idia badinaia. (Genese 3:​1-6) Tiokratik dalana, eiava Dirava ena lohia dalana, idia dadaraia dainai, lohia daladia ma haida idia tahudia. (Kohelete 8:9) Haida be taunimanima doridia karana amo edia lohia siahuna idia hahedinaraia. Idia laloa, idia goada dainai idia lohia be maoro. Edia ura hegeregerena taunimanima ma haida idia doridia diba badina idia goada dainai, bona idia laloa unai sibona be hegeregere. To idia momo idia laloa namona be idia hahedinaraia edia lohia siahuna be mai ena gwaumaoro.

Gunaguna negadia amo, lohia taudia momo be unai bamona idia karaia totona, idia gwau idia be dirava eiava dirava edia amo siahu idia abia. Unai lalohadai koikoina amo taunimanima idia laloa “king dagina be helaga gauna.” Idaunegai Mesopotamia ena lohia taudia bona idaunegai Aigupito ena Farao taudia idia gwau idia be unai bamona dagi idia abia.

Alesana Badana, ia murinai idia lohia Greece pavapavadia, bona Roma pavapava badadia momo idia gwau idia danu be dirava bona idia ura taunimanima ese idia tomadiho henidia. Unai bamona lohia taudia edia lohia daladia idia gwauraidia “lohia tomadiho henidia.” Unai lohia dalana amo, ia hadareredia besedia idauidau taudia dekenai lohia tauna ena siahu ia hagoadaia. Lohia tauna tomadiho henia lasi karana idia gwauraia Gavamani inai henia karana. The Legacy of Rome bukana lalonai, Profesa Ernest Barker ia toretore, ia gwau: “[Roma] pavapavana be dirava ai idia halaoa dainai, bona dirava ta bamona taunimanima ese idia badinaia dainai, ia hedinarai unai be gavamani ena badina, eiava gavamani ese ia lohiadia orea idauidau ia hatamonadia gauna.”

Unai be momokani Pavapava Constantine (306-337 C.E. ai ia lohia) ese gavamani dekenai gwaumaoro ia henia “Keristen tomadihona” ia abia dae totona negana lalonai. Ena nega murinai danu, bona gabeai, Pavapava Theodosius Ginigunana (379-395 C.E. ai ia lohia) ese unai ia gwauraia Roma Gavamanina ena tomadiho. Unai ese “Keristen” pavapavadia haida be dirava hegeregeredia idia tomadiho henidia ela bona lagani 400 C.E. negana murinai.

“Siahu Rua,” “Tuari Kaia Rua”

Pope ena dagi ia goada ia lao neganai, Dubu Oreana bona Gavamani ihuanai idia noho hekwakwanai idia dika idia lao. Unai dainai, lagani 500 C.E. ia mai kahirakahira neganai, Pope Gelasius Ginigunana ese “siahu rua” ena taravatu ia gwauraia: pope taudia be edia siahu helagana amo idia lohia bona pavapava be lohia siahu amo idia lohia bona idia gaukara hebou​—pavapava be pope edia siahu henunai idia noho. Gabeai, unai taravatu be “tuari kaia rua” taravatuna ai ia lao: “Pope taudia be lauma dalana ai tuari kaia idia gaukaralaia, bona tanobada lohia taudia ese tuari kaia korikoridia idia gaukaralaidia, to tanobada lohia taudia be pope ese ia haganidia hegeregerena unai tuari kaia korikorina idia gaukaralaia diba.” (The New Encyclopædia Britannica) Unai hahegani dainai, lagani 500 ia lao 1500 C.E. bamona neganai, Katolik Oreana ia gwau ia be mai ena gwaumaoro pavapava bona king edia korona idia henidia totona, unai taudia edia siahu idia gwauraia dainai, idaunegai koikoi herevana “king dagina be helaga gauna” idia gwauraia noho.

To namo lasi ita laloa unai be pavapava ena lohia gwaumaorona, Dirava ena amo, hegeregerena. Unai lalohadai be gabeai ia matamaia, bona ena badina be politikol lohia taudia edia dala ia kehoa pope ena siahu henuna amo idia siri totona. Pavapava ena lohia gwaumaorona, Dirava ena amo, lalohadaina ia gwau, pavapava edia lohia siahuna be Roma ena pope ena amo lasi to Dirava ena amo ia mai. New Catholic Encyclopedia bukana ia gwau: “Pope be gavamani gunalaia taudia iboudiai dekenai, lauma dalana ai bona tanobada dalana ai edia siahu ia henidia noho neganai, pavapava ena lohia gwaumaorona, Dirava ena amo, lalohadaina dainai, bese idauidau edia pavapava be idia gwau, pope ena siahu hegeregerena edia siahu danu be Dirava ena amo ia mai.”b

Taunimanima ese Idia Abidia Hidi Dainai Idia Lohia Ena Koikoi Herevana

Nega ia lao noho lalonai, taunimanima be lohia daladia ma haida idia gwauraidia. Idia gwau dala ta be taunimanima ese gavamani idia abia hidi. Taunimanima momo idia laloa unai lalohadai be Greece dekenai ia vara. To idaunegai Greece ena demokratik gavamani be hanua haida sibona dekenai idia gaukaralaia, bona tatau sibodia be unai gavamani totona vouti idia henia diba. Hahine, hesiai taudia, bona unuseniai idia noho idau bese taudia idia vouti diba lasi​—taunimanima iboudiai amo idia be hanua taudia edia kahana tamona, eiava taunimanima 5 5 amo idia be 4 4. Ita gwau diba lasi unai gavamani be taunimanima ese idia abia hidi dainai ia lohia!

Taunimanima ese idia abidia hidi dainai idia lohia lalohadaina be daika ese ia havaraia? Ita hoa, badina lagani 500 ia lao 1500 C.E. neganai, Roman Katolik tomadihona idia stadilaia dubu taudia ese idia hamatamaia. Lagani 1200 ia lao 1299 C.E. neganai, Thomas Aquinas ia gwau, ena be Dirava ese lohia siahuna ia havaraia, to taunimanima ese unai siahu idia gaukaralaia. Unai lalohadai be taunimanima momo ese idia ura henia. New Catholic Encyclopedia ia gwau: “Lagani 1600 ia lao 1699 C.E. neganai, Katolik tomadihona idia stadilaia diba taudia momo idia abia dae lohia taudia edia siahu ena gwaumaoro be taunimanima edia amo ia mai.”

Unai tomadiho dekenai taunimanima be edia pope, bisop, eiava pris idia abidia hidi diba lasi, unai dainai, dahaka dainai unai dubu lalonai tomadiho idia stadilaia dubu taudia idia gwau lohia siahuna ena gwaumaoro be taunimanima edia amo ia mai? Badina Europe ena pavapava haida be pope ena siahu henunai idia noho dainai idia hesiku idia lao. Taunimanima ese idia abidia hidi lohiadia dekenai siahu idia henidia dainai, idia ura neganai pope be mai edia siahu pavapava ta eiava lohia ta idia kokia totona. Tanobada ena sivarai idia torea taudia Will bona Ariel Durant idia toretore, idia gwau: “Lohia edia siahu ena gwaumaoro be taunimanima amo idia abia ena lalohadai idia abia dae taudia be Jesuit taudia momo danu, idia laloa unai lalohadai amo pope ena siahu idia hagoadaia diba to tanobada lohiadia edia siahu idia hamanokaia diba. Kadinal Bellarmine ia gwau, bema pavapava edia siahu ena gwaumaoro be taunimanima edia amo ia mai, bena unai dainai pavapava be taunimanima edia ura hegeregeredia idia lohia, vadaeni, unai pavapava be pope edia siahu henunai idia noho . . . Spain ena Jesuit tauna ta, Luis Molina, ia gwau, lohia taudia edia siahu ena gwaumaoro be taunimanima edia amo ia mai dainai, ia kerere pavapavana ta idia kokia be maoro​—to namona be gaukara ibounai ia heau namonamo dala namona ai idia karaia.”

Pope ese unai “gaukara ibounai ia heau namonamo dala namona” ia gwauraia. Unai ia hamomokania totona, France ena Katolik bukana Histoire Universelle de l’Eglise Catholique ese Biographie universel bukana amo hereva ia abia, ena hereva be inai: “Bellarmine . . . ese ia hadibaia, ia gwau Katolik hahedibana ta be, taunimanima ese idia abidia hidi dainai lohia taudia be edia siahu idia abia, bona pope ese ia gwauraia negana sibona ai, taunimanima ese unai siahu idia henidia diba.” (Italiks be ai ese ai toredia.) Unai dainai, lohia taudia edia siahu ena gwaumaoro be taunimanima amo dainai pope ese ia gaukaralaia diba lohia taudia abia hidi dalana ia naria, bona ia ura neganai, ia kokidia diba. Vanegai, Katolik orea gunalaia taudia ese unai kara idia gaukaralaia, demokratik gavamanidia edia Katolik vouti taudia edia lalona idia ania totona.

Hari inai negai demokratik daladia ai, gavamani ia lohia ena maoro be “idia lohiadia taudia edia gwaumaoro amo idia abia.” To, unai be “idia lohiadia taudia momo edia gwaumaoro” sibona, bona vouti taudia momo be vouti karana idia hesikulaia dainai, bona politikol kara kereredia dainai, unai “taudia momo” be momokani taunimanima kahana maragina ta sibona. Hari inai negai, “idia lohiadia taudia edia gwaumaoro” ena anina be nega momo “idia lohiadia taudia ese lohia taudia idia abia dae kava, eiava koudia dalana be hekwarahi bada dainai, idia henia kava gwaumaorona.”

Bese be Gau Hereana Ena Koikoi Herevana

Gunaguna pope taudia ese unai koikoi herevana, king dagina be helaga gauna, idia gwauraia momo, to unai hereva ese edia dagi ia hadikaia badina unai hereva idia haidaua bena idia gwauraia, pavapava ena lohia gwaumaorona, Dirava ena amo. Unai hegeregerena, taunimanima ese idia abidia hidi dainai idia lohia ena koikoi herevana idia gwauraia momo, to gabeai unai hereva ese Katolik Oreana ia hadikaia. Lagani 1600 ia lao 1799 C.E. neganai, tanobada ena aonega taudia, hegeregere England ena Thomas Hobbes bona John Locke bona France tauna Jean-Jacques Rousseau, be unai lalohadai, taunimanima ese idia abidia hidi dainai idia lohia, idia stadilaia. Lohia taudia bona idia lohiaia taudia edia huanai ia vara “taunimanima edia kontraka” herevadia idia gwauraidia. Edia hereva be tomadiho stadilaia karana amo idia havaraia lasi, to “taunimanima edia mauri taravatudia” amo idia havaraia, bona unai lalohadai idauidau dainai Katolik Oreana bona pope dagina idia hadikadia lalohadai momo ia havaradia.

Rousseau ia mase negana sisina murinai, France dekenai Gavamani Gwau-edeede Henia Karana ia vara. Unai gwau-edeede karana dainai lohia taudia idia lohia ena gwaumaoro ena lalohadai haida idia boio, to lalohadai matamatana ta ia havaraia; bese be gau hereana unai. The New Encyclopædia Britannica bukana ia gwau: “France taudia idia gwau pavapava gwaumaorona, Dirava ena amo, be koikoi gauna; danu, dagi bada taudia be siahu idia abia, bona Roman Katolik Oreana be Gwaumaoro idauidau idia abia be kerere.” To, Britannica ia gwau, “Gavamani Gwau-edeede Henia Karana dainai, idia havaraia gauna matamatana, bese gavamanina unai, be goada bada gauna ai ia lao.” Unai “havaraia gauna matamatana” dainai gavamani gwau-edeede karana idia karaia taudia idia gaukara diba. Badina be dahaka?

Badina Rousseau ese ia gwauraia lohia dalana henunai, idia lohiadia taudia iboudiai ese edia lohia taudia abidia hidi dalana ai idia hereva diba. Unai dainai taunimanima iboudiai idia vouti diba ena demokratik dalana ia havaraia​—unai be France dekenai Gavamani Gwau-edeede Henia Karana idia gunalaia taudia idia ura henia lasi karana ta. Profesa Duverger ia gwauraia hedinarai, ia gwau: “Idia ura lasi unai do ia vara, unai dainai, idia koua totona, lagani 1789 ia lao 1791 dekenai, Taravatu Idia Karaia Ena Hebou taudia lalonai idia noho bisinesi siahu taudia ese bese be herea lalohadaina idia havaraia. Idia gwau unai taunimanima be ‘Bese,’ bona idia gwau ena kahana idauidau amo ia idau to ia be gau momokanina ta. Ena hereva idia gwauraia taudia amo, Bese sibona be mai ena gwaumaoro lohia siahuna ia gaukaralaia totona . . . Demokratik dalana bamona idia karaia, to bese be herea lalohadaina be demokratik dalana lasi, badina idia gaukaralaia kerere diba bona idia ura henia gavamani daladia idauidau dekenai gwaumaoro idia henia diba, unai amo tau tamona sibona be lohia siahuna ia abia diba.” (Italiks be ia ese ia torea.)

Taunimanima Edia Gaukara Ia Kwalimu Lasi

Bese Gavamanina be lohia siahuna ia abia be maoro lalohadaina idia abia dae dainai, bese abia isi karana ia havaraia. The New Encyclopædia Britannica bukana ia gwau: “Nega momo taunimanima idia laloa bese abia isi karana be idaunega amo ia vara karana; nega haida idia laloa kerere, idia laloa unai be politikol karadia dekenai hanaihanai idia karaia gauna. To, ita gwau diba America bona France dekenai idia vara gavamani gwau-edeede henia karadia lalodiai unai kara ena siahu be nega ginigunana ia hedinarai badabada.” Unai gavamani gwau-edeede henia karadia negana murinai, bese abia isi karana be America tanodia ai, Europe, Africa, bona Asia dekenai idia karaia momo. Bese abia isi karana dainai, idia gwau tuari dikadia idia karaia be maoro.

Britain ena sivarai ia torea tauna Arnold Toynbee ia toretore, ia gwau: “Iduhu Abia Isi karana be hegeregere botolo gunadia bona Bese abia isi momo karana be Demokratik uaina matamatana ia dika vadaeni gauna bamona idia atoa unai botolo lalodiai. . . . Demokratik dalana bona Iduhu Abia Isi Karana idia gaukaralaidia hebou neganai, ena siahu be bada herea, hari inai negai West Kahana Tanodia edia politikol karadia dekenai, to Demokratik dalana sibona ena siahu ena bada be unai bamona lasi.” Bese abia isi karana ese maino tanobadana ta ia havaraia lasi. Toynbee ia gwau: “Tomadiho edia Tuari murinai, nega sisina ia noho, bena Bese Abia Isi Tuari idia karaia; bona hari inai negai West Kahana Tanodia ai, tomadiho goadalaia mai lalo-dika ida karana bona bese abia isi mai lalo-dika ida karana be dala tamona ai idia hedinarai bona idia be gau dikana momokani tamona.”

Lohia taudia be inai koikoi daladia amo lohia daladia edia maoro idia hamomokania toho, idia lohiadia taudia dekenai: “king dagina be helaga gauna,” “pavapava gwaumaorona, Dirava ena amo,” “taunimanima ese idia abidia hidi dainai idia lohia,” bona “bese be gau hereana.” To, tanobada lohia taudia edia kara ita laloa vadaeni, bona Keristen tauna ese Solomon ena lalohadai danu do ia abia: “Taunimanima haida ese edia bamodia idia biagudia bona idia hahisidia.”​—Kohelete 8:9.

Politikol Gavamanina idia tomadiho henia lasi, to Keristen taudia ese Dirava idia tomadiho henia, bona idia diba ia sibona be lohia siahuna ena gwaumaoro ia henia be maoro. Idia danu be salamo torea tauna David bamona idia laloa, ia gwau: “Iehova e, goada bona siahu bona hairai bona kwalimu bona hereadae be oiemu; badina be gau iboudiai guba dekenai bona tanobada dekenai be oiemu. Iehova e, basileia be oiemu, oi be sibomu oi abia isi, oi be gau iboudiai edia kwarana.” (1 Sisiga 29:11) To, Dirava idia laloa bada dainai, tanobada lohia taudia bona lauma dalana ai idia lohia taudia idia matauraidia. Moale dekenai unai idia karaia dalana bona ena badina be murina sivarai rua dekenai do ita tahua.

[Footnotes]

[Picture on page 15]

Katolik Oreana ia gwau ia be mai ena gwaumaoro pavapava badadia bona king taudia edia korona ia henidia totona

[Picture Credit Line on page 15]

Consecration of Charlemagne: Bibliothèque Nationale, Paris