Siahu Taudia Matauraia Karana—Dahaka Dainai mai Anina Bada?

PULISI taudia be mai edia siahu iseda kohu idia henaoa taudia eiava iseda ruma bese taudia idia hadikaia toho taudia idia dogoatao totona, unai dainai taunimanima iboudiai idia moale, ani? Bona ita moale badina kota taudia be mai edia siahu kara dika taudia idia panisia totona bena unai amo taunimanima idia naria, ani?

Ma taunimanima durua gaudia haida, hegeregere dala hanamoa gaukarana, momoru kokia daladia, bona edukeisen​—⁠vaia gavamani ena siahu taudia ese idia haboua takisi monina amo davana idia karaia gaudia​—⁠ita laloa diba danu. Keristani taudia momokanidia idia diba vadaeni unai bamona siahu taudia idia matauraia be mai anina bada. To unai hemataurai ena hetoana be dahaka? Bona edena mauri daladia dekenai unai matauraia karana be mai anina?

Siahu Taudia Emu Gabu Dekenai

Baibel ese taunimanima ibounai, herevana idia be abidadama taudia o abidadama lasi taudia, ia hadibaia gavamani ena siahu taudia, edia gabu ena namo totona idia gaukara taudia, do idia matauraia. Keristani aposetolo Paulo ese unai gaudia be ena Roma tadikaka dekenai ia torea, bona ia gwauraia gaudia ita laloa be heduru gauna, unai be Roma 13:​1-7 lalonai ita davaria.

Paulo be Roma tauna ta, bona iena negai Roma be tanobada ena basileia badana. Lagani 56 C.E. bamona ai, Paulo ese ia torea revarevana ese Keristani taudia ia sisiba henia taunimanima vairanai haheitalai namona do idia hahedinaraia totona. Ia gwau: “Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.”

Unuseniai Paulo ia hahedinaraia, bema Dirava ese dala ia koua, taunimanima ese siahu do idia abia diba lasi. Unai dainai ita gwau diba Dirava ena palani lalonai gavamani ena siahu taudia be mai edia gaukara. Bona unai dainai “gavamani ena hereva idia kamonai henia lasi taudia be Dirava danu idia kamonai henia lasi.”

Gavamani ena siahu taudia ese kara namo idia karaia taudia idia hanamoa diba, to danu, idia be mai edia siahu kara dika taudia idia panisia totona. Kara dika idia karaia taudia be badina momo dainai unai taudia edia maoro, ‘kara dika ena davana idia henia diba’ ena maoro, dekenai idia gari, badina gavamani be “Dirava ena hesiai tauna” dainai unai bamona idia karaia.

Paulo be ena hereva dokonai ia gwau, “Unai dainai, gavamani mai ena siahu taudia do umui kamonai henidia, Dirava ena badu umui laloa dainai lasi, to badina be emui lalona dekenai umui diba dala maorona be unai. Takisi moni danu umui henia ena badina be unai. Badina be gavamani taudia ese gaukara davana idia abia be namo, Dirava ena gaukara do idia karaia diba totona.”

Takisi moni gaukaralaia dalana be gavamani taudia edia maduna, takisi moni ia henia tauna ena maduna lasi. Keristani tauna be kara momokani tauna dainai, lalona ena mamina namona ia dogoatao noho. Ia diba gavamani ena siahu taudia ia matauraia bona takisi moni ia henia neganai, ia ese ena noho gabuna ena namo ia habadaia sibona lasi, to danu ia be Dirava ena ura hegeregerena ia kara.

Ruma Bese Bona Siahu Taudia

Ruma bese lalonai siahu taudia be edena bamona? Ena mauri dinadia ginigunadia lalonai, beibi be ia do idia laloa totona do ia tai eiava boiboi. To mai ena aonega tamana o sinana ese beibi ena ura gaudia korikoridia do ia diba bona ena kara be beibi ena badu hegeregerena ia haidaua lasi. Natudia haida, idia bada neganai, be sibona edia ura idia karaia diba bona sibona edia dala idia abia hidi diba. Edia diba ia bada lasi dainai, kara dika o ma kerere haida lalonai idia vareai diba, bena edia ruma bese bona edia gabu taudia edia mauri idia hadikaia, siahu taudia momo idia diba namonamo hegeregerena.

Inai buka Children We Deserve ia torea hahinena, Rosalind Miles, ia gwau: “Tama sina ese natudia idia matahakani henia haraga lasi. Idia hamatamaia negana be natuna ia vara negana.” Bema matamana amo tama sina ese kara namo bona lalokau dalanai edia siahu idia gaukaralaia bona idia atoa taravatu idia badinaia hanaihanai, daudau lasi edia natudia ese unai siahu bona ia amo ia mai matahakani mai lalokauna do idia abia dae.

Baibel lalonai ruma bese dekenai siahu gaukaralaia herevadia momo idia noho. Aonega Herevadia bukana lalonai, aonega tauna Solomona ese Dirava idia gari henia tama sina be edia natudia vairanai do idia lalo-tamona herevana ia gwauraia, ia gwau: “Lauegu natuna e, oiemu tamana bona sinana, edia hadibaia hereva do oi kamonai henia.” (Aonega Herevadia 1:⁠8) Tama sina ese edia natudia vairanai unai bamona lalo-tamona karana idia hahedinaraia noho neganai, natudia be tama sina edia lalohadai bona ura do idia diba. Reana natudia ese tama eiava sina do idia gaukaralaia, ma ta ena ura do ia dadaraia totona bona idia sibona edia ura gauna do idia abia totona, to idia lalo-tamona tama sina edia siahu be matamata taudia ia naria gauna.

Baibel ese ia hahedinaraia tau ena maduna badana be ena natudia sibona lasi, to ena adavana danu be lauma dalanai do ia naria totona. Unai idia gwauraia kwara dagina. Unai kwara dagina be edena bamona do ia gaukaralaia? Paulo ese ia hahedinaraia Keriso be kongregesen ena kwarana hegeregerena tau be hahine ena kwarana. Bena Paulo be ma ia gwau: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:25) Tau ta ese Iesu ena haheitalai ia tohotohoa bona lalokau dalanai ena kwara dagina ia gaukaralaia neganai, ena hahine ese do ia “matauraia” bada. (Efeso 5:33) Unai bamona ruma bese lalonai idia noho natudia danu be do idia itaia haida ese Dirava amo siahu idia abia be mai anina bada bona idia do ia hagoadaia idia abia dae totona.​​—⁠Efeso 6:​1-3.

Edena dala ai adavana lasi tama o sina, edia adavana idia mase taudia danu, ese unai idia karaia diba? Herevana ta be tamana o sinana, to ia hahedinaraia diba Iehova Dirava bona Iesu Keriso edia siahu henunai ia hereva. Iesu be hanaihanai mai siahu ida ia hereva​—⁠ena tamana bona lauma helaga amo ia vara Baibel ena siahu henunai.​—⁠Mataio 4:​1-10; 7:29; Ioane 5:​19, 30; 8:⁠28.

Baibel lalonai mai anina bada hakaua herevadia momo idia noho, natudia ese idia davaria hekwakwanai idia herevalaia. Unai hakaua herevadia idia tahua bona idia badinaia neganai, tama eiava sina ese natudia dekenai mai lalokau bona heduru sisibana do ia henia diba. (Genese 6:22; Aonega Herevadia 13:20; Mataio 6:33; 1 Korinto 15:33; Filipi 4:​8, 9) Danu, tama sina ese natudia durua totona idia karaia Baibel idia herevalaia bukadia amo heduru idia abia bena edia natudia idia durua Baibel ena siahu matauraia karana amo idia abia namo idia laloa bada totona.a

Keristani Kongregesen Bona Siahu Taudia

“Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.” (Mataio 17:⁠5) Unai hereva, Iehova sibona ese ia gwauraia herevadia, ese idia hamomokania Iesu be Dirava ena siahu henunai ia hereva tauna. Ia gwauraia gaudia be Evanelia bukadia hani lalonai idia torea, idia ita itaia haraga diba.

Guba dekenai ia daekau gwauraia neganai, Iesu ese ena hahediba taudia ia hamaoroa: “Siahu ibounai guba dekenai bona tanobada dekenai be lau dekenai ia henia vadaeni.” (Mataio 28:18) Iesu be kongregesen ena kwarana dainai, tanobada dekenai ena murinai idia raka horoa taudia ia naria sibona lasi, to Pentekoste 33 C.E. ai lauma helaga ia bubua negana amo, ia ese idia ia gaukaralaia hereva momokani idia halasia “hesiai tauna mai ena kamonai, bona mai ena kara maoromaoro” oreana bamona. (Mataio 24:​45-47; Kara 2:​1-36) Unai ibounai ia hagugurua bona Keristani kongregesen ia hagoadaia totona dahaka ia karaia? “Atai dekenai ia daekau lao neganai, . . . harihari gaudia taunimanima dekenai ia henia.” (Efeso 4:⁠8) Unai “harihari gaudia taunimanima dekenai” be Keristani elda taudia, lauma helaga ese idia ia abia hidi bona siahu idia abia edia tadikaka edia namo be lauma dalanai idia naria totona.​—⁠Kara 20:⁠28.

Unai dainai Paulo ese sisiba ia henia: “Umui emui hakaua taudia gunadia do umui laloatao. Idia ese Dirava ena hereva umui dekenai idia hadibaia. Edia mauri dalana do umui laloa lou, bona edia abidadama kara hegeregerena do umui badinaia.” Unai abidadama taudia be Iesu ena aena gabudia dekenai idia raka dainai, ia be aonega karana bema edia abidadama ita tohotohoa. Bena Paulo be ma ia gwau: “Umui idia hakaua taudia do umui kamonai henia, bona edia hereva do umui badinaia [“hanaihanai umui laloatao idia ese siahu idia abia,” The Amplified Bible]. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.”​—⁠Heberu 13:​7, 17.

Dahaka ia vara bema unai hakaua herevana ita laloa bada lasi? Keristani kongregesen ginigunana lalonai haida be unai bamona idia karaia bona hereva momokani negea taudia ai idia lao. Baibel ia gwau Humenaio bona Pileto be haida edia abidadama hadikaia taudia bona edia anina lasi herevadia amo helaga gaudia idia hadikaia. Idia gwauraia herevana ta be toreisi lou ia vara vadaeni, lauma dalana ai eiava laulau dalana ai, bona unai dainai ma toreisi lou ta Dirava ena Basileia henunai do ia vara lasi.​—⁠2 Timoteo 2:​16-18, NW.

Siahu taudia ese heduru idia henia. Keristani elda taudia ese edia hereva idia hakoikoia diba, badina idia be Iesu ena gwaukau taudia dainai Baibel ena siahu idia gaukaralaia. (2 Timoteo 3:​16, 17) Hari inai negai unai be ia momokani Keristani kongregesen dekenai, Baibel ese ia gwauraia “hereva momokani ena du, bona hereva momokani ia gimaia maguna.” (1 Timoteo 3:15) Do idia naria namonamo hahediba koikoi herevadia ese “hereva momokani,” Baibel lalonai ita totona ia noho gauna, do idia hadikaia lasi totona.​—⁠2 Timoteo 1:​13, 14.

Tanobada dekenai siahu taudia matauraia karana ia boio noho lalonai, ita Keristani taudia ita lalo-parara iseda gabu dekenai, ruma bese lalonai, bona Keristani kongregesen lalonai haida ese siahu idia abia be iseda namo totona. Unai taudia matauraia karana be mai ena namo tauanina, hemami, bona lauma dalana dekenai. Unai Dirava amo siahu idia abia taudia ita abia dae bona matauraia amo, siahu bada taudia​—⁠Iehova Dirava bona Iesu Keriso​—⁠ese iseda namo idia naria bona unai amo namo ita abia ela bona hanaihanai.​—⁠Salamo 119:165; Heberu 12:⁠9.

[Footnote]

[Blurb on page 5]

Baibel lalonai ruma bese dekenai siahu gaukaralaia herevadia momo idia noho

[Picture on page 6]

Adavana lasi tama o sina be Iehova Dirava bona Iesu Keriso edia siahu henunai idia hereva

[Pictures on page 7]

Keristani taudia idia lalo-parara, ruma bese lalonai, Keristani kongregesen lalonai, bona edia gabu dekenai haida ese siahu idia abia be edia namo totona

[Picture Credit Line on page 4]

Photo by Josh Mathes, Collection of the Supreme Court of the United States