Emu Kudouna Dekenai Dika Do Oi Gwauatao
“Egu Tamana guba dekenai ia noho be unai bamona do ia karaia umui dekenai, bema umui ta ta emui kudouna dekenai emui tadikakana edia dika do umui gwauatao lasi.”—MATAIO 18:35.
1, 2. (a) Taunimanima momo ese ena kara dika idia diba hahinena ta be edena dala ai ia hahedinaraia Iesu ia laloa bada? (b) Unai dainai Iesu be dahaka ia gwau?
IA BE ariara hahinena ta, bona oi laloa ia be tomadiho goadalaia tauna ena ruma dekenai do oi davaria lasi. To unuseniai ia noho dainai bema haida idia hoa, reana ia karaia karana dainai idia hoa bada herea. Ia be kara maoromaoro tauna badana dekenai ia lao, bona ena matana ranu amo iena aena ia huria bona ena huina amo ia hakaukaua, unai amo ia hahedinaraia unai tauna ena gaukara ia laloa bada.
2 Unai tauna, Iesu, ese unai “ariara hahine” ia dadaraia lasi. To Farisea tauna Simona, unai ruma biaguna, ia laloa momo badina unai hahine be kara dika hahinena ta. Unai dainai Iesu ese tau tamona amo moni idia abitorehai taudia rua edia sivarai ia gwauraia. Ta ena abitorehai be bada—gaukara tauna ena lagani ibounai ena davana bamona. Tau ma ta ena abitorehai ena bada be unai tau ginigunana ena abitorehai ena kahana ten amo kahana ta—hua rua mai kahana ena davana bamona. Unai tau rua idia hegeregere lasi edia abitorehai ena davana idia karaia, bena heniatorehai tauna ese “idia ruaosi edia abiatorehai ia gwauatao.” Ia hedinarai goevagoeva, ena abitorehai badana idia gwauatao tauna ese lalokau ia hahedinaraia be mai badina namo hereana. Iesu ese unai sivarai be unai hahine ena kara namo ida ia hakapua murinai, inai hakaua herevana ia gwauraia: “Iena dika idia maragi sibona ia gwauatao tauna be, iena lalokau danu ia maragi.” Bena unai hahine ia hamaoroa: “Oiemu dika be lau gwauatao vadaeni.”—Luka 7:36-48.
3. Sibona dekenai edena bamona ita laloa be namo?
3 Mani sibona dekenai oi henanadai, ‘Bema lau be unai hahine eiava bema egu mauri lalonai unai bamona ia vara bona lau dekenai hebogahisi idia hahedinaraia, do lau lalo-auka bona ma haida edia dika do lau gwauatao lasi, a?’ Reana oi haere, ‘Unai bamona do lau karaia lasi!’ To, oi diba momokani vadaeni oiemu ura be dika gwauatao karana oi hahedinaraia, a? Unai be oiemu kara korikorina, a? Nega momo unai bamona oi karaia, bona ma haida ese oi idia gwauraia dika gwauatao tauna, a? Mani ita laloa dahaka dainai unai ita lalohadailaia namonamo be namo.
Ta ese Eda Dika Ia Gwauatao be Namo —Bona Ta ese Ia Gwauatao
4. Sibona dekenai dahaka ita diba bona abia dae be namo?
4 Oi be kara dika tauna, bona unai oi diba namonamo. Bema oi idia nanadaia, do oi gwau oibe, badina reana 1 Ioane 1:8 ena hereva oi laloatao, ia gwau: “Bema ita gwau ita kara dika lasi, ita sibona ita koia noho, bona hereva momokani be ita lalonai ia noho lasi.” (Roma 3:23; 5:12) Haida edia kara dika be reana kara dika badadia. To ena be oi be unai bamona kara dika badadia oi karaia lasi, nega momo bona dala momo ai Dirava ena taravatu oi badinaia lasi—oi kara dika. Unai be momokani, ani?
5. Dahaka dainai Dirava ita tanikiu henia be namo?
5 Unai dainai, reana oiemu mauri be aposetolo Paulo ia gwauraia bamona: “Guna umui ese kerere idauidau umui karaia, bona emui tauanina ena ura dikadia umui karaia. . . . To Dirava ese umui ia hamauria lou Keriso danu. Momokani, Dirava ese unai iseda dika ibounai ia gwauatao.” (Kolose 2:13; Efeso 2:1-3) Mani inai hereva oi laloa “iseda dika ibounai ia gwauatao.” Anina be bada herea. Ita ta ta be Davida bamona ita noinoi be mai badina namona, ia gwau: ‘Iehova e, oiemu ladana dainai, egu kara dika do oi gwauatao, badina egu kara dika be bada.’—Salamo 25:11.
6. Iehova bona dika gwauatao karana ita laloa neganai, dahaka ita diba momokani?
6 Dirava ese oiemu—eiava ita ta ta eda—dika be edena bamona ia gwauatao diba? Gau badana ta be, Iehova Dirava ia ura dika do ia gwauatao. Dika gwauatao karana be ena kara korikorina hegeregerena. (Esodo 34:6, 7; Salamo 86:5) Dirava ia ura ia dekenai ita guriguri bona ia ita noia ita ia hebogahisi henia, iseda dika ia gwauatao totona. (2 Sivarai 6:21; Salamo 103:3, 10, 14) Bona ia ese hahemaoro maoromaoro karana amo dika ia gwauatao diba dalana ia hegaegaelaia—Iesu ese ia henia mauri davalaia boubouna unai.—Roma 3:24; 1 Petero 1:18, 19; 1 Ioane 4:9, 14.
7. Edena dala ai oi ura Iehova oi tohotohoa be namo?
7 Namona be Dirava ese mai ena ura ida dika ia gwauatao karana oi laloa, unai amo taunimanima do oi kara henia dalana maorona oi itaia. Paulo ese unai ia hahedinaraia, ia gwau: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” (Efeso 4:32) Ita daradara lasi, Paulo ia ura Dirava ena haheitalai amo diba ita abia, badina murina sirina ai ia gwau: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.” (Efeso 5:1) Unai hereva rua ia hakapua dalana oi itaia, a? Iehova Dirava ese oiemu dika ia gwauatao, unai dainai—mai goada ida Paulo ia gwau—namona be oi ese Ia oi tohotohoa bona ma haida ‘do oi hebogahisi henia bona edia kara dika do oi gwauatao.’ To mani sibona dekenai oi henanadai, ‘Unai bamona lau karaia, a? Bema unai be vaia egu kara lasi, lau karaia toho, bona lau hekwarahi momokani dika gwauatao karana dekenai Dirava lau tohotohoa totona, a?’
Dika Gwauatao Karana Ita Habadaia be Gau Badana
8. Iseda kongregesen dekenai dahaka ita diba be namo?
8 Bema Keristani kongregesen lalonai, nega ta ta sibona Dirava ena kara bamona dika do ita gwauatao be mai badina, unai be namo herea. To mauri be unai bamona lasi. Momokani, iseda Keristani tadikaka bona taihu idia hekwarahi Iesu ia hahedinaraia lalokauna idia hahedinaraia totona. (Ioane 13:35; 15:12, 13; Galatia 6:2) Nega daudau idia hekwarahi, bona idia do hekwarahi noho, inai tanobada dikana hegeregerena idia laloa, hereva, bona kara lasi totona. Idia ura momokani mauri matamata idia badinaia. (Kolose 3:9, 10) To, ita gorea diba lasi gauna be, iseda tanobada ibounai oreana, bona kongregesen ta ta, lalonai idia noho taudia be goevadae lasi taudia. Momokani, edia kara idia hanamoa vadaeni, hari idia be guna bamona lasi, to idia be do goevadae lasi.
9, 10. Bema tadikaka edia huanai hekwakwanai idia vara, dahaka dainai ita hoa lasi?
9 Dirava ese Baibel lalonai ita ia hamaoroa kongregesen lalonai, iseda tadikaka bona taihu huanai, kara dikadia do idia vara diba. Hegeregere, Paulo ena hereva Kolose 3:13 dekenai mani oi laloa, ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu.”
10 Baibel ese unai siri ai ita ia hadibaia lou Dirava ese iseda dika ia gwauatao dainai iseda maduna be ma haida edia dika ita gwauatao. Dahaka dainai unai be mai ena hekwarahi? Paulo ia gwau ta ia maumau ena badina be reana ena bamona ese “ia kara dika henia dainai.” Ia lalo-parara unai bamona lalohisihisi karadia do idia vara. Unai be aposetolo taudia edia negai, “guba ena mauri namona” ena helaro idia abia Keristani “helaga taudia” (NW ) huanai idia vara. (Kolose 1:2, 5) Vadaeni, ita laloa diba hari inai nega, lauma helaga ese Keristani taudia momokanidia haida sibona be ‘Dirava ena taudia, ia lalokau henia, bona ia abia hidi’ taudia ia gwauraia negana, be ia idau, a? (Kolose 3:12) Unai dainai, namo lasi ita laloa iseda kongregesen be dika momokani bema idia vara gaudia dainai haida idia maumau—eiava badina korikoridia o idia laloa gaudia dainai idia lalohisihisi.
11. Hahediba tauna Iamesi ese ita dekenai dahaka ia hadibaia?
11 Iesu ena tadina Iamesi ena hereva ese ia hahedinaraia danu nega haida kara ta ia vara dainai iseda tadikaka edia dika do ita gwauatao be namo. “Sedira umui ta be mai ena aonega bona mai ena diba. Bema tau ta be inai bamona neganai, namona be iena aonega do ia hamomokania, iena mauri namona bona iena kara namodia dekena amo. . . . To umui emui lalona dekenai, bema mama, bona umui sibona habadaia kara idia noho neganai, . . . do umui heagilaia lasi, Dirava ena hereva momokani do umui hadikaia garina.” (Iamesi 3:13, 14) ‘Mama bona sibona habadaia karadia’ be Keristani taudia momokanidia huanai idia vara, a? Oibe, Iamesi ena hereva ese ia hahedinaraia goevagoeva Keristani taudia ginigunadia edia kongregesen lalonai unai bamona kara idia vara bona hari inai negai do idia vara danu.
12. Dahaka hekwakwanai be idaunegai Filipi kongregesen lalonai ia vara?
12 Haheitalai ta be Paulo ida idia gaukara goadagoada horoa Keristani hahinedia rua huanai ia vara gauna. Reana guna Euodia bona Sunutuke, Filipi kongregesen taudia, edia sivarai oi duahia dainai oi laloatao. Ena be Filipi 4:2, 3 ese ia vara gauna ena kahana iboudiai ia gwauraia lasi, to ia hahedinaraia idia huanai hekwakwanai ta ia vara. Unai hekwakwanai be laloa namonamo lasi herevana ta, varavara ta ena hemataurai lasi karana, eiava edia huanai ia noho mama karana dainai ia vara, a? Herevana ena badina be dahaka, to ia bada dainai Paulo be daudau herea, Roma dekenai, ia noho neganai unai sivarai ia kamonai. Reana unai Keristani taihu rua be idia hereva heheni lasi, hebou lalodiai idia hedavari heheni lasi eiava edia turadia dekenai ma ta idia gwauraia dika.
13. Euodia bona Sunutuke be reana dahaka idia karaia, bona unai dainai dahaka ita diba?
13 Unai bamona be hari oi itaia, emu kongregesen dekenai haida huanai eiava oi dekenai ia vara, a? Reana hari danu unai bamona hekwakwanai ia noho. Dahaka ita karaia diba? Unai idaunegai ia vara gauna lalonai, Paulo ese unai gwauhamata taihu ruaosi ia hagoadaia Lohiabada lalonai idia “laloa tamona be namo.” Reana idia gwau unai gauna do idia herevalaia, idia laloa kerere gaudia hamaoromaoroa totona, ma ta ena dika gwauatao totona edia ura do idia hahedinaraia, bena Iehova ese dika ia gwauatao bamona idia karaia. Ita laloa diba Euodia bona Sunutuke ese idia karaia, bona ita danu ita karaia diba. Unai bamona dika gwauatao karana be hari inai negai ita hahedinaraia namonamo diba.
Maino Oi Karaia—Dika Oi Gwauatao
14. Nega haida ita hegeregere hekwakwanai ita hanaia sibona ena badina be dahaka bona dahaka dainai unai be dala namo hereana?
14 Oi bona Keristani tauna ma ta huanai hekwakwanai ia vara neganai, ena dika oi gwauatao ena anina korikorina be dahaka? Momokani, dala haragana tamona ita gwauraia diba lasi, to Baibel ese haheitalai namodia bona namo idia havaraia heduru herevadia ia hahedinaraia. Ia gwauraia sisiba badana ta—reana oi abia dae bona badinaia be auka herevana—be unai dika do oi laloaboio, do oi hanaia sibona. Nega momo bema haida huanai hekwakwanai ia vara, Euodia bona Sunutuke huanai ia vara hegeregerena, idia ta ta idia laloa kerere be ma ta ese ia karaia. Unai dainai bema oi dekenai unai bamona ia vara, reana oi laloa kerere be unai Keristani tauna ma ta ena, eiava ia ese dika bada ia havaraia. To, oi ese dika gwauatao karana amo unai hekwakwanai oi haorea diba, a? Namona be oi lalo-parara, bema kerere ibounai be unai Keristani tauna ma ta ena, bona nega momo unai be momokani lasi, oi sibona ese dika gwauatao bona laloaboio karana amo unai hekwakwanai do oi hanaia diba.
15, 16. (a) Mika ese edena dala ai Iehova ia herevalaia? (b) Dirava ese ‘kara dika ia hanaia noho’ ena anina be dahaka?
15 Namona be Dirava ena haheitalai dika gwauatao karana dekenai ita laloaboio lasi. (Efeso 4:32–5:1) Ia ese dika ia laloaboio karana be peroveta tauna Mika ese ia herevalaia, ia gwau: “Lohiabada e, Dirava ta oi hegeregerena be ia noho lasi. Oi ese oiemu bese taudia, idia do mauri noho taudia, edia kara dika oi gwauatao [bona hanaia] noho. Oiemu badu ia noho hanaihanai lasi, to oi ura bada oiemu noho hanaihanai lalokauna ai dekenai do oi henia.”—Mika 7:18.
16 Baibel ia gwau Dirava ese ‘kara dika ia hanaia noho’ neganai, ia gwau lasi ena anina be Ia ese kerere ia laloatao diba lasi, ia gwau lasi ena laloatao karana be mai ena dika. Mani Samson bona Davida oi laloa, idia ruaosi be kara dika badadia idia karaia. Dirava ese edia kara dikadia be nega daudau murinai ia laloatao diba; ita danu be edia kerere haida ita diba badina Iehova ena ura be Baibel lalonai idia noho. To, iseda Dirava, dika gwauatao Diravana, ese idia ruaosi ia hebogahisi henia, bona ia gwau edia abidadama ita tohotohoa be namo.—Heberu 11:32; 12:1.
17. (a) Edena lalohadai ese ita ia durua bena ita hegeregere haida edia kara kerere do ita hanaia sibona? (b) Unai ita karaia toho neganai, edena dala ai Iehova ita tohotohoa? (Futnout itaia.)
17 Oibe, Iehova ese kara dika ia “gwauatao bona hanaia”a diba, Davida ese hanaihanai ia noia hegeregerena. (2 Samuela 12:13; 24:10) Dirava ena kara ita tohotohoa diba, bona ita hegeregere ita ida hesiai gaukara idia karaia kara dika taudia edia kara kerere ita hanaia sibona, a? Mani oi laloa oi be peleini badana ta lalonai oi noho bona peleini ia heau haraga do ia roho totona. Uindo amo oi itaia, peleini ia heau gabuna kahirakahira ai oi diba hahine ta ese hemataurai lasi dalanai ena malana ia hahedinaraia, natudia idia karaia bamona. Oi diba guna ia lalohisihisi bona reana unai kara be oi dekenai ia karaia. Eiava reana oi ia laloa lasi. To, peleini be ia daekau bona ataiai ia giroa neganai, unai hahine oi hanaia, bona hari ena toana be maragi momokani. Hora tamona murinai oi be kilomita handred momo oi heau vadaeni, bona ena hemataurai lasi karana be oi laloaboio vadaeni. Unai hegeregerena, bema Iehova bamona ta ena dika ita hanaia sibona, nega momo unai ese ita ia durua ena dika ita gwauatao totona. (Aonega Herevadia 19:11) Lagani 10 murinai eiava Keriso ena Lagani 1000 Lohia Negana ia matamaia bena lagani 200 murinai, unai dika ena toana be maragi momokani, ani? Namona be oi hanaia sibona, ani?
18. Bema ia vara dika ita rakatania diba lasi, edena sisiba ita badinaia diba?
18 To, nega haida, reana ia vara gauna dainai oi guriguri bona dika oi gwauatao toho, to mamina oi abia oi gwauatao diba lasi. Dahaka do oi karaia be namo? Iesu ia gwau unai ma ta dekenai do oi lao bona umui ruaosi ese emui hekwakwanai do umui hanaia toho, maino umui karaia totona. “Unai dainai, oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.”—Mataio 5:23, 24.
19. Iseda tadikaka ida maino ita tahua neganai, dahaka lalohadai ita abia dae bona dahaka ita abia dae lasi be namo?
19 Mani oi itaia, Iesu ia gwau lasi oiemu tadikaka dekenai do oi lao, oiemu maoro bona iena kerere oi hamomokania totona. Reana, ia kerere. To reana umui ruaosi umui kerere. Herevana daika ia kerere, to unai ma ta ese ena kerere ia gwauraia totona eiava oi vairanai sibona do ia hamaragia totona ia dekenai oi lao lasi. Bema ia ida oi herevahereva neganai oi ura gauna be unai bamona, anina namona do oi havaraia lasi. Danu, hekwakwanai ena badina korikorina eiava oi laloa gauna ena kahana iboudiai umui herevalaia totona ia dekenai oi lao lasi. Keristani lalokau dalanai umui herevahereva namonamo neganai, bema umui davaria umui lalo-pararalaia kerere gauna ta be emui hekwakwanai ena badina, umui ruaosi ese do umui hamaoromaoroa diba. To ena be umui herevahereva murinai danu, emui lalohadai unai gauna dekenai be tamona lasi, oi laloa hanaihanai emui lalohadai ia hegeregere momokani be gau badana, a? Bema umui ruaosi umui abia dae umui ta ta be umui ura iseda Dirava, dika gwauatao Diravana, umui hesiai henia mai momokani ida, unai danu be namo, ani? Bema unai lalohadai maorona umui abia dae, reana umui ta ta be mai emui kudouna ibounai ida umui gwau diba, “Lau sori ita be kara dika taudia dainai inai hepapahuahu ia vara. Mani, ita hanaia sibona be namo.”
20. Aposetolo taudia edia haheitalai amo dahaka ita dibaia diba?
20 Namona be oi laloatao aposetolo taudia huanai hepapahuahu idia vara danu, idia haida ese dagi bada idia ura abia neganai ia vara bamona. (Mareko 10:35-39; Luka 9:46; 22:24-26) Unai dainai idia noho namonamo lasi, reana idia lalohisihisi, eiava reana idia badu. To idia hegeregere unai bamona hepapahuahu idia hanaia sibona bona idia gaukara hebou. Idia ta be gabeai ia gwau: “Bema tau ta ese mauri ia ura henia, bona nega namodia ia ura itaia neganai, ia ese iena uduna do ia naria, hereva dika do ia gwauraia lasi. Bona hereva koikoi do ia gwauraia lasi, dika do ia rakatania, bona kara namo do ia karaia. Maino do ia tahua, bona maino ena dala do ia badinaia noho.”—1 Petero 3:10, 11.
21. Iesu ese dika gwauatao karana dekenai edena sisiba namona ia henia?
21 Ita gwauraia vadaeni herevana lalonai lalohadai ta be inai: Guna ita karaia dika momo be Dirava ese ia gwauatao vadaeni, unai dainai namona be ia ita tohotohoa bona iseda tadikaka edia dika ita gwauatao. (Salamo 103:12; Isaia 43:25) To unai hereva lalonai lalohadai ma ta ia noho. Iesu ese ia hahedinaraia gurigurina lalonai, ia gwau: “Bema taunimanima edia dika umui gwauatao neganai, emui Tamana, guba dekenai ia noho ese emui dika danu do ia gwauatao.” Lagani ta murinai, ena hahediba taudia dekenai guriguri dalana ia hadibaia neganai, unai hereva ena anina badana ia gwauraia lou, ia gwau: “Aiemai dika do oi gwauatao, badina be ai danu ese ai dekenai idia hadikaia taudia edia dika ai gwauatao.” (Mataio 6:12, 14; Luka 11:4) Bena, Iesu be dina haida sibona murinai do ia mase neganai, ia be ma ia gwau: “Umui guriguri gwauraia neganai, idia hadikaia umui taudia edia dika do umui gwauatao. Unai neganai umui emui gubai ia noho Tamana ese umui emui dika do ia gwauatao.”—Mareko 11:25.
22, 23. Bema mai eda ura ida ma haida edia dika ita gwauatao, ena anina iseda vaira negana dekenai be dahaka?
22 Oibe, Dirava ese iseda dika ia gwauatao noho totona gau badana be mai eda ura ida iseda tadikaka edia dika ita gwauatao. Keristani taudia huanai hekwakwanai ia vara neganai, namona be sibona dekenai oi gwau, ‘Tadikaka eiava taihu ta ese kara namona ta ia karaia lasi, hadikaia karana ta ia karaia, eiava ia be goevadae lasi dainai kerere ia karaia do lau hamomokania diba be anina lasi, to Dirava ese egu dika ia gwauatao be mai anina bada, ani?’ Haere be oi diba.
23 To, bema ia vara gauna be ita ia hahisia gauna maragina ta eiava hekwakwanai maragina ta sibona lasi, to kara badana ta be edena bamona? Bona edena negai Mataio 18:15-18 ai ia noho Iesu ena sisiba ita badinaia be maoro? Namona be unai gaudia do ita herevalaia.
[Footnote]
a Diba bada tauna ta ia gwau Mika 7:18 ai idia gaukaralaia Heberu herevana be “laolao tauna ena kara, ia ura lasi itaia gauna ta ia hanaia neganai ia karaia karana, amo ia mai. Unai hereva ese Dirava be kara dika ia itaia lasi eiava ia laloa kara dika be anina maragi o anina lasi lalohadaina ia hahedinaraia lasi, to ia hahedinaraia lalohadaina be, nega haida panisi henia totona kara dika ta ia makaia lasi; panisi ia henia lasi, to ia gwauatao.”—Gunalaia Taudia 3:26; 1 Samuela 16:8.
Oi Laloatao, A?
◻ Edena dala ai Iehova ese dika gwauatao karana ia haheitalaia?
◻ Kongregesen lalonai idia noho taudia dekenai dahaka do ita laloatao be namo?
◻ Nega momo, kara kereredia dekenai dahaka ita karaia be namo?
◻ Bema mai badina, iseda tadikaka ida maino be edena bamona ita karaia diba?
[Picture on page 15]
Oi bona Keristani tauna ta huanai hekwakwanai ta ia vara neganai, namona be oi hanaia toho; nega ia hanaia lalonai unai kara ena anina be ia maragi ia lao